নারাযণীযং দশক 6 - বিরাট্স্বরূপবর্ণনম্

এবং চতুর্দশজগন্মযতাং গতস্য
পাতালমীশ তব পাদতলং বদন্তি ।
পাদোর্ধ্বদেশমপি দেব রসাতলং তে
গুল্ফদ্বযং খলু মহাতলমদ্ভুতাত্মন্ ॥1॥

জঙ্ঘে তলাতলমথো সুতলং চ জানূ
কিঞ্চোরুভাগযুগলং বিতলাতলে দ্বে ।
ক্ষোণীতলং জঘনমম্বরমঙ্গ নাভি-
র্বক্ষশ্চ শক্রনিলযস্তব চক্রপাণে ॥2॥

গ্রীবা মহস্তব মুখং চ জনস্তপস্তু
ফালং শিরস্তব সমস্তমযস্য সত্যম্ ।
এবং জগন্মযতনো জগদাশ্রিতৈর-
প্যন্যৈর্নিবদ্ধবপুষে ভগবন্নমস্তে ॥3॥

ত্বদ্ব্রহ্মরন্ধ্রপদমীশ্বর বিশ্বকন্দ
ছন্দাংসি কেশব ঘনাস্তব কেশপাশাঃ ।
উল্লাসিচিল্লিযুগলং দ্রুহিণস্য গেহং
পক্ষ্মাণি রাত্রিদিবসৌ সবিতা চ নেত্রৈ ॥4॥

নিশ্শেষবিশ্বরচনা চ কটাক্ষমোক্ষঃ
কর্ণৌ দিশোঽশ্বিযুগলং তব নাসিকে দ্বে ।
লোভত্রপে চ ভগবন্নধরোত্তরোষ্ঠৌ
তারাগণাশ্চ দশনাঃ শমনশ্চ দংষ্ট্রা ॥5॥

মাযা বিলাসহসিতং শ্বসিতং সমীরো
জিহ্বা জলং বচনমীশ শকুন্তপঙ্ক্তিঃ ।
সিদ্ধাদযঃ স্বরগণা মুখরন্ধ্রমগ্নি-
র্দেবা ভুজাঃ স্তনযুগং তব ধর্মদেবঃ ॥6॥

পৃষ্ঠং ত্বধর্ম ইহ দেব মনঃ সুধাংশু -
রব্যক্তমেব হৃদযম্বুজমম্বুজাক্ষ ।
কুক্ষিঃ সমুদ্রনিবহা বসনং তু সন্ধ্যে
শেফঃ প্রজাপতিরসৌ বৃষণৌ চ মিত্রঃ ॥7॥

শ্রোণীস্থলং মৃগগণাঃ পদযোর্নখাস্তে
হস্ত্যুষ্ট্রসৈন্ধবমুখা গমনং তু কালঃ ।
বিপ্রাদিবর্ণভবনং বদনাব্জবাহু-
চারূরুযুগ্মচরণং করুণাম্বুধে তে ॥8॥

সংসারচক্রমযি চক্রধর ক্রিযাস্তে
বীর্যং মহাসুরগণোঽস্থিকুলানি শৈলাঃ ।
নাড্যস্সরিত্সমুদযস্তরবশ্চ রোম
জীযাদিদং বপুরনির্বচনীযমীশ ॥9॥

ঈদৃগ্জগন্মযবপুস্তব কর্মভাজাং
কর্মাবসানসমযে স্মরণীযমাহুঃ ।
তস্যান্তরাত্মবপুষে বিমলাত্মনে তে
বাতালযাধিপ নমোঽস্তু নিরুন্ধি রোগান্ ॥10॥