নারাযণীযং দশক 57 - প্রলম্বাসুরবধম্

রামসখঃ ক্বাপি দিনে কামদ ভগবন্ গতো ভবান্ বিপিনম্ ।
সূনুভিরপি গোপানাং ধেনুভিরভিসংবৃতো লসদ্বেষঃ ॥1॥

সন্দর্শযন্ বলায স্বৈরং বৃন্দাবনশ্রিযং বিমলাম্ ।
কাণ্ডীরৈঃ সহ বালৈর্ভাণ্ডীরকমাগমো বটং ক্রীডন্ ॥2॥

তাবত্তাবকনিধনস্পৃহযালুর্গোপমূর্তিরদযালুঃ ।
দৈত্যঃ প্রলম্বনামা প্রলম্ববাহুং ভবন্তমাপেদে ॥3॥

জানন্নপ্যবিজানন্নিব তেন সমং নিবদ্ধসৌহার্দঃ ।
বটনিকটে পটুপশুপব্যাবদ্ধং দ্বন্দ্বযুদ্ধমারব্ধাঃ ॥4॥

গোপান্ বিভজ্য তন্বন্ সঙ্ঘং বলভদ্রকং ভবত্কমপি ।
ত্বদ্বলভীরুং দৈত্যং ত্বদ্বলগতমন্বমন্যথা ভগবন্ ॥5॥

কল্পিতবিজেতৃবহনে সমরে পরযূথগং স্বদযিততরম্ ।
শ্রীদামানমধত্থাঃ পরাজিতো ভক্তদাসতাং প্রথযন্ ॥6॥

এবং বহুষু বিভূমন্ বালেষু বহত্সু বাহ্যমানেষু ।
রামবিজিতঃ প্রলম্বো জহার তং দূরতো ভবদ্ভীত্যা ॥7॥

ত্বদ্দূরং গমযন্তং তং দৃষ্ট্বা হলিনি বিহিতগরিমভরে ।
দৈত্যঃ স্বরূপমাগাদ্যদ্রূপাত্ স হি বলোঽপি চকিতোঽভূত্ ॥8॥

উচ্চতযা দৈত্যতনোস্ত্বন্মুখমালোক্য দূরতো রামঃ ।
বিগতভযো দৃঢমুষ্ট্যা ভৃশদুষ্টং সপদি পিষ্টবানেনম্ ॥9॥

হত্বা দানববীরং প্রাপ্তং বলমালিলিঙ্গিথ প্রেম্ণা ।
তাবন্মিলতোর্যুবযোঃ শিরসি কৃতা পুষ্পবৃষ্টিরমরগণৈঃ ॥10॥

আলম্বো ভুবনানাং প্রালম্বং নিধনমেবমারচযন্ ।
কালং বিহায সদ্যো লোলম্বরুচে হরে হরেঃ ক্লেশান্ ॥11॥