ଶ୍ରୀ ଲକ୍ଷ୍ମୀ ସହସ୍ରନାମ ସ୍ତୋତ୍ରଂ

ନାମ୍ନାଂ ସାଷ୍ଟସହସ୍ରଞ୍ଚ ବ୍ରୂହି ଗାର୍ଗ୍ଯ ମହାମତେ ।
ମହାଲକ୍ଷ୍ମ୍ଯା ମହାଦେଵ୍ଯା ଭୁକ୍ତିମୁକ୍ତ୍ଯର୍ଥସିଦ୍ଧଯେ ॥ 1 ॥

ସନତ୍କୁମାରମାସୀନଂ ଦ୍ଵାଦଶାଦିତ୍ଯସନ୍ନିଭମ୍ ।
ଅପୃଚ୍ଛନ୍ଯୋଗିନୋ ଭକ୍ତ୍ଯା ଯୋଗିନାମର୍ଥସିଦ୍ଧଯେ ॥ 2 ॥

ସର୍ଵଲୌକିକକର୍ମଭ୍ଯୋ ଵିମୁକ୍ତାନାଂ ହିତାଯ ଵୈ ।
ଭୁକ୍ତିମୁକ୍ତିପ୍ରଦଂ ଜପ୍ଯମନୁବ୍ରୂହି ଦଯାନିଧେ ॥ 3 ॥

ସନତ୍କୁମାର ଭଗଵନ୍ସର୍ଵଜ୍ଞୋଽସି ଵିଶେଷତଃ ।
ଆସ୍ତିକ୍ଯସିଦ୍ଧଯେ ନୄଣାଂ କ୍ଷିପ୍ରଧର୍ମାର୍ଥସାଧନମ୍ ॥ 4 ॥

ଖିଦ୍ଯନ୍ତି ମାନଵାସ୍ସର୍ଵେ ଧନାଭାଵେନ କେଵଲମ୍ ।
ସିଦ୍ଧ୍ଯନ୍ତି ଧନିନୋଽନ୍ଯସ୍ଯ ନୈଵ ଧର୍ମାର୍ଥକାମନାଃ ॥ 5 ॥

ଦାରିଦ୍ର୍ଯଧ୍ଵଂସିନୀ ନାମ କେନ ଵିଦ୍ଯା ପ୍ରକୀର୍ତିତା ।
କେନ ଵା ବ୍ରହ୍ମଵିଦ୍ଯାଽପି କେନ ମୃତ୍ଯୁଵିନାଶିନୀ ॥ 6 ॥

ସର୍ଵାସାଂ ସାରଭୂତୈକା ଵିଦ୍ଯାନାଂ କେନ କୀର୍ତିତା ।
ପ୍ରତ୍ଯକ୍ଷସିଦ୍ଧିଦା ବ୍ରହ୍ମନ୍ ତାମାଚକ୍ଷ୍ଵ ଦଯାନିଧେ ॥ 7 ॥

ସାଧୁ ପୃଷ୍ଟଂ ମହାଭାଗାସ୍ସର୍ଵଲୋକହିତୈଷିଣଃ ।
ମହତାମେଷ ଧର୍ମଶ୍ଚ ନାନ୍ଯେଷାମିତି ମେ ମତିଃ ॥ 8 ॥

ବ୍ରହ୍ମଵିଷ୍ଣୁମହାଦେଵମହେନ୍ଦ୍ରାଦିମହାତ୍ମଭିଃ ।
ସମ୍ପ୍ରୋକ୍ତଂ କଥଯାମ୍ଯଦ୍ଯ ଲକ୍ଷ୍ମୀନାମସହସ୍ରକମ୍ ॥ 9 ॥

ଯସ୍ଯୋଚ୍ଚାରଣମାତ୍ରେଣ ଦାରିଦ୍ର୍ଯାନ୍ମୁଚ୍ଯତେ ନରଃ ।
କିଂ ପୁନସ୍ତଜ୍ଜପାଜ୍ଜାପୀ ସର୍ଵେଷ୍ଟାର୍ଥାନଵାପ୍ନୁଯାତ୍ ॥ 10 ॥
ଅସ୍ଯ ଶ୍ରୀଲକ୍ଷ୍ମୀଦିଵ୍ଯସହସ୍ରନାମସ୍ତୋତ୍ରମହାମନ୍ତ୍ରସ୍ଯ ଆନନ୍ଦକର୍ଦମଚିକ୍ଲୀତେନ୍ଦିରାସୁତାଦଯୋ ମହାତ୍ମାନୋ ମହର୍ଷଯଃ ଅନୁଷ୍ଟୁପ୍ଛନ୍ଦଃ ଵିଷ୍ଣୁମାଯା ଶକ୍ତିଃ ମହାଲକ୍ଷ୍ମୀଃ ପରାଦେଵତା ଶ୍ରୀମହାଲକ୍ଷ୍ମୀପ୍ରସାଦଦ୍ଵାରା ସର୍ଵେଷ୍ଟାର୍ଥସିଦ୍ଧ୍ଯର୍ଥେ ଜପେ ଵିନିଯୋଗଃ ।
ଧ୍ଯାନମ୍
ପଦ୍ମନାଭପ୍ରିଯାଂ ଦେଵୀଂ ପଦ୍ମାକ୍ଷୀଂ ପଦ୍ମଵାସିନୀମ୍ ।
ପଦ୍ମଵକ୍ତ୍ରାଂ ପଦ୍ମହସ୍ତାଂ ଵନ୍ଦେ ପଦ୍ମାମହର୍ନିଶମ୍ ॥ 1 ॥
ପୂର୍ଣେନ୍ଦୁଵଦନାଂ ଦିଵ୍ଯରତ୍ନାଭରଣଭୂଷିତାମ୍ ।
ଵରଦାଭଯହସ୍ତାଢ୍ଯାଂ ଧ୍ଯାଯେଚ୍ଚନ୍ଦ୍ରସହୋଦରୀମ୍ ॥ 2 ॥
ଇଚ୍ଛାରୂପାଂ ଭଗଵତସ୍ସଚ୍ଚିଦାନନ୍ଦରୂପିଣୀମ୍ ।
ସର୍ଵଜ୍ଞାଂ ସର୍ଵଜନନୀଂ ଵିଷ୍ଣୁଵକ୍ଷସ୍ସ୍ଥଲାଲଯାମ୍ ।
ଦଯାଲୁମନିଶଂ ଧ୍ଯାଯେତ୍ସୁଖସିଦ୍ଧିସ୍ଵରୂପିଣୀମ୍ ॥ 3 ॥
ସ୍ତୋତ୍ରମ୍
ନିତ୍ଯାଗତାନନ୍ତନିତ୍ଯା ନନ୍ଦିନୀ ଜନରଞ୍ଜନୀ ।
ନିତ୍ଯପ୍ରକାଶିନୀ ଚୈଵ ସ୍ଵପ୍ରକାଶସ୍ଵରୂପିଣୀ ॥ 1 ॥
ମହାଲକ୍ଷ୍ମୀର୍ମହାକାଲୀ ମହାକନ୍ଯା ସରସ୍ଵତୀ ।
ଭୋଗଵୈଭଵସନ୍ଧାତ୍ରୀ ଭକ୍ତାନୁଗ୍ରହକାରିଣୀ ॥ 2 ॥
ଈଶାଵାସ୍ଯା ମହାମାଯା ମହାଦେଵୀ ମହେଶ୍ଵରୀ ।
ହୃଲ୍ଲେଖା ପରମା ଶକ୍ତିର୍ମାତୃକାବୀଜରୂପିଣୀ ॥ 3 ॥
ନିତ୍ଯାନନ୍ଦା ନିତ୍ଯବୋଧା ନାଦିନୀ ଜନମୋଦିନୀ ।
ସତ୍ଯପ୍ରତ୍ଯଯନୀ ଚୈଵ ସ୍ଵପ୍ରକାଶାତ୍ମରୂପିଣୀ ॥ 4 ॥
ତ୍ରିପୁରା ଭୈରଵୀ ଵିଦ୍ଯା ହଂସା ଵାଗୀଶ୍ଵରୀ ଶିଵା ।
ଵାଗ୍ଦେଵୀ ଚ ମହାରାତ୍ରିଃ କାଲରାତ୍ରିସ୍ତ୍ରିଲୋଚନା ॥ 5 ॥
ଭଦ୍ରକାଲୀ କରାଲୀ ଚ ମହାକାଲୀ ତିଲୋତ୍ତମା ।
କାଲୀ କରାଲଵକ୍ତ୍ରାନ୍ତା କାମାକ୍ଷୀ କାମଦା ଶୁଭା ॥ 6 ॥
ଚଣ୍ଡିକା ଚଣ୍ଡରୂପେଶା ଚାମୁଣ୍ଡା ଚକ୍ରଧାରିଣୀ ।
ତ୍ରୈଲୋକ୍ଯଜଯିନୀ ଦେଵୀ ତ୍ରୈଲୋକ୍ଯଵିଜଯୋତ୍ତମା ॥ 7 ॥
