ଅଷ୍ଟାଵକ୍ର ଗୀତା ସପ୍ତଦଶୋଽଧ୍ଯାଯଃ

ତେନ ଜ୍ଞାନଫଲଂ ପ୍ରାପ୍ତଂ ଯୋଗାଭ୍ଯାସଫଲଂ ତଥା ।

ତୃପ୍ତଃ ସ୍ଵଚ୍ଛେନ୍ଦ୍ରିଯୋ ନିତ୍ଯମେକାକୀ ରମତେ ତୁ ଯଃ ॥ 17-1॥
ନ କଦାଚିଜ୍ଜଗତ୍ଯସ୍ମିନ୍ ତତ୍ତ୍ଵଜ୍ଞୋ ହନ୍ତ ଖିଦ୍ଯତି ।

ଯତ ଏକେନ ତେନେଦଂ ପୂର୍ଣଂ ବ୍ରହ୍ମାଣ୍ଡମଣ୍ଡଲମ୍ ॥ 17-2॥
ନ ଜାତୁ ଵିଷଯାଃ କେଽପି ସ୍ଵାରାମଂ ହର୍ଷଯନ୍ତ୍ଯମୀ ।

ସଲ୍ଲକୀପଲ୍ଲଵପ୍ରୀତମିଵେଭଂ ନିମ୍ବପଲ୍ଲଵାଃ ॥ 17-3॥
ଯସ୍ତୁ ଭୋଗେଷୁ ଭୁକ୍ତେଷୁ ନ ଭଵତ୍ଯଧିଵାସିତଃ ।

ଅଭୁକ୍ତେଷୁ ନିରାକାଙ୍କ୍ଷୀ ତାଦୃଶୋ ଭଵଦୁର୍ଲଭଃ ॥ 17-4॥
ବୁଭୁକ୍ଷୁରିହ ସଂସାରେ ମୁମୁକ୍ଷୁରପି ଦୃଶ୍ଯତେ ।

ଭୋଗମୋକ୍ଷନିରାକାଙ୍କ୍ଷୀ ଵିରଲୋ ହି ମହାଶଯଃ ॥ 17-5॥
ଧର୍ମାର୍ଥକାମମୋକ୍ଷେଷୁ ଜୀଵିତେ ମରଣେ ତଥା ।

କସ୍ଯାପ୍ଯୁଦାରଚିତ୍ତସ୍ଯ ହେଯୋପାଦେଯତା ନ ହି ॥ 17-6॥
ଵାଞ୍ଛା ନ ଵିଶ୍ଵଵିଲଯେ ନ ଦ୍ଵେଷସ୍ତସ୍ଯ ଚ ସ୍ଥିତୌ ।

ଯଥା ଜୀଵିକଯା ତସ୍ମାଦ୍ ଧନ୍ଯ ଆସ୍ତେ ଯଥା ସୁଖମ୍ ॥ 17-7॥
କୃତାର୍ଥୋଽନେନ ଜ୍ଞାନେନେତ୍ଯେଵଂ ଗଲିତଧୀଃ କୃତୀ ।

ପଶ୍ଯନ୍ ଶୃଣ୍ଵନ୍ ସ୍ପୃଶନ୍ ଜିଘ୍ରନ୍ନ୍

ଅଶ୍ନନ୍ନାସ୍ତେ ଯଥା ସୁଖମ୍ ॥ 17-8॥
ଶୂନ୍ଯା ଦୃଷ୍ଟିର୍ଵୃଥା ଚେଷ୍ଟା ଵିକଲାନୀନ୍ଦ୍ରିଯାଣି ଚ ।

ନ ସ୍ପୃହା ନ ଵିରକ୍ତିର୍ଵା କ୍ଷୀଣସଂସାରସାଗରେ ॥ 17-9॥
ନ ଜାଗର୍ତି ନ ନିଦ୍ରାତି ନୋନ୍ମୀଲତି ନ ମୀଲତି ।

