ଅମୃତ ସଞ୍ଜୀଵନି ଧନ୍ଵନ୍ତରୀ ସ୍ତୋତ୍ରମ୍

ଅଥାପରମହଂ ଵକ୍ଷ୍ଯେଽମୃତସଞ୍ଜୀଵନଂ ସ୍ତଵମ୍ ।
ଯସ୍ଯାନୁଷ୍ଠାନମାତ୍ରେଣ ମୃତ୍ଯୁର୍ଦୂରାତ୍ପଲାଯତେ ॥ 1 ॥

ଅସାଧ୍ଯାଃ କଷ୍ଟସାଧ୍ଯାଶ୍ଚ ମହାରୋଗା ଭଯଙ୍କରାଃ ।
ଶୀଘ୍ରଂ ନଶ୍ଯନ୍ତି ପଠନାଦସ୍ଯାଯୁଶ୍ଚ ପ୍ରଵର୍ଧତେ ॥ 2 ॥

ଶାକିନୀଡାକିନୀଦୋଷାଃ କୁଦୃଷ୍ଟିଗ୍ରହଶତ୍ରୁଜାଃ ।
ପ୍ରେତଵେତାଲଯକ୍ଷୋତ୍ଥା ବାଧା ନଶ୍ଯନ୍ତି ଚାଖିଲାଃ ॥ 3 ॥

ଦୁରିତାନି ସମସ୍ତାନି ନାନାଜନ୍ମୋଦ୍ଭଵାନି ଚ ।
ସଂସର୍ଗଜଵିକାରାଣି ଵିଲୀଯନ୍ତେଽସ୍ଯ ପାଠତଃ ॥ 4 ॥

ସର୍ଵୋପଦ୍ରଵନାଶାଯ ସର୍ଵବାଧାପ୍ରଶାନ୍ତଯେ ।
ଆଯୁଃ ପ୍ରଵୃଦ୍ଧଯେ ଚୈତତ୍ ସ୍ତୋତ୍ରଂ ପରମମଦ୍ଭୁତମ୍ ॥ 5 ॥

ବାଲଗ୍ରହାଭିଭୂତାନାଂ ବାଲାନାଂ ସୁଖଦାଯକମ୍ ।
ସର୍ଵାରିଷ୍ଟହରଂ ଚୈତଦ୍ବଲପୁଷ୍ଟିକରଂ ପରମ୍ ॥ 6 ॥

ବାଲାନାଂ ଜୀଵନାଯୈତତ୍ ସ୍ତୋତ୍ରଂ ଦିଵ୍ଯଂ ସୁଧୋପମମ୍ ।
ମୃତଵତ୍ସତ୍ଵହରଣଂ ଚିରଞ୍ଜୀଵିତ୍ଵକାରକମ୍ ॥ 7 ॥

ମହାରୋଗାଭିଭୂତାନାଂ ଭଯଵ୍ଯାକୁଲିତାତ୍ମନାମ୍ ।
ସର୍ଵାଧିଵ୍ଯାଧିହରଣଂ ଭଯଘ୍ନମମୃତୋପମମ୍ ॥ 8 ॥

ଅଲ୍ପମୃତ୍ଯୁଶ୍ଚାପମୃତ୍ଯୁଃ ପାଠାଦସ୍ଯଃ ପ୍ରଣଶ୍ଯତି ।
ଜଲାଽଗ୍ନିଵିଷଶସ୍ତ୍ରାରି ନ ହି ଶୃଙ୍ଗି ଭଯଂ ତଥା ॥ 9 ॥

ଗର୍ଭରକ୍ଷାକରଂ ସ୍ତ୍ରୀଣାଂ ବାଲାନାଂ ଜୀଵନପ୍ରଦମ୍ ।
ମହାରୋଗହରଂ ନୄଣାମଲ୍ପମୃତ୍ଯୁହରଂ ପରମ୍ ॥ 10 ॥

ବାଲା ଵୃଦ୍ଧାଶ୍ଚ ତରୁଣା ନରା ନାର୍ଯଶ୍ଚ ଦୁଃଖିତାଃ ।
ଭଵନ୍ତି ସୁଖିନଃ ପାଠାଦସ୍ଯ ଲୋକେ ଚିରାଯୁଷଃ ॥ 11 ॥

