নারাযণীযং দশক 43 - তৃণাবর্তবধম্

ত্বামেকদা গুরুমরুত্পুরনাথ বোঢুং
গাঢাধিরূঢগরিমাণমপারযন্তী ।
মাতা নিধায শযনে কিমিদং বতেতি
ধ্যাযন্ত্যচেষ্টত গৃহেষু নিবিষ্টশঙ্কা ॥1॥

তাবদ্বিদূরমুপকর্ণিতঘোরঘোষ-
ব্যাজৃম্ভিপাংসুপটলীপরিপূরিতাশঃ ।
বাত্যাবপুস্স কিল দৈত্যবরস্তৃণাব-
র্তাখ্যো জহার জনমানসহারিণং ত্বাম্ ॥2॥

উদ্দামপাংসুতিমিরাহতদৃষ্টিপাতে
দ্রষ্টুং কিমপ্যকুশলে পশুপাললোকে ।
হা বালকস্য কিমিতি ত্বদুপান্তমাপ্তা
মাতা ভবন্তমবিলোক্য ভৃশং রুরোদ ॥3॥

তাবত্ স দানববরোঽপি চ দীনমূর্তি-
র্ভাবত্কভারপরিধারণলূনবেগঃ ।
সঙ্কোচমাপ তদনু ক্ষতপাংসুঘোষে
ঘোষে ব্যতাযত ভবজ্জননীনিনাদঃ ॥4॥

রোদোপকর্ণনবশাদুপগম্য গেহং
ক্রন্দত্সু নন্দমুখগোপকুলেষু দীনঃ ।
ত্বাং দানবস্ত্বখিলমুক্তিকরং মুমুক্ষু-
স্ত্বয্যপ্রমুঞ্চতি পপাত বিযত্প্রদেশাত্ ॥5॥

রোদাকুলাস্তদনু গোপগণা বহিষ্ঠ-
পাষাণপৃষ্ঠভুবি দেহমতিস্থবিষ্ঠম্ ।
প্রৈক্ষন্ত হন্ত নিপতন্তমমুষ্য বক্ষ-
স্যক্ষীণমেব চ ভবন্তমলং হসন্তম্ ॥6॥

গ্রাবপ্রপাতপরিপিষ্টগরিষ্ঠদেহ-
ভ্রষ্টাসুদুষ্টদনুজোপরি ধৃষ্টহাসম্ ।
আঘ্নানমম্বুজকরেণ ভবন্তমেত্য
গোপা দধুর্গিরিবরাদিব নীলরত্নম্ ॥7॥

একৈকমাশু পরিগৃহ্য নিকামনন্দ-
ন্নন্দাদিগোপপরিরব্ধবিচুম্বিতাঙ্গম্ ।
আদাতুকামপরিশঙ্কিতগোপনারী-
হস্তাম্বুজপ্রপতিতং প্রণুমো ভবন্তম্ ॥8॥

ভূযোঽপি কিন্নু কৃণুমঃ প্রণতার্তিহারী
গোবিন্দ এব পরিপালযতাত্ সুতং নঃ ।
ইত্যাদি মাতরপিতৃপ্রমুখৈস্তদানীং
সম্প্রার্থিতস্ত্বদবনায বিভো ত্বমেব ॥9॥

বাতাত্মকং দনুজমেবমযি প্রধূন্বন্
বাতোদ্ভবান্ মম গদান্ কিমু নো ধুনোষি ।
কিং বা করোমি পুনরপ্যনিলালযেশ
নিশ্শেষরোগশমনং মুহুরর্থযে ত্বাম্ ॥10॥