ସିଦ୍ଧଲକ୍ଷ୍ମୀଃ କ୍ରିଯାଲକ୍ଷ୍ମୀର୍ମୋକ୍ଷଲକ୍ଷ୍ମୀଃ ପ୍ରସାଦିନୀ ।
ଉମା ଭଗଵତୀ ଦୁର୍ଗା ଚାନ୍ଦ୍ରୀ ଦାକ୍ଷାଯଣୀ ଶିଵା ॥ 8 ॥
ପ୍ରତ୍ଯଙ୍ଗିରା ଧରାଵେଲା ଲୋକମାତା ହରିପ୍ରିଯା ।
ପାର୍ଵତୀ ପରମା ଦେଵୀ ବ୍ରହ୍ମଵିଦ୍ଯାପ୍ରଦାଯିନୀ ॥ 9 ॥
ଅରୂପା ବହୁରୂପା ଚ ଵିରୂପା ଵିଶ୍ଵରୂପିଣୀ ।
ପଞ୍ଚଭୂତାତ୍ମିକା ଵାଣୀ ପଞ୍ଚଭୂତାତ୍ମିକା ପରା ॥ 10 ॥
କାଲୀ ମା ପଞ୍ଚିକା ଵାଗ୍ମୀ ହଵିଃପ୍ରତ୍ଯଧିଦେଵତା ।
ଦେଵମାତା ସୁରେଶାନା ଦେଵଗର୍ଭାଽମ୍ବିକା ଧୃତିଃ ॥ 11 ॥
ସଙ୍ଖ୍ଯା ଜାତିଃ କ୍ରିଯାଶକ୍ତିଃ ପ୍ରକୃତିର୍ମୋହିନୀ ମହୀ ।
ଯଜ୍ଞଵିଦ୍ଯା ମହାଵିଦ୍ଯା ଗୁହ୍ଯଵିଦ୍ଯା ଵିଭାଵରୀ ॥ 12 ॥
ଜ୍ଯୋତିଷ୍ମତୀ ମହାମାତା ସର୍ଵମନ୍ତ୍ରଫଲପ୍ରଦା ।
ଦାରିଦ୍ର୍ଯଧ୍ଵଂସିନୀ ଦେଵୀ ହୃଦଯଗ୍ରନ୍ଥିଭେଦିନୀ ॥ 13 ॥
ସହସ୍ରାଦିତ୍ଯସଙ୍କାଶା ଚନ୍ଦ୍ରିକା ଚନ୍ଦ୍ରରୂପିଣୀ ।
ଗାଯତ୍ରୀ ସୋମସମ୍ଭୂତିସ୍ସାଵିତ୍ରୀ ପ୍ରଣଵାତ୍ମିକା ॥ 14 ॥
ଶାଙ୍କରୀ ଵୈଷ୍ଣଵୀ ବ୍ରାହ୍ମୀ ସର୍ଵଦେଵନମସ୍କୃତା ।
ସେଵ୍ଯଦୁର୍ଗା କୁବେରାକ୍ଷୀ କରଵୀରନିଵାସିନୀ ॥ 15 ॥
ଜଯା ଚ ଵିଜଯା ଚୈଵ ଜଯନ୍ତୀ ଚାଽପରାଜିତା ।
କୁବ୍ଜିକା କାଲିକା ଶାସ୍ତ୍ରୀ ଵୀଣାପୁସ୍ତକଧାରିଣୀ ॥ 16 ॥
ସର୍ଵଜ୍ଞଶକ୍ତିଶ୍ଶ୍ରୀଶକ୍ତିର୍ବ୍ରହ୍ମଵିଷ୍ଣୁଶିଵାତ୍ମିକା ।
ଇଡାପିଙ୍ଗଲିକାମଧ୍ଯମୃଣାଲୀତନ୍ତୁରୂପିଣୀ ॥ 17 ॥
ଯଜ୍ଞେଶାନୀ ପ୍ରଥା ଦୀକ୍ଷା ଦକ୍ଷିଣା ସର୍ଵମୋହିନୀ ।
ଅଷ୍ଟାଙ୍ଗଯୋଗିନୀ ଦେଵୀ ନିର୍ବୀଜଧ୍ଯାନଗୋଚରା ॥ 18 ॥
ସର୍ଵତୀର୍ଥସ୍ଥିତା ଶୁଦ୍ଧା ସର୍ଵପର୍ଵତଵାସିନୀ ।
ଵେଦଶାସ୍ତ୍ରପ୍ରଭା ଦେଵୀ ଷଡଙ୍ଗାଦିପଦକ୍ରମା ॥ 19 ॥
ଶିଵା ଧାତ୍ରୀ ଶୁଭାନନ୍ଦା ଯଜ୍ଞକର୍ମସ୍ଵରୂପିଣୀ ।
ଵ୍ରତିନୀ ମେନକା ଦେଵୀ ବ୍ରହ୍ମାଣୀ ବ୍ରହ୍ମଚାରିଣୀ ॥ 20 ॥
ଏକାକ୍ଷରପରା ତାରା ଭଵବନ୍ଧଵିନାଶିନୀ ।
ଵିଶ୍ଵମ୍ଭରା ଧରାଧାରା ନିରାଧାରାଽଧିକସ୍ଵରା ॥ 21 ॥
ରାକା କୁହୂରମାଵାସ୍ଯା ପୂର୍ଣିମାଽନୁମତିର୍ଦ୍ଯୁତିଃ ।
ସିନୀଵାଲୀ ଶିଵାଽଵଶ୍ଯା ଵୈଶ୍ଵଦେଵୀ ପିଶଙ୍ଗିଲା ॥ 22 ॥
ପିପ୍ପଲା ଚ ଵିଶାଲାକ୍ଷୀ ରକ୍ଷୋଘ୍ନୀ ଵୃଷ୍ଟିକାରିଣୀ ।
ଦୁଷ୍ଟଵିଦ୍ରାଵିଣୀ ଦେଵୀ ସର୍ଵୋପଦ୍ରଵନାଶିନୀ ॥ 23 ॥
ଶାରଦା ଶରସନ୍ଧାନା ସର୍ଵଶସ୍ତ୍ରସ୍ଵରୂପିଣୀ ।
ଯୁଦ୍ଧମଧ୍ଯସ୍ଥିତା ଦେଵୀ ସର୍ଵଭୂତପ୍ରଭଞ୍ଜନୀ ॥ 24 ॥
ଅଯୁଦ୍ଧା ଯୁଦ୍ଧରୂପା ଚ ଶାନ୍ତା ଶାନ୍ତିସ୍ଵରୂପିଣୀ ।
ଗଙ୍ଗା ସରସ୍ଵତୀଵେଣୀଯମୁନାନର୍ମଦାପଗା ॥ 25 ॥
ସମୁଦ୍ରଵସନାଵାସା ବ୍ରହ୍ମାଣ୍ଡଶ୍ରୋଣିମେଖଲା ।
ପଞ୍ଚଵକ୍ତ୍ରା ଦଶଭୁଜା ଶୁଦ୍ଧସ୍ଫଟିକସନ୍ନିଭା ॥ 26 ॥
ରକ୍ତା କୃଷ୍ଣା ସିତା ପୀତା ସର୍ଵଵର୍ଣା ନିରୀଶ୍ଵରୀ ।
କାଲିକା ଚକ୍ରିକା ଦେଵୀ ସତ୍ଯା ତୁ ଵଟୁକାସ୍ଥିତା ॥ 27 ॥
ତରୁଣୀ ଵାରୁଣୀ ନାରୀ ଜ୍ଯେଷ୍ଠାଦେଵୀ ସୁରେଶ୍ଵରୀ ।
ଵିଶ୍ଵମ୍ଭରାଧରା କର୍ତ୍ରୀ ଗଲାର୍ଗଲଵିଭଞ୍ଜନୀ ॥ 28 ॥
ସନ୍ଧ୍ଯାରାତ୍ରିର୍ଦିଵାଜ୍ଯୋତ୍ସ୍ନା କଲାକାଷ୍ଠା ନିମେଷିକା ।
ଉର୍ଵୀ କାତ୍ଯାଯନୀ ଶୁଭ୍ରା ସଂସାରାର୍ଣଵତାରିଣୀ ॥ 29 ॥
କପିଲା କୀଲିକାଽଶୋକା ମଲ୍ଲିକାନଵମଲ୍ଲିକା । [ ମଲ୍ଲିକାନଵମାଲିକା ]
ଦେଵିକା ନନ୍ଦିକା ଶାନ୍ତା ଭଞ୍ଜିକା ଭଯଭଞ୍ଜିକା ॥ 30 ॥
