ଅଷ୍ଟାଵକ୍ର ଗୀତା ଚତୁର୍ଥୋଽଧ୍ଯାଯଃ

ହନ୍ତାତ୍ମଜ୍ଞାନସ୍ଯ ଧୀରସ୍ଯ ଖେଲତୋ ଭୋଗଲୀଲଯା ।

ନ ହି ସଂସାରଵାହୀକୈର୍ମୂଢୈଃ ସହ ସମାନତା ॥ 4-1॥
ଯତ୍ ପଦଂ ପ୍ରେପ୍ସଵୋ ଦୀନାଃ ଶକ୍ରାଦ୍ଯାଃ ସର୍ଵଦେଵତାଃ ।

ଅହୋ ତତ୍ର ସ୍ଥିତୋ ଯୋଗୀ ନ ହର୍ଷମୁପଗଚ୍ଛତି ॥ 4-2॥
ତଜ୍ଜ୍ଞସ୍ଯ ପୁଣ୍ଯପାପାଭ୍ଯାଂ ସ୍ପର୍ଶୋ ହ୍ଯନ୍ତର୍ନ ଜାଯତେ ।

ନ ହ୍ଯାକାଶସ୍ଯ ଧୂମେନ ଦୃଶ୍ଯମାନାପି ସଙ୍ଗତିଃ ॥ 4-3॥
ଆତ୍ମୈଵେଦଂ ଜଗତ୍ସର୍ଵଂ ଜ୍ଞାତଂ ଯେନ ମହାତ୍ମନା ।

ଯଦୃଚ୍ଛଯା ଵର୍ତମାନଂ ତଂ ନିଷେଦ୍ଧୁଂ କ୍ଷମେତ କଃ ॥ 4-4॥
ଆବ୍ରହ୍ମସ୍ତମ୍ବପର୍ଯନ୍ତେ ଭୂତଗ୍ରାମେ ଚତୁର୍ଵିଧେ ।

ଵିଜ୍ଞସ୍ଯୈଵ ହି ସାମର୍ଥ୍ଯମିଚ୍ଛାନିଚ୍ଛାଵିଵର୍ଜନେ ॥ 4-5॥
ଆତ୍ମାନମଦ୍ଵଯଂ କଶ୍ଚିଜ୍ଜାନାତି ଜଗଦୀଶ୍ଵରମ୍ ।

ଯଦ୍ ଵେତ୍ତି ତତ୍ସ କୁରୁତେ ନ ଭଯଂ ତସ୍ଯ କୁତ୍ରଚିତ୍ ॥ 4-6॥