ନାରାଯଣୀଯଂ ଦଶକ 13 - ହିରଣ୍ଯାକ୍ଷଵଧମ୍

ହିରଣ୍ଯାକ୍ଷଂ ତାଵଦ୍ଵରଦ ଭଵଦନ୍ଵେଷଣପରଂ
ଚରନ୍ତଂ ସାଂଵର୍ତେ ପଯସି ନିଜଜଙ୍ଘାପରିମିତେ ।
ଭଵଦ୍ଭକ୍ତୋ ଗତ୍ଵା କପଟପଟୁଧୀର୍ନାରଦମୁନିଃ
ଶନୈରୂଚେ ନନ୍ଦନ୍ ଦନୁଜମପି ନିନ୍ଦଂସ୍ତଵ ବଲମ୍ ॥1॥

ସ ମାଯାଵୀ ଵିଷ୍ଣୁର୍ହରତି ଭଵଦୀଯାଂ ଵସୁମତୀଂ
ପ୍ରଭୋ କଷ୍ଟଂ କଷ୍ଟଂ କିମିଦମିତି ତେନାଭିଗଦିତଃ ।
ନଦନ୍ କ୍ଵାସୌ କ୍ଵାସଵିତି ସ ମୁନିନା ଦର୍ଶିତପଥୋ
ଭଵନ୍ତଂ ସମ୍ପ୍ରାପଦ୍ଧରଣିଧରମୁଦ୍ଯନ୍ତମୁଦକାତ୍ ॥2॥

ଅହୋ ଆରଣ୍ଯୋଽଯଂ ମୃଗ ଇତି ହସନ୍ତଂ ବହୁତରୈ-
ର୍ଦୁରୁକ୍ତୈର୍ଵିଧ୍ଯନ୍ତଂ ଦିତିସୁତମଵଜ୍ଞାଯ ଭଗଵନ୍ ।
ମହୀଂ ଦୃଷ୍ଟ୍ଵା ଦଂଷ୍ଟ୍ରାଶିରସି ଚକିତାଂ ସ୍ଵେନ ମହସା
ପଯୋଧାଵାଧାଯ ପ୍ରସଭମୁଦଯୁଙ୍କ୍ଥା ମୃଧଵିଧୌ ॥3॥

ଗଦାପାଣୌ ଦୈତ୍ଯେ ତ୍ଵମପି ହି ଗୃହୀତୋନ୍ନତଗଦୋ
ନିଯୁଦ୍ଧେନ କ୍ରୀଡନ୍ ଘଟଘଟରଵୋଦ୍ଘୁଷ୍ଟଵିଯତା ।
ରଣାଲୋକୌତ୍ସୁକ୍ଯାନ୍ମିଲତି ସୁରସଙ୍ଘେ ଦ୍ରୁତମମୁଂ
ନିରୁନ୍ଧ୍ଯାଃ ସନ୍ଧ୍ଯାତଃ ପ୍ରଥମମିତି ଧାତ୍ରା ଜଗଦିଷେ ॥4॥

ଗଦୋନ୍ମର୍ଦେ ତସ୍ମିଂସ୍ତଵ ଖଲୁ ଗଦାଯାଂ ଦିତିଭୁଵୋ
ଗଦାଘାତାଦ୍ଭୂମୌ ଝଟିତି ପତିତାଯାମହହ! ଭୋଃ ।
ମୃଦୁସ୍ମେରାସ୍ଯସ୍ତ୍ଵଂ ଦନୁଜକୁଲନିର୍ମୂଲନଚଣଂ
ମହାଚକ୍ରଂ ସ୍ମୃତ୍ଵା କରଭୁଵି ଦଧାନୋ ରୁରୁଚିଷେ ॥5॥

ତତଃ ଶୂଲଂ କାଲପ୍ରତିମରୁଷି ଦୈତ୍ଯେ ଵିସୃଜତି
ତ୍ଵଯି ଛିନ୍ଦତ୍ଯେନତ୍ କରକଲିତଚକ୍ରପ୍ରହରଣାତ୍ ।
ସମାରୁଷ୍ଟୋ ମୁଷ୍ଟ୍ଯା ସ ଖଲୁ ଵିତୁଦଂସ୍ତ୍ଵାଂ ସମତନୋତ୍
ଗଲନ୍ମାଯେ ମାଯାସ୍ତ୍ଵଯି କିଲ ଜଗନ୍ମୋହନକରୀଃ ॥6॥

ଭଵଚ୍ଚକ୍ରଜ୍ଯୋତିଷ୍କଣଲଵନିପାତେନ ଵିଧୁତେ
ତତୋ ମାଯାଚକ୍ରେ ଵିତତଘନରୋଷାନ୍ଧମନସମ୍ ।
ଗରିଷ୍ଠାଭିର୍ମୁଷ୍ଟିପ୍ରହୃତିଭିରଭିଘ୍ନନ୍ତମସୁରଂ
ସ୍ଵପାଦାଙ୍ଗୁଷ୍ଠେନ ଶ୍ରଵଣପଦମୂଲେ ନିରଵଧୀଃ ॥7॥

ମହାକାଯଃ ସୋଽଯଂ ତଵ ଚରଣପାତପ୍ରମଥିତୋ
ଗଲଦ୍ରକ୍ତୋ ଵକ୍ତ୍ରାଦପତଦୃଷିଭିଃ ଶ୍ଲାଘିତହତିଃ ।
ତଦା ତ୍ଵାମୁଦ୍ଦାମପ୍ରମଦଭରଵିଦ୍ଯୋତିହୃଦଯା
ମୁନୀନ୍ଦ୍ରାଃ ସାନ୍ଦ୍ରାଭିଃ ସ୍ତୁତିଭିରନୁଵନ୍ନଧ୍ଵରତନୁମ୍ ॥8॥

ତ୍ଵଚି ଛନ୍ଦୋ ରୋମସ୍ଵପି କୁଶଗଣଶ୍ଚକ୍ଷୁଷି ଘୃତଂ
ଚତୁର୍ହୋତାରୋଽଙ୍ଘ୍ରୌ ସ୍ରୁଗପି ଵଦନେ ଚୋଦର ଇଡା ।
ଗ୍ରହା ଜିହ୍ଵାଯାଂ ତେ ପରପୁରୁଷ କର୍ଣେ ଚ ଚମସା
ଵିଭୋ ସୋମୋ ଵୀର୍ଯଂ ଵରଦ ଗଲଦେଶେଽପ୍ଯୁପସଦଃ ॥9॥

ମୁନୀନ୍ଦ୍ରୈରିତ୍ଯାଦିସ୍ତଵନମୁଖରୈର୍ମୋଦିତମନା
ମହୀଯସ୍ଯା ମୂର୍ତ୍ଯା ଵିମଲତରକୀର୍ତ୍ଯା ଚ ଵିଲସନ୍ ।
ସ୍ଵଧିଷ୍ଣ୍ଯଂ ସମ୍ପ୍ରାପ୍ତଃ ସୁଖରସଵିହାରୀ ମଧୁରିପୋ
ନିରୁନ୍ଧ୍ଯା ରୋଗଂ ମେ ସକଲମପି ଵାତାଲଯପତେ ॥10॥