ନାରାଯଣୀଯଂ ଦଶକ 47 - ଉଲୂଖଲବନ୍ଧନମ୍

ଏକଦା ଦଧିଵିମାଥକାରିଣୀଂ ମାତରଂ ସମୁପସେଦିଵାନ୍ ଭଵାନ୍ ।
ସ୍ତନ୍ଯଲୋଲୁପତଯା ନିଵାରଯନ୍ନଙ୍କମେତ୍ଯ ପପିଵାନ୍ ପଯୋଧରୌ ॥1॥

ଅର୍ଧପୀତକୁଚକୁଡ୍ମଲେ ତ୍ଵଯି ସ୍ନିଗ୍ଧହାସମଧୁରାନନାମ୍ବୁଜେ ।
ଦୁଗ୍ଧମୀଶ ଦହନେ ପରିସ୍ରୁତଂ ଧର୍ତୁମାଶୁ ଜନନୀ ଜଗାମ ତେ ॥2॥

ସାମିପୀତରସଭଙ୍ଗସଙ୍ଗତକ୍ରୋଧଭାରପରିଭୂତଚେତସା।
ମନ୍ଥଦଣ୍ଡମୁପଗୃହ୍ଯ ପାଟିତଂ ହନ୍ତ ଦେଵ ଦଧିଭାଜନଂ ତ୍ଵଯା ॥3॥

ଉଚ୍ଚଲଦ୍ଧ୍ଵନିତମୁଚ୍ଚକୈସ୍ତଦା ସନ୍ନିଶମ୍ଯ ଜନନୀ ସମାଦ୍ରୁତା ।
ତ୍ଵଦ୍ଯଶୋଵିସରଵଦ୍ଦଦର୍ଶ ସା ସଦ୍ଯ ଏଵ ଦଧି ଵିସ୍ତୃତଂ କ୍ଷିତୌ ॥4॥

ଵେଦମାର୍ଗପରିମାର୍ଗିତଂ ରୁଷା ତ୍ଵମଵୀକ୍ଷ୍ଯ ପରିମାର୍ଗଯନ୍ତ୍ଯସୌ ।
ସନ୍ଦଦର୍ଶ ସୁକୃତିନ୍ଯୁଲୂଖଲେ ଦୀଯମାନନଵନୀତମୋତଵେ ॥5॥

ତ୍ଵାଂ ପ୍ରଗୃହ୍ଯ ବତ ଭୀତିଭାଵନାଭାସୁରାନନସରୋଜମାଶୁ ସା ।
ରୋଷରୂଷିତମୁଖୀ ସଖୀପୁରୋ ବନ୍ଧନାଯ ରଶନାମୁପାଦଦେ ॥6॥

ବନ୍ଧୁମିଚ୍ଛତି ଯମେଵ ସଜ୍ଜନସ୍ତଂ ଭଵନ୍ତମଯି ବନ୍ଧୁମିଚ୍ଛତୀ ।
ସା ନିଯୁଜ୍ଯ ରଶନାଗୁଣାନ୍ ବହୂନ୍ ଦ୍ଵ୍ଯଙ୍ଗୁଲୋନମଖିଲଂ କିଲୈକ୍ଷତ ॥7॥

ଵିସ୍ମିତୋତ୍ସ୍ମିତସଖୀଜନେକ୍ଷିତାଂ ସ୍ଵିନ୍ନସନ୍ନଵପୁଷଂ ନିରୀକ୍ଷ୍ଯ ତାମ୍ ।
ନିତ୍ଯମୁକ୍ତଵପୁରପ୍ଯହୋ ହରେ ବନ୍ଧମେଵ କୃପଯାଽନ୍ଵମନ୍ଯଥାଃ ॥8॥

ସ୍ଥୀଯତାଂ ଚିରମୁଲୂଖଲେ ଖଲେତ୍ଯାଗତା ଭଵନମେଵ ସା ଯଦା।
ପ୍ରାଗୁଲୂଖଲବିଲାନ୍ତରେ ତଦା ସର୍ପିରର୍ପିତମଦନ୍ନଵାସ୍ଥିଥାଃ ॥9॥

ଯଦ୍ଯପାଶସୁଗମୋ ଵିଭୋ ଭଵାନ୍ ସଂଯତଃ କିମୁ ସପାଶଯାଽନଯା ।
ଏଵମାଦି ଦିଵିଜୈରଭିଷ୍ଟୁତୋ ଵାତନାଥ ପରିପାହି ମାଂ ଗଦାତ୍ ॥10॥