ଅହୋ ପରଦଶା କ୍ଵାପି ଵର୍ତତେ ମୁକ୍ତଚେତସଃ ॥ 17-10॥
ସର୍ଵତ୍ର ଦୃଶ୍ଯତେ ସ୍ଵସ୍ଥଃ ସର୍ଵତ୍ର ଵିମଲାଶଯଃ ।

ସମସ୍ତଵାସନା ମୁକ୍ତୋ ମୁକ୍ତଃ ସର୍ଵତ୍ର ରାଜତେ ॥ 17-11॥
ପଶ୍ଯନ୍ ଶୃଣ୍ଵନ୍ ସ୍ପୃଶନ୍ ଜିଘ୍ରନ୍ନ୍ ଅଶ୍ନନ୍

ଗୃହ୍ଣନ୍ ଵଦନ୍ ଵ୍ରଜନ୍ ।

ଈହିତାନୀହିତୈର୍ମୁକ୍ତୋ ମୁକ୍ତ ଏଵ ମହାଶଯଃ ॥ 17-12॥
ନ ନିନ୍ଦତି ନ ଚ ସ୍ତୌତି ନ ହୃଷ୍ଯତି ନ କୁପ୍ଯତି ।

ନ ଦଦାତି ନ ଗୃହ୍ଣାତି ମୁକ୍ତଃ ସର୍ଵତ୍ର ନୀରସଃ ॥ 17-13॥
ସାନୁରାଗାଂ ସ୍ତ୍ରିଯଂ ଦୃଷ୍ଟ୍ଵା ମୃତ୍ଯୁଂ ଵା ସମୁପସ୍ଥିତମ୍ ।

ଅଵିହ୍ଵଲମନାଃ ସ୍ଵସ୍ଥୋ ମୁକ୍ତ ଏଵ ମହାଶଯଃ ॥ 17-14॥
ସୁଖେ ଦୁଃଖେ ନରେ ନାର୍ଯାଂ ସମ୍ପତ୍ସୁ ଚ ଵିପତ୍ସୁ ଚ ।

ଵିଶେଷୋ ନୈଵ ଧୀରସ୍ଯ ସର୍ଵତ୍ର ସମଦର୍ଶିନଃ ॥ 17-15॥
ନ ହିଂସା ନୈଵ କାରୁଣ୍ଯଂ ନୌଦ୍ଧତ୍ଯଂ ନ ଚ ଦୀନତା ।

ନାଶ୍ଚର୍ଯଂ ନୈଵ ଚ କ୍ଷୋଭଃ କ୍ଷୀଣସଂସରଣେ ନରେ ॥ 17-16॥
ନ ମୁକ୍ତୋ ଵିଷଯଦ୍ଵେଷ୍ଟା ନ ଵା ଵିଷଯଲୋଲୁପଃ ।

ଅସଂସକ୍ତମନା ନିତ୍ଯଂ ପ୍ରାପ୍ତାପ୍ରାପ୍ତମୁପାଶ୍ନୁତେ ॥ 17-17॥
ସମାଧାନାସମାଧାନହିତାହିତଵିକଲ୍ପନାଃ ।

ଶୂନ୍ଯଚିତ୍ତୋ ନ ଜାନାତି କୈଵଲ୍ଯମିଵ ସଂସ୍ଥିତଃ ॥ 17-18॥
ନିର୍ମମୋ ନିରହଙ୍କାରୋ ନ କିଞ୍ଚିଦିତି ନିଶ୍ଚିତଃ ।

ଅନ୍ତର୍ଗଲିତସର୍ଵାଶଃ କୁର୍ଵନ୍ନପି କରୋତି ନ ॥ 17-19॥
ମନଃପ୍ରକାଶସମ୍ମୋହସ୍ଵପ୍ନଜାଡ୍ଯଵିଵର୍ଜିତଃ ।

ଦଶାଂ କାମପି ସମ୍ପ୍ରାପ୍ତୋ ଭଵେଦ୍ ଗଲିତମାନସଃ ॥ 17-20॥