তৈত্তিরীয উপনিষদ্ - শীক্ষাবল্লী

ইতি প্রথমো-ঽনুবাকঃ ॥ শীক্ষাং-ব্যাঁ᳚খ্যাস্যা॒মঃ । বর্ণ॒স্স্বরঃ । মাত্রা॒ বলম্ । সাম॑ সন্তা॒নঃ । ইত্যুক্তশ্শী᳚ক্ষাধ্যা॒যঃ ॥ 1 ॥ ইতি দ্বিতীযো-ঽনুবাকঃ ॥ স॒হ নৌ॒ যশঃ । স॒হ নৌ ব্র॑হ্মব॒র্চসম্ । অথাতস্সগ্ংহিতাযা উপনিষদং-ব্যাঁ᳚খ্যাস্যা॒মঃ । পঞ্চস্বধিক॑রণে॒ষু । অধিলোকমধিজ্যৌতিষমধিবিদ্যমধিপ্রজ॑মধ্যা॒ত্মম্ । তা মহাসগ্ংহিতা ই॑ত্যাচ॒ক্ষতে । অথা॑ধিলো॒কম্ । পৃথিবী পূ᳚র্বরূ॒পম্ । দ্যৌরুত্ত॑ররূ॒পম্ । আকা॑শস্স॒ন্ধিঃ ॥ 1 ॥ বাযু॑স্সন্ধা॒নম্ । ইত্য॑ধিলো॒কম্ । অথা॑ধিজ্যৌ॒তিষম্ । অগ্নিঃ পূ᳚র্বরূ॒পম্ । আদিত্য উত্ত॑ররূ॒পম্ । আ॑পস্স॒ন্ধিঃ । বৈদ্যুত॑স্সন্ধা॒নম্ । ইত্য॑ধিজ্যৌ॒তিষম্ । অথা॑ধিবি॒দ্যম্ । আচার্যঃ পূ᳚র্বরূ॒পম্ ॥ 2 ॥ অন্তেবাস্যুত্ত॑ররূ॒পম্ । বি॑দ্যা স॒ন্ধিঃ । প্রবচনগ্ং॑ সন্ধা॒নম্ । ইত্য॑ধিবি॒দ্যম্ । অথাধি॒প্রজম্ । মাতা পূ᳚র্বরূ॒পম্ । পিতোত্ত॑ররূ॒পম্ । প্র॑জা স॒ন্ধিঃ । প্রজননগ্ং॑ সন্ধা॒নম্ । ইত্যধি॒প্রজম্ ॥ 3 ॥ অথাধ্যা॒ত্মম্ । অধরা হনুঃ পূ᳚র্বরূ॒পম্ । উত্তরা হনুরুত্ত॑ররূ॒পম্ । বাক্স॒ন্ধিঃ । জিহ্বা॑ সন্ধা॒নম্ । ইত্যধ্যা॒ত্মম্ । ইতীমা ম॑হাস॒গ্ং॒হিতাঃ । য এবমেতা মহাসগ্ংহিতা ব্যাখ্যা॑তা বে॒দ । সন্ধীযতে প্রজ॑যা প॒শুভিঃ । ব্রহ্মবর্চসেনান্নাদ্যেন সুবর্গ্যেণ॑ লোকে॒ন ॥ 4 ॥ ইতি তৃতীযো-ঽনুবাকঃ ॥ যশ্ছন্দ॑সামৃষ॒ভো বি॒শ্বরূ॑পঃ । ছন্দো॒ভ্যো-ঽধ্য॒মৃতা᳚থ্স-ম্ব॒ভূব॑ । স মেন্দ্রো॑ মে॒ধযা᳚ স্পৃণোতু । অ॒মৃত॑স্য দেব॒ ধার॑ণো ভূযাসম্ । শরী॑র-ম্মে॒ বিচ॑র্​ষণম্ । জি॒হ্বা মে॒ মধু॑মত্তমা । কর্ণা᳚ভ্যা-ম্ভূরি॒ বিশ্রু॑বম্ । ব্রহ্ম॑ণঃ কো॒শো॑-ঽসি মে॒ধযা-ঽপি॑হিতঃ । শ্রু॒ত-ম্মে॑ গোপায । আ॒বহ॑ন্তী বিতন্বা॒না ॥ 