అష్టావక్ర గీతా అష్టమోఽధ్యాయః

తదా బన్ధో యదా చిత్తం కిఞ్చిద్ వాఞ్ఛతి శోచతి ।

కిఞ్చిన్ ముఞ్చతి గృహ్ణాతి కిఞ్చిద్ధృష్యతి కుప్యతి ॥ 8-1॥
తదా ముక్తిర్యదా చిత్తం న వాఞ్ఛతి న శోచతి ।

న ముఞ్చతి న గృహ్ణాతి న హృష్యతి న కుప్యతి ॥ 8-2॥
తదా బన్ధో యదా చిత్తం సక్తం కాస్వపి దృష్టిషు ।

తదా మోక్షో యదా చిత్తమసక్తం సర్వదృష్టిషు ॥ 8-3॥
యదా నాహం తదా మోక్షో యదాహం బన్ధనం తదా ।

మత్వేతి హేలయా కిఞ్చిన్మా గృహాణ విముఞ్చ మా ॥ 8-4॥