ନାରାଯଣୀଯଂ ଦଶକ 63 - ଗୋଵର୍ଧନୋଦ୍ଧାରଣମ୍

ଦଦୃଶିରେ କିଲ ତତ୍କ୍ଷଣମକ୍ଷତ-
ସ୍ତନିତଜୃମ୍ଭିତକମ୍ପିତଦିକ୍ତଟାଃ ।
ସୁଷମଯା ଭଵଦଙ୍ଗତୁଲାଂ ଗତା
ଵ୍ରଜପଦୋପରି ଵାରିଧରାସ୍ତ୍ଵଯା ॥1॥

ଵିପୁଲକରକମିଶ୍ରୈସ୍ତୋଯଧାରାନିପାତୈ-
ର୍ଦିଶିଦିଶି ପଶୁପାନାଂ ମଣ୍ଡଲେ ଦଣ୍ଡ୍ଯମାନେ ।
କୁପିତହରିକୃତାନ୍ନଃ ପାହି ପାହୀତି ତେଷାଂ
ଵଚନମଜିତ ଶୃଣ୍ଵନ୍ ମା ବିଭୀତେତ୍ଯଭାଣୀଃ ॥2॥

କୁଲ ଇହ ଖଲୁ ଗୋତ୍ରୋ ଦୈଵତଂ ଗୋତ୍ରଶତ୍ରୋ-
ର୍ଵିହତିମିହ ସ ରୁନ୍ଧ୍ଯାତ୍ କୋ ନୁ ଵଃ ସଂଶଯୋଽସ୍ମିନ୍ ।
ଇତି ସହସିତଵାଦୀ ଦେଵ ଗୋଵର୍ଦ୍ଧନାଦ୍ରିଂ
ତ୍ଵରିତମୁଦମୁମୂଲୋ ମୂଲତୋ ବାଲଦୋର୍ଭ୍ଯାମ୍ ॥3॥

ତଦନୁ ଗିରିଵରସ୍ଯ ପ୍ରୋଦ୍ଧୃତସ୍ଯାସ୍ଯ ତାଵତ୍
ସିକତିଲମୃଦୁଦେଶେ ଦୂରତୋ ଵାରିତାପେ ।
ପରିକରପରିମିଶ୍ରାନ୍ ଧେନୁଗୋପାନଧସ୍ତା-
ଦୁପନିଦଧଦଧତ୍ଥା ହସ୍ତପଦ୍ମେନ ଶୈଲମ୍ ॥4॥

ଭଵତି ଵିଧୃତଶୈଲେ ବାଲିକାଭିର୍ଵଯସ୍ଯୈ-
ରପି ଵିହିତଵିଲାସଂ କେଲିଲାପାଦିଲୋଲେ ।
ସଵିଧମିଲିତଧେନୂରେକହସ୍ତେନ କଣ୍ଡୂ-
ଯତି ସତି ପଶୁପାଲାସ୍ତୋଷମୈଷନ୍ତ ସର୍ଵେ ॥5॥

ଅତିମହାନ୍ ଗିରିରେଷ ତୁ ଵାମକେ
କରସରୋରୁହି ତଂ ଧରତେ ଚିରମ୍ ।
କିମିଦମଦ୍ଭୁତମଦ୍ରିବଲଂ ନ୍ଵିତି
ତ୍ଵଦଵଲୋକିଭିରାକଥି ଗୋପକୈଃ ॥6॥

ଅହହ ଧାର୍ଷ୍ଟ୍ଯମମୁଷ୍ଯ ଵଟୋର୍ଗିରିଂ
ଵ୍ଯଥିତବାହୁରସାଵଵରୋପଯେତ୍ ।
ଇତି ହରିସ୍ତ୍ଵଯି ବଦ୍ଧଵିଗର୍ହଣୋ
ଦିଵସସପ୍ତକମୁଗ୍ରମଵର୍ଷଯତ୍ ॥7॥

ଅଚଲତି ତ୍ଵଯି ଦେଵ ପଦାତ୍ ପଦଂ
ଗଲିତସର୍ଵଜଲେ ଚ ଘନୋତ୍କରେ ।
ଅପହୃତେ ମରୁତା ମରୁତାଂ ପତି-
ସ୍ତ୍ଵଦଭିଶଙ୍କିତଧୀଃ ସମୁପାଦ୍ରଵତ୍ ॥8॥

ଶମମୁପେଯୁଷି ଵର୍ଷଭରେ ତଦା
ପଶୁପଧେନୁକୁଲେ ଚ ଵିନିର୍ଗତେ ।
ଭୁଵି ଵିଭୋ ସମୁପାହିତଭୂଧରଃ
ପ୍ରମୁଦିତୈଃ ପଶୁପୈଃ ପରିରେଭିଷେ ॥9॥

ଧରଣିମେଵ ପୁରା ଧୃତଵାନସି
କ୍ଷିତିଧରୋଦ୍ଧରଣେ ତଵ କଃ ଶ୍ରମଃ ।
ଇତି ନୁତସ୍ତ୍ରିଦଶୈଃ କମଲାପତେ
ଗୁରୁପୁରାଲଯ ପାଲଯ ମାଂ ଗଦାତ୍ ॥10॥