1 ॥ কু॒র্বা॒ণা চীর॑মা॒ত্মনঃ॑ । বাসাগ্ং॑সি॒ মম॒ গাব॑শ্চ । অ॒ন্ন॒পা॒নে চ॑ সর্ব॒দা । ততো॑ মে॒ শ্রিয॒মাব॑হ । লো॒ম॒শা-ম্প॒শুভি॑স্স॒হ স্বাহা᳚ । আমা॑ যন্তু ব্রহ্মচা॒রিণ॒স্স্বাহা᳚ । বিমা॑-ঽঽযন্তু ব্রহ্মচা॒রিণ॒স্স্বাহা᳚ । প্রমা॑-ঽঽযন্তু ব্রহ্মচা॒রিণ॒স্স্বাহা᳚ । দমা॑যন্তু ব্রহ্মচা॒রিণ॒স্স্বাহা᳚ । শমা॑যন্তু ব্রহ্মচা॒রিণ॒স্স্বাহা᳚ ॥ 2 ॥ যশো॒ জনে॑-ঽসানি॒ স্বাহা᳚ । শ্রেযা॒ন্বস্য॑সো-ঽসানি॒ স্বাহা᳚ । ত-ন্ত্বা॑ ভগ॒ প্রবি॑শানি॒ স্বাহা᳚ । স মা॑ ভগ॒ প্রবি॑শ॒ স্বাহা᳚ । তস্মিন্᳚-থ্স॒হস্র॑শাখে । নিভ॑গা॒হ-ন্ত্বযি॑ মৃজে॒ স্বাহা᳚ । যথা-ঽঽপঃ॒ প্রব॑তা॒-ঽঽযন্তি॑ । যথা॒ মাসা॑ অহর্জ॒রম্ । এ॒ব-ম্মা-ম্ব্র॑হ্মচা॒রিণঃ॑ । ধাত॒রায॑ন্তু স॒র্বত॒স্স্বাহা᳚ । প্র॒তি॒বে॒শো॑-ঽসি॒ প্রমা॑ভাহি॒ প্রমা॑পদ্যস্ব ॥ 3 ॥ ইতি চতুর্থো-ঽনুবাকঃ ॥ ভূর্ভুব॒স্সুব॒রিতি॒ বা এ॒তাস্তি॒স্রো ব্যাহৃ॑তযঃ । তাসা॑মুহস্মৈ॒ তা-ঞ্চ॑তু॒র্থীম্ । মাহা॑চমস্যঃ॒ প্রবে॑দযতে । মহ॒ ইতি॑ । তদ্ব্রহ্ম॑ । স আ॒ত্মা । অঙ্গা᳚ন্য॒ন্যা দে॒বতাঃ᳚ । ভূরিতি॒ বা অ॒যং-লোঁ॒কঃ । ভুব॒ ইত্য॒ন্তরি॑ক্ষম্ । সুব॒রিত্য॒সৌ লো॒কঃ ॥ 1 ॥ মহ॒ ইত্যা॑দি॒ত্যঃ । আ॒দি॒ত্যেন॒ বাব সর্বে॑ লো॒কা মহী॑যন্তে । ভূরিতি॒ বা অ॒গ্নিঃ । ভুব॒ ইতি॑ বা॒যুঃ । সুব॒রিত্যা॑দি॒ত্যঃ । মহ॒ ইতি॑ চ॒ন্দ্রমাঃ᳚ । চ॒ন্দ্রম॑সা॒ বাব সর্বা॑ণি॒ জ্যোতীগ্ং॑ষি॒ মহী॑যন্তে । ভূরিতি॒ বা ঋচঃ॑ । ভুব॒ ইতি॒ সামা॑নি । সুব॒রিতি॒ যজূগ্ং॑ষি ॥ 2 ॥ মহ॒ ইতি॒ ব্রহ্ম॑ । ব্রহ্ম॑ণা॒ বাব সর্বে॑ বে॒দা মহী॑যন্তে । ভূরিতি॒ বৈ প্রা॒ণঃ । ভুব॒ ইত্য॑পা॒নঃ । সুব॒রিতি॑ ব্যা॒নঃ । মহ॒ ইত্যন্নম্᳚ । অন্নে॑ন॒ বাব সর্বে᳚ প্রা॒ণা মহী॑যন্তে । তা বা এ॒তাশ্চত॑স্রশ্চতু॒র্ধা । চত॑স্রশ্চতস্রো॒ ব্যাহৃ॑তযঃ । তা যো বেদ॑ । স বে॑দ॒ ব্রহ্ম॑ । সর্বে᳚-ঽস্মৈ দে॒বা ব॒লিমাব॑হন্তি ॥ 3 ॥ ইতি পঞ্চমো-ঽনুবাকঃ ॥ স য এ॒ষো᳚-ঽন্তরহৃ॑দয আকা॒শঃ । তস্মি॑ন্ন॒য-ম্পুরু॑ষো মনো॒মযঃ॑ । অমৃ॑তো হির॒ণ্মযঃ॑ । অন্ত॑রেণ॒ তালু॑কে । য এ॒ষস্তন॑ ইবাব॒লম্ব॑তে । সে᳚ন্দ্রযো॒নিঃ । যত্রা॒সৌ কে॑শা॒ন্তো বি॒বর্ত॑তে । ব্য॒পোহ্য॑ শীর্​ষকপা॒লে । ভূরিত্য॒গ্নৌ প্রতি॑তিষ্ঠতি । ভুব॒ ইতি॑ বা॒যৌ ॥ 1 ॥ সুব॒রিত্যা॑দি॒ত্যে । মহ॒ ইতি॒ ব্রহ্ম॑ণি । আ॒প্নোতি॒ স্বারা᳚জ্যম্ । আ॒প্নোতি॒ মন॑স॒স্পতিম্᳚ । বাক্প॑তি॒শ্চক্ষু॑ষ্পতিঃ । শ্রোত্র॑পতির্বি॒জ্ঞান॑পতিঃ । এ॒তত্ততো॑ ভবতি । আ॒কা॒শশ॑রীর॒-ম্ব্রহ্ম॑ । স॒ত্যাত্ম॑ প্রা॒ণারা॑ম॒-ম্মন॑ আনন্দম্ । শান্তি॑সমৃদ্ধম॒মৃতম্᳚ । ইতি॑ প্রাচীন যো॒গ্যোপা᳚স্স্ব ॥ 2 ॥ ইতি ষষ্ঠো-ঽনুবাকঃ ॥ পৃ॒থি॒ব্য॑ন্তরি॑ক্ষ॒-ন্দ্যৌর্দিশো॑-ঽবান্তরদি॒শাঃ । অ॒গ্নির্বা॒যুরা॑দি॒ত্যশ্চ॒ন্দ্রমা॒ নক্ষ॑ত্রাণি । আপ॒ ওষ॑ধযো॒ বন॒স্পত॑য আকা॒শ আ॒ত্মা । ইত্য॑ধিভূ॒তম্ । অথাধ্যা॒ত্মম্ । প্রা॒ণো ব্যা॒নো॑-ঽপা॒ন উ॑দা॒নস্স॑মা॒নঃ । চক্ষু॒শ্শ্রোত্র॒-ম্মনো॒ বাক্ত্বক্ । চর্ম॑মা॒গ্ং॒সগ্গ্ স্নাবাস্থি॑ ম॒জ্জা । এ॒তদ॑ধিবি॒ধায॒ ঋষি॒রবো॑চত্ । পাঙ্ক্তং॒-বাঁ ই॒দগ্ং সর্বম্᳚ । পাঙ্ক্তে॑নৈ॒ব পাঙ্ক্তগ্গ্॑ স্পৃণো॒তীতি॑ ॥ 1 ॥ ইতি সপ্তমো-ঽনুবাকঃ ॥ ওমিতি॒ ব্রহ্ম॑ । ওমিতী॒দগ্ং সর্বম্᳚ । ওমিত্যে॒তদ॑নুকৃতির্-হ স্ম॒ বা অ॒প্যো শ্রা॑ব॒যেত্যাশ্রা॑বযন্তি । ওমিতি॒ সামা॑নি গাযন্তি । ওগ্ং শোমিতি॑ শ॒স্ত্রাণি॑ শগ্ংসন্তি । ওমিত্য॑ধ্ব॒র্যুঃ প্র॑তিগ॒র-ম্প্রতি॑গৃণাতি । ওমিতি॒ ব্রহ্মা॒ প্রসৌ॑তি । ওমিত্য॑গ্নিহো॒ত্রমনু॑জানাতি । ওমিতি॑ ব্রাহ্ম॒ণঃ প্র॑ব॒ক্ষ্যন্না॑হ॒ ব্রহ্মোপা᳚প্নবা॒নীতি॑ । ব্রহ্মৈ॒বোপা᳚প্নোতি ॥ 1 ॥ ইত্যষ্টমো-ঽনুবাকঃ ॥ ঋত-ঞ্চ স্বাধ্যাযপ্রব॑চনে॒ চ । সত্য-ঞ্চ স্বাধ্যাযপ্রব॑চনে॒ চ । তপশ্চ স্বাধ্যাযপ্রব॑চনে॒ চ । দমশ্চ স্বাধ্যাযপ্রব॑চনে॒ চ । শমশ্চ স্বাধ্যাযপ্রব॑চনে॒ চ । অগ্নযশ্চ স্বাধ্যাযপ্রব॑চনে॒ চ । অগ্নিহোত্র-ঞ্চ স্বাধ্যাযপ্রব॑চনে॒ চ । অতিথযশ্চ স্বাধ্যাযপ্রব॑চনে॒ চ । মানুষ-ঞ্চ স্বাধ্যাযপ্রব॑চনে॒ চ । প্রজা চ স্বাধ্যাযপ্রব॑চনে॒ চ । প্রজনশ্চ স্বাধ্যাযপ্রব॑চনে॒ চ । প্রজাতিশ্চ স্বাধ্যাযপ্রব॑চনে॒ চ । সত্যমিতি সত্যবচা॑ রাথী॒তরঃ । তপ ইতি তপোনিত্যঃ পৌ॑রুশি॒ষ্টিঃ । স্বাধ্যাযপ্রবচনে এবেতি নাকো॑ মৌদ্গ॒ল্যঃ । তদ্ধি তপ॑স্তদ্ধি॒ তপঃ ॥ 1 ॥ ইতি নবমো-ঽনুবাকঃ ॥ অ॒হং-বৃঁ॒ক্ষস্য॒ রেরি॑বা । কী॒র্তিঃ পৃ॒ষ্ঠ-ঙ্গি॒রেরি॑ব । ঊ॒র্ধ্বপ॑বিত্রো বা॒জিনী॑ব স্ব॒মৃত॑মস্মি । দ্রবি॑ণ॒গ্ং॒ সব॑র্চসম্ । সুমেধা অ॑মৃতো॒ক্ষিতঃ । ইতি ত্রিশঙ্কোর্বেদা॑নুব॒চনম্ ॥ 1 ॥ ইতি দশমো-ঽনুবাকঃ ॥ বেদমনূচ্যাচার্যো-ঽন্তেবাসিনম॑নুশা॒স্তি । সত্যং॒-বঁদ । ধর্ম॒-ঞ্চর । স্বাধ্যাযা᳚ন্মা প্র॒মদঃ । আচার্যায প্রিয-ন্ধনমাহৃত্য প্রজাতন্তু-ম্মা ব্য॑বচ্ছে॒ত্সীঃ । সত্যান্ন প্রম॑দিত॒ব্যম্ । ধর্মান্ন প্রম॑দিত॒ব্যম্ । কুশলান্ন প্রম॑দিত॒ব্যম্ । ভূত্যৈ ন প্রম॑দিত॒ব্যম্ । স্বাধ্যাযপ্রবচনাভ্যা-ন্ন প্রম॑দিত॒ব্যম্ ॥ 