କୌଶିକୀ ଵୈଦିକୀ ଦେଵୀ ସୌରୀ ରୂପାଧିକାଽତିଭା ।
ଦିଗ୍ଵସ୍ତ୍ରା ନଵଵସ୍ତ୍ରା ଚ କନ୍ଯକା କମଲୋଦ୍ଭଵା ॥ 31 ॥
ଶ୍ରୀସ୍ସୌମ୍ଯଲକ୍ଷଣାଽତୀତଦୁର୍ଗା ସୂତ୍ରପ୍ରବୋଧିକା ।
ଶ୍ରଦ୍ଧା ମେଧା କୃତିଃ ପ୍ରଜ୍ଞା ଧାରଣା କାନ୍ତିରେଵ ଚ ॥ 32 ॥
ଶ୍ରୁତିଃ ସ୍ମୃତିର୍ଧୃତିର୍ଧନ୍ଯା ଭୂତିରିଷ୍ଟିର୍ମନୀଷିଣୀ ।
ଵିରକ୍ତିର୍ଵ୍ଯାପିନୀ ମାଯା ସର୍ଵମାଯାପ୍ରଭଞ୍ଜନୀ ॥ 33 ॥
ମାହେନ୍ଦ୍ରୀ ମନ୍ତ୍ରିଣୀ ସିଂହୀ ଚେନ୍ଦ୍ରଜାଲସ୍ଵରୂପିଣୀ ।
ଅଵସ୍ଥାତ୍ରଯନିର୍ମୁକ୍ତା ଗୁଣତ୍ରଯଵିଵର୍ଜିତା ॥ 34 ॥
ଈଷଣାତ୍ରଯନିର୍ମୁକ୍ତା ସର୍ଵରୋଗଵିଵର୍ଜିତା ।
ଯୋଗିଧ୍ଯାନାନ୍ତଗମ୍ଯା ଚ ଯୋଗଧ୍ଯାନପରାଯଣା ॥ 35 ॥
ତ୍ରଯୀଶିଖା ଵିଶେଷଜ୍ଞା ଵେଦାନ୍ତଜ୍ଞାନରୂପିଣୀ ।
ଭାରତୀ କମଲା ଭାଷା ପଦ୍ମା ପଦ୍ମଵତୀ କୃତିଃ ॥ 36 ॥
ଗୌତମୀ ଗୋମତୀ ଗୌରୀ ଈଶାନା ହଂସଵାହିନୀ ।
ନାରାଯଣୀ ପ୍ରଭାଧାରା ଜାହ୍ନଵୀ ଶଙ୍କରାତ୍ମଜା ॥ 37 ॥
ଚିତ୍ରଘଣ୍ଟା ସୁନନ୍ଦା ଶ୍ରୀର୍ମାନଵୀ ମନୁସମ୍ଭଵା ।
ସ୍ତମ୍ଭିନୀ କ୍ଷୋଭିଣୀ ମାରୀ ଭ୍ରାମିଣୀ ଶତ୍ରୁମାରିଣୀ ॥ 38 ॥
ମୋହିନୀ ଦ୍ଵେଷିଣୀ ଵୀରା ଅଘୋରା ରୁଦ୍ରରୂପିଣୀ ।
ରୁଦ୍ରୈକାଦଶିନୀ ପୁଣ୍ଯା କଲ୍ଯାଣୀ ଲାଭକାରିଣୀ ॥ 39 ॥
ଦେଵଦୁର୍ଗା ମହାଦୁର୍ଗା ସ୍ଵପ୍ନଦୁର୍ଗାଽଷ୍ଟଭୈରଵୀ ।
ସୂର୍ଯଚନ୍ଦ୍ରାଗ୍ନିରୂପା ଚ ଗ୍ରହନକ୍ଷତ୍ରରୂପିଣୀ ॥ 40 ॥
ବିନ୍ଦୁନାଦକଲାତୀତା ବିନ୍ଦୁନାଦକଲାତ୍ମିକା ।
ଦଶଵାଯୁଜଯାକାରା କଲାଷୋଡଶସଂଯୁତା ॥ 41 ॥
କାଶ୍ଯପୀ କମଲାଦେଵୀ ନାଦଚକ୍ରନିଵାସିନୀ ।
ମୃଡାଧାରା ସ୍ଥିରା ଗୁହ୍ଯା ଦେଵିକା ଚକ୍ରରୂପିଣୀ ॥ 42 ॥
ଅଵିଦ୍ଯା ଶାର୍ଵରୀ ଭୁଞ୍ଜା ଜମ୍ଭାସୁରନିବର୍ହିଣୀ ।
ଶ୍ରୀକାଯା ଶ୍ରୀକଲା ଶୁଭ୍ରା କର୍ମନିର୍ମୂଲକାରିଣୀ ॥ 43 ॥
ଆଦିଲକ୍ଷ୍ମୀର୍ଗୁଣାଧାରା ପଞ୍ଚବ୍ରହ୍ମାତ୍ମିକା ପରା ।
ଶ୍ରୁତିର୍ବ୍ରହ୍ମମୁଖାଵାସା ସର୍ଵସମ୍ପତ୍ତିରୂପିଣୀ ॥ 44 ॥
ମୃତସଞ୍ଜୀଵନୀ ମୈତ୍ରୀ କାମିନୀ କାମଵର୍ଜିତା ।
ନିର୍ଵାଣମାର୍ଗଦା ଦେଵୀ ହଂସିନୀ କାଶିକା କ୍ଷମା ॥ 45 ॥
ସପର୍ଯା ଗୁଣିନୀ ଭିନ୍ନା ନିର୍ଗୁଣା ଖଣ୍ଡିତାଶୁଭା ।
ସ୍ଵାମିନୀ ଵେଦିନୀ ଶକ୍ଯା ଶାମ୍ବରୀ ଚକ୍ରଧାରିଣୀ ॥ 46 ॥
ଦଣ୍ଡିନୀ ମୁଣ୍ଡିନୀ ଵ୍ଯାଘ୍ରୀ ଶିଖିନୀ ସୋମସଂହତିଃ ।
ଚିନ୍ତାମଣିଶ୍ଚିଦାନନ୍ଦା ପଞ୍ଚବାଣପ୍ରବୋଧିନୀ ॥ 47 ॥
ବାଣଶ୍ରେଣିସ୍ସହସ୍ରାକ୍ଷୀ ସହସ୍ରଭୁଜପାଦୁକା ।
ସନ୍ଧ୍ଯାଵଲିସ୍ତ୍ରିସନ୍ଧ୍ଯାଖ୍ଯା ବ୍ରହ୍ମାଣ୍ଡମଣିଭୂଷଣା ॥ 48 ॥
ଵାସଵୀ ଵାରୁଣୀସେନା କୁଲିକା ମନ୍ତ୍ରରଞ୍ଜନୀ ।
ଜିତପ୍ରାଣସ୍ଵରୂପା ଚ କାନ୍ତା କାମ୍ଯଵରପ୍ରଦା ॥ 49 ॥
ମନ୍ତ୍ରବ୍ରାହ୍ମଣଵିଦ୍ଯାର୍ଥା ନାଦରୂପା ହଵିଷ୍ମତୀ ।
ଆଥର୍ଵଣିଃ ଶ୍ରୁତିଃ ଶୂନ୍ଯା କଲ୍ପନାଵର୍ଜିତା ସତୀ ॥ 50 ॥
ସତ୍ତାଜାତିଃ ପ୍ରମାଽମେଯାଽପ୍ରମିତିଃ ପ୍ରାଣଦା ଗତିଃ ।
ଅଵର୍ଣା ପଞ୍ଚଵର୍ଣା ଚ ସର୍ଵଦା ଭୁଵନେଶ୍ଵରୀ ॥ 51 ॥
ତ୍ରୈଲୋକ୍ଯମୋହିନୀ ଵିଦ୍ଯା ସର୍ଵଭର୍ତ୍ରୀ କ୍ଷରାଽକ୍ଷରା ।
ହିରଣ୍ଯଵର୍ଣା ହରିଣୀ ସର୍ଵୋପଦ୍ରଵନାଶିନୀ ॥ 52 ॥
କୈଵଲ୍ଯପଦଵୀରେଖା ସୂର୍ଯମଣ୍ଡଲସଂସ୍ଥିତା ।
ସୋମମଣ୍ଡଲମଧ୍ଯସ୍ଥା ଵହ୍ନିମଣ୍ଡଲସଂସ୍ଥିତା ॥ 53 ॥
ଵାଯୁମଣ୍ଡଲମଧ୍ଯସ୍ଥା ଵ୍ଯୋମମଣ୍ଡଲସଂସ୍ଥିତା ।
ଚକ୍ରିକା ଚକ୍ରମଧ୍ଯସ୍ଥା ଚକ୍ରମାର୍ଗପ୍ରଵର୍ତିନୀ ॥ 54 ॥
କୋକିଲାକୁଲଚକ୍ରେଶା ପକ୍ଷତିଃ ପଙ୍କ୍ତିପାଵନୀ ।
ସର୍ଵସିଦ୍ଧାନ୍ତମାର୍ଗସ୍ଥା ଷଡ୍ଵର୍ଣାଵରଵର୍ଜିତା ॥ 55 ॥
ଶରରୁଦ୍ରହରା ହନ୍ତ୍ରୀ ସର୍ଵସଂହାରକାରିଣୀ ।
ପୁରୁଷା ପୌରୁଷୀ ତୁଷ୍ଟିସ୍ସର୍ଵତନ୍ତ୍ରପ୍ରସୂତିକା ॥ 56 ॥
ଅର୍ଧନାରୀଶ୍ଵରୀ ଦେଵୀ ସର୍ଵଵିଦ୍ଯାପ୍ରଦାଯିନୀ ।
ଭାର୍ଗଵୀ ଯାଜୁଷୀଵିଦ୍ଯା ସର୍ଵୋପନିଷଦାସ୍ଥିତା ॥ 57 ॥ [ ଭୁଜୁଷୀଵିଦ୍ଯା ]
ଵ୍ଯୋମକେଶାଖିଲପ୍ରାଣା ପଞ୍ଚକୋଶଵିଲକ୍ଷଣା ।
ପଞ୍ଚକୋଶାତ୍ମିକା ପ୍ରତ୍ଯକ୍ପଞ୍ଚବ୍ରହ୍ମାତ୍ମିକା ଶିଵା ॥ 58 ॥
ଜଗଜ୍ଜରାଜନିତ୍ରୀ ଚ ପଞ୍ଚକର୍ମପ୍ରସୂତିକା ।
ଵାଗ୍ଦେଵ୍ଯାଭରଣାକାରା ସର୍ଵକାମ୍ଯସ୍ଥିତାସ୍ଥିତିଃ ॥ 59 ॥
ଅଷ୍ଟାଦଶଚତୁଷ୍ଷଷ୍ଠିପୀଠିକା ଵିଦ୍ଯଯା ଯୁତା ।
କାଲିକାକର୍ଷଣଶ୍ଯାମା ଯକ୍ଷିଣୀ କିନ୍ନରେଶ୍ଵରୀ ॥ 60 ॥
କେତକୀ ମଲ୍ଲିକାଽଶୋକା ଵାରାହୀ ଧରଣୀ ଧ୍ରୁଵା ।
ନାରସିଂହୀ ମହୋଗ୍ରାସ୍ଯା ଭକ୍ତାନାମାର୍ତିନାଶିନୀ ॥ 61 ॥
ଅନ୍ତର୍ବଲା ସ୍ଥିରା ଲକ୍ଷ୍ମୀର୍ଜରାମରଣନାଶିନୀ ।
ଶ୍ରୀରଞ୍ଜିତା ମହାକାଯା ସୋମସୂର୍ଯାଗ୍ନିଲୋଚନା ॥ 62 ॥
ଅଦିତିର୍ଦେଵମାତା ଚ ଅଷ୍ଟପୁତ୍ରାଽଷ୍ଟଯୋଗିନୀ ।
ଅଷ୍ଟପ୍ରକୃତିରଷ୍ଟାଷ୍ଟଵିଭ୍ରାଜଦ୍ଵିକୃତାକୃତିଃ ॥ 63 ॥
ଦୁର୍ଭିକ୍ଷଧ୍ଵଂସିନୀ ଦେଵୀ ସୀତା ସତ୍ଯା ଚ ରୁକ୍ମିଣୀ ।
ଖ୍ଯାତିଜା ଭାର୍ଗଵୀ ଦେଵୀ ଦେଵଯୋନିସ୍ତପସ୍ଵିନୀ ॥ 64 ॥
ଶାକମ୍ଭରୀ ମହାଶୋଣା ଗରୁଡୋପରିସଂସ୍ଥିତା ।
ସିଂହଗା ଵ୍ଯାଘ୍ରଗା ଦେଵୀ ଵାଯୁଗା ଚ ମହାଦ୍ରିଗା ॥ 65 ॥
ଅକାରାଦିକ୍ଷକାରାନ୍ତା ସର୍ଵଵିଦ୍ଯାଧିଦେଵତା ।
ମନ୍ତ୍ରଵ୍ଯାଖ୍ଯାନନିପୁଣା ଜ୍ଯୋତିଶ୍ଶାସ୍ତ୍ରୈକଲୋଚନା ॥ 66 ॥
ଇଡାପିଙ୍ଗଲିକାମଧ୍ଯାସୁଷୁମ୍ନା ଗ୍ରନ୍ଥିଭେଦିନୀ ।
କାଲଚକ୍ରାଶ୍ରଯୋପେତା କାଲଚକ୍ରସ୍ଵରୂପିଣୀ ॥ 67 ॥
ଵୈଶାରଦୀ ମତିଶ୍ଶ୍ରେଷ୍ଠା ଵରିଷ୍ଠା ସର୍ଵଦୀପିକା ।
ଵୈନାଯକୀ ଵରାରୋହା ଶ୍ରୋଣିଵେଲା ବହିର୍ଵଲିଃ ॥ 68 ॥
ଜମ୍ଭିନୀ ଜୃମ୍ଭିଣୀ ଜମ୍ଭକାରିଣୀ ଗଣକାରିକା ।
ଶରଣୀ ଚକ୍ରିକାଽନନ୍ତା ସର୍ଵଵ୍ଯାଧିଚିକିତ୍ସକୀ ॥ 69 ॥
ଦେଵକୀ ଦେଵସଙ୍କାଶା ଵାରିଧିଃ କରୁଣାକରା ।
ଶର୍ଵରୀ ସର୍ଵସମ୍ପନ୍ନା ସର୍ଵପାପପ୍ରଭଞ୍ଜନୀ ॥ 70 ॥
ଏକମାତ୍ରା ଦ୍ଵିମାତ୍ରା ଚ ତ୍ରିମାତ୍ରା ଚ ତଥାଽପରା ।
ଅର୍ଧମାତ୍ରା ପରା ସୂକ୍ଷ୍ମା ସୂକ୍ଷ୍ମାର୍ଥାଽର୍ଥପରାଽପରା ॥ 71 ॥
ଏକଵୀରା ଵିଶେଷାଖ୍ଯା ଷଷ୍ଠୀଦେଵୀ ମନସ୍ଵିନୀ ।
ନୈଷ୍କର୍ମ୍ଯା ନିଷ୍କଲାଲୋକା ଜ୍ଞାନକର୍ମାଧିକା ଗୁଣା ॥ 72 ॥
ସବନ୍ଧ୍ଵାନନ୍ଦସନ୍ଦୋହା ଵ୍ଯୋମାକାରାଽନିରୂପିତା ।
ଗଦ୍ଯପଦ୍ଯାତ୍ମିକା ଵାଣୀ ସର୍ଵାଲଙ୍କାରସଂଯୁତା ॥ 73 ॥
ସାଧୁବନ୍ଧପଦନ୍ଯାସା ସର୍ଵୌକୋ ଘଟିକାଵଲିଃ ।
ଷଟ୍କର୍ମା କର୍କଶାକାରା ସର୍ଵକର୍ମଵିଵର୍ଜିତା ॥ 74 ॥
ଆଦିତ୍ଯଵର୍ଣା ଚାପର୍ଣା କାମିନୀ ଵରରୂପିଣୀ ।
ବ୍ରହ୍ମାଣୀ ବ୍ରହ୍ମସନ୍ତାନା ଵେଦଵାଗୀଶ୍ଵରୀ ଶିଵା ॥ 75 ॥
ପୁରାଣନ୍ଯାଯମୀମାଂସାଧର୍ମଶାସ୍ତ୍ରାଗମଶ୍ରୁତା ।
ସଦ୍ଯୋଵେଦଵତୀ ସର୍ଵା ହଂସୀ ଵିଦ୍ଯାଧିଦେଵତା ॥ 76 ॥
ଵିଶ୍ଵେଶ୍ଵରୀ ଜଗଦ୍ଧାତ୍ରୀ ଵିଶ୍ଵନିର୍ମାଣକାରିଣୀ ।
ଵୈଦିକୀ ଵେଦରୂପା ଚ କାଲିକା କାଲରୂପିଣୀ ॥ 77 ॥
ନାରାଯଣୀ ମହାଦେଵୀ ସର୍ଵତତ୍ତ୍ଵପ୍ରଵର୍ତିନୀ ।
