ନାରାଯଣୀଯଂ ଦଶକ 49 - ଵୃନ୍ଦାଵନପ୍ରଵେଶମ୍

ଭଵତ୍ପ୍ରଭାଵାଵିଦୁରା ହି ଗୋପାସ୍ତରୁପ୍ରପାତାଦିକମତ୍ର ଗୋଷ୍ଠେ ।
ଅହେତୁମୁତ୍ପାତଗଣଂ ଵିଶଙ୍କ୍ଯ ପ୍ରଯାତୁମନ୍ଯତ୍ର ମନୋ ଵିତେନୁଃ ॥1॥

ତତ୍ରୋପନନ୍ଦାଭିଧଗୋପଵର୍ଯୋ ଜଗୌ ଭଵତ୍ପ୍ରେରଣଯୈଵ ନୂନମ୍ ।
ଇତଃ ପ୍ରତୀଚ୍ଯାଂ ଵିପିନଂ ମନୋଜ୍ଞଂ ଵୃନ୍ଦାଵନଂ ନାମ ଵିରାଜତୀତି ॥2॥

ବୃହଦ୍ଵନଂ ତତ୍ ଖଲୁ ନନ୍ଦମୁଖ୍ଯା ଵିଧାଯ ଗୌଷ୍ଠୀନମଥ କ୍ଷଣେନ ।
ତ୍ଵଦନ୍ଵିତତ୍ଵଜ୍ଜନନୀନିଵିଷ୍ଟଗରିଷ୍ଠଯାନାନୁଗତା ଵିଚେଲୁଃ ॥3॥

ଅନୋମନୋଜ୍ଞଧ୍ଵନିଧେନୁପାଲୀଖୁରପ୍ରଣାଦାନ୍ତରତୋ ଵଧୂଭିଃ ।
ଭଵଦ୍ଵିନୋଦାଲପିତାକ୍ଷରାଣି ପ୍ରପୀଯ ନାଜ୍ଞାଯତ ମାର୍ଗଦୈର୍ଘ୍ଯମ୍ ॥4॥

ନିରୀକ୍ଷ୍ଯ ଵୃନ୍ଦାଵନମୀଶ ନନ୍ଦତ୍ପ୍ରସୂନକୁନ୍ଦପ୍ରମୁଖଦ୍ରୁମୌଘମ୍ ।
ଅମୋଦଥାଃ ଶାଦ୍ଵଲସାନ୍ଦ୍ରଲକ୍ଷ୍ମ୍ଯା ହରିନ୍ମଣୀକୁଟ୍ଟିମପୁଷ୍ଟଶୋଭମ୍ ॥5॥

ନଵାକନିର୍ଵ୍ଯୂଢନିଵାସଭେଦେଷ୍ଵଶେଷଗୋପେଷୁ ସୁଖାସିତେଷୁ ।
ଵନଶ୍ରିଯଂ ଗୋପକିଶୋରପାଲୀଵିମିଶ୍ରିତଃ ପର୍ଯଗଲୋକଥାସ୍ତ୍ଵମ୍ ॥6॥

ଅରାଲମାର୍ଗାଗତନିର୍ମଲାପାଂ ମରାଲକୂଜାକୃତନର୍ମଲାପାମ୍ ।
ନିରନ୍ତରସ୍ମେରସରୋଜଵକ୍ତ୍ରାଂ କଲିନ୍ଦକନ୍ଯାଂ ସମଲୋକଯସ୍ତ୍ଵମ୍ ॥7॥

ମଯୂରକେକାଶତଲୋଭନୀଯଂ ମଯୂଖମାଲାଶବଲଂ ମଣୀନାମ୍ ।
ଵିରିଞ୍ଚଲୋକସ୍ପୃଶମୁଚ୍ଚଶୃଙ୍ଗୈର୍ଗିରିଂ ଚ ଗୋଵର୍ଧନମୈକ୍ଷଥାସ୍ତ୍ଵମ୍ ॥8॥

ସମଂ ତତୋ ଗୋପକୁମାରକୈସ୍ତ୍ଵଂ ସମନ୍ତତୋ ଯତ୍ର ଵନାନ୍ତମାଗାଃ ।
ତତସ୍ତତସ୍ତାଂ କୁଟିଲାମପଶ୍ଯଃ କଲିନ୍ଦଜାଂ ରାଗଵତୀମିଵୈକାମ୍ ॥9॥

ତଥାଵିଧେଽସ୍ମିନ୍ ଵିପିନେ ପଶଵ୍ଯେ ସମୁତ୍ସୁକୋ ଵତ୍ସଗଣପ୍ରଚାରେ ।
ଚରନ୍ ସରାମୋଽଥ କୁମାରକୈସ୍ତ୍ଵଂ ସମୀରଗେହାଧିପ ପାହି ରୋଗାତ୍ ॥10॥