గీతగోవిన్దం తృతీయః సర్గః - ముగ్ధ మధుసూదనః

॥ ముగ్ధమధుసూదనః ॥
కంసారిరపి సంసారవాసనాబన్ధశృఙ్ఖలామ్ ।
రాధామాధాయ హృదయే తత్యాజ వ్రజసున్దరీః ॥ 18 ॥

ఇతస్తతస్తామనుసృత్య రాధికా-మనఙ్గబాణవ్రణఖిన్నమానసః ।
కృతానుతాపః స కలిన్దనన్దినీ-తటాన్తకుఞ్జే విషసాద మాధవః ॥ 19 ॥
॥ గీతం 7 ॥
మామియం చలితా విలోక్య వృతం వధూనిచయేన ।
సాపరాధతయా మయాపి న వారితాతిభయేన ॥
హరి హరి హతాదరతయా గతా సా కుపితేవ ॥ 1 ॥
కిం కరిష్యతి కిం వదిష్యతి సా చిరం విరహేణ ।
కిం ధనేన జనేన కిం మమ జీవనేన గృహేణ ॥ 2 ॥
చిన్తయామి తదాననం కుటిలభ్రు కోపభరేణ ।
శోణపద్మమివోపరి భ్రమతాకులం భ్రమరేణ ॥ 3 ॥
తామహం హృది సఙ్గతామనిశం భృశం రమయామి ।
కిం వనేఽనుసరామి తామిహ కిం వృథా విలపామి ॥ 4 ॥
తన్వి ఖిన్నమసూయయా హృదయం తవాకలయామి ।
తన్న వేద్మి కుతో గతాసి న తేన తేఽనునయామి ॥ 5 ॥
దృశ్యతే పురతో గతాగతమేవ మే విదధాసి ।
కిం పురేవ ససమ్భ్రమం పరిరమ్భణం న దదాసి ॥ 6 ॥
క్షమ్యతామపరం కదాపి తవేదృశం న కరోమి ।
దేహి సున్దరి దర్శనం మమ మన్మథేన దునోమి ॥ 7 ॥
వర్ణితం జయదేవకేన హరేరిదం ప్రవణేన ।
కిన్దుబిల్వసముద్రసమ్భవరోహిణీరమణేన ॥ 8 ॥
హృది బిసలతాహారో నాయం భుజఙ్గమనాయకః కువలయదలశ్రేణీ కణ్ఠే న సా గరలద్యుతిః ।
మలయజరజో నేదం భస్మ ప్రియారహితే మయి ప్రహర న హరభ్రాన్త్యానఙ్గ క్రుధా కిము ధావసి ॥ 20 ॥
పాణౌ మా కురు చూతసాయకమముం మా చాపమారోపయ క్రీడానిర్జితవిశ్వ మూర్ఛితజనాఘాతేన కిం పౌరుషమ్ ।
తస్యా ఏవ మృగీదృశో మనసిజప్రేఙ్ఖత్కటాక్షాశుగ-శ్రేణీజర్జరితం మనాగపి మనో నాద్యాపి సన్ధుక్షతే ॥ 21 ॥
భ్రూచాపే నిహితః కటాక్షవిశిఖో నిర్మాతు మర్మవ్యథాం శ్యామాత్మా కుటిలః కరోతు కబరీభారోఽపి మారోద్యమమ్ ।
మోహం తావదయం చ తన్వి తనుతాం బిమ్బాదరో రాగవాన్ సద్వృత్తస్తనమణ్దలస్తవ కథం ప్రాణైర్మమ క్రీడతి ॥ 22 ॥
తాని స్పర్శసుఖాని తే చ తరలాః స్నిగ్ధా దృశోర్విభ్రమా-స్తద్వక్త్రామ్బుజసౌరభం స చ సుధాస్యన్దీ గిరాం వక్రిమా ।
సా బిమ్బాధరమాధురీతి విషయాసఙ్గేఽపి చేన్మానసం తస్యాం లగ్నసమాధి హన్త విరహవ్యాధిః కథం వర్ధతే ॥ 23 ॥
భ్రూపల్లవం ధనురపాఙ్గతరఙ్గితాని బాణాః గుణః శ్రవణపాలిరితి స్మరేణ ।
తస్యామనఙ్గజయజఙ్గమదేవతాయాం అస్త్రాణి నిర్జితజగన్తి కిమర్పితాని ॥ 24 ॥
[ఏషః శ్లోకః కేషుచన సంస్కరణేషు విద్యతే]
తిర్యక్కణ్ఠ విలోల మౌలి తరలోత్తం సస్య వంశోచ్చరద్-
దీప్తిస్థాన కృతావధాన లలనా లక్షైర్న సంలక్షితాః ।
సమ్ముగ్ధే మధుసూదనస్య మధురే రాధాముఖేన్దౌ సుధా-
సారే కన్దలితాశ్చిరం దధతు వః క్షేమం కటాక్షోర్మ్మయ ॥ (25) ॥