ହିରଣ୍ଯଵର୍ଣରୂପା ଚ ହିରଣ୍ଯପଦସମ୍ଭଵା ॥ 78 ॥
କୈଵଲ୍ଯପଦଵୀ ପୁଣ୍ଯା କୈଵଲ୍ଯଜ୍ଞାନଲକ୍ଷିତା ।
ବ୍ରହ୍ମସମ୍ପତ୍ତିରୂପା ଚ ବ୍ରହ୍ମସମ୍ପତ୍ତିକାରିଣୀ ॥ 79 ॥
ଵାରୁଣୀ ଵାରୁଣାରାଧ୍ଯା ସର୍ଵକର୍ମପ୍ରଵର୍ତିନୀ ।
ଏକାକ୍ଷରପରାଽଽଯୁକ୍ତା ସର୍ଵଦାରିଦ୍ର୍ଯଭଞ୍ଜିନୀ ॥ 80 ॥
ପାଶାଙ୍କୁଶାନ୍ଵିତା ଦିଵ୍ଯା ଵୀଣାଵ୍ଯାଖ୍ଯାକ୍ଷସୂତ୍ରଭୃତ୍ ।
ଏକମୂର୍ତିସ୍ତ୍ରଯୀମୂର୍ତିର୍ମଧୁକୈଟଭଭଞ୍ଜିନୀ ॥ 81 ॥
ସାଙ୍ଖ୍ଯା ସାଙ୍ଖ୍ଯଵତୀ ଜ୍ଵାଲା ଜ୍ଵଲନ୍ତୀ କାମରୂପିଣୀ ।
ଜାଗ୍ରତୀ ସର୍ଵସମ୍ପତ୍ତିସ୍ସୁଷୁପ୍ତା ସ୍ଵେଷ୍ଟଦାଯିନୀ ॥ 82 ॥
କପାଲିନୀ ମହାଦଂଷ୍ଟ୍ରା ଭ୍ରୁକୁଟୀ କୁଟିଲାନନା ।
ସର୍ଵାଵାସା ସୁଵାସା ଚ ବୃହତ୍ଯଷ୍ଟିଶ୍ଚ ଶକ୍ଵରୀ ॥ 83 ॥
ଛନ୍ଦୋଗଣପ୍ରତିଷ୍ଠା ଚ କଲ୍ମାଷୀ କରୁଣାତ୍ମିକା ।
ଚକ୍ଷୁଷ୍ମତୀ ମହାଘୋଷା ଖଡ୍ଗଚର୍ମଧରାଽଶନିଃ ॥ 84 ॥
ଶିଲ୍ପଵୈଚିତ୍ର୍ଯଵିଦ୍ଯୋତା ସର୍ଵତୋଭଦ୍ରଵାସିନୀ ।
ଅଚିନ୍ତ୍ଯଲକ୍ଷଣାକାରା ସୂତ୍ରଭାଷ୍ଯନିବନ୍ଧନା ॥ 85 ॥
ସର୍ଵଵେଦାର୍ଥସମ୍ପତ୍ତିସ୍ସର୍ଵଶାସ୍ତ୍ରାର୍ଥମାତୃକା ।
ଅକାରାଦିକ୍ଷକାରାନ୍ତସର୍ଵଵର୍ଣକୃତସ୍ଥଲା ॥ 86 ॥
ସର୍ଵଲକ୍ଷ୍ମୀସ୍ସଦାନନ୍ଦା ସାରଵିଦ୍ଯା ସଦାଶିଵା ।
ସର୍ଵଜ୍ଞା ସର୍ଵଶକ୍ତିଶ୍ଚ ଖେଚରୀରୂପଗୋଚ୍ଛ୍ରିତା ॥ 87 ॥
ଅଣିମାଦିଗୁଣୋପେତା ପରା କାଷ୍ଠା ପରା ଗତିଃ ।
ହଂସଯୁକ୍ତଵିମାନସ୍ଥା ହଂସାରୂଢା ଶଶିପ୍ରଭା ॥ 88 ॥
ଭଵାନୀ ଵାସନାଶକ୍ତିରାକୃତିସ୍ଥାଖିଲାଽଖିଲା ।
ତନ୍ତ୍ରହେତୁର୍ଵିଚିତ୍ରାଙ୍ଗୀ ଵ୍ଯୋମଗଙ୍ଗାଵିନୋଦିନୀ ॥ 89 ॥
ଵର୍ଷା ଚ ଵାର୍ଷିକା ଚୈଵ ଋଗ୍ଯଜୁସ୍ସାମରୂପିଣୀ ।
ମହାନଦୀନଦୀପୁଣ୍ଯାଽଗଣ୍ଯପୁଣ୍ଯଗୁଣକ୍ରିଯା ॥ 90 ॥
ସମାଧିଗତଲଭ୍ଯାର୍ଥା ଶ୍ରୋତଵ୍ଯା ସ୍ଵପ୍ରିଯା ଘୃଣା ।
ନାମାକ୍ଷରପରା ଦେଵୀ ଉପସର୍ଗନଖାଞ୍ଚିତା ॥ 91 ॥
ନିପାତୋରୁଦ୍ଵଯୀଜଙ୍ଘା ମାତୃକା ମନ୍ତ୍ରରୂପିଣୀ ।
ଆସୀନା ଚ ଶଯାନା ଚ ତିଷ୍ଠନ୍ତୀ ଧାଵନାଧିକା ॥ 92 ॥
ଲକ୍ଷ୍ଯଲକ୍ଷଣଯୋଗାଢ୍ଯା ତାଦ୍ରୂପ୍ଯଗଣନାକୃତିଃ ।
ସୈକରୂପା ନୈକରୂପା ସେନ୍ଦୁରୂପା ତଦାକୃତିଃ ॥ 93 ॥
ସମାସତଦ୍ଧିତାକାରା ଵିଭକ୍ତିଵଚନାତ୍ମିକା ।
ସ୍ଵାହାକାରା ସ୍ଵଧାକାରା ଶ୍ରୀପତ୍ଯର୍ଧାଙ୍ଗନନ୍ଦିନୀ ॥ 94 ॥
ଗମ୍ଭୀରା ଗହନା ଗୁହ୍ଯା ଯୋନିଲିଙ୍ଗାର୍ଧଧାରିଣୀ ।
ଶେଷଵାସୁକିସଂସେଵ୍ଯା ଚପଲା ଵରଵର୍ଣିନୀ ॥ 95 ॥
କାରୁଣ୍ଯାକାରସମ୍ପତ୍ତିଃ କୀଲକୃନ୍ମନ୍ତ୍ରକୀଲିକା ।
ଶକ୍ତିବୀଜାତ୍ମିକା ସର୍ଵମନ୍ତ୍ରେଷ୍ଟାକ୍ଷଯକାମନା ॥ 96 ॥
ଆଗ୍ନେଯୀ ପାର୍ଥିଵା ଆପ୍ଯା ଵାଯଵ୍ଯା ଵ୍ଯୋମକେତନା ।
ସତ୍ଯଜ୍ଞାନାତ୍ମିକାଽଽନନ୍ଦା ବ୍ରାହ୍ମୀ ବ୍ରହ୍ମ ସନାତନୀ ॥ 97 ॥
ଅଵିଦ୍ଯାଵାସନା ମାଯାପ୍ରକୃତିସ୍ସର୍ଵମୋହିନୀ ।
ଶକ୍ତିର୍ଧାରଣଶକ୍ତିଶ୍ଚ ଚିଦଚିଚ୍ଛକ୍ତିଯୋଗିନୀ ॥ 98 ॥
ଵକ୍ତ୍ରାରୁଣା ମହାମାଯା ମରୀଚିର୍ମଦମର୍ଦିନୀ ।
ଵିରାଟ୍ ସ୍ଵାହା ସ୍ଵଧା ଶୁଦ୍ଧା ନୀରୂପାସ୍ତିସ୍ସୁଭକ୍ତିଗା ॥ 99 ॥
ନିରୂପିତାଦ୍ଵଯୀଵିଦ୍ଯା ନିତ୍ଯାନିତ୍ଯସ୍ଵରୂପିଣୀ ।
ଵୈରାଜମାର୍ଗସଞ୍ଚାରା ସର୍ଵସତ୍ପଥଦର୍ଶିନୀ ॥ 100 ॥
ଜାଲନ୍ଧରୀ ମୃଡାନୀ ଚ ଭଵାନୀ ଭଵଭଞ୍ଜନୀ ।
ତ୍ରୈକାଲିକଜ୍ଞାନତନ୍ତୁସ୍ତ୍ରିକାଲଜ୍ଞାନଦାଯିନୀ ॥ 101 ॥
ନାଦାତୀତା ସ୍ମୃତିଃ ପ୍ରଜ୍ଞା ଧାତ୍ରୀରୂପା ତ୍ରିପୁଷ୍କରା ।
ପରାଜିତାଵିଧାନଜ୍ଞା ଵିଶେଷିତଗୁଣାତ୍ମିକା ॥ 102 ॥
ହିରଣ୍ଯକେଶିନୀ ହେମବ୍ରହ୍ମସୂତ୍ରଵିଚକ୍ଷଣା ।
ଅସଙ୍ଖ୍ଯେଯପରାର୍ଧାନ୍ତସ୍ଵରଵ୍ଯଞ୍ଜନଵୈଖରୀ ॥ 103 ॥
ମଧୁଜିହ୍ଵା ମଧୁମତୀ ମଧୁମାସୋଦଯା ମଧୁଃ ।
ମାଧଵୀ ଚ ମହାଭାଗା ମେଘଗମ୍ଭୀରନିସ୍ଵନା ॥ 104 ॥
ବ୍ରହ୍ମଵିଷ୍ଣୁମହେଶାଦିଜ୍ଞାତଵ୍ଯାର୍ଥଵିଶେଷଗା ।
ନାଭୌ ଵହ୍ନିଶିଖାକାରା ଲଲାଟେ ଚନ୍ଦ୍ରସନ୍ନିଭା ॥ 105 ॥
ଭ୍ରୂମଧ୍ଯେ ଭାସ୍କରାକାରା ସର୍ଵତାରାକୃତିର୍ହୃଦି ।
କୃତ୍ତିକାଦିଭରଣ୍ଯନ୍ତନକ୍ଷତ୍ରେଷ୍ଟ୍ଯାର୍ଚିତୋଦଯା ॥ 106 ॥
ଗ୍ରହଵିଦ୍ଯାତ୍ମିକା ଜ୍ଯୋତିର୍ଜ୍ଯୋତିର୍ଵିନ୍ମତିଜୀଵିକା ।
ବ୍ରହ୍ମାଣ୍ଡଗର୍ଭିଣୀ ବାଲା ସପ୍ତାଵରଣଦେଵତା ॥ 107 ॥
ଵୈରାଜୋତ୍ତମସାମ୍ରାଜ୍ଯା କୁମାରକୁଶଲୋଦଯା ।
ବଗଲା ଭ୍ରମରାମ୍ବା ଚ ଶିଵଦୂତୀ ଶିଵାତ୍ମିକା ॥ 108 ॥
ମେରୁଵିନ୍ଧ୍ଯାଦିସଂସ୍ଥାନା କାଶ୍ମୀରପୁରଵାସିନୀ ।
ଯୋଗନିଦ୍ରା ମହାନିଦ୍ରା ଵିନିଦ୍ରା ରାକ୍ଷସାଶ୍ରିତା ॥ 109 ॥
ସୁଵର୍ଣଦା ମହାଗଙ୍ଗା ପଞ୍ଚାଖ୍ଯା ପଞ୍ଚସଂହତିଃ ।
ସୁପ୍ରଜାତା ସୁଵୀରା ଚ ସୁପୋଷା ସୁପତିଶ୍ଶିଵା ॥ 110 ॥
ସୁଗୃହା ରକ୍ତବୀଜାନ୍ତା ହତକନ୍ଦର୍ପଜୀଵିକା ।
ସମୁଦ୍ରଵ୍ଯୋମମଧ୍ଯସ୍ଥା ସମବିନ୍ଦୁସମାଶ୍ରଯା ॥ 111 ॥
ସୌଭାଗ୍ଯରସଜୀଵାତୁସ୍ସାରାସାରଵିଵେକଦୃକ୍ ।
ତ୍ରିଵଲ୍ଯାଦିସୁପୁଷ୍ଟାଙ୍ଗା ଭାରତୀ ଭରତାଶ୍ରିତା ॥ 112 ॥
ନାଦବ୍ରହ୍ମମଯୀଵିଦ୍ଯା ଜ୍ଞାନବ୍ରହ୍ମମଯୀପରା ।
ବ୍ରହ୍ମନାଡୀ ନିରୁକ୍ତିଶ୍ଚ ବ୍ରହ୍ମକୈଵଲ୍ଯସାଧନମ୍ ॥ 113 ॥
କାଲିକେଯମହୋଦାରଵୀର୍ଯଵିକ୍ରମରୂପିଣୀ ।
ଵଡଵାଗ୍ନିଶିଖାଵକ୍ତ୍ରା ମହାକଵଲତର୍ପଣା ॥ 114 ॥
ମହାଭୂତା ମହାଦର୍ପା ମହାସାରା ମହାକ୍ରତୁଃ ।
ପଞ୍ଜଭୂତମହାଗ୍ରାସା ପଞ୍ଚଭୂତାଧିଦେଵତା ॥ 115 ॥
ସର୍ଵପ୍ରମାଣା ସମ୍ପତ୍ତିସ୍ସର୍ଵରୋଗପ୍ରତିକ୍ରିଯା ।
ବ୍ରହ୍ମାଣ୍ଡାନ୍ତର୍ବହିର୍ଵ୍ଯାପ୍ତା ଵିଷ୍ଣୁଵକ୍ଷୋଵିଭୂଷିଣୀ ॥ 116 ॥
ଶାଙ୍କରୀ ଵିଧିଵକ୍ତ୍ରସ୍ଥା ପ୍ରଵରା ଵରହେତୁକୀ ।
ହେମମାଲା ଶିଖାମାଲା ତ୍ରିଶିଖା ପଞ୍ଚଲୋଚନା ॥ 117 ॥ [ ପଞ୍ଚମୋଚନା ]
ସର୍ଵାଗମସଦାଚାରମର୍ଯାଦା ଯାତୁଭଞ୍ଜନୀ ।
ପୁଣ୍ଯଶ୍ଲୋକପ୍ରବନ୍ଧାଢ୍ଯା ସର୍ଵାନ୍ତର୍ଯାମିରୂପିଣୀ ॥ 118 ॥
ସାମଗାନସମାରାଧ୍ଯା ଶ୍ରୋତ୍ରକର୍ଣରସାଯନମ୍ ।
ଜୀଵଲୋକୈକଜୀଵାତୁର୍ଭଦ୍ରୋଦାରଵିଲୋକନା ॥ 119 ॥
ତଟିତ୍କୋଟିଲସତ୍କାନ୍ତିସ୍ତରୁଣୀ ହରିସୁନ୍ଦରୀ ।
ମୀନନେତ୍ରା ଚ ସେନ୍ଦ୍ରାକ୍ଷୀ ଵିଶାଲାକ୍ଷୀ ସୁମଙ୍ଗଲା ॥ 120 ॥
ସର୍ଵମଙ୍ଗଲସମ୍ପନ୍ନା ସାକ୍ଷାନ୍ମଙ୍ଗଲଦେଵତା ।
ଦେହହୃଦ୍ଦୀପିକା ଦୀପ୍ତିର୍ଜିହ୍ଵପାପପ୍ରଣାଶିନୀ ॥ 121 ॥
ଅର୍ଧଚନ୍ଦ୍ରୋଲ୍ଲସଦ୍ଦଂଷ୍ଟ୍ରା ଯଜ୍ଞଵାଟୀଵିଲାସିନୀ ।
ମହାଦୁର୍ଗା ମହୋତ୍ସାହା ମହାଦେଵବଲୋଦଯା ॥ 122 ॥
ଡାକିନୀଡ୍ଯା ଶାକିନୀଡ୍ଯା ସାକିନୀଡ୍ଯା ସମସ୍ତଜୁଟ୍ ।
ନିରଙ୍କୁଶା ନାକିଵନ୍ଦ୍ଯା ଷଡାଧାରାଧିଦେଵତା ॥ 123 ॥
ଭୁଵନଜ୍ଞାନିନିଶ୍ଶ୍ରେଣୀ ଭୁଵନାକାରଵଲ୍ଲରୀ ।
ଶାଶ୍ଵତୀ ଶାଶ୍ଵତାକାରା ଲୋକାନୁଗ୍ରହକାରିଣୀ ॥ 124 ॥
ସାରସୀ ମାନସୀ ହଂସୀ ହଂସଲୋକପ୍ରଦାଯିନୀ ।
ଚିନ୍ମୁଦ୍ରାଲଙ୍କୃତକରା କୋଟିସୂର୍ଯସମପ୍ରଭା ॥ 125 ॥
