ଗୀତଗୋଵିନ୍ଦଂ ଏକାଦଶଃ ସର୍ଗଃ - ସାନନ୍ଦ ଦାମୋଦରଃ

॥ ସାନନ୍ଦଦାମୋଦରଃ ॥
ସୁଚିରମନୁନଯନେ ପ୍ରୀଣଯିତ୍ଵା ମୃଗାକ୍ଷୀଂ ଗତଵତି କୃତଵେଶେ କେଶଵେ କୁଞ୍ଜଶଯ୍ଯାମ୍ ।
ରଚିତରୁଚିରଭୂଷାଂ ଦୃଷ୍ଟିମୋଷେ ପ୍ରଦୋଷେ ସ୍ଫୁରତି ନିରଵସାଦାଂ କାପି ରାଧାଂ ଜଗାଦ ॥ 59 ॥
॥ ଗୀତଂ 20 ॥
ଵିରଚିତଚାଟୁଵଚନରଚନଂ ଚରଣେ ରଚିତପ୍ରଣିପାତମ୍ ।
ସମ୍ପ୍ରତି ମଞ୍ଜୁଲଵଞ୍ଜୁଲସୀମନି କେଲିଶଯନମନୁଯାତମ୍ ॥
ମୁଗ୍ଧେ ମଧୁମଥନମନୁଗତମନୁସର ରାଧିକେ ॥ 1 ॥
ଘନଜଘନସ୍ତନଭାରଭରେ ଦରମନ୍ଥରଚରଣଵିହାରମ୍ ।
ମୁଖରିତମଣୀମଞ୍ଜୀରମୁପୈହି ଵିଧେହି ମରାଲଵିକାରମ୍ ॥ 2 ॥
ଶୃଣୁ ରମଣୀଯତରଂ ତରୁଣୀଜନମୋହନମଧୁପଵିରାଵମ୍ ।
କୁସୁମଶରାସନଶାସନବନ୍ଦିନି ପିକନିକରେ ଭଜ ଭାଵମ୍ ॥ 3 ॥
ଅନିଲତରଲକିସଲଯନିକରେଣ କରେଣ ଲତାନିକୁରମ୍ବମ୍ ।
ପ୍ରେରଣମିଵ କରଭୋରୁ କରୋତି ଗତିଂ ପ୍ରତିମୁଞ୍ଚ ଵିଲମ୍ବମ୍ ॥ 4 ॥
ସ୍ଫୁରିତମନଙ୍ଗତରଙ୍ଗଵଶାଦିଵ ସୂଚିତହରିପରିରମ୍ଭମ୍ ।
ପୃଚ୍ଛ ମନୋହରହାରଵିମଲଜଲଧାରମମୁଂ କୁଚକୁମ୍ଭମ୍ ॥ 5 ॥
ଅଧିଗତମଖିଲସଖୀଭିରିଦଂ ତଵ ଵପୁରପି ରତିରଣସଜ୍ଜମ୍ ।
ଚଣ୍ଡି ରସିତରଶନାରଵଡିଣ୍ଡିମମଭିସର ସରସମଲଜ୍ଜମ୍ ॥ 6 ॥
ସ୍ମରଶରସୁଭଗନଖେନ କରେଣ ସଖୀମଵଲମ୍ବ୍ଯ ସଲୀଲମ୍ ।
ଚଲ ଵଲଯକ୍ଵଣୀତୈରଵବୋଧଯ ହରମପି ନିଜଗତିଶୀଲମ୍ ॥ 7 ॥
ଶ୍ରୀଜଯଦେଵଭଣିତମଧରୀକୃତହାରମୁଦାସିତଵାମମ୍ ।
ହରିଵିନିହିତମନସାମଧିତିଷ୍ଠତୁ କଣ୍ଠତଟୀମଵିରାମମ୍ ॥ 8 ॥
ସା ମାଂ ଦ୍ରକ୍ଷ୍ଯତି ଵକ୍ଷ୍ଯତି ସ୍ମରକଥାଂ ପ୍ରତ୍ଯଙ୍ଗମାଲିଙ୍ଗନୈଃ ପ୍ରୀତିଂ ଯାସ୍ଯତି ରମ୍ଯତେ ସଖି ସମାଗତ୍ଯେତି ଚିନ୍ତାକୁଲଃ ।
ସ ତ୍ଵାଂ ପଶ୍ଯତି ଵେପତେ ପୁଲକଯତ୍ଯାନନ୍ଦତି ସ୍ଵିଦ୍ଯତି ପ୍ରତ୍ଯୁଦ୍ଗଚ୍ଛତି ମୂର୍ଚ୍ଛତି ସ୍ଥିରତମଃପୁଞ୍ଜେ ନିକୁଞ୍ଜେ ପ୍ରିଯଃ ॥ 60 ॥
