নারাযণীযং দশক 19 - প্রচেতৃণাং চরিতম্

পৃথোস্তু নপ্তা পৃথুধর্মকর্মঠঃ
প্রাচীনবর্হির্যুবতৌ শতদ্রুতৌ ।
প্রচেতসো নাম সুচেতসঃ সুতা-
নজীজনত্ত্বত্করুণাঙ্কুরানিব ॥1॥

পিতুঃ সিসৃক্ষানিরতস্য শাসনাদ্-
ভবত্তপস্যাভিরতা দশাপি তে
পযোনিধিং পশ্চিমমেত্য তত্তটে
সরোবরং সন্দদৃশুর্মনোহরম্ ॥2॥

তদা ভবত্তীর্থমিদং সমাগতো
ভবো ভবত্সেবকদর্শনাদৃতঃ ।
প্রকাশমাসাদ্য পুরঃ প্রচেতসা-
মুপাদিশত্ ভক্ততমস্তব স্তবম্ ॥3॥

স্তবং জপন্তস্তমমী জলান্তরে
ভবন্তমাসেবিষতাযুতং সমাঃ ।
ভবত্সুখাস্বাদরসাদমীষ্বিযান্
বভূব কালো ধ্রুববন্ন শীঘ্রতা ॥4॥

তপোভিরেষামতিমাত্রবর্ধিভিঃ
স যজ্ঞহিংসানিরতোঽপি পাবিতঃ ।
পিতাঽপি তেষাং গৃহযাতনারদ-
প্রদর্শিতাত্মা ভবদাত্মতাং যযৌ ॥5॥

কৃপাবলেনৈব পুরঃ প্রচেতসাং
প্রকাশমাগাঃ পতগেন্দ্রবাহনঃ ।
বিরাজি চক্রাদিবরাযুধাংশুভি-
র্ভুজাভিরষ্টাভিরুদঞ্চিতদ্যুতিঃ ॥6॥

প্রচেতসাং তাবদযাচতামপি
ত্বমেব কারুণ্যভরাদ্বরানদাঃ ।
ভবদ্বিচিন্তাঽপি শিবায দেহিনাং
ভবত্বসৌ রুদ্রনুতিশ্চ কামদা ॥7॥

অবাপ্য কান্তাং তনযাং মহীরুহাং
তযা রমধ্বং দশলক্ষবত্সরীম্ ।
সুতোঽস্তু দক্ষো ননু তত্ক্ষণাচ্চ মাং
প্রযাস্যথেতি ন্যগদো মুদৈব তান্ ॥8॥

ততশ্চ তে ভূতলরোধিনস্তরূন্
ক্রুধা দহন্তো দ্রুহিণেন বারিতাঃ ।
দ্রুমৈশ্চ দত্তাং তনযামবাপ্য তাং
ত্বদুক্তকালং সুখিনোঽভিরেমিরে ॥9॥

অবাপ্য দক্ষং চ সুতং কৃতাধ্বরাঃ
প্রচেতসো নারদলব্ধযা ধিযা ।
অবাপুরানন্দপদং তথাবিধ-
স্ত্বমীশ বাতালযনাথ পাহি মাম্ ॥10॥