ନାରାଯଣୀଯଂ ଦଶକ 19 - ପ୍ରଚେତୃଣାଂ ଚରିତମ୍

ପୃଥୋସ୍ତୁ ନପ୍ତା ପୃଥୁଧର୍ମକର୍ମଠଃ
ପ୍ରାଚୀନବର୍ହିର୍ଯୁଵତୌ ଶତଦ୍ରୁତୌ ।
ପ୍ରଚେତସୋ ନାମ ସୁଚେତସଃ ସୁତା-
ନଜୀଜନତ୍ତ୍ଵତ୍କରୁଣାଙ୍କୁରାନିଵ ॥1॥

ପିତୁଃ ସିସୃକ୍ଷାନିରତସ୍ଯ ଶାସନାଦ୍-
ଭଵତ୍ତପସ୍ଯାଭିରତା ଦଶାପି ତେ
ପଯୋନିଧିଂ ପଶ୍ଚିମମେତ୍ଯ ତତ୍ତଟେ
ସରୋଵରଂ ସନ୍ଦଦୃଶୁର୍ମନୋହରମ୍ ॥2॥

ତଦା ଭଵତ୍ତୀର୍ଥମିଦଂ ସମାଗତୋ
ଭଵୋ ଭଵତ୍ସେଵକଦର୍ଶନାଦୃତଃ ।
ପ୍ରକାଶମାସାଦ୍ଯ ପୁରଃ ପ୍ରଚେତସା-
ମୁପାଦିଶତ୍ ଭକ୍ତତମସ୍ତଵ ସ୍ତଵମ୍ ॥3॥

ସ୍ତଵଂ ଜପନ୍ତସ୍ତମମୀ ଜଲାନ୍ତରେ
ଭଵନ୍ତମାସେଵିଷତାଯୁତଂ ସମାଃ ।
ଭଵତ୍ସୁଖାସ୍ଵାଦରସାଦମୀଷ୍ଵିଯାନ୍
ବଭୂଵ କାଲୋ ଧ୍ରୁଵଵନ୍ନ ଶୀଘ୍ରତା ॥4॥

ତପୋଭିରେଷାମତିମାତ୍ରଵର୍ଧିଭିଃ
ସ ଯଜ୍ଞହିଂସାନିରତୋଽପି ପାଵିତଃ ।
ପିତାଽପି ତେଷାଂ ଗୃହଯାତନାରଦ-
ପ୍ରଦର୍ଶିତାତ୍ମା ଭଵଦାତ୍ମତାଂ ଯଯୌ ॥5॥

କୃପାବଲେନୈଵ ପୁରଃ ପ୍ରଚେତସାଂ
ପ୍ରକାଶମାଗାଃ ପତଗେନ୍ଦ୍ରଵାହନଃ ।
ଵିରାଜି ଚକ୍ରାଦିଵରାଯୁଧାଂଶୁଭି-
ର୍ଭୁଜାଭିରଷ୍ଟାଭିରୁଦଞ୍ଚିତଦ୍ଯୁତିଃ ॥6॥

ପ୍ରଚେତସାଂ ତାଵଦଯାଚତାମପି
ତ୍ଵମେଵ କାରୁଣ୍ଯଭରାଦ୍ଵରାନଦାଃ ।
ଭଵଦ୍ଵିଚିନ୍ତାଽପି ଶିଵାଯ ଦେହିନାଂ
ଭଵତ୍ଵସୌ ରୁଦ୍ରନୁତିଶ୍ଚ କାମଦା ॥7॥

ଅଵାପ୍ଯ କାନ୍ତାଂ ତନଯାଂ ମହୀରୁହାଂ
ତଯା ରମଧ୍ଵଂ ଦଶଲକ୍ଷଵତ୍ସରୀମ୍ ।
ସୁତୋଽସ୍ତୁ ଦକ୍ଷୋ ନନୁ ତତ୍କ୍ଷଣାଚ୍ଚ ମାଂ
ପ୍ରଯାସ୍ଯଥେତି ନ୍ଯଗଦୋ ମୁଦୈଵ ତାନ୍ ॥8॥

ତତଶ୍ଚ ତେ ଭୂତଲରୋଧିନସ୍ତରୂନ୍
କ୍ରୁଧା ଦହନ୍ତୋ ଦ୍ରୁହିଣେନ ଵାରିତାଃ ।
ଦ୍ରୁମୈଶ୍ଚ ଦତ୍ତାଂ ତନଯାମଵାପ୍ଯ ତାଂ
ତ୍ଵଦୁକ୍ତକାଲଂ ସୁଖିନୋଽଭିରେମିରେ ॥9॥

ଅଵାପ୍ଯ ଦକ୍ଷଂ ଚ ସୁତଂ କୃତାଧ୍ଵରାଃ
ପ୍ରଚେତସୋ ନାରଦଲବ୍ଧଯା ଧିଯା ।
ଅଵାପୁରାନନ୍ଦପଦଂ ତଥାଵିଧ-
ସ୍ତ୍ଵମୀଶ ଵାତାଲଯନାଥ ପାହି ମାମ୍ ॥10॥