ଅଷ୍ଟାଵକ୍ର ଗୀତା ଅଷ୍ଟମୋଽଧ୍ଯାଯଃ

ତଦା ବନ୍ଧୋ ଯଦା ଚିତ୍ତଂ କିଞ୍ଚିଦ୍ ଵାଞ୍ଛତି ଶୋଚତି ।

କିଞ୍ଚିନ୍ ମୁଞ୍ଚତି ଗୃହ୍ଣାତି କିଞ୍ଚିଦ୍ଧୃଷ୍ଯତି କୁପ୍ଯତି ॥ 8-1॥
ତଦା ମୁକ୍ତିର୍ଯଦା ଚିତ୍ତଂ ନ ଵାଞ୍ଛତି ନ ଶୋଚତି ।

ନ ମୁଞ୍ଚତି ନ ଗୃହ୍ଣାତି ନ ହୃଷ୍ଯତି ନ କୁପ୍ଯତି ॥ 8-2॥
ତଦା ବନ୍ଧୋ ଯଦା ଚିତ୍ତଂ ସକ୍ତଂ କାସ୍ଵପି ଦୃଷ୍ଟିଷୁ ।

ତଦା ମୋକ୍ଷୋ ଯଦା ଚିତ୍ତମସକ୍ତଂ ସର୍ଵଦୃଷ୍ଟିଷୁ ॥ 8-3॥
ଯଦା ନାହଂ ତଦା ମୋକ୍ଷୋ ଯଦାହଂ ବନ୍ଧନଂ ତଦା ।

ମତ୍ଵେତି ହେଲଯା କିଞ୍ଚିନ୍ମା ଗୃହାଣ ଵିମୁଞ୍ଚ ମା ॥ 8-4॥