ସୁଖପ୍ରାଣିଶିରୋରେଖା ସଦଦୃଷ୍ଟପ୍ରଦାଯିନୀ ।
ସର୍ଵସାଙ୍କର୍ଯଦୋଷଘ୍ନୀ ଗ୍ରହୋପଦ୍ରଵନାଶିନୀ ॥ 126 ॥
କ୍ଷୁଦ୍ରଜନ୍ତୁଭଯଘ୍ନୀ ଚ ଵିଷରୋଗାଦିଭଞ୍ଜନୀ ।
ସଦାଶାନ୍ତା ସଦାଶୁଦ୍ଧା ଗୃହଚ୍ଛିଦ୍ରନିଵାରିଣୀ ॥ 127 ॥
କଲିଦୋଷପ୍ରଶମନୀ କୋଲାହଲପୁରସ୍ଥିତା ।
ଗୌରୀ ଲାକ୍ଷଣିକୀ ମୁଖ୍ଯା ଜଘନ୍ଯାକୃତିଵର୍ଜିତା ॥ 128 ॥
ମାଯା ଵିଦ୍ଯା ମୂଲଭୂତା ଵାସଵୀ ଵିଷ୍ଣୁଚେତନା ।
ଵାଦିନୀ ଵସୁରୂପା ଚ ଵସୁରତ୍ନପରିଚ୍ଛଦା ॥ 129 ॥
ଛାନ୍ଦସୀ ଚନ୍ଦ୍ରହୃଦଯା ମନ୍ତ୍ରସ୍ଵଚ୍ଛନ୍ଦଭୈରଵୀ ।
ଵନମାଲା ଵୈଜଯନ୍ତୀ ପଞ୍ଚଦିଵ୍ଯାଯୁଧାତ୍ମିକା ॥ 130 ॥
ପୀତାମ୍ବରମଯୀ ଚଞ୍ଚତ୍କୌସ୍ତୁଭା ହରିକାମିନୀ ।
ନିତ୍ଯା ତଥ୍ଯା ରମା ରାମା ରମଣୀ ମୃତ୍ଯୁଭଞ୍ଜନୀ ॥ 131 ॥
ଜ୍ଯେଷ୍ଠା କାଷ୍ଠା ଧନିଷ୍ଠାନ୍ତା ଶରାଙ୍ଗୀ ନିର୍ଗୁଣପ୍ରିଯା ।
ମୈତ୍ରେଯା ମିତ୍ରଵିନ୍ଦା ଚ ଶେଷ୍ଯଶେଷକଲାଶଯା ॥ 132 ॥
ଵାରାଣସୀଵାସଲଭ୍ଯା ଚାର୍ଯାଵର୍ତଜନସ୍ତୁତା । [ ଵାରାଣସୀଵାସରତା ]
ଜଗଦୁତ୍ପତ୍ତିସଂସ୍ଥାନସଂହାରତ୍ରଯକାରଣମ୍ ॥ 133 ॥
ତ୍ଵମମ୍ବ ଵିଷ୍ଣୁସର୍ଵସ୍ଵଂ ନମସ୍ତେଽସ୍ତୁ ମହେଶ୍ଵରି ।
ନମସ୍ତେ ସର୍ଵଲୋକାନାଂ ଜନନ୍ଯୈ ପୁଣ୍ଯମୂର୍ତଯେ ॥ 134 ॥
ସିଦ୍ଧଲକ୍ଷ୍ମୀର୍ମହାକାଲି ମହଲକ୍ଷ୍ମି ନମୋଽସ୍ତୁ ତେ ।
ସଦ୍ଯୋଜାତାଦିପଞ୍ଚାଗ୍ନିରୂପା ପଞ୍ଚକପଞ୍ଚକମ୍ ॥ 135 ॥
ଯନ୍ତ୍ରଲକ୍ଷ୍ମୀର୍ଭଵତ୍ଯାଦିରାଦ୍ଯାଦ୍ଯେ ତେ ନମୋ ନମଃ ।
ସୃଷ୍ଟ୍ଯାଦିକାରଣାକାରଵିତତେ ଦୋଷଵର୍ଜିତେ ॥ 136 ॥
ଜଗଲ୍ଲକ୍ଷ୍ମୀର୍ଜଗନ୍ମାତର୍ଵିଷ୍ଣୁପତ୍ନି ନମୋଽସ୍ତୁ ତେ ।
ନଵକୋଟିମହାଶକ୍ତିସମୁପାସ୍ଯପଦାମ୍ବୁଜେ ॥ 137 ॥
କନତ୍ସୌଵର୍ଣରତ୍ନାଢ୍ଯ ସର୍ଵାଭରଣଭୂଷିତେ ।
ଅନନ୍ତାନିତ୍ଯମହିଷୀପ୍ରପଞ୍ଚେଶ୍ଵରନାଯକି ॥ 138 ॥
ଅତ୍ଯୁଚ୍ଛ୍ରିତପଦାନ୍ତସ୍ଥେ ପରମଵ୍ଯୋମନାଯକି ।
ନାକପୃଷ୍ଠଗତାରାଧ୍ଯେ ଵିଷ୍ଣୁଲୋକଵିଲାସିନି ॥ 139 ॥
ଵୈକୁଣ୍ଠରାଜମହିଷି ଶ୍ରୀରଙ୍ଗନଗରାଶ୍ରିତେ ।
ରଙ୍ଗନାଯକି ଭୂପୁତ୍ରି କୃଷ୍ଣେ ଵରଦଵଲ୍ଲଭେ ॥ 140 ॥
କୋଟିବ୍ରହ୍ମାଦିସଂସେଵ୍ଯେ କୋଟିରୁଦ୍ରାଦିକୀର୍ତିତେ ।
ମାତୁଲୁଙ୍ଗମଯଂ ଖେଟଂ ସୌଵର୍ଣଚଷକଂ ତଥା ॥ 141 ॥
ପଦ୍ମଦ୍ଵଯଂ ପୂର୍ଣକୁମ୍ଭଂ କୀରଞ୍ଚ ଵରଦାଭଯେ ।
ପାଶମଙ୍କୁଶକଂ ଶଙ୍ଖଂ ଚକ୍ରଂ ଶୂଲଂ କୃପାଣିକାମ୍ ॥ 142 ॥
ଧନୁର୍ବାଣୌ ଚାକ୍ଷମାଲାଂ ଚିନ୍ମୁଦ୍ରାମପି ବିଭ୍ରତୀ ।
ଅଷ୍ଟାଦଶଭୁଜେ ଲକ୍ଷ୍ମୀର୍ମହାଷ୍ଟାଦଶପୀଠଗେ ॥ 143 ॥
ଭୂମିନୀଲାଦିସଂସେଵ୍ଯେ ସ୍ଵାମିଚିତ୍ତାନୁଵର୍ତିନି ।
ପଦ୍ମେ ପଦ୍ମାଲଯେ ପଦ୍ମି ପୂର୍ଣକୁମ୍ଭାଭିଷେଚିତେ ॥ 144 ॥
ଇନ୍ଦିରେନ୍ଦିନ୍ଦିରାଭାକ୍ଷି କ୍ଷୀରସାଗରକନ୍ଯକେ ।
ଭାର୍ଗଵି ତ୍ଵଂ ସ୍ଵତନ୍ତ୍ରେଚ୍ଛା ଵଶୀକୃତଜଗତ୍ପତିଃ ॥ 145 ॥
ମଙ୍ଗଲଂ ମଙ୍ଗଲାନାଂ ତ୍ଵଂ ଦେଵତାନାଂ ଚ ଦେଵତା ।
ତ୍ଵମୁତ୍ତମୋତ୍ତମାନାଂ ଚ ତ୍ଵଂ ଶ୍ରେଯଃ ପରମାମୃତମ୍ ॥ 146 ॥
ଧନଧାନ୍ଯାଭିଵୃଦ୍ଧିଶ୍ଚ ସାର୍ଵଭୌମସୁଖୋଚ୍ଛ୍ରଯା ।
ଆନ୍ଦୋଲିକାଦିସୌଭାଗ୍ଯଂ ମତ୍ତେଭାଦିମହୋଦଯଃ ॥ 147 ॥
ପୁତ୍ରପୌତ୍ରାଭିଵୃଦ୍ଧିଶ୍ଚ ଵିଦ୍ଯାଭୋଗବଲାଦିକମ୍ ।
ଆଯୁରାରୋଗ୍ଯସମ୍ପତ୍ତିରଷ୍ଟୈଶ୍ଵର୍ଯଂ ତ୍ଵମେଵ ହି ॥ 148 ॥
ପରମେଶଵିଭୂତିଶ୍ଚ ସୂକ୍ଷ୍ମାତ୍ସୂକ୍ଷ୍ମତରାଗତିଃ ।
ସଦଯାପାଙ୍ଗସନ୍ଦତ୍ତବ୍ରହ୍ମେନ୍ଦ୍ରାଦିପଦସ୍ଥିତିଃ ॥ 149 ॥