1 ॥ দেবপিতৃকার্যাভ্যা-ন্ন প্রম॑দিত॒ব্যম্ । মাতৃ॑দেবো॒ ভব । পিতৃ॑দেবো॒ ভব । আচার্য॑দেবো॒ ভব । অতিথি॑দেবো॒ ভব । যান্যনবদ্যানি॑ কর্মা॒ণি । তানি সেবি॑তব্যা॒নি । নো ই॑তরা॒ণি । যান্যস্মাকগ্ং সুচ॑রিতা॒নি । তানি ত্বযো॑পাস্যা॒নি ॥ 2 ॥ নো ই॑তরা॒ণি । যে কে চারুমচ্ছ্রেযাগ্ং॑সো ব্রা॒হ্মণাঃ । তেষা-ন্ত্বযা-ঽঽসনে ন প্রশ্ব॑সিত॒ব্যম্ । শ্রদ্ধ॑যা দে॒যম্ । অশ্রদ্ধ॑যা-ঽদে॒যম্ । শ্রি॑যা দে॒যম্ । হ্রি॑যা দে॒যম্ । ভি॑যা দে॒যম্ । সং​বিঁ॑দা দে॒যম্ । অথ যদি তে কর্মবিচিকিত্সা বা বৃত্তবিচিকি॑ত্সা বা॒ স্যাত্ ॥ 3 ॥ যে তত্র ব্রাহ্মণা᳚স্সম্ম॒র্​শিনঃ । যুক্তা॑ আযু॒ক্তাঃ । অলূক্ষা॑ ধর্ম॑কামা॒স্স্যুঃ । যথা তে॑ তত্র॑ বর্তে॒রন্ন্ । তথা তত্র॑ বর্তে॒থাঃ । অথাভ্যা᳚খ্যা॒তেষু । যে তত্র ব্রাহ্মণা᳚স্সম্ম॒র্​শিনঃ । যুক্তা॑ আযু॒ক্তাঃ । অলূক্ষা॑ ধর্মকামা॒স্স্যুঃ । যথা তে॑ তেষু॑ বর্তে॒রন্ন্ । তথা তেষু॑ বর্তে॒থাঃ । এষ॑ আদে॒শঃ । এষ উ॑পদে॒শঃ । এষা বে॑দোপ॒নিষত্ । এতদ॑নুশা॒সনম্ । এবমুপা॑সিত॒ব্যম্ । এবমু চৈত॑দুপা॒স্যম্ ॥ 4 ॥ ইত্যেকাদশো-ঽনুবাকঃ ॥ শ-ন্নো॑ মি॒ত্রশ্শং-বঁরু॑ণঃ । শ-ন্নো॑ ভবত্বর্য॒মা । শ-ন্ন॒ ইন্দ্রো॒ বৃহ॒স্পতিঃ॑ । শ-ন্নো॒ বিষ্ণু॑রুরুক্র॒মঃ । নমো॒ ব্রহ্ম॑ণে । নম॑স্তে বাযো । ত্বমে॒ব প্র॒ত্যক্ষ॒-ম্ব্রহ্মা॑সি । ত্বামে॒ব প্র॒ত্যক্ষ॒-ম্ব্রহ্মাবা॑দিষম্ । ঋ॒তম॑বাদিষম্ । স॒ত্যম॑বাদিষম্ । তন্মামা॑বীত্ । তদ্ব॒ক্তার॑মাবীত্ । আবী॒ন্মাম্ । আবী᳚দ্ব॒ক্তারম্᳚ । ওঁ শান্তি॒-শ্শান্তি॒-শ্শান্তিঃ॑ ॥ 1 ॥ ইতি দ্বাদশো-ঽনুবাকঃ ॥ ॥ হরিঃ॑ ওম্ ॥ ॥ শ্রী কৃষ্ণার্পণমস্তু ॥