નારાયણીયં દશક 6 - વિરાટ્સ્વરૂપવર્ણનમ્

એવં ચતુર્દશજગન્મયતાં ગતસ્ય
પાતાલમીશ તવ પાદતલં વદન્તિ ।
પાદોર્ધ્વદેશમપિ દેવ રસાતલં તે
ગુલ્ફદ્વયં ખલુ મહાતલમદ્ભુતાત્મન્ ॥1॥

જઙ્ઘે તલાતલમથો સુતલં ચ જાનૂ
કિઞ્ચોરુભાગયુગલં વિતલાતલે દ્વે ।
ક્ષોણીતલં જઘનમમ્બરમઙ્ગ નાભિ-
ર્વક્ષશ્ચ શક્રનિલયસ્તવ ચક્રપાણે ॥2॥

ગ્રીવા મહસ્તવ મુખં ચ જનસ્તપસ્તુ
ફાલં શિરસ્તવ સમસ્તમયસ્ય સત્યમ્ ।
એવં જગન્મયતનો જગદાશ્રિતૈર-
પ્યન્યૈર્નિબદ્ધવપુષે ભગવન્નમસ્તે ॥3॥

ત્વદ્બ્રહ્મરન્ધ્રપદમીશ્વર વિશ્વકન્દ
છન્દાંસિ કેશવ ઘનાસ્તવ કેશપાશાઃ ।
ઉલ્લાસિચિલ્લિયુગલં દ્રુહિણસ્ય ગેહં
પક્ષ્માણિ રાત્રિદિવસૌ સવિતા ચ નેત્રૈ ॥4॥

નિશ્શેષવિશ્વરચના ચ કટાક્ષમોક્ષઃ
કર્ણૌ દિશોઽશ્વિયુગલં તવ નાસિકે દ્વે ।
લોભત્રપે ચ ભગવન્નધરોત્તરોષ્ઠૌ
તારાગણાશ્ચ દશનાઃ શમનશ્ચ દંષ્ટ્રા ॥5॥

માયા વિલાસહસિતં શ્વસિતં સમીરો
જિહ્વા જલં વચનમીશ શકુન્તપઙ્ક્તિઃ ।
સિદ્ધાદયઃ સ્વરગણા મુખરન્ધ્રમગ્નિ-
ર્દેવા ભુજાઃ સ્તનયુગં તવ ધર્મદેવઃ ॥6॥

પૃષ્ઠં ત્વધર્મ ઇહ દેવ મનઃ સુધાંશુ -
રવ્યક્તમેવ હૃદયમ્બુજમમ્બુજાક્ષ ।
કુક્ષિઃ સમુદ્રનિવહા વસનં તુ સન્ધ્યે
શેફઃ પ્રજાપતિરસૌ વૃષણૌ ચ મિત્રઃ ॥7॥

શ્રોણીસ્થલં મૃગગણાઃ પદયોર્નખાસ્તે
હસ્ત્યુષ્ટ્રસૈન્ધવમુખા ગમનં તુ કાલઃ ।
વિપ્રાદિવર્ણભવનં વદનાબ્જબાહુ-
ચારૂરુયુગ્મચરણં કરુણામ્બુધે તે ॥8॥

સંસારચક્રમયિ ચક્રધર ક્રિયાસ્તે
વીર્યં મહાસુરગણોઽસ્થિકુલાનિ શૈલાઃ ।
નાડ્યસ્સરિત્સમુદયસ્તરવશ્ચ રોમ
જીયાદિદં વપુરનિર્વચનીયમીશ ॥9॥

ઈદૃગ્જગન્મયવપુસ્તવ કર્મભાજાં
કર્માવસાનસમયે સ્મરણીયમાહુઃ ।
તસ્યાન્તરાત્મવપુષે વિમલાત્મને તે
વાતાલયાધિપ નમોઽસ્તુ નિરુન્ધિ રોગાન્ ॥10॥