നാരായണീയം ദശക 52 - വത്സസ്തേയം തഥാ ബ്രഹ്മഗര്വശമനമ്

അന്യാവതാരനികരേഷ്വനിരീക്ഷിതം തേ
ഭൂമാതിരേകമഭിവീക്ഷ്യ തദാഘമോക്ഷേ ।
ബ്രഹ്മാ പരീക്ഷിതുമനാഃ സ പരോക്ഷഭാവം
നിന്യേഽഥ വത്സകഗണാന് പ്രവിതത്യ മായാമ് ॥1॥

വത്സാനവീക്ഷ്യ വിവശേ പശുപോത്കരേ താ-
നാനേതുകാമ ഇവ ധാതൃമതാനുവര്തീ ।
ത്വം സാമിഭുക്തകബലോ ഗതവാംസ്തദാനീം
ഭുക്താംസ്തിരോഽധിത സരോജഭവഃ കുമാരാന് ॥2॥

വത്സാഈതസ്തദനു ഗോപഗണായിതസ്ത്വം
ശിക്യാദിഭാണ്ഡമുരലീഗവലാദിരൂപഃ ।
പ്രാഗ്വദ്വിഹൃത്യ വിപിനേഷു ചിരായ സായം
ത്വം മായയാഽഥ ബഹുധാ വ്രജമായയാഥ ॥3॥

ത്വാമേവ ശിക്യഗവലാദിമയം ദധാനോ
ഭൂയസ്ത്വമേവ പശുവത്സകബാലരൂപഃ ।
ഗോരൂപിണീഭിരപി ഗോപവധൂമയീഭി-
രാസാദിതോഽസി ജനനീഭിരതിപ്രഹര്ഷാത് ॥4॥

ജീവം ഹി കഞ്ചിദഭിമാനവശാത്സ്വകീയം
മത്വാ തനൂജ ഇതി രാഗഭരം വഹന്ത്യഃ ।
ആത്മാനമേവ തു ഭവന്തമവാപ്യ സൂനും
പ്രീതിം യയുര്ന കിയതീം വനിതാശ്ച ഗാവഃ ॥5॥

ഏവം പ്രതിക്ഷണവിജൃമ്ഭിതഹര്ഷഭാര-
നിശ്ശേഷഗോപഗണലാലിതഭൂരിമൂര്തിമ് ।
ത്വാമഗ്രജോഽപി ബുബുധേ കില വത്സരാന്തേ
ബ്രഹ്മാത്മനോരപി മഹാന് യുവയോര്വിശേഷഃ ॥6॥

വര്ഷാവധൌ നവപുരാതനവത്സപാലാന്
ദൃഷ്ട്വാ വിവേകമസൃണേ ദ്രുഹിണേ വിമൂഢേ ।
പ്രാദീദൃശഃ പ്രതിനവാന് മകുടാങ്ഗദാദി
ഭൂഷാംശ്ചതുര്ഭുജയുജഃ സജലാമ്ബുദാഭാന് ॥7॥

പ്രത്യേകമേവ കമലാപരിലാലിതാങ്ഗാന്
ഭോഗീന്ദ്രഭോഗശയനാന് നയനാഭിരാമാന് ।
ലീലാനിമീലിതദൃശഃ സനകാദിയോഗി-
വ്യാസേവിതാന് കമലഭൂര്ഭവതോ ദദര്ശ ॥8॥

നാരായണാകൃതിമസങ്ഖ്യതമാം നിരീക്ഷ്യ
സര്വത്ര സേവകമപി സ്വമവേക്ഷ്യ ധാതാ ।
മായാനിമഗ്നഹൃദയോ വിമുമോഹ യാവ-
ദേകോ ബഭൂവിഥ തദാ കബലാര്ധപാണിഃ ॥9॥

നശ്യന്മദേ തദനു വിശ്വപതിം മുഹുസ്ത്വാം
നത്വാ ച നൂതവതി ധാതരി ധാമ യാതേ ।
പോതൈഃ സമം പ്രമുദിതൈഃ പ്രവിശന് നികേതം
വാതാലയാധിപ വിഭോ പരിപാഹി രോഗാത് ॥10॥