ଅକ୍ଷ୍ଣୋର୍ନିକ୍ଷିପଦଞ୍ଜନଂ ଶ୍ରଵଣଯୋସ୍ତାପିଚ୍ଛଗୁଚ୍ଛାଵଲୀଂ ମୂର୍ଧ୍ନି ଶ୍ଯାମସରୋଜଦାମ କୁଚଯୋଃ କସ୍ତୂରିକାପାତ୍ରକମ୍ ।
ଧୂର୍ତାନାମଭିସାରସତ୍ଵରହୃଦାଂ ଵିଷ୍ଵଙ୍ନିକୁଞ୍ଜେ ସଖି ଧ୍ଵାନ୍ତଂ ନୀଲନିଚୋଲଚାରୁ ସଦୃଶାଂ ପ୍ରତ୍ଯଙ୍ଗମାଲିଙ୍ଗତି ॥ 61 ॥
କାଶ୍ମୀରଗୌରଵପୁଷାମଭିସାରିକାଣାଂ ଆବଦ୍ଧରେଖମଭିତୋ ରୁଚିମଞ୍ଜରୀଭିଃ ।
ଏତତ୍ତମାଲଦଲନୀଲତମଂ ତମିଶ୍ରଂ ତତ୍ପ୍ରେମହେମନିକଷୋପଲତାଂ ତନୋତି ॥ 62 ॥
ହାରାଵଲୀତରଲକାଞ୍ଚନକାଞ୍ଚିଦାମ-କେଯୂରକଙ୍କଣମଣିଦ୍ଯୁତିଦୀପିତସ୍ଯ ।
ଦ୍ଵାରେ ନିକୁଞ୍ଜନିଲଯସ୍ଯହରିଂ ନିରୀକ୍ଷ୍ଯ ଵ୍ରୀଡାଵତୀମଥ ସଖୀ ନିଜଗାହ ରାଧାମ୍ ॥ 63 ॥
॥ ଗୀତଂ 21 ॥
ମଞ୍ଜୁତରକୁଞ୍ଜତଲକେଲିସଦନେ ।
ଵିଲସ ରତିରଭସହସିତଵଦନେ ॥
ପ୍ରଵିଶ ରାଧେ ମାଧଵସମୀପମିହ ॥ 1 ॥
ନଵଭଵଦଶୋକଦଲଶଯନସାରେ ।
ଵିଲସ କୁଚକଲଶତରଲହାରେ ॥ 2 ॥
କୁସୁମଚଯରଚିତଶୁଚିଵାସଗେହେ ।
ଵିଲସ କୁସୁମସୁକୁମାରଦେହେ ॥ 3 ॥
ଚଲମଲଯଵନପଵନସୁରଭିଶୀତେ ।
ଵିଲସ ରସଵଲିତଲଲିତଗୀତେ ॥ 4 ॥
ମଧୁମୁଦିତମଧୁପକୁଲକଲିତରାଵେ ।
ଵିଲସ ମଦନରସସରସଭାଵେ ॥ 5 ॥
ମଧୁତରଲପିକନିକରନିନଦମୁଖରେ ।
ଵିଲସ ଦଶନରୁଚିରୁଚିରଶିଖରେ ॥ 6 ॥
ଵିତତ ବହୁଵଲ୍ଲିନଵପଲ୍ଲଵଘନେ ।
ଵିଲସ ଚିରମଲସପୀନଜଘନେ ॥ 7 ॥
ଵିହିତପଦ୍ମାଵତୀସୁଖସମାଜେ ।
ଭଣତି ଜଯଦେଵକଵିରାଜେ ॥ 8 ॥
ତ୍ଵାଂ ଚିତ୍ତେନ ଚିରଂ ଵହନ୍ନଯମତିଶ୍ରାନ୍ତୋ ଭୃଶଂ ତାପିତଃ କନ୍ଦର୍ପେଣ ତୁ ପାତୁମିଚ୍ଛତି ସୁଧାସମ୍ବାଧବିମ୍ବାଧରମ୍ ।
ଅସ୍ଯାଙ୍ଗଂ ତଦଲଙ୍କୁରୁ କ୍ଷଣମିହ ଭ୍ରୂକ୍ଷେପଲକ୍ଷ୍ମୀଲଵ-କ୍ରୀତେ ଦାସ ଇଵୋପସେଵିତପଦାମ୍ଭୋଜେ କୁତଃ ସମ୍ଭ୍ରମଃ ॥ 64 ॥
ସା ସସାଧ୍ଵସସାନନ୍ଦଂ ଗୋଵିନ୍ଦେ ଲୋଲଲୋଚନା ।
