ନାରାଯଣୀଯଂ ଦଶକ 57 - ପ୍ରଲମ୍ବାସୁରଵଧମ୍

ରାମସଖଃ କ୍ଵାପି ଦିନେ କାମଦ ଭଗଵନ୍ ଗତୋ ଭଵାନ୍ ଵିପିନମ୍ ।
ସୂନୁଭିରପି ଗୋପାନାଂ ଧେନୁଭିରଭିସଂଵୃତୋ ଲସଦ୍ଵେଷଃ ॥1॥

ସନ୍ଦର୍ଶଯନ୍ ବଲାଯ ସ୍ଵୈରଂ ଵୃନ୍ଦାଵନଶ୍ରିଯଂ ଵିମଲାମ୍ ।
କାଣ୍ଡୀରୈଃ ସହ ବାଲୈର୍ଭାଣ୍ଡୀରକମାଗମୋ ଵଟଂ କ୍ରୀଡନ୍ ॥2॥

ତାଵତ୍ତାଵକନିଧନସ୍ପୃହଯାଲୁର୍ଗୋପମୂର୍ତିରଦଯାଲୁଃ ।
ଦୈତ୍ଯଃ ପ୍ରଲମ୍ବନାମା ପ୍ରଲମ୍ବବାହୁଂ ଭଵନ୍ତମାପେଦେ ॥3॥

ଜାନନ୍ନପ୍ଯଵିଜାନନ୍ନିଵ ତେନ ସମଂ ନିବଦ୍ଧସୌହାର୍ଦଃ ।
ଵଟନିକଟେ ପଟୁପଶୁପଵ୍ଯାବଦ୍ଧଂ ଦ୍ଵନ୍ଦ୍ଵଯୁଦ୍ଧମାରବ୍ଧାଃ ॥4॥

ଗୋପାନ୍ ଵିଭଜ୍ଯ ତନ୍ଵନ୍ ସଙ୍ଘଂ ବଲଭଦ୍ରକଂ ଭଵତ୍କମପି ।
ତ୍ଵଦ୍ବଲଭୀରୁଂ ଦୈତ୍ଯଂ ତ୍ଵଦ୍ବଲଗତମନ୍ଵମନ୍ଯଥା ଭଗଵନ୍ ॥5॥

କଲ୍ପିତଵିଜେତୃଵହନେ ସମରେ ପରଯୂଥଗଂ ସ୍ଵଦଯିତତରମ୍ ।
ଶ୍ରୀଦାମାନମଧତ୍ଥାଃ ପରାଜିତୋ ଭକ୍ତଦାସତାଂ ପ୍ରଥଯନ୍ ॥6॥

ଏଵଂ ବହୁଷୁ ଵିଭୂମନ୍ ବାଲେଷୁ ଵହତ୍ସୁ ଵାହ୍ଯମାନେଷୁ ।
ରାମଵିଜିତଃ ପ୍ରଲମ୍ବୋ ଜହାର ତଂ ଦୂରତୋ ଭଵଦ୍ଭୀତ୍ଯା ॥7॥

ତ୍ଵଦ୍ଦୂରଂ ଗମଯନ୍ତଂ ତଂ ଦୃଷ୍ଟ୍ଵା ହଲିନି ଵିହିତଗରିମଭରେ ।
ଦୈତ୍ଯଃ ସ୍ଵରୂପମାଗାଦ୍ଯଦ୍ରୂପାତ୍ ସ ହି ବଲୋଽପି ଚକିତୋଽଭୂତ୍ ॥8॥

ଉଚ୍ଚତଯା ଦୈତ୍ଯତନୋସ୍ତ୍ଵନ୍ମୁଖମାଲୋକ୍ଯ ଦୂରତୋ ରାମଃ ।
ଵିଗତଭଯୋ ଦୃଢମୁଷ୍ଟ୍ଯା ଭୃଶଦୁଷ୍ଟଂ ସପଦି ପିଷ୍ଟଵାନେନମ୍ ॥9॥

ହତ୍ଵା ଦାନଵଵୀରଂ ପ୍ରାପ୍ତଂ ବଲମାଲିଲିଙ୍ଗିଥ ପ୍ରେମ୍ଣା ।
ତାଵନ୍ମିଲତୋର୍ଯୁଵଯୋଃ ଶିରସି କୃତା ପୁଷ୍ପଵୃଷ୍ଟିରମରଗଣୈଃ ॥10॥

ଆଲମ୍ବୋ ଭୁଵନାନାଂ ପ୍ରାଲମ୍ବଂ ନିଧନମେଵମାରଚଯନ୍ ।
କାଲଂ ଵିହାଯ ସଦ୍ଯୋ ଲୋଲମ୍ବରୁଚେ ହରେ ହରେଃ କ୍ଲେଶାନ୍ ॥11॥