ଶ୍ରୀ ଵୈକୁଣ୍ଠ ଗଦ୍ଯମ୍

ଯାମୁନାର୍ଯସୁଧାମ୍ଭୋଧିମଵଗାହ୍ଯ ଯଥାମତି ।

ଆଦାଯ ଭକ୍ତିଯୋଗାଖ୍ଯଂ ରତ୍ନଂ ସନ୍ଦର୍ଶଯାମ୍ଯହମ୍ ॥
ସ୍ଵାଧୀନ ତ୍ରିଵିଧଚେତନାଚେତନସ୍ଵରୂପସ୍ଥିତି ପ୍ରଵୃତ୍ତିଭେଦଂ, କ୍ଲେଶ କର୍ମାଦ୍ଯଶେଷଦୋଷାସଂସ୍ପୃଷ୍ଟଂ, ସ୍ଵାଭାଵିକାନଵଧିକାତିଶଯ ଜ୍ଞାନବଲୈଶ୍ଵର୍ଯଵୀର୍ଯଶକ୍ତିତେଜଃ ପ୍ରଭୃତ୍ଯସଙ୍ଖ୍ଯେଯ କଲ୍ଯାଣଗୁଣଗଣୌଘ ମହାର୍ଣଵଂ, ପରମପୁରୁଷଂ, ଭଗଵନ୍ତଂ, ନାରାଯଣଂ, ସ୍ଵାମିତ୍ଵେନ ସୁହୃତ୍ଵେନ ଗୁରୁତ୍ଵେନ ଚ ପରିଗୃହ୍ଯ ଐକାନ୍ତିକାତ୍ଯନ୍ତିକ ତତ୍ପାଦାମ୍ବୁଜଦ୍ଵଯ ପରିଚର୍ଯୈକମନୋରଥଃ, ତତ୍ପ୍ରାପ୍ତଯେ ଚ ତତ୍ପାଦାମ୍ବୁଜଦ୍ଵଯ ପ୍ରପତ୍ତେରନ୍ଯନ୍ନ ମେ କଲ୍ପକୋଟିସହସ୍ରେଣାପି ସାଧନମସ୍ତୀତି ମନ୍ଵାନଃ, ତସ୍ଯୈଵ ଭଗଵତୋ ନାରାଯଣସ୍ଯ ଅଖିଲସତ୍ତ୍ଵଦଯୈକସାଗରସ୍ଯ ଅନାଲୋଚିତ ଗୁଣଗୁଣାଖଣ୍ଡ ଜନାନୁକୂଲାମର୍ଯାଦ ଶୀଲଵତଃ, ସ୍ଵାଭାଵିକାନଵଧିକାତିଶଯ ଗୁଣଵତ୍ତଯା ଦେଵତିର୍ଯଙ୍ମନୁଷ୍ଯାଦ୍ଯଖିଲଜନ ହୃଦଯାନନ୍ଦନସ୍ଯ ଆଶ୍ରିତଵାତ୍ସଲ୍ଯୈକଜଲଧେଃ ଭକ୍ତଜନସଂଶ୍ଲେଷୈକଭୋଗସ୍ଯ ନିତ୍ଯଜ୍ଞାନକ୍ରିଯୈଶ୍ଵର୍ଯାଦି ଭୋଗସାମଗ୍ରୀସମୃଦ୍ଧସ୍ଯ, ମହାଵିଭୂତେଃ, ଶ୍ରୀମଚ୍ଚରଣାରଵିନ୍ଦଯୁଗଲଂ ଅନନ୍ଯାତ୍ମସଞ୍ଜୀଵନେନ ତଦ୍ଗତସର୍ଵଭାଵେନ ଶରଣମନୁଵ୍ରଜେତ୍ । ତତଶ୍ଚ ପ୍ରତ୍ଯହମାତ୍ମୋଜ୍ଜୀଵନାଯୈଵମନୁସ୍ମରେତ୍ । ଚତୁର୍ଦଶଭୁଵନାତ୍ମକଂ ଅଣ୍ଡଂ, ଦଶଗୁଣିତୋତ୍ତରଂ ଚ ଆଵରଣସପ୍ତକଂ, ସମସ୍ତଂ କାର୍ଯକାରଣ(ଜାତ)ମତୀତ୍ଯ, ଵର୍ତମାନେ ପରମଵ୍ଯୋମଶବ୍ଦାଭିଧେଯେ, ବ୍ରହ୍ମାଦୀନାଂ ଵାଙ୍ମନସାଽଗୋଚରେ, ଶ୍ରୀମତି ଵୈକୁଣ୍ଠେ ଦିଵ୍ଯଲୋକେ, ସନକଵିଧିଶିଵାଦିଭିରପି ଅଚିନ୍ତ୍ଯସ୍ଵଭାଵୈଶ୍ଵର୍ଯୈଃ, ନିତ୍ଯସିଦ୍ଧୈରନନ୍ତୈର୍ଭଗଵଦାନୁକୂଲ୍ଯୈକ ଭୋଗୈର୍ଦିଵ୍ଯପୁରୁଷୈଃ ମହାତ୍ମଭିଃ ଆପୂରିତେ, ତେଷାମପି ଇଯତ୍ପରିମାଣଂ, ଇଯଦୈଶ୍ଵର୍ଯଂ, ଈଦୃଶସ୍ଵଭାଵମିତି ପରିଚ୍ଛେତ୍ତୁମଯୋଗ୍ଯେ, ଦିଵ୍ଯାଵରଣଶତସହସ୍ରାଵୃତେ, ଦିଵ୍ଯକଲ୍ପକତରୂପଶୋଭିତେ, ଦିଵ୍ଯୋଦ୍ଯାନ ଶତସହସ୍ରକୋଟିଭିରାଵୃତେ, ଅତିପ୍ରମାଣେ ଦିଵ୍ଯାଯତନେ, କସ୍ମିଂଶ୍ଚିଦ୍ଵିଚିତ୍ର ଦିଵ୍ଯରତ୍ନମଯ ଦିଵ୍ଯାସ୍ଥାନମଣ୍ଡପେ, ଦିଵ୍ଯରତ୍ନସ୍ତମ୍ଭ ଶତସହସ୍ରକୋଟିଭିରୁପଶୋଭିତେ,

ଦିଵ୍ଯନାନାରତ୍ନକୃତସ୍ଥଲ ଵିଚିତ୍ରିତେ, ଦିଵ୍ଯାଲଙ୍କାରାଲଙ୍କୃତେ, ପରିତଃ ପତିତୈଃ ପତମାନୈଃ ପାଦପସ୍ଥୈଶ୍ଚ ନାନାଗନ୍ଧଵର୍ଣୈର୍ଦିଵ୍ଯପୁଷ୍ପୈଃ ଶୋଭମାନୈର୍ଦିଵ୍ଯପୁଷ୍ପୋପଵନୈରୁପଶୋଭିତେ, ସଙ୍କୀର୍ଣପାରିଜାତାଦି କଲ୍ପଦ୍ରୁମୋପଶୋଭିତୈଃ, ଅସଙ୍କୀର୍ଣୈଶ୍ଚ କୈଶ୍ଚିଦନ୍ତସ୍ସ୍ଥପୁଷ୍ପରତ୍ନାଦିନିର୍ମିତ ଦିଵ୍ଯଲୀଲାମଣ୍ଡପ ଶତସହସ୍ରୋପଶୋଭିତୈଃ, ସର୍ଵଦାଽନୁଭୂଯମାନୈରପ୍ଯପୂର୍ଵଵଦାଶ୍ଚର୍ଯମାଵହଦ୍ଭିଃ କ୍ରୀଡାଶୈଲ ଶତସହସ୍ରୈରଲଙ୍କୃତୈଃ, କୈଶ୍ଚିନ୍ନାରାଯଣଦିଵ୍ଯଲୀଲାଽସାଧାରଣୈଃ, କୈଶ୍ଚିତ୍ପଦ୍ମଵନାଲଯା ଦିଵ୍ଯଲୀଲାଽସାଧାରଣୈଃ, ସାଧାରଣୈଶ୍ଚ କୈଶ୍ଚିତ୍ ଶୁକଶାରିକାମଯୂରକୋକିଲାଦିଭିଃ କୋମଲକୂଜିତୈରାକୁଲୈଃ, ଦିଵ୍ଯୋଦ୍ଯାନ ଶତସହସ୍ରୈରାଵୃତେ, ମଣିମୁକ୍ତାପ୍ରଵାଲ କୃତସୋପାନୈଃ, ଦିଵ୍ଯାମଲାମୃତରସୋଦକୈଃ, ଦିଵ୍ଯାଣ୍ଡଜଵରୈଃ, ଅତିରମଣୀଯଦର୍ଶନୈଃ ଅତିମନୋହରମଧୁରସ୍ଵରୈଃ ଆକୁଲୈଃ, ଅନ୍ତସ୍ଥ ମୁକ୍ତାମଯ ଦିଵ୍ଯକ୍ରୀଡାସ୍ଥାନୋପଶୋଭିତୈଃ ଦିଵ୍ଯସୌଗନ୍ଧିକଵାପୀଶତସହସ୍ରୈଃ, ଦିଵ୍ଯରାଜହଂସାଵଲୀଵିରାଜିତୈରାଵୃତେ, ନିରସ୍ତାତିଶଯାନନ୍ଦୈକରସତଯା ଚାନନ୍ତ୍ଯାଚ୍ଚ ପ୍ରଵିଷ୍ଟାନୁନ୍ମାଦଯଦ୍ଭିଃ କ୍ରୀଡୋଦ୍ଦେଶୈର୍ଵିରାଜିତେ, ତତ୍ର ତତ୍ର କୃତ ଦିଵ୍ଯପୁଷ୍ପପର୍ଯଙ୍କୋପଶୋଭିତେ, ନାନାପୁଷ୍ପାସଵାସ୍ଵାଦ ମତ୍ତଭୃଙ୍ଗାଵଲୀଭିଃ ଉଦ୍ଗୀଯମାନ ଦିଵ୍ଯଗାନ୍ଧର୍ଵେଣାପୂରିତେ, ଚନ୍ଦନାଗରୁକର୍ପୂର ଦିଵ୍ଯପୁଷ୍ପାଵଗାହି ମନ୍ଦାନିଲାସେଵ୍ଯମାନେ, ମଧ୍ଯେ ପୁଷ୍ପସଞ୍ଚଯ ଵିଚିତ୍ରିତେ, ମହତି ଦିଵ୍ଯଯୋଗପର୍ଯଙ୍କେ ଅନନ୍ତଭୋଗିନି, ଶ୍ରୀମଦ୍ଵୈକୁଣ୍ଠୈଶ୍ଵର୍ଯାଦି ଦିଵ୍ଯଲୋକଂ ଆତ୍ମକାନ୍ତ୍ଯା ଵିଶ୍ଵମାପ୍ଯାଯଯନ୍ତ୍ଯା ଶେଷ ଶେଷାଶନାଦି ସର୍ଵପରିଜନଂ ଭଗଵତସ୍ତତ୍ତଦଵସ୍ଥୋଚିତ ପରିଚର୍ଯାଯାଂ ଆଜ୍ଞାପଯନ୍ତ୍ଯା, ଶୀଲରୂପଗୁଣ ଵିଲାସାଦିଭିଃ ଆତ୍ମାନୁରୂପଯା ଶ୍ରିଯା ସହାସୀନଂ, ପ୍ରତ୍ଯଗ୍ରୋନ୍ମୀଲିତ ସରସିଜସଦୃଶ ନଯନଯୁଗଲଂ, ସ୍ଵଚ୍ଛନୀଲଜୀମୂତସଙ୍କାଶଂ, ଅତ୍ଯୁଜ୍ଜ୍ଵଲପୀତଵାସସଂ, ସ୍ଵଯା ପ୍ରଭଯାଽତିନିର୍ମଲଯା ଅତିଶୀତଲଯା ଅତିକୋମଲଯା ସ୍ଵଚ୍ଛମାଣିକ୍ଯାଭଯା କୃତ୍ସ୍ନଂ ଜଗଦ୍ଭାସଯନ୍ତଂ,

