অষ্টাবক্র গীতা সপ্তদশোঽধ্যাযঃ

তেন জ্ঞানফলং প্রাপ্তং যোগাভ্যাসফলং তথা ।

তৃপ্তঃ স্বচ্ছেন্দ্রিযো নিত্যমেকাকী রমতে তু যঃ ॥ 17-1॥
ন কদাচিজ্জগত্যস্মিন্ তত্ত্বজ্ঞো হন্ত খিদ্যতি ।

যত একেন তেনেদং পূর্ণং ব্রহ্মাণ্ডমণ্ডলম্ ॥ 17-2॥
ন জাতু বিষযাঃ কেঽপি স্বারামং হর্ষযন্ত্যমী ।

সল্লকীপল্লবপ্রীতমিবেভং নিম্বপল্লবাঃ ॥ 17-3॥
যস্তু ভোগেষু ভুক্তেষু ন ভবত্যধিবাসিতঃ ।

অভুক্তেষু নিরাকাঙ্ক্ষী তাদৃশো ভবদুর্লভঃ ॥ 17-4॥
বুভুক্ষুরিহ সংসারে মুমুক্ষুরপি দৃশ্যতে ।

ভোগমোক্ষনিরাকাঙ্ক্ষী বিরলো হি মহাশযঃ ॥ 17-5॥
ধর্মার্থকামমোক্ষেষু জীবিতে মরণে তথা ।

কস্যাপ্যুদারচিত্তস্য হেযোপাদেযতা ন হি ॥ 17-6॥
বাঞ্ছা ন বিশ্ববিলযে ন দ্বেষস্তস্য চ স্থিতৌ ।

যথা জীবিকযা তস্মাদ্ ধন্য আস্তে যথা সুখম্ ॥ 17-7॥
কৃতার্থোঽনেন জ্ঞানেনেত্যেবং গলিতধীঃ কৃতী ।

পশ্যন্ শৃণ্বন্ স্পৃশন্ জিঘ্রন্ন্

অশ্নন্নাস্তে যথা সুখম্ ॥ 17-8॥
শূন্যা দৃষ্টির্বৃথা চেষ্টা বিকলানীন্দ্রিযাণি চ ।

ন স্পৃহা ন বিরক্তির্বা ক্ষীণসংসারসাগরে ॥ 17-9॥
ন জাগর্তি ন নিদ্রাতি নোন্মীলতি ন মীলতি ।

অহো পরদশা ক্বাপি বর্ততে মুক্তচেতসঃ ॥ 17-10॥
সর্বত্র দৃশ্যতে স্বস্থঃ সর্বত্র বিমলাশযঃ ।

সমস্তবাসনা মুক্তো মুক্তঃ সর্বত্র রাজতে ॥ 17-11॥
পশ্যন্ শৃণ্বন্ স্পৃশন্ জিঘ্রন্ন্ অশ্নন্

গৃহ্ণন্ বদন্ ব্রজন্ ।

ঈহিতানীহিতৈর্মুক্তো মুক্ত এব মহাশযঃ ॥ 17-12॥
ন নিন্দতি ন চ স্তৌতি ন হৃষ্যতি ন কুপ্যতি ।

ন দদাতি ন গৃহ্ণাতি মুক্তঃ সর্বত্র নীরসঃ ॥ 17-13॥
সানুরাগাং স্ত্রিযং দৃষ্ট্বা মৃত্যুং বা সমুপস্থিতম্ ।

অবিহ্বলমনাঃ স্বস্থো মুক্ত এব মহাশযঃ ॥ 17-14॥
সুখে দুঃখে নরে নার্যাং সম্পত্সু চ বিপত্সু চ ।

বিশেষো নৈব ধীরস্য সর্বত্র সমদর্শিনঃ ॥ 17-15॥
ন হিংসা নৈব কারুণ্যং নৌদ্ধত্যং ন চ দীনতা ।

নাশ্চর্যং নৈব চ ক্ষোভঃ ক্ষীণসংসরণে নরে ॥ 17-16॥
ন মুক্তো বিষযদ্বেষ্টা ন বা বিষযলোলুপঃ ।

অসংসক্তমনা নিত্যং প্রাপ্তাপ্রাপ্তমুপাশ্নুতে ॥ 17-17॥
সমাধানাসমাধানহিতাহিতবিকল্পনাঃ ।

শূন্যচিত্তো ন জানাতি কৈবল্যমিব সংস্থিতঃ ॥ 17-18॥
নির্মমো নিরহঙ্কারো ন কিঞ্চিদিতি নিশ্চিতঃ ।

অন্তর্গলিতসর্বাশঃ কুর্বন্নপি করোতি ন ॥ 17-19॥
মনঃপ্রকাশসম্মোহস্বপ্নজাড্যবিবর্জিতঃ ।

দশাং কামপি সম্প্রাপ্তো ভবেদ্ গলিতমানসঃ ॥ 17-20॥