শ্রী বিষ্ণু পঞ্জর স্তোত্রম্

ওঁ অস্য শ্রীবিষ্ণুপঞ্জরস্তোত্র মহামন্ত্রস্য নারদ ঋষিঃ । অনুষ্টুপ্ ছন্দঃ । শ্রীবিষ্ণুঃ পরমাত্মা দেবতা । অহং বীজম্ । সোহং শক্তিঃ । ওঁ হ্রীং কীলকম্ । মম সর্বদেহরক্ষণার্থং জপে বিনিযোগঃ ।
নারদ ঋষযে নমঃ মুখে । শ্রীবিষ্ণুপরমাত্মদেবতাযৈ নমঃ হৃদযে । অহং বীজং গুহ্যে । সোহং শক্তিঃ পাদযোঃ । ওঁ হ্রীং কীলকং পাদাগ্রে । ওঁ হ্রাং হ্রীং হ্রূং হ্রৈং হ্রৌং হ্রঃ ইতি মন্ত্রঃ ।
ওঁ হ্রাং অঙ্গুষ্ঠাভ্যাং নমঃ ।
ওঁ হ্রীং তর্জনীভ্যাং নমঃ ।
ওঁ হ্রূং মধ্যমাভ্যাং নমঃ ।
ওঁ হ্রৈং অনামিকাভ্যাং নমঃ ।
ওঁ হ্রৌং কনিষ্ঠিকাভ্যাং নমঃ ।
ওঁ হ্রঃ করতলকরপৃষ্ঠাভ্যাং নমঃ ।
ইতি করন্যাসঃ ।
ওঁ হ্রাং হৃদযায নমঃ ।
ওঁ হ্রীং শিরসে স্বাহা ।
ওঁ হ্রূং শিখাযৈ বষট্ ।
ওঁ হ্রৈং কবচায হুম্ ।
ওঁ হ্রৌং নেত্রত্রযায বৌষট্ ।
ওঁ হ্রঃ অস্ত্রায ফট্ ।
ইতি অঙ্গন্যাসঃ ।
অহং বীজং প্রাণাযামং মন্ত্রত্রযেণ কুর্যাত্ ।
ধ্যানম্ ।
পরং পরস্মাত্প্রকৃতেরনাদিমেকং নিবিষ্টং বহুধা গুহাযাম্ ।
সর্বালযং সর্বচরাচরস্থং নমামি বিষ্ণুং জগদেকনাথম্ ॥ 1 ॥

ওঁ বিষ্ণুপঞ্জরকং দিব্যং সর্বদুষ্টনিবারণম্ ।
উগ্রতেজো মহাবীর্যং সর্বশত্রুনিকৃন্তনম্ ॥ 2 ॥

ত্রিপুরং দহমানস্য হরস্য ব্রহ্মণো হিতম্ ।
তদহং সম্প্রবক্ষ্যামি আত্মরক্ষাকরং নৃণাম্ ॥ 3 ॥

পাদৌ রক্ষতু গোবিন্দো জঙ্ঘে চৈব ত্রিবিক্রমঃ ।
ঊরূ মে কেশবঃ পাতু কটিং চৈব জনার্দনঃ ॥ 4 ॥

নাভিং চৈবাচ্যুতঃ পাতু গুহ্যং চৈব তু বামনঃ ।
উদরং পদ্মনাভশ্চ পৃষ্ঠং চৈব তু মাধবঃ ॥ 5 ॥

বামপার্শ্বং তথা বিষ্ণুর্দক্ষিণং মধুসূদনঃ ।
বাহূ বৈ বাসুদেবশ্চ হৃদি দামোদরস্তথা ॥ 6 ॥

কণ্ঠং রক্ষতু বারাহঃ কৃষ্ণশ্চ মুখমণ্ডলম্ ।
মাধবঃ কর্ণমূলে তু হৃষীকেশশ্চ নাসিকে ॥ 7 ॥

নেত্রে নারাযণো রক্ষেল্ললাটং গরুডধ্বজঃ ।
কপোলৌ কেশবো রক্ষেদ্বৈকুণ্ঠঃ সর্বতোদিশম্ ॥ 8 ॥

শ্রীবত্সাঙ্কশ্চ সর্বেষামঙ্গানাং রক্ষকো ভবেত্ ।
পূর্বস্যাং পুণ্ডরীকাক্ষ আগ্নেয্যাং শ্রীধরস্তথা ॥ 9 ॥

দক্ষিণে নারসিংহশ্চ নৈরৃত্যাং মাধবোঽবতু ।
পুরুষোত্তমো বারুণ্যাং বাযব্যাং চ জনার্দনঃ ॥ 10 ॥

গদাধরস্তু কৌবের্যামীশান্যাং পাতু কেশবঃ ।
আকাশে চ গদা পাতু পাতালে চ সুদর্শনম্ ॥ 11 ॥

সন্নদ্ধঃ সর্বগাত্রেষু প্রবিষ্টো বিষ্ণুপঞ্জরঃ ।
বিষ্ণুপঞ্জরবিষ্টোঽহং বিচরামি মহীতলে ॥ 12 ॥

রাজদ্বারেঽপথে ঘোরে সঙ্গ্রামে শত্রুসঙ্কটে ।
নদীষু চ রণে চৈব চোরব্যাঘ্রভযেষু চ ॥ 13 ॥

ডাকিনীপ্রেতভূতেষু ভযং তস্য ন জাযতে ।
রক্ষ রক্ষ মহাদেব রক্ষ রক্ষ জনেশ্বর ॥ 14 ॥

রক্ষন্তু দেবতাঃ সর্বা ব্রহ্মবিষ্ণুমহেশ্বরাঃ ।
জলে রক্ষতু বারাহঃ স্থলে রক্ষতু বামনঃ ॥ 15 ॥

অটব্যাং নারসিংহশ্চ সর্বতঃ পাতু কেশবঃ ॥
দিবা রক্ষতু মাং সূর্যো রাত্রৌ রক্ষতু চন্দ্রমাঃ ॥ 16 ॥

পন্থানং দুর্গমং রক্ষেত্সর্বমেব জনার্দনঃ ।
রোগবিঘ্নহতশ্চৈব ব্রহ্মহা গুরুতল্পগঃ ॥ 17 ॥

স্ত্রীহন্তা বালঘাতী চ সুরাপো বৃষলীপতিঃ ।
মুচ্যতে সর্বপাপেভ্যো যঃ পঠেন্নাত্র সংশযঃ ॥ 18 ॥

অপুত্রো লভতে পুত্রং ধনার্থী লভতে ধনম্ ।
বিদ্যার্থী লভতে বিদ্যাং মোক্ষার্থী লভতে গতিম্ ॥ 19 ॥

আপদো হরতে নিত্যং বিষ্ণুস্তোত্রার্থসম্পদা ।
যস্ত্বিদং পঠতে স্তোত্রং বিষ্ণুপঞ্জরমুত্তমম্ ॥ 20 ॥

মুচ্যতে সর্বপাপেভ্যো বিষ্ণুলোকং স গচ্ছতি ।
গোসহস্রফলং তস্য বাজপেযশতস্য চ ॥ 21 ॥

অশ্বমেধসহস্রস্য ফলং প্রাপ্নোতি মানবঃ ।
সর্বকামং লভেদস্য পঠনান্নাত্র সংশযঃ ॥ 22 ॥

জলে বিষ্ণুঃ স্থলে বিষ্ণুর্বিষ্ণুঃ পর্বতমস্তকে ।
জ্বালামালাকুলে বিষ্ণুঃ সর্বং বিষ্ণুমযং জগত্ ॥ 23 ॥