ତ୍ରିସୁପର୍ଣମ୍

(ତୈ-ଆ-10-38ଃ40)
ଓ-ମ୍ବ୍ରହ୍ମ॑ମେତୁ॒ ମାମ୍ । ମଧୁ॑ମେତୁ॒ ମାମ୍ ।
ବ୍ରହ୍ମ॑ମେ॒ଵ ମଧୁ॑ମେତୁ॒ ମାମ୍ ।
ଯାସ୍ତେ॑ ସୋମ ପ୍ର॒ଜା ଵ॒ଥ୍ସୋ-ଽଭି॒ ସୋ ଅ॒ହମ୍ ।
ଦୁଷ୍ଷ୍ଵ॑ପ୍ନ॒ହନ୍ଦୁ॑ରୁଷ୍ଵ॒ହ ।
ଯାସ୍ତେ॑ ସୋମ ପ୍ରା॒ଣାଗ୍ଂସ୍ତାଞ୍ଜୁ॑ହୋମି ।
ତ୍ରିସୁ॑ପର୍ଣ॒ମଯା॑ଚିତ-ମ୍ବ୍ରାହ୍ମ॒ଣାଯ॑ ଦଦ୍ଯାତ୍ ।
ବ୍ର॒ହ୍ମ॒ହ॒ତ୍ଯାଂ-ଵାଁ ଏ॒ତେ ଘ୍ନ॑ନ୍ତି ।
ଯେ ବ୍ରା᳚ହ୍ମ॒ଣାସ୍ତ୍ରିସୁ॑ପର୍ଣ॒-ମ୍ପଠ॑ନ୍ତି ।
ତେ ସୋମ॒-ମ୍ପ୍ରାପ୍ନୁ॑ଵନ୍ତି ।
ଆ॒ସ॒ହ॒ସ୍ରାତ୍ପ॒ଙ୍କ୍ତି-ମ୍ପୁନ॑ନ୍ତି ।
ଓମ୍ ॥ 1

ବ୍ରହ୍ମ॑ ମେ॒ଧଯା᳚ ।
ମଧୁ॑ ମେ॒ଧଯା᳚ ।
ବ୍ରହ୍ମ॑ମେ॒ଵ ମଧୁ॑ ମେ॒ଧଯା᳚ ।
ଅ॒ଦ୍ଯା ନୋ॑ ଦେଵ ସଵିତଃ ପ୍ର॒ଜାଵ॑ତ୍ସାଵୀ॒ସ୍ସୌଭ॑ଗମ୍ ।
ପରା॑ ଦୁ॒ଷ୍ଵପ୍ନି॑ଯଗ୍ଂ ସୁଵ ।
ଵିଶ୍ଵା॑ନି ଦେଵ ସଵିତର୍ଦୁରି॒ତାନି॒ ପରା॑ସୁଵ ।
ଯଦ୍ଭ॒ଦ୍ର-ନ୍ତନ୍ମ॒ ଆସୁ॑ଵ ।
ମଧୁ॒ ଵାତା॑ ଋତାଯ॒ତେ ମଧୁ॑ କ୍ଷରନ୍ତି॒ ସିନ୍ଧ॑ଵଃ ।
ମାଧ୍ଵୀ᳚ର୍ନସ୍ସ॒ନ୍ତ୍ଵୋଷ॑ଧୀଃ ।
ମଧୁ॒ ନକ୍ତ॑ମୁ॒ତୋଷସି॒ ମଧୁ॑ମ॒ତ୍ପାର୍ଥି॑ଵ॒ଗ୍ଂ॒ ରଜଃ॑ ।
ମଧୁ॒ ଦ୍ଯୌର॑ସ୍ତୁ ନଃ ପି॒ତା ।
ମଧୁ॑ ମାନ୍ନୋ॒ ଵନ॒ସ୍ପତି॒ର୍ମଧୁ॑ମାଗ୍ଂ ଅସ୍ତୁ॒ ସୂର୍ଯଃ॑ ।
ମାଧ୍ଵୀ॒ର୍ଗାଵୋ॑ ଭଵନ୍ତୁ ନଃ ।
ଯ ଇ॒ମ-ନ୍ତ୍ରିସୁ॑ପର୍ଣ॒ମଯା॑ଚିତ-ମ୍ବ୍ରାହ୍ମ॒ଣାଯ॑ ଦଦ୍ଯାତ୍ ।
ଭ୍ରୂ॒ଣ॒ହ॒ତ୍ଯାଂ-ଵାଁ ଏ॒ତେ ଘ୍ନ॑ନ୍ତି ।
ଯେ ବ୍ରା᳚ହ୍ମ॒ଣାସ୍ତ୍ରିସୁ॑ପର୍ଣ॒-ମ୍ପଠ॑ନ୍ତି ।
ତେ ସୋମ॒-ମ୍ପ୍ରାପ୍ନୁ॑ଵନ୍ତି ।
ଆ॒ସ॒ହ॒ସ୍ରାତ୍ପ॒ଙ୍କ୍ତି-ମ୍ପୁନ॑ନ୍ତି ।
ଓମ୍ ॥ 2

