ଶ୍ରୀ କାଲିକାଷ୍ଟକମ୍

ଗଲଦ୍ରକ୍ତମୁଣ୍ଡାଵଲୀକଣ୍ଠମାଲା
ମହାଘୋରରାଵା ସୁଦଂଷ୍ଟ୍ରା କରାଲା ।
ଵିଵସ୍ତ୍ରା ଶ୍ମଶାନାଲଯା ମୁକ୍ତକେଶୀ
ମହାକାଲକାମାକୁଲା କାଲିକେଯମ୍ ॥ 1 ॥

ଭୁଜେ ଵାମଯୁଗ୍ମେ ଶିରୋଽସିଂ ଦଧାନା
ଵରଂ ଦକ୍ଷଯୁଗ୍ମେଽଭଯଂ ଵୈ ତଥୈଵ ।
ସୁମଧ୍ଯାଽପି ତୁଙ୍ଗସ୍ତନା ଭାରନମ୍ରା
ଲସଦ୍ରକ୍ତସୃକ୍କଦ୍ଵଯା ସୁସ୍ମିତାସ୍ଯା ॥ 2 ॥

ଶଵଦ୍ଵନ୍ଦ୍ଵକର୍ଣାଵତଂସା ସୁକେଶୀ
ଲସତ୍ପ୍ରେତପାଣିଂ ପ୍ରଯୁକ୍ତୈକକାଞ୍ଚୀ ।
ଶଵାକାରମଞ୍ଚାଧିରୂଢା ଶିଵାଭିଃ
ଚତୁର୍ଦିକ୍ଷୁଶବ୍ଦାଯମାନାଽଭିରେଜେ ॥ 3 ॥
ସ୍ତୁତିଃ
ଵିରଞ୍ଚ୍ଯାଦିଦେଵାସ୍ତ୍ରଯସ୍ତେ ଗୁଣାସ୍ତ୍ରୀନ୍
ସମାରାଧ୍ଯ କାଲୀଂ ପ୍ରଧାନା ବଭୂଵୁଃ ।
ଅନାଦିଂ ସୁରାଦିଂ ମଖାଦିଂ ଭଵାଦିଂ
ସ୍ଵରୂପଂ ତ୍ଵଦୀଯଂ ନ ଵିନ୍ଦନ୍ତି ଦେଵାଃ ॥ 1 ॥
ଜଗନ୍ମୋହିନୀଯଂ ତୁ ଵାଗ୍ଵାଦିନୀଯଂ
ସୁହୃତ୍ପୋଷିଣୀ ଶତ୍ରୁସଂହାରଣୀଯମ୍ ।
ଵଚସ୍ତମ୍ଭନୀଯଂ କିମୁଚ୍ଚାଟନୀଯଂ
ସ୍ଵରୂପଂ ତ୍ଵଦୀଯଂ ନ ଵିନ୍ଦନ୍ତି ଦେଵାଃ ॥ 2 ॥
ଇଯଂ ସ୍ଵର୍ଗଦାତ୍ରୀ ପୁନଃ କଲ୍ପଵଲ୍ଲୀ
ମନୋଜାସ୍ତୁ କାମାନ୍ ଯଥାର୍ଥଂ ପ୍ରକୁର୍ଯାତ୍ ।
ତଥା ତେ କୃତାର୍ଥା ଭଵନ୍ତୀତି ନିତ୍ଯଂ
ସ୍ଵରୂପଂ ତ୍ଵଦୀଯଂ ନ ଵିନ୍ଦନ୍ତି ଦେଵାଃ ॥ 3 ॥
ସୁରାପାନମତ୍ତା ସୁଭକ୍ତାନୁରକ୍ତା
ଲସତ୍ପୂତଚିତ୍ତେ ସଦାଵିର୍ଭଵତ୍ତେ ।
ଜପଧ୍ଯାନପୂଜାସୁଧାଧୌତପଙ୍କା
ସ୍ଵରୂପଂ ତ୍ଵଦୀଯଂ ନ ଵିନ୍ଦନ୍ତି ଦେଵାଃ ॥ 4 ॥
ଚିଦାନନ୍ଦକନ୍ଦଂ ହସନ୍ମନ୍ଦମନ୍ଦଂ
ଶରଚ୍ଚନ୍ଦ୍ରକୋଟିପ୍ରଭାପୁଞ୍ଜବିମ୍ବମ୍ ।
ମୁନୀନାଂ କଵୀନାଂ ହୃଦି ଦ୍ଯୋତଯନ୍ତଂ
ସ୍ଵରୂପଂ ତ୍ଵଦୀଯଂ ନ ଵିନ୍ଦନ୍ତି ଦେଵାଃ ॥ 5 ॥
ମହାମେଘକାଲୀ ସୁରକ୍ତାପି ଶୁଭ୍ରା
କଦାଚିଦ୍ଵିଚିତ୍ରାକୃତିର୍ଯୋଗମାଯା ।
ନ ବାଲା ନ ଵୃଦ୍ଧା ନ କାମାତୁରାପି
ସ୍ଵରୂପଂ ତ୍ଵଦୀଯଂ ନ ଵିନ୍ଦନ୍ତି ଦେଵାଃ ॥ 6 ॥
କ୍ଷମସ୍ଵାପରାଧଂ ମହାଗୁପ୍ତଭାଵଂ
ମଯା ଲୋକମଧ୍ଯେ ପ୍ରକାଶୀକୃତଂ ଯତ୍ ।
ତଵ ଧ୍ଯାନପୂତେନ ଚାପଲ୍ଯଭାଵାତ୍
ସ୍ଵରୂପଂ ତ୍ଵଦୀଯଂ ନ ଵିନ୍ଦନ୍ତି ଦେଵାଃ ॥ 7 ॥
ଯଦି ଧ୍ଯାନଯୁକ୍ତଂ ପଠେଦ୍ଯୋ ମନୁଷ୍ଯଃ
ତଦା ସର୍ଵଲୋକେ ଵିଶାଲୋ ଭଵେଚ୍ଚ ।
ଗୃହେ ଚାଷ୍ଟସିଦ୍ଧିର୍ମୃତେ ଚାପି ମୁକ୍ତିଃ
ସ୍ଵରୂପଂ ତ୍ଵଦୀଯଂ ନ ଵିନ୍ଦନ୍ତି ଦେଵାଃ ॥ 8 ॥