ନାରାଯଣୀଯଂ ଦଶକ 52 - ଵତ୍ସସ୍ତେଯଂ ତଥା ବ୍ରହ୍ମଗର୍ଵଶମନମ୍

ଅନ୍ଯାଵତାରନିକରେଷ୍ଵନିରୀକ୍ଷିତଂ ତେ
ଭୂମାତିରେକମଭିଵୀକ୍ଷ୍ଯ ତଦାଘମୋକ୍ଷେ ।
ବ୍ରହ୍ମା ପରୀକ୍ଷିତୁମନାଃ ସ ପରୋକ୍ଷଭାଵଂ
ନିନ୍ଯେଽଥ ଵତ୍ସକଗଣାନ୍ ପ୍ରଵିତତ୍ଯ ମାଯାମ୍ ॥1॥

ଵତ୍ସାନଵୀକ୍ଷ୍ଯ ଵିଵଶେ ପଶୁପୋତ୍କରେ ତା-
ନାନେତୁକାମ ଇଵ ଧାତୃମତାନୁଵର୍ତୀ ।
ତ୍ଵଂ ସାମିଭୁକ୍ତକବଲୋ ଗତଵାଂସ୍ତଦାନୀଂ
ଭୁକ୍ତାଂସ୍ତିରୋଽଧିତ ସରୋଜଭଵଃ କୁମାରାନ୍ ॥2॥

ଵତ୍ସାଈତସ୍ତଦନୁ ଗୋପଗଣାଯିତସ୍ତ୍ଵଂ
ଶିକ୍ଯାଦିଭାଣ୍ଡମୁରଲୀଗଵଲାଦିରୂପଃ ।
ପ୍ରାଗ୍ଵଦ୍ଵିହୃତ୍ଯ ଵିପିନେଷୁ ଚିରାଯ ସାଯଂ
ତ୍ଵଂ ମାଯଯାଽଥ ବହୁଧା ଵ୍ରଜମାଯଯାଥ ॥3॥

ତ୍ଵାମେଵ ଶିକ୍ଯଗଵଲାଦିମଯଂ ଦଧାନୋ
ଭୂଯସ୍ତ୍ଵମେଵ ପଶୁଵତ୍ସକବାଲରୂପଃ ।
ଗୋରୂପିଣୀଭିରପି ଗୋପଵଧୂମଯୀଭି-
ରାସାଦିତୋଽସି ଜନନୀଭିରତିପ୍ରହର୍ଷାତ୍ ॥4॥

ଜୀଵଂ ହି କଞ୍ଚିଦଭିମାନଵଶାତ୍ସ୍ଵକୀଯଂ
ମତ୍ଵା ତନୂଜ ଇତି ରାଗଭରଂ ଵହନ୍ତ୍ଯଃ ।
ଆତ୍ମାନମେଵ ତୁ ଭଵନ୍ତମଵାପ୍ଯ ସୂନୁଂ
ପ୍ରୀତିଂ ଯଯୁର୍ନ କିଯତୀଂ ଵନିତାଶ୍ଚ ଗାଵଃ ॥5॥

ଏଵଂ ପ୍ରତିକ୍ଷଣଵିଜୃମ୍ଭିତହର୍ଷଭାର-
ନିଶ୍ଶେଷଗୋପଗଣଲାଲିତଭୂରିମୂର୍ତିମ୍ ।
ତ୍ଵାମଗ୍ରଜୋଽପି ବୁବୁଧେ କିଲ ଵତ୍ସରାନ୍ତେ
ବ୍ରହ୍ମାତ୍ମନୋରପି ମହାନ୍ ଯୁଵଯୋର୍ଵିଶେଷଃ ॥6॥

ଵର୍ଷାଵଧୌ ନଵପୁରାତନଵତ୍ସପାଲାନ୍
ଦୃଷ୍ଟ୍ଵା ଵିଵେକମସୃଣେ ଦ୍ରୁହିଣେ ଵିମୂଢେ ।
ପ୍ରାଦୀଦୃଶଃ ପ୍ରତିନଵାନ୍ ମକୁଟାଙ୍ଗଦାଦି
ଭୂଷାଂଶ୍ଚତୁର୍ଭୁଜଯୁଜଃ ସଜଲାମ୍ବୁଦାଭାନ୍ ॥7॥

ପ୍ରତ୍ଯେକମେଵ କମଲାପରିଲାଲିତାଙ୍ଗାନ୍
ଭୋଗୀନ୍ଦ୍ରଭୋଗଶଯନାନ୍ ନଯନାଭିରାମାନ୍ ।
ଲୀଲାନିମୀଲିତଦୃଶଃ ସନକାଦିଯୋଗି-
ଵ୍ଯାସେଵିତାନ୍ କମଲଭୂର୍ଭଵତୋ ଦଦର୍ଶ ॥8॥

ନାରାଯଣାକୃତିମସଙ୍ଖ୍ଯତମାଂ ନିରୀକ୍ଷ୍ଯ
ସର୍ଵତ୍ର ସେଵକମପି ସ୍ଵମଵେକ୍ଷ୍ଯ ଧାତା ।
ମାଯାନିମଗ୍ନହୃଦଯୋ ଵିମୁମୋହ ଯାଵ-
ଦେକୋ ବଭୂଵିଥ ତଦା କବଲାର୍ଧପାଣିଃ ॥9॥

ନଶ୍ଯନ୍ମଦେ ତଦନୁ ଵିଶ୍ଵପତିଂ ମୁହୁସ୍ତ୍ଵାଂ
ନତ୍ଵା ଚ ନୂତଵତି ଧାତରି ଧାମ ଯାତେ ।
ପୋତୈଃ ସମଂ ପ୍ରମୁଦିତୈଃ ପ୍ରଵିଶନ୍ ନିକେତଂ
ଵାତାଲଯାଧିପ ଵିଭୋ ପରିପାହି ରୋଗାତ୍ ॥10॥