નારાયણીયં દશક 43 - તૃણાવર્તવધમ્

ત્વામેકદા ગુરુમરુત્પુરનાથ વોઢું
ગાઢાધિરૂઢગરિમાણમપારયન્તી ।
માતા નિધાય શયને કિમિદં બતેતિ
ધ્યાયન્ત્યચેષ્ટત ગૃહેષુ નિવિષ્ટશઙ્કા ॥1॥

તાવદ્વિદૂરમુપકર્ણિતઘોરઘોષ-
વ્યાજૃમ્ભિપાંસુપટલીપરિપૂરિતાશઃ ।
વાત્યાવપુસ્સ કિલ દૈત્યવરસ્તૃણાવ-
ર્તાખ્યો જહાર જનમાનસહારિણં ત્વામ્ ॥2॥

ઉદ્દામપાંસુતિમિરાહતદૃષ્ટિપાતે
દ્રષ્ટું કિમપ્યકુશલે પશુપાલલોકે ।
હા બાલકસ્ય કિમિતિ ત્વદુપાન્તમાપ્તા
માતા ભવન્તમવિલોક્ય ભૃશં રુરોદ ॥3॥

તાવત્ સ દાનવવરોઽપિ ચ દીનમૂર્તિ-
ર્ભાવત્કભારપરિધારણલૂનવેગઃ ।
સઙ્કોચમાપ તદનુ ક્ષતપાંસુઘોષે
ઘોષે વ્યતાયત ભવજ્જનનીનિનાદઃ ॥4॥

રોદોપકર્ણનવશાદુપગમ્ય ગેહં
ક્રન્દત્સુ નન્દમુખગોપકુલેષુ દીનઃ ।
ત્વાં દાનવસ્ત્વખિલમુક્તિકરં મુમુક્ષુ-
સ્ત્વય્યપ્રમુઞ્ચતિ પપાત વિયત્પ્રદેશાત્ ॥5॥

રોદાકુલાસ્તદનુ ગોપગણા બહિષ્ઠ-
પાષાણપૃષ્ઠભુવિ દેહમતિસ્થવિષ્ઠમ્ ।
પ્રૈક્ષન્ત હન્ત નિપતન્તમમુષ્ય વક્ષ-
સ્યક્ષીણમેવ ચ ભવન્તમલં હસન્તમ્ ॥6॥

ગ્રાવપ્રપાતપરિપિષ્ટગરિષ્ઠદેહ-
ભ્રષ્ટાસુદુષ્ટદનુજોપરિ ધૃષ્ટહાસમ્ ।
આઘ્નાનમમ્બુજકરેણ ભવન્તમેત્ય
ગોપા દધુર્ગિરિવરાદિવ નીલરત્નમ્ ॥7॥

એકૈકમાશુ પરિગૃહ્ય નિકામનન્દ-
ન્નન્દાદિગોપપરિરબ્ધવિચુમ્બિતાઙ્ગમ્ ।
આદાતુકામપરિશઙ્કિતગોપનારી-
હસ્તામ્બુજપ્રપતિતં પ્રણુમો ભવન્તમ્ ॥8॥

ભૂયોઽપિ કિન્નુ કૃણુમઃ પ્રણતાર્તિહારી
ગોવિન્દ એવ પરિપાલયતાત્ સુતં નઃ ।
ઇત્યાદિ માતરપિતૃપ્રમુખૈસ્તદાનીં
સમ્પ્રાર્થિતસ્ત્વદવનાય વિભો ત્વમેવ ॥9॥

વાતાત્મકં દનુજમેવમયિ પ્રધૂન્વન્
વાતોદ્ભવાન્ મમ ગદાન્ કિમુ નો ધુનોષિ ।
કિં વા કરોમિ પુનરપ્યનિલાલયેશ
નિશ્શેષરોગશમનં મુહુરર્થયે ત્વામ્ ॥10॥