ଅସ୍ମାତ୍ପରତରଂ ନାସ୍ତି ଜୀଵନୋପାଯ ଐହିକଃ ।
ତସ୍ମାତ୍ ସର୍ଵପ୍ରଯତ୍ନେନ ପାଠମସ୍ଯ ସମାଚରେତ୍ ॥ 12 ॥

ଅଯୁତାଵୃତ୍ତିକଂ ଵାଥ ସହସ୍ରାଵୃତ୍ତିକଂ ତଥା ।
ତଦର୍ଧଂ ଵା ତଦର୍ଧଂ ଵା ପଠେଦେତଚ୍ଚ ଭକ୍ତିତଃ ॥ 13 ॥

କଲଶେ ଵିଷ୍ଣୁମାରାଧ୍ଯ ଦୀପଂ ପ୍ରଜ୍ଵାଲ୍ଯ ଯତ୍ନତଃ ।
ସାଯଂ ପ୍ରାତଶ୍ଚ ଵିଧିଵତ୍ ସ୍ତୋତ୍ରମେତତ୍ ପଠେତ୍ ସୁଧୀଃ ॥ 14 ॥

ସର୍ପିଷା ହଵିଷା ଵାଽପି ସଂଯାଵେନାଥ ଭକ୍ତିତଃ ।
ଦଶାଂଶମାନତୋ ହୋମଂ କୁର୍ଯାତ୍ ସର୍ଵାର୍ଥସିଦ୍ଧଯେ ॥ 15 ॥
ଅଥ ସ୍ତୋତ୍ରମ୍
ନମୋ ନମୋ ଵିଶ୍ଵଵିଭାଵନାଯ
ନମୋ ନମୋ ଲୋକସୁଖପ୍ରଦାଯ ।
ନମୋ ନମୋ ଵିଶ୍ଵସୃଜେଶ୍ଵରାଯ
ନମୋ ନମୋ ମୁକ୍ତିଵରପ୍ରଦାଯ ॥ 1 ॥
ନମୋ ନମସ୍ତେଽଖିଲଲୋକପାଯ
ନମୋ ନମସ୍ତେଽଖିଲକାମଦାଯ ।
ନମୋ ନମସ୍ତେଽଖିଲକାରଣାଯ
ନମୋ ନମସ୍ତେଽଖିଲରକ୍ଷକାଯ ॥ 2 ॥
ନମୋ ନମସ୍ତେ ସକଲାର୍ତିହର୍ତ୍ରେ
ନମୋ ନମସ୍ତେ ଵିରୁଜଃ ପ୍ରକର୍ତ୍ରେ ।
ନମୋ ନମସ୍ତେଽଖିଲଵିଶ୍ଵଧର୍ତ୍ରେ
ନମୋ ନମସ୍ତେଽଖିଲଲୋକଭର୍ତ୍ରେ ॥ 3 ॥
ସୃଷ୍ଟଂ ଦେଵ ଚରାଚରଂ ଜଗଦିଦଂ ବ୍ରହ୍ମସ୍ଵରୂପେଣ ତେ
ସର୍ଵଂ ତତ୍ପରିପାଲ୍ଯତେ ଜଗଦିଦଂ ଵିଷ୍ଣୁସ୍ଵରୂପେଣ ତେ ।
ଵିଶ୍ଵଂ ସଂହ୍ରିତଯେ ତଦେଵ ନିଖିଲଂ ରୁଦ୍ରସ୍ଵରୂପେଣ ତେ
ସଂସିଚ୍ଯାମୃତଶୀକରୈର୍ହର ମହାରିଷ୍ଟଂ ଚିରଂ ଜୀଵଯ ॥ 4 ॥
ଯୋ ଧନ୍ଵନ୍ତରିସଞ୍ଜ୍ଞଯା ନିଗଦିତଃ କ୍ଷୀରାବ୍ଧିତୋ ନିଃସୃତୋ
ହସ୍ତାଭ୍ଯାଂ ଜନଜୀଵନାଯ କଲଶଂ ପୀଯୂଷପୂର୍ଣଂ ଦଧତ୍ ।