ଅଵ୍ଯାହତମହାଭାଗ୍ଯଂ ତ୍ଵମେଵାକ୍ଷୋଭ୍ଯଵିକ୍ରମଃ ।
ସମନ୍ଵଯଶ୍ଚ ଵେଦାନାମଵିରୋଧସ୍ତ୍ଵମେଵ ହି ॥ 150 ॥
ନିଃଶ୍ରେଯସପଦପ୍ରାପ୍ତିସାଧନଂ ଫଲମେଵ ଚ ।
ଶ୍ରୀମନ୍ତ୍ରରାଜରାଜ୍ଞୀ ଚ ଶ୍ରୀଵିଦ୍ଯା କ୍ଷେମକାରିଣୀ ॥ 151 ॥
ଶ୍ରୀମ୍ବୀଜଜପସନ୍ତୁଷ୍ଟା ଐଂ ହ୍ରୀଂ ଶ୍ରୀଂ ବୀଜପାଲିକା ।
ପ୍ରପତ୍ତିମାର୍ଗସୁଲଭା ଵିଷ୍ଣୁପ୍ରଥମକିଙ୍କରୀ ॥ 152 ॥
କ୍ଲୀଙ୍କାରାର୍ଥସଵିତ୍ରୀ ଚ ସୌମଙ୍ଗଲ୍ଯାଧିଦେଵତା ।
ଶ୍ରୀଷୋଡଶାକ୍ଷରୀଵିଦ୍ଯା ଶ୍ରୀଯନ୍ତ୍ରପୁରଵାସିନୀ ॥ 153 ॥
ସର୍ଵମଙ୍ଗଲମାଙ୍ଗଲ୍ଯେ ଶିଵେ ସର୍ଵାର୍ଥସାଧିକେ ।
ଶରଣ୍ଯେ ତ୍ର୍ଯମ୍ବକେ ଗୌରୀ ନାରାଯଣି ନମୋଽସ୍ତୁ ତେ ॥ 154 ॥
ପୁନଃ ପୁନର୍ନମସ୍ତେଽସ୍ତୁ ସାଷ୍ଟାଙ୍ଗମଯୁତଂ ପୁନଃ ।
ସନତ୍କୁମାର ଉଵାଚ-
ଏଵଂ ସ୍ତୁତା ମହାଲକ୍ଷ୍ମୀର୍ବ୍ରହ୍ମରୁଦ୍ରାଦିଭିସ୍ସୁରୈଃ ।
ନମଦ୍ଭିରାର୍ତୈର୍ଦୀନୈଶ୍ଚ ନିସ୍ସ୍ଵତ୍ଵୈର୍ଭୋଗଵର୍ଜିତୈଃ ॥ 1 ॥
ଜ୍ଯେଷ୍ଠା ଜୁଷ୍ଟୈଶ୍ଚ ନିଶ୍ଶ୍ରୀକୈସ୍ସଂସାରାତ୍ସ୍ଵପରାଯଣୈଃ ।
ଵିଷ୍ଣୁପତ୍ନୀ ଦଦୌ ତେଷାଂ ଦର୍ଶନଂ ଦୃଷ୍ଟିତର୍ପଣମ୍ ॥ 2 ॥
ଶରତ୍ପୂର୍ଣେନ୍ଦୁକୋଟ୍ଯାଭଧଵଲାପାଙ୍ଗଵୀକ୍ଷଣୈଃ ।
ସର୍ଵାନ୍ସତ୍ତ୍ଵସମାଵିଷ୍ଟାନ୍ ଚକ୍ରେ ହୃଷ୍ଟା ଵରଂ ଦଦୌ ॥ 3 ॥
ମହାଲକ୍ଷ୍ମୀରୁଵାଚ-
ନାମ୍ନାଂ ସାଷ୍ଟସହସ୍ରଂ ମେ ପ୍ରମାଦାଦ୍ଵାପି ଯସ୍ସକୃତ୍ ।
କୀର୍ତଯେତ୍ତତ୍କୁଲେ ସତ୍ଯଂ ଵସାମ୍ଯାଚନ୍ଦ୍ରତାରକମ୍ ॥ 4 ॥
କିଂ ପୁନର୍ନିଯମାଜ୍ଜପ୍ତୁର୍ମଦେକଶରଣସ୍ଯ ଚ ।
ମାତୃଵତ୍ସାନୁକମ୍ପାହଂ ପୋଷକୀ ସ୍ଯାମହର୍ନିଶମ୍ ॥ 5 ॥
ମନ୍ନାମ ସ୍ତଵତାଂ ଲୋକେ ଦୁର୍ଲଭଂ ନାସ୍ତି ଚିନ୍ତିତମ୍ ।
ମତ୍ପ୍ରସାଦେନ ସର୍ଵେଽପି ସ୍ଵସ୍ଵେଷ୍ଟାର୍ଥମଵାପ୍ସ୍ଯଥ ॥ 6 ॥
ଲୁପ୍ତଵୈଷ୍ଣଵଧର୍ମସ୍ଯ ମଦ୍ଵ୍ରତେଷ୍ଵଵକୀର୍ଣିନଃ ।
ଭକ୍ତିପ୍ରପତ୍ତିହୀନସ୍ଯ ଵନ୍ଦ୍ଯୋ ନାମ୍ନାଂ ସ୍ତଵୋଽପି ମେ ॥ 7 ॥
ତସ୍ମାଦଵଶ୍ଯଂ ତୈର୍ଦୋଷୈର୍ଵିହୀନଃ ପାପଵର୍ଜିତଃ ।
ଜପେତ୍ସାଷ୍ଟସହସ୍ରଂ ମେ ନାମ୍ନାଂ ପ୍ରତ୍ଯହମାଦରାତ୍ ॥ 8 ॥
ସାକ୍ଷାଦଲକ୍ଷ୍ମୀପୁତ୍ରୋଽପି ଦୁର୍ଭାଗ୍ଯୋଽପ୍ଯଲସୋଽପି ଵା ।
ଅପ୍ରଯତ୍ନୋଽପି ମୂଢୋଽପି ଵିକଲଃ ପତିତୋଽପି ଚ ॥ 9 ॥
ଅଵଶ୍ଯଂ ପ୍ରାପ୍ନୁଯାଦ୍ଭାଗ୍ଯଂ ମତ୍ପ୍ରସାଦେନ କେଵଲମ୍ ।
ସ୍ପୃହେଯମଚିରାଦ୍ଦେଵା ଵରଦାନାଯ ଜାପିନଃ ।
ଦଦାମି ସର୍ଵମିଷ୍ଟାର୍ଥଂ ଲକ୍ଷ୍ମୀତି ସ୍ମରତାଂ ଧ୍ରୁଵମ୍ ॥ 10 ॥
ସନତ୍କୁମାର ଉଵାଚ-
ଇତ୍ଯୁକ୍ତ୍ଵାଽନ୍ତର୍ଦଧେ ଲକ୍ଷ୍ମୀର୍ଵୈଷ୍ଣଵୀ ଭଗଵତ୍କଲା ।
ଇଷ୍ଟାପୂର୍ତଂ ଚ ସୁକୃତଂ ଭାଗଧେଯଂ ଚ ଚିନ୍ତିତମ୍ ॥ 11 ॥
ସ୍ଵଂ ସ୍ଵଂ ସ୍ଥାନଂ ଚ ଭୋଗଂ ଚ ଵିଜଯଂ ଲେଭିରେ ସୁରାଃ ।
ତଦେତତ୍ ପ୍ରଵଦାମ୍ଯଦ୍ଯ ଲକ୍ଷ୍ମୀନାମସହସ୍ରକମ୍ ।
ଯୋଗିନଃ ପଠତ କ୍ଷିପ୍ରଂ ଚିନ୍ତିତାର୍ଥାନଵାପ୍ସ୍ଯଥ ॥ 12 ॥
ଗାର୍ଗ୍ଯ ଉଵାଚ-
ସନତ୍କୁମାରୋଯୋଗୀନ୍ଦ୍ର ଇତ୍ଯୁକ୍ତ୍ଵା ସ ଦଯାନିଧିଃ ।
ଅନୁଗୃହ୍ଯ ଯଯୌ କ୍ଷିପ୍ରଂ ତାଂଶ୍ଚ ଦ୍ଵାଦଶଯୋଗିନଃ ॥ 13 ॥
ତସ୍ମାଦେତଦ୍ରହସ୍ଯଂ ଚ ଗୋପ୍ଯଂ ଜପ୍ଯଂ ପ୍ରଯତ୍ନତଃ ।
ଅଷ୍ଟମ୍ଯାଂ ଚ ଚତୁର୍ଦଶ୍ଯାଂ ନଵମ୍ଯାଂ ଭୃଗୁଵାସରେ ॥ 14 ॥
ପୌର୍ଣମାସ୍ଯାମମାଯାଂ ଚ ପର୍ଵକାଲେ ଵିଶେଷତଃ ।
ଜପେଦ୍ଵା ନିତ୍ଯକାର୍ଯେଷୁ ସର୍ଵାନ୍କାମାନଵାପ୍ନୁଯାତ୍ ॥ 15 ॥