ଅଚିନ୍ତ୍ଯଦିଵ୍ଯାଦ୍ଭୁତ ନିତ୍ଯଯୌଵନ ସ୍ଵଭାଵଲାଵଣ୍ଯମଯାମୃତସାଗରଂ, ଅତିସୌକୁମାର୍ଯାଦି ଈଷତ୍ ପ୍ରସ୍ଵିନ୍ନଵଦାଲକ୍ଷ୍ଯମାଣ ଲଲାଟଫଲକ ଦିଵ୍ଯାଲକାଵଲୀଵିରାଜିତଂ, ପ୍ରବୁଦ୍ଧମୁଗ୍ଧାମ୍ବୁଜ ଚାରୁଲୋଚନଂ, ସଵିଭ୍ରମଭ୍ରୂଲତଂ, ଉଜ୍ଜ୍ଵଲାଧରଂ, ଶୁଚିସ୍ମିତଂ, କୋମଲଗଣ୍ଡଂ, ଉନ୍ନସଂ, ଉଦଗ୍ରପୀନାଂସ ଵିଲମ୍ବିକୁଣ୍ଡଲାଲକାଵଲୀ ବନ୍ଧୁର କମ୍ବୁକନ୍ଧରଂ, ପ୍ରିଯାଵତଂ‍ସୋତ୍ପଲ କର୍ଣଭୂଷଣଶ୍ଲଥାଲକାବନ୍ଧ ଵିମର୍ଦଶଂସିଭିଃ ଚତୁର୍ଭିରାଜାନୁଵିଲମ୍ବିଭିର୍ଭୁଜୈର୍ଵିରାଜିତଂ, ଅତିକୋମଲ ଦିଵ୍ଯରେଖାଲଙ୍କୃତାତାମ୍ରକରତଲଂ, ଦିଵ୍ଯାଙ୍ଗୁଲୀଯକଵିରାଜିତଂ, ଅତିକୋମଲ ଦିଵ୍ଯନଖାଵଲୀଵିରାଜିତଂ, ଅତିରକ୍ତାଙ୍ଗୁଲୀଭିରଲଙ୍କୃତଂ, ତତ୍କ୍ଷଣୋନ୍ମୀଲିତ ପୁଣ୍ଡରୀକ ସଦୃଶଚରଣଯୁଗଲଂ, ଅତିମନୋହର କିରୀଟମକୁଟ ଚୂଡାଵତଂସ ମକରକୁଣ୍ଡଲ ଗ୍ରୈଵେଯକ ହାର କେଯୂର କଟକ ଶ୍ରୀଵତ୍ସ କୌସ୍ତୁଭ ମୁକ୍ତାଦାମୋଦରବନ୍ଧନ ପୀତାମ୍ବର କାଞ୍ଚୀଗୁଣ ନୂପୁରାଦିଭିରତ୍ଯନ୍ତ ସୁଖସ୍ପର୍ଶୈଃ ଦିଵ୍ଯଗନ୍ଧୈର୍ଭୂଷଣୈର୍ଭୂଷିତଂ, ଶ୍ରୀମତ୍ଯା ଵୈଜଯନ୍ତ୍ଯା ଵନମାଲଯା ଵିରାଜିତଂ, ଶଙ୍ଖଚକ୍ରଗଦାଽସି ଶାର୍ଙ୍ଗାଦି ଦିଵ୍ଯାଯୁଧୈଃ ସେଵ୍ଯମାନଂ, ସ୍ଵସଙ୍କଲ୍ପମାତ୍ରାଵକ୍ଲୁପ୍ତ ଜଗଜ୍ଜନ୍ମସ୍ଥିତିଧ୍ଵଂସାଦିକେ ଶ୍ରୀମତି ଵିଷ୍ଵକ୍ସେନେ ନ୍ଯସ୍ତ ସମସ୍ତାତ୍ମୈଶ୍ଵର୍ଯଂ, ଵୈନତେଯାଦିଭିଃ ସ୍ଵଭାଵତୋ ନିରସ୍ତ ସମସ୍ତ ସାଂସାରିକ ସ୍ଵଭାଵୈଃ ଭଗଵତ୍ପରିଚର୍ଯାକରଣ ଯୋଗ୍ଯୈର୍ଭଗଵତ୍ପରିଚର୍ଯୈକଭୋଗୈ-ର୍ନିତ୍ଯସିଦ୍ଧୈରନନ୍ତୈଃ ଯଥା ଯୋଗଂ ସେଵ୍ଯମାନଂ, ଆତ୍ମଭୋଗେନ ଅନନୁସଂହିତପରାଦିକାଲ ଦିଵ୍ଯାମଲ କୋମଲାଵଲୋକନେନ ଵିଶ୍ଵମାହ୍ଲାଦଯନ୍ତଂ, ଈଷଦୁନ୍ମୀଲିତ ମୁଖାମ୍ବୁଜୋଦରଵିନିର୍ଗତେନ ଦିଵ୍ଯାନନାରଵିନ୍ଦ ଶୋଭାଜନନେନ ଦିଵ୍ଯଗାମ୍ଭୀର୍ଯୌଦାର୍ଯ ସୌନ୍ଦର୍ଯ ମାଧୁର୍ଯାଦ୍ଯନଵଧିକ ଗୁଣଗଣଵିଭୂଷିତେନ, ଅତିମନୋହର ଦିଵ୍ଯଭାଵଗର୍ଭେଣ ଦିଵ୍ଯଲୀଲାଽଽଲାପାମୃତେନ ଅଖିଲଜନ ହୃଦଯାନ୍ତରାଣ୍ଯାପୂରଯନ୍ତଂ ଭଗଵନ୍ତଂ ନାରାଯଣଂ ଧ୍ଯାନଯୋଗେନ ଦୃଷ୍ଟ୍ଵା, ତତୋ ଭଗଵତୋ ନିତ୍ଯସ୍ଵାମ୍ଯମାତ୍ମନୋ ନିତ୍ଯଦାସ୍ଯଂ ଚ ଯଥାଵସ୍ଥିତମନୁସନ୍ଧାଯ, କଦାଽହଂ ଭଗଵନ୍ତଂ ନାରାଯଣଂ, ମମ କୁଲନାଥଂ, ମମ କୁଲଦୈଵତଂ, ମମ କୁଲଧନଂ, ମମ ଭୋଗ୍ଯଂ, ମମ ମାତରଂ, ମମ ପିତରଂ, ମମ ସର୍ଵଂ ସାକ୍ଷାତ୍କରଵାଣି ଚକ୍ଷୁଷା ।

କଦାଽହଂ ଭଗଵତ୍ପାଦାମ୍ବୁଜଦ୍ଵଯଂ ଶିରସା ସଙ୍ଗ୍ରହୀଷ୍ଯାମି । କଦାଽହଂ ଭଗଵତ୍ପାଦାମ୍ବୁଜଦ୍ଵଯ ପରିଚର୍ଯାଽଽଶଯା ନିରସ୍ତସମସ୍ତେତର ଭୋଗାଶଃ, ଅପଗତ ସମସ୍ତ ସାଂସାରିକସ୍ଵଭାଵଃ ତତ୍ପାଦାମ୍ବୁଜଦ୍ଵଯଂ ପ୍ରଵେକ୍ଷ୍ଯାମି । କଦାଽହଂ ଭଗଵତ୍ପାଦାମ୍ବୁଜଦ୍ଵଯ ପରିଚର୍ଯାକରଣଯୋଗ୍ଯ-ସ୍ତଦେକଭୋଗସ୍ତତ୍ପାଦୌ ପରିଚରିଷ୍ଯାମି । କଦା ମାଂ ଭଗଵାନ୍ ସ୍ଵକୀଯଯା ଅତିଶୀତଲଯା ଦୃଶା ଅଵଲୋକ୍ଯ, ସ୍ନିଗ୍ଧଗମ୍ଭୀରମଧୁରଯା ଗିରା ପରିଚର୍ଯାଯାଂ ଆଜ୍ଞାପଯିଷ୍ଯତି, ଇତି ଭଗଵତ୍ପରିଚର୍ଯାଯାମାଶାଂ ଵର୍ଧଯିତ୍ଵା ତଯୈଵାଽଶଯା ତତ୍ପ୍ରସାଦୋପବୃଂହିତଯା ଭଗଵନ୍ତମୁପେତ୍ଯ, ଦୂରାଦେଵ ଭଗଵନ୍ତଂ ଶେଷଭୋଗେ ଶ୍ରିଯା ସହାସୀନଂ ଵୈନତେଯାଦିଭିଃ ସେଵ୍ଯମାନଂ, ସମସ୍ତପରିଵାରାଯ ଶ୍ରୀମତେ ନାରାଯଣାଯ ନମଃ, ଇତି ପ୍ରଣମ୍ଯ ଉତ୍ଥାଯୋତ୍ଥାଯ ପୁନଃ ପୁନଃ ପ୍ରଣମ୍ଯ ଅତ୍ଯନ୍ତ ସାଧ୍ଵସଵିନଯାଵନତୋ ଭୂତ୍ଵା, ଭଗଵତ୍ପାରିଷଦଗଣନାଯକୈର୍ଦ୍ଵାରପାଲୈଃ କୃପଯା ସ୍ନେହଗର୍ଭଯା ଦୃଶାଽଵଲୋକିତଃ ସମ୍ଯଗଭିଵନ୍ଦିତୈସ୍ତୈସ୍ତୈରେଵାନୁମତୋ ଭଗଵନ୍ତମୁପେତ୍ଯ, ଶ୍ରୀମତା ମୂଲମନ୍ତ୍ରେଣ ମାମୈକାନ୍ତିକାତ୍ଯନ୍ତିକ ପରିଚର୍ଯାକରଣାଯ ପରିଗୃହ୍ଣୀଷ୍ଵ ଇତି ଯାଚମାନଃ ପ୍ରଣମ୍ଯାତ୍ମାନଂ ଭଗଵତେ ନିଵେଦଯେତ୍ ।

ତତୋ ଭଗଵତା ସ୍ଵଯମେଵାତ୍ମସଞ୍ଜୀଵନେନ ଅମର୍ଯାଦଶୀଲଵତା ଅତିପ୍ରେମାନ୍ଵିତେନ ଅଵଲୋକନେନାଵଲୋକ୍ଯ ସର୍ଵଦେଶ ସର୍ଵକାଲ ସର୍ଵାଵସ୍ଥୋଚିତାତ୍ଯନ୍ତଶେଷଭାଵାଯ ସ୍ଵୀକୃତୋଽନୁଜ୍ଞାତଶ୍ଚ ଅତ୍ଯନ୍ତସାଧ୍ଵସଵିନଯାଵନତଃ କିଙ୍କୁର୍ଵାଣଃ କୃତାଞ୍ଜଲିପୁଟୋ ଭଗଵନ୍ତମୁପାସୀତ । ତତଶ୍ଚାନୁଭୂଯମାନ ଭାଵଵିଶେଷଃ ନିରତିଶଯପ୍ରୀତ୍ଯାଽନ୍ଯତ୍କିଞ୍ଚିତ୍କର୍ତୁଂ ଦ୍ରଷ୍ଟୁଂ ସ୍ମର୍ତୁମଶକ୍ତଃ ପୁନରପି ଶେଷଭାଵମେଵ ଯାଚମାନୋ ଭଗଵନ୍ତମେଵାଵିଚ୍ଛିନ୍ନସ୍ରୋତୋରୂପେଣାଵଲୋକନେନ ଅଵଲୋକଯନ୍ନାସୀତ । ତତୋ ଭଗଵତା ସ୍ଵଯମେଵାତ୍ମସଞ୍ଜୀଵନେନାଵଲୋକନେନାଵଲୋକ୍ଯ ସସ୍ମିତମାହୂଯ ସମସ୍ତକ୍ଲେଶାପହଂ ନିରତିଶଯସୁଖାଵହମାତ୍ମୀଯଂ, ଶ୍ରୀମତ୍ପାଦାରଵିନ୍ଦଯୁଗଲଂ ଶିରସି କୃତଂ ଧ୍ଯାତ୍ଵା, ଅମୃତସାଗରାନ୍ତର୍ନିମଗ୍ନସର୍ଵାଵଯଵଃ ସୁଖମାସୀତ ।
ଲକ୍ଷ୍ମୀପତେର୍ଯତିପତେଶ୍ଚ ଦଯୈକଧାମ୍ନୋଃ

ଯୋଽସୌ ପୁରା ସମଜନିଷ୍ଟ ଜଗଦ୍ଧିତାର୍ଥମ୍ ।

ପ୍ରାପ୍ଯଂ ପ୍ରକାଶଯତୁ ନଃ ପରମଂ ରହସ୍ଯଂ

ସଂଵାଦ ଏଷ ଶରଣାଗତି ମନ୍ତ୍ରସାରଃ ॥