ବ୍ରହ୍ମ॑ ମେ॒ଧଵା᳚ ।
ମଧୁ॑ ମେ॒ଧଵା᳚ ।
ବ୍ରହ୍ମ॑ମେ॒ଵ ମଧୁ॑ ମେ॒ଧଵା᳚ ।
ବ୍ର॒ହ୍ମା ଦେ॒ଵାନା᳚-ମ୍ପଦ॒ଵୀଃ କ॑ଵୀ॒ନାମୃଷି॒ର୍ଵିପ୍ରା॑ଣା-ମ୍ମହି॒ଷୋ ମୃ॒ଗାଣା᳚ମ୍ ।
ଶ୍ଯେ॒ନୋ ଗୃଦ୍ଧ୍ରା॑ଣା॒ଗ୍ଂ॒ ସ୍ଵଧି॑ତି॒ର୍ଵନା॑ନା॒ଗ୍ଂ॒ ସୋମଃ॑ ପ॒ଵିତ୍ର॒ମତ୍ଯେ॑ତି॒ ରେଭନ୍ନ୍॑ ।
ହ॒ଗ୍ଂ॒ସଶ୍ଶୁ॑ଚି॒ଷଦ୍ଵସୁ॑ରନ୍ତରିକ୍ଷ॒ସଦ୍ଧୋତା॑ ଵେଦି॒ଷଦତି॑ଥିର୍ଦୁରୋଣ॒ସତ୍ ।
ନୃ॒ଷଦ୍ଵ॑ର॒ସଦୃ॑ତ॒ସଦ୍ଵ୍ଯୋ॑ମ॒ସଦ॒ବ୍ଜା ଗୋ॒ଜା ଋ॑ତ॒ଜା ଅ॑ଦ୍ରି॒ଜା ଋ॒ତ-ମ୍ବୃ॒ହତ୍ ।
ଋ॒ଚେ ତ୍ଵା॑ ରୁ॒ଚେ ତ୍ଵା॒ ସମିତ୍ସ୍ର॑ଵନ୍ତି ସ॒ରିତୋ॒ ନ ଧେନାଃ᳚ ।
ଅ॒ନ୍ତର୍​ହୃ॒ଦା ମନ॑ସା ପୂ॒ଯମା॑ନାଃ ।
ଘୃ॒ତସ୍ଯ॒ ଧାରା॑ ଅ॒ଭିଚା॑କଶୀମି ।
ହି॒ର॒ଣ୍ଯଯୋ॑ ଵେତ॒ସୋ ମଦ୍ଧ୍ଯ॑ ଆସାମ୍ ।
ତସ୍ମି᳚ନ୍​ଥ୍ସୁପ॒ର୍ଣୋ ମ॑ଧୁ॒କୃ-ତ୍କୁ॑ଲା॒ଯୀ ଭଜ॑ନ୍ନାସ୍ତେ॒ ମଧୁ॑ ଦେ॒ଵତା᳚ଭ୍ଯଃ ।
ତସ୍ଯା॑ସତେ॒ ହର॑ଯସ୍ସ॒ପ୍ତ ତୀରେ᳚ ସ୍ଵ॒ଧା-ନ୍ଦୁହା॑ନା ଅ॒ମୃତ॑ସ୍ଯ॒ ଧାରା᳚ମ୍ ।
ଯ ଇ॒ଦ-ନ୍ତ୍ରିସୁ॑ପର୍ଣ॒ମଯା॑ଚିତ-ମ୍ବ୍ରାହ୍ମ॒ଣାଯ॑ ଦଦ୍ଯାତ୍ ।
ଵୀ॒ର॒ହ॒ତ୍ଯାଂ-ଵାଁ ଏ॒ତେ ଘ୍ନନ୍ତି ।
ଯେ ବ୍ରା᳚ହ୍ମ॒ଣାସ୍ତ୍ରିସୁ॑ପର୍ଣ॒-ମ୍ପଠ॑ନ୍ତି ।
ତେ ସୋମ॒-ମ୍ପ୍ରାପ୍ନୁ॑ଵନ୍ତି ।
ଆ॒ସ॒ହ॒ସ୍ରାତ୍ପ॒ଙ୍କ୍ତି-ମ୍ପୁନ॑ନ୍ତି ।
ଓମ୍ ॥ 3
ଓଁ ଶାନ୍ତି॒-ଶ୍ଶାନ୍ତି॒-ଶ୍ଶାନ୍ତିଃ॑ ॥