ସିଞ୍ଜାନମଞ୍ଜୁମଞ୍ଜୀରଂ ପ୍ରଵିଵେଶ ନିଵେଶନମ୍ ॥ 65 ॥
॥ ଗୀତଂ 22 ॥
ରାଧାଵଦନଵିଲୋକନଵିକସିତଵିଵିଧଵିକାରଵିଭଙ୍ଗମ୍ ।
ଜଲନିଧିମିଵ ଵିଧୁମଣ୍ଡଲଦର୍ଶନତରଲିତତୁଙ୍ଗତରଙ୍ଗମ୍ ॥
ହରିମେକରସଂ ଚିରମଭିଲଷିତଵିଲାସଂ ସା ଦଦାର୍ଶ ଗୁରୁହର୍ଷଵଶଂଵଦଵଦନମନଙ୍ଗନିଵାସମ୍ ॥ 1 ॥
ହାରମମଲତରତାରମୁରସି ଦଧତଂ ପରିରଭ୍ଯ ଵିଦୂରମ୍ ।
ସ୍ଫୁଟତରଫେନକଦମ୍ବକରମ୍ବିତମିଵ ଯମୁନାଜଲପୂରମ୍ ॥ 2 ॥
ଶ୍ଯାମଲମୃଦୁଲକଲେଵରମଣ୍ଡଲମଧିଗତଗୌରଦୁକୂଲମ୍ ।
ନୀଲନଲିନମିଵ ପୀତପରାଗପତଲଭରଵଲଯିତମୂଲମ୍ ॥ 3 ॥
ତରଲଦୃଗଞ୍ଚଲଚଲନମନୋହରଵଦନଜନିତରତିରାଗମ୍ ।
ସ୍ଫୁଟକମଲୋଦରଖେଲିତଖଞ୍ଜନଯୁଗମିଵ ଶରଦି ତଡାଗମ୍ ॥ 4 ॥
ଵଦନକମଲପରିଶୀଲନମିଲିତମିହିରସମକୁଣ୍ଡଲଶୋଭମ୍ ।
ସ୍ମିତରୁଚିରୁଚିରସମୁଲ୍ଲସିତାଧରପଲ୍ଲଵକୃତରତିଲୋଭମ୍ ॥ 5 ॥
ଶଶିକିରଣଚ୍ଛୁରିତୋଦରଜଲଧରସୁନ୍ଦରସକୁସୁମକେଶମ୍ ।
ତିମିରୋଦିତଵିଧୁମଣ୍ଦଲନିର୍ମଲମଲଯଜତିଲକନିଵେଶମ୍ ॥ 6 ॥
ଵିପୁଲପୁଲକଭରଦନ୍ତୁରିତଂ ରତିକେଲିକଲାଭିରଧୀରମ୍ ।
ମଣିଗଣକିରଣସମୂହସମୁଜ୍ଜ୍ଵଲଭୂଷଣସୁଭଗଶରୀରମ୍ ॥ 7 ॥
ଶ୍ରୀଜଯଦେଵଭଣିତଵିଭଵଦ୍ଵିଗୁଣୀକୃତଭୂଷଣଭାରମ୍ ।
ପ୍ରଣମତ ହୃଦି ସୁଚିରଂ ଵିନିଧାଯ ହରିଂ ସୁକୃତୋଦଯସାରମ୍ ॥ 8 ॥
ଅତିକ୍ରମ୍ଯାପାଙ୍ଗଂ ଶ୍ରଵଣପଥପର୍ଯନ୍ତଗମନ-ପ୍ରଯାସେନେଵାକ୍ଷ୍ଣୋସ୍ତରଲତରତାରଂ ପତିତଯୋଃ ।
ଇଦାନୀଂ ରାଧାଯାଃ ପ୍ରିଯତମସମାଲୋକସମଯେ ପପାତ ସ୍ଵେଦାମ୍ବୁପ୍ରସର ଇଵ ହର୍ଷାଶ୍ରୁନିକରଃ ॥ 66 ॥
ଭଵନ୍ତ୍ଯାସ୍ତଲ୍ପାନ୍ତଂ କୃତକପଟକଣ୍ଡୂତିପିହିତ-ସ୍ମିତଂ ଯାତେ ଗେହାଦ୍ବହିରଵହିତାଲୀପରିଜନେ ।
ପ୍ରିଯାସ୍ଯଂ ପଶ୍ଯନ୍ତ୍ଯାଃ ସ୍ମରଶରସମାକୂଲସୁଭଗଂ ସଲଜ୍ଜା ଲଜ୍ଜାପି ଵ୍ଯଗମଦିଵ ଦୂରଂ ମୃଗଦୃଶଃ ॥ 67 ॥