ନାରାଯଣୀଯଂ ଦଶକ 60 - ଗୋପୀଵସ୍ତ୍ରାପହରଣମ୍

ମଦନାତୁରଚେତସୋଽନ୍ଵହଂ ଭଵଦଙ୍ଘ୍ରିଦ୍ଵଯଦାସ୍ଯକାମ୍ଯଯା ।
ଯମୁନାତଟସୀମ୍ନି ସୈକତୀଂ ତରଲାକ୍ଷ୍ଯୋ ଗିରିଜାଂ ସମାର୍ଚିଚନ୍ ॥1॥

ତଵ ନାମକଥାରତାଃ ସମଂ ସୁଦୃଶଃ ପ୍ରାତରୁପାଗତା ନଦୀମ୍ ।
ଉପହାରଶତୈରପୂଜଯନ୍ ଦଯିତୋ ନନ୍ଦସୁତୋ ଭଵେଦିତି ॥2॥

ଇତି ମାସମୁପାହିତଵ୍ରତାସ୍ତରଲାକ୍ଷୀରଭିଵୀକ୍ଷ୍ଯ ତା ଭଵାନ୍ ।
କରୁଣାମୃଦୁଲୋ ନଦୀତଟଂ ସମଯାସୀତ୍ତଦନୁଗ୍ରହେଚ୍ଛଯା ॥3॥

ନିଯମାଵସିତୌ ନିଜାମ୍ବରଂ ତଟସୀମନ୍ଯଵମୁଚ୍ଯ ତାସ୍ତଦା ।
ଯମୁନାଜଲଖେଲନାକୁଲାଃ ପୁରତସ୍ତ୍ଵାମଵଲୋକ୍ଯ ଲଜ୍ଜିତାଃ ॥4॥

ତ୍ରପଯା ନମିତାନନାସ୍ଵଥୋ ଵନିତାସ୍ଵମ୍ବରଜାଲମନ୍ତିକେ ।
ନିହିତଂ ପରିଗୃହ୍ଯ ଭୂରୁହୋ ଵିଟପଂ ତ୍ଵଂ ତରସାଽଧିରୂଢଵାନ୍ ॥5॥

ଇହ ତାଵଦୁପେତ୍ଯ ନୀଯତାଂ ଵସନଂ ଵଃ ସୁଦୃଶୋ ଯଥାଯଥମ୍ ।
ଇତି ନର୍ମମୃଦୁସ୍ମିତେ ତ୍ଵଯି ବ୍ରୁଵତି ଵ୍ଯାମୁମୁହେ ଵଧୂଜନୈଃ ॥6॥

ଅଯି ଜୀଵ ଚିରଂ କିଶୋର ନସ୍ତଵ ଦାସୀରଵଶୀକରୋଷି କିମ୍ ।
ପ୍ରଦିଶାମ୍ବରମମ୍ବୁଜେକ୍ଷଣେତ୍ଯୁଦିତସ୍ତ୍ଵଂ ସ୍ମିତମେଵ ଦତ୍ତଵାନ୍ ॥7॥

ଅଧିରୁହ୍ଯ ତଟଂ କୃତାଞ୍ଜଲୀଃ ପରିଶୁଦ୍ଧାଃ ସ୍ଵଗତୀର୍ନିରୀକ୍ଷ୍ଯ ତାଃ ।
ଵସନାନ୍ଯଖିଲାନ୍ଯନୁଗ୍ରହଂ ପୁନରେଵଂ ଗିରମପ୍ଯଦା ମୁଦା ॥8॥

ଵିଦିତଂ ନନୁ ଵୋ ମନୀଷିତଂ ଵଦିତାରସ୍ତ୍ଵିହ ଯୋଗ୍ଯମୁତ୍ତରମ୍ ।
ଯମୁନାପୁଲିନେ ସଚନ୍ଦ୍ରିକାଃ କ୍ଷଣଦା ଇତ୍ଯବଲାସ୍ତ୍ଵମୂଚିଵାନ୍ ॥9॥

ଉପକର୍ଣ୍ଯ ଭଵନ୍ମୁଖଚ୍ଯୁତଂ ମଧୁନିଷ୍ଯନ୍ଦି ଵଚୋ ମୃଗୀଦୃଶଃ ।
ପ୍ରଣଯାଦଯି ଵୀକ୍ଷ୍ଯ ଵୀକ୍ଷ୍ଯ ତେ ଵଦନାବ୍ଜଂ ଶନକୈର୍ଗୃହଂ ଗତାଃ ॥10॥

ଇତି ନନ୍ଵନୁଗୃହ୍ଯ ଵଲ୍ଲଵୀର୍ଵିପିନାନ୍ତେଷୁ ପୁରେଵ ସଞ୍ଚରନ୍ ।
କରୁଣାଶିଶିରୋ ହରେ ହର ତ୍ଵରଯା ମେ ସକଲାମଯାଵଲିମ୍ ॥11॥