নারাযণীযং দশক 60 - গোপীবস্ত্রাপহরণম্

মদনাতুরচেতসোঽন্বহং ভবদঙ্ঘ্রিদ্বযদাস্যকাম্যযা ।
যমুনাতটসীম্নি সৈকতীং তরলাক্ষ্যো গিরিজাং সমার্চিচন্ ॥1॥

তব নামকথারতাঃ সমং সুদৃশঃ প্রাতরুপাগতা নদীম্ ।
উপহারশতৈরপূজযন্ দযিতো নন্দসুতো ভবেদিতি ॥2॥

ইতি মাসমুপাহিতব্রতাস্তরলাক্ষীরভিবীক্ষ্য তা ভবান্ ।
করুণামৃদুলো নদীতটং সমযাসীত্তদনুগ্রহেচ্ছযা ॥3॥

নিযমাবসিতৌ নিজাম্বরং তটসীমন্যবমুচ্য তাস্তদা ।
যমুনাজলখেলনাকুলাঃ পুরতস্ত্বামবলোক্য লজ্জিতাঃ ॥4॥

ত্রপযা নমিতাননাস্বথো বনিতাস্বম্বরজালমন্তিকে ।
নিহিতং পরিগৃহ্য ভূরুহো বিটপং ত্বং তরসাঽধিরূঢবান্ ॥5॥

ইহ তাবদুপেত্য নীযতাং বসনং বঃ সুদৃশো যথাযথম্ ।
ইতি নর্মমৃদুস্মিতে ত্বযি ব্রুবতি ব্যামুমুহে বধূজনৈঃ ॥6॥

অযি জীব চিরং কিশোর নস্তব দাসীরবশীকরোষি কিম্ ।
প্রদিশাম্বরমম্বুজেক্ষণেত্যুদিতস্ত্বং স্মিতমেব দত্তবান্ ॥7॥

অধিরুহ্য তটং কৃতাঞ্জলীঃ পরিশুদ্ধাঃ স্বগতীর্নিরীক্ষ্য তাঃ ।
বসনান্যখিলান্যনুগ্রহং পুনরেবং গিরমপ্যদা মুদা ॥8॥

বিদিতং ননু বো মনীষিতং বদিতারস্ত্বিহ যোগ্যমুত্তরম্ ।
যমুনাপুলিনে সচন্দ্রিকাঃ ক্ষণদা ইত্যবলাস্ত্বমূচিবান্ ॥9॥

উপকর্ণ্য ভবন্মুখচ্যুতং মধুনিষ্যন্দি বচো মৃগীদৃশঃ ।
প্রণযাদযি বীক্ষ্য বীক্ষ্য তে বদনাব্জং শনকৈর্গৃহং গতাঃ ॥10॥

ইতি নন্বনুগৃহ্য বল্লবীর্বিপিনান্তেষু পুরেব সঞ্চরন্ ।
করুণাশিশিরো হরে হর ত্বরযা মে সকলামযাবলিম্ ॥11॥