ଶ୍ରୀ ରାମ କଵଚମ୍

ଆଜାନୁବାହୁମରଵିନ୍ଦଦଲାଯତାକ୍ଷ-
-ମାଜନ୍ମଶୁଦ୍ଧରସହାସମୁଖପ୍ରସାଦମ୍ ।
ଶ୍ଯାମଂ ଗୃହୀତ ଶରଚାପମୁଦାରରୂପଂ
ରାମଂ ସରାମମଭିରାମମନୁସ୍ମରାମି ॥ 1 ॥
ଅସ୍ଯ ଶ୍ରୀରାମକଵଚସ୍ଯ ଅଗସ୍ତ୍ଯ ଋଷିଃ ଅନୁଷ୍ଟୁପ୍ ଛନ୍ଦଃ ସୀତାଲକ୍ଷ୍ମଣୋପେତଃ ଶ୍ରୀରାମଚନ୍ଦ୍ରୋ ଦେଵତା ଶ୍ରୀରାମଚନ୍ଦ୍ରପ୍ରସାଦସିଦ୍ଧ୍ଯର୍ଥେ ଜପେ ଵିନିଯୋଗଃ ।
ଅଥ ଧ୍ଯାନଂ
ନୀଲଜୀମୂତସଙ୍କାଶଂ ଵିଦ୍ଯୁଦ୍ଵର୍ଣାମ୍ବରାଵୃତମ୍ ।
କୋମଲାଙ୍ଗଂ ଵିଶାଲାକ୍ଷଂ ଯୁଵାନମତିସୁନ୍ଦରମ୍ ॥ 1 ॥
ସୀତାସୌମିତ୍ରିସହିତଂ ଜଟାମୁକୁଟଧାରିଣମ୍ ।
ସାସିତୂଣଧନୁର୍ବାଣପାଣିଂ ଦାନଵମର୍ଦନମ୍ ॥ 2 ॥
ଯଦା ଚୋରଭଯେ ରାଜଭଯେ ଶତ୍ରୁଭଯେ ତଥା ।
ଧ୍ଯାତ୍ଵା ରଘୁପତିଂ କ୍ରୁଦ୍ଧଂ କାଲାନଲସମପ୍ରଭମ୍ ॥ 3 ॥
ଚୀରକୃଷ୍ଣାଜିନଧରଂ ଭସ୍ମୋଦ୍ଧୂଲିତଵିଗ୍ରହମ୍ ।
ଆକର୍ଣାକୃଷ୍ଟଵିଶିଖକୋଦଣ୍ଡଭୁଜମଣ୍ଡିତମ୍ ॥ 4 ॥
ରଣେ ରିପୂନ୍ ରାଵଣାଦୀଂସ୍ତୀକ୍ଷ୍ଣମାର୍ଗଣଵୃଷ୍ଟିଭିଃ ।
ସଂହରନ୍ତଂ ମହାଵୀରମୁଗ୍ରମୈନ୍ଦ୍ରରଥସ୍ଥିତମ୍ ॥ 5 ॥
ଲକ୍ଷ୍ମଣାଦ୍ଯୈର୍ମହାଵୀରୈର୍ଵୃତଂ ହନୁମଦାଦିଭିଃ ।
ସୁଗ୍ରୀଵାଦ୍ଯୈର୍ମାହାଵୀରୈଃ ଶୈଲଵୃକ୍ଷକରୋଦ୍ଯତୈଃ ॥ 6 ॥
ଵେଗାତ୍କରାଲହୁଙ୍କାରୈର୍ଭୁଭୁକ୍କାରମହାରଵୈଃ ।
ନଦଦ୍ଭିଃ ପରିଵାଦଦ୍ଭିଃ ସମରେ ରାଵଣଂ ପ୍ରତି ॥ 7 ॥
ଶ୍ରୀରାମ ଶତ୍ରୁସଙ୍ଘାନ୍ମେ ହନ ମର୍ଦଯ ଖାଦଯ ।
ଭୂତପ୍ରେତପିଶାଚାଦୀନ୍ ଶ୍ରୀରାମାଶୁ ଵିନାଶଯ ॥ 8 ॥
ଏଵଂ ଧ୍ଯାତ୍ଵା ଜପେଦ୍ରାମକଵଚଂ ସିଦ୍ଧିଦାଯକମ୍ ।
ସୁତୀକ୍ଷ୍ଣ ଵଜ୍ରକଵଚଂ ଶୃଣୁ ଵକ୍ଷ୍ଯାମ୍ଯନୁତ୍ତମମ୍ ॥ 9 ॥
ଅଥ କଵଚମ୍
ଶ୍ରୀରାମଃ ପାତୁ ମେ ମୂର୍ଧ୍ନି ପୂର୍ଵେ ଚ ରଘୁଵଂଶଜଃ ।
ଦକ୍ଷିଣେ ମେ ରଘୁଵରଃ ପଶ୍ଚିମେ ପାତୁ ପାଵନଃ ॥ 10 ॥
ଉତ୍ତରେ ମେ ରଘୁପତିର୍ଭାଲଂ ଦଶରଥାତ୍ମଜଃ ।
ଭ୍ରୁଵୋର୍ଦୂର୍ଵାଦଲଶ୍ଯାମସ୍ତଯୋର୍ମଧ୍ଯେ ଜନାର୍ଦନଃ ॥ 11 ॥
ଶ୍ରୋତ୍ରଂ ମେ ପାତୁ ରାଜେନ୍ଦ୍ରୋ ଦୃଶୌ ରାଜୀଵଲୋଚନଃ ।
ଘ୍ରାଣଂ ମେ ପାତୁ ରାଜର୍ଷିର୍ଗଣ୍ଡୌ ମେ ଜାନକୀପତିଃ ॥ 12 ॥
କର୍ଣମୂଲେ ଖରଧ୍ଵଂସୀ ଭାଲଂ ମେ ରଘୁଵଲ୍ଲଭଃ ।
ଜିହ୍ଵାଂ ମେ ଵାକ୍ପତିଃ ପାତୁ ଦନ୍ତପଙ୍କ୍ତୀ ରଘୂତ୍ତମଃ ॥ 13 ॥
ଓଷ୍ଠୌ ଶ୍ରୀରାମଚନ୍ଦ୍ରୋ ମେ ମୁଖଂ ପାତୁ ପରାତ୍ପରଃ ।
କଣ୍ଠଂ ପାତୁ ଜଗଦ୍ଵନ୍ଦ୍ଯଃ ସ୍କନ୍ଧୌ ମେ ରାଵଣାନ୍ତକଃ ॥ 14 ॥
ଧନୁର୍ବାଣଧରଃ ପାତୁ ଭୁଜୌ ମେ ଵାଲିମର୍ଦନଃ ।
ସର୍ଵାଣ୍ଯଙ୍ଗୁଲିପର୍ଵାଣି ହସ୍ତୌ ମେ ରାକ୍ଷସାନ୍ତକଃ ॥ 15 ॥
ଵକ୍ଷୋ ମେ ପାତୁ କାକୁତ୍ସ୍ଥଃ ପାତୁ ମେ ହୃଦଯଂ ହରିଃ ।
ସ୍ତନୌ ସୀତାପତିଃ ପାତୁ ପାର୍ଶ୍ଵଂ ମେ ଜଗଦୀଶ୍ଵରଃ ॥ 16 ॥
ମଧ୍ଯଂ ମେ ପାତୁ ଲକ୍ଷ୍ମୀଶୋ ନାଭିଂ ମେ ରଘୁନାଯକଃ ।
କୌସଲ୍ଯେଯଃ କଟୀ ପାତୁ ପୃଷ୍ଠଂ ଦୁର୍ଗତିନାଶନଃ ॥ 17 ॥
ଗୁହ୍ଯଂ ପାତୁ ହୃଷୀକେଶଃ ସକ୍ଥିନୀ ସତ୍ଯଵିକ୍ରମଃ ।
ଊରୂ ଶାର୍ଙ୍ଗଧରଃ ପାତୁ ଜାନୁନୀ ହନୁମତ୍ପ୍ରିଯଃ ॥ 18 ॥
ଜଙ୍ଘେ ପାତୁ ଜଗଦ୍ଵ୍ଯାପୀ ପାଦୌ ମେ ତାଟକାନ୍ତକଃ ।
ସର୍ଵାଙ୍ଗଂ ପାତୁ ମେ ଵିଷ୍ଣୁଃ ସର୍ଵସନ୍ଧୀନନାମଯଃ ॥ 19 ॥
ଜ୍ଞାନେନ୍ଦ୍ରିଯାଣି ପ୍ରାଣାଦୀନ୍ ପାତୁ ମେ ମଧୁସୂଦନଃ ।
ପାତୁ ଶ୍ରୀରାମଭଦ୍ରୋ ମେ ଶବ୍ଦାଦୀନ୍ଵିଷଯାନପି ॥ 20 ॥
ଦ୍ଵିପଦାଦୀନି ଭୂତାନି ମତ୍ସମ୍ବନ୍ଧୀନି ଯାନି ଚ ।
ଜାମଦଗ୍ନ୍ଯମହାଦର୍ପଦଲନଃ ପାତୁ ତାନି ମେ ॥ 21 ॥
ସୌମିତ୍ରିପୂର୍ଵଜଃ ପାତୁ ଵାଗାଦୀନୀନ୍ଦ୍ରିଯାଣି ଚ ।
ରୋମାଙ୍କୁରାଣ୍ଯଶେଷାଣି ପାତୁ ସୁଗ୍ରୀଵରାଜ୍ଯଦଃ ॥ 22 ॥
ଵାଙ୍ମନୋବୁଦ୍ଧ୍ଯହଙ୍କାରୈର୍ଜ୍ଞାନାଜ୍ଞାନକୃତାନି ଚ ।
ଜନ୍ମାନ୍ତରକୃତାନୀହ ପାପାନି ଵିଵିଧାନି ଚ ॥ 23 ॥
ତାନି ସର୍ଵାଣି ଦଗ୍ଧ୍ଵାଶୁ ହରକୋଦଣ୍ଡଖଣ୍ଡନଃ ।
ପାତୁ ମାଂ ସର୍ଵତୋ ରାମଃ ଶାର୍ଙ୍ଗବାଣଧରଃ ସଦା ॥ 24 ॥