ଆଯୁର୍ଵେଦମରୀରଚଜ୍ଜନରୁଜାଂ ନାଶାଯ ସ ତ୍ଵଂ ମୁଦା
ସଂସିଚ୍ଯାମୃତଶୀକରୈର୍ହର ମହାରିଷ୍ଟଂ ଚିରଂ ଜୀଵଯ ॥ 5 ॥
ସ୍ତ୍ରୀରୂପଂ ଵରଭୂଷଣାମ୍ବରଧରଂ ତ୍ରୈଲୋକ୍ଯସମ୍ମୋହନଂ
କୃତ୍ଵା ପାଯଯତି ସ୍ମ ଯଃ ସୁରଗଣାନ୍ ପୀଯୂଷମତ୍ଯୁତ୍ତମମ୍ ।
ଚକ୍ରେ ଦୈତ୍ଯଗଣାନ୍ ସୁଧାଵିରହିତାନ୍ ସମ୍ମୋହ୍ଯ ସ ତ୍ଵଂ ମୁଦା
ସଂସିଚ୍ଯାମୃତଶୀକରୈର୍ହର ମହାରିଷ୍ଟଂ ଚିରଂ ଜୀଵଯ ॥ 6 ॥
ଚାକ୍ଷୁଷୋଦଧିସମ୍ପ୍ଲାଵ ଭୂଵେଦପ ଝଷାକୃତେ ।
ସିଞ୍ଚ ସିଞ୍ଚାମୃତକଣୈଶ୍ଚିରଂ ଜୀଵଯ ଜୀଵଯ ॥ 7 ॥
ପୃଷ୍ଠମନ୍ଦରନିର୍ଘୂର୍ଣନିଦ୍ରାକ୍ଷ କମଠାକୃତେ ।
ସିଞ୍ଚ ସିଞ୍ଚାମୃତକଣୈଶ୍ଚିରଂ ଜୀଵଯ ଜୀଵଯ ॥ 8 ॥
ଯାଞ୍ଚାଚ୍ଛଲବଲିତ୍ରାସମୁକ୍ତନିର୍ଜର ଵାମନ ।
ସିଞ୍ଚ ସିଞ୍ଚାମୃତକଣୈଶ୍ଚିରଂ ଜୀଵଯ ଜୀଵଯ ॥ 9 ॥
ଧରୋଦ୍ଧାର ହିରଣ୍ଯାକ୍ଷଘାତ କ୍ରୋଡାକୃତେ ପ୍ରଭୋ ।
ସିଞ୍ଚ ସିଞ୍ଚାମୃତକଣୈଶ୍ଚିରଂ ଜୀଵଯ ଜୀଵଯ ॥ 10 ॥
ଭକ୍ତତ୍ରାସଵିନାଶାତ୍ତଚଣ୍ଡତ୍ଵ ନୃହରେ ଵିଭୋ ।
ସିଞ୍ଚ ସିଞ୍ଚାମୃତକଣୈଶ୍ଚିରଂ ଜୀଵଯ ଜୀଵଯ ॥ 11 ॥
କ୍ଷତ୍ରିଯାରଣ୍ଯସଞ୍ଛେଦକୁଠାରକରରୈଣୁକ ।
ସିଞ୍ଚ ସିଞ୍ଚାମୃତକଣୈଶ୍ଚିରଂ ଜୀଵଯ ଜୀଵଯ ॥ 12 ॥
ରକ୍ଷୋରାଜପ୍ରତାପାବ୍ଧିଶୋଷଣାଶୁଗ ରାଘଵ ।
ସିଞ୍ଚ ସିଞ୍ଚାମୃତକଣୈଶ୍ଚିରଂ ଜୀଵଯ ଜୀଵଯ ॥ 13 ॥
ଭୂଭାରାସୁରସନ୍ଦୋହକାଲାଗ୍ନେ ରୁକ୍ମିଣୀପତେ ।
ସିଞ୍ଚ ସିଞ୍ଚାମୃତକଣୈଶ୍ଚିରଂ ଜୀଵଯ ଜୀଵଯ ॥ 14 ॥
ଵେଦମାର୍ଗରତାନର୍ହଵିଭ୍ରାନ୍ତ୍ଯୈ ବୁଦ୍ଧରୂପଧୃକ୍ ।
ସିଞ୍ଚ ସିଞ୍ଚାମୃତକଣୈଶ୍ଚିରଂ ଜୀଵଯ ଜୀଵଯ ॥ 15 ॥
କଲିଵର୍ଣାଶ୍ରମାସ୍ପଷ୍ଟଧର୍ମର୍ଧ୍ଯୈ କଲ୍କିରୂପଭାକ୍ ।
ସିଞ୍ଚ ସିଞ୍ଚାମୃତକଣୈଶ୍ଚିରଂ ଜୀଵଯ ଜୀଵଯ ॥ 16 ॥
ଅସାଧ୍ଯାଃ କଷ୍ଟସାଧ୍ଯା ଯେ ମହାରୋଗା ଭଯଙ୍କରାଃ ।
ଛିନ୍ଧି ତାନାଶୁ ଚକ୍ରେଣ ଚିରଂ ଜୀଵଯ ଜୀଵଯ ॥ 17 ॥
ଅଲ୍ପମୃତ୍ଯୁଂ ଚାପମୃତ୍ଯୁଂ ମହୋତ୍ପାତାନୁପଦ୍ରଵାନ୍ ।
ଭିନ୍ଧି ଭିନ୍ଧି ଗଦାଘାତୈଶ୍ଚିରଂ ଜୀଵଯ ଜୀଵଯ ॥ 18 ॥
ଅହଂ ନ ଜାନେ କିମପି ତ୍ଵଦନ୍ଯତ୍
ସମାଶ୍ରଯେ ନାଥ ପଦାମ୍ବୁଜଂ ତେ ।
କୁରୁଷ୍ଵ ତଦ୍ଯନ୍ମନସୀପ୍ସିତଂ ତେ
ସୁକର୍ମଣା କେନ ସମକ୍ଷମୀଯାମ୍ ॥ 19 ॥
ତ୍ଵମେଵ ତାତୋ ଜନନୀ ତ୍ଵମେଵ
ତ୍ଵମେଵ ନାଥଶ୍ଚ ତ୍ଵମେଵ ବନ୍ଧୁଃ ।
ଵିଦ୍ଯାଧନାଗାରକୁଲଂ ତ୍ଵମେଵ
ତ୍ଵମେଵ ସର୍ଵଂ ମମ ଦେଵଦେଵ ॥ 20 ॥
ନ ମେଽପରାଧଂ ପ୍ରଵିଲୋକଯ ପ୍ରଭୋ-
-ଽପରାଧସିନ୍ଧୋଶ୍ଚ ଦଯାନିଧିସ୍ତ୍ଵମ୍ ।
ତାତେନ ଦୁଷ୍ଟୋଽପି ସୁତଃ ସୁରକ୍ଷତେ
ଦଯାଲୁତା ତେଽଵତୁ ସର୍ଵଦାଽସ୍ମାନ୍ ॥ 21 ॥
ଅହହ ଵିସ୍ମର ନାଥ ନ ମାଂ ସଦା
କରୁଣଯା ନିଜଯା ପରିପୂରିତଃ ।
ଭୁଵି ଭଵାନ୍ ଯଦି ମେ ନ ହି ରକ୍ଷକଃ
କଥମହୋ ମମ ଜୀଵନମତ୍ର ଵୈ ॥ 22 ॥
ଦହ ଦହ କୃପଯା ତ୍ଵଂ ଵ୍ଯାଧିଜାଲଂ ଵିଶାଲଂ
ହର ହର କରଵାଲଂ ଚାଲ୍ପମୃତ୍ଯୋଃ କରାଲମ୍ ।
ନିଜଜନପରିପାଲଂ ତ୍ଵାଂ ଭଜେ ଭାଵଯାଲଂ
କୁରୁ କୁରୁ ବହୁକାଲଂ ଜୀଵିତଂ ମେ ସଦାଽଲମ୍ ॥ 23 ॥
ନ ଯତ୍ର ଧର୍ମାଚରଣଂ ନ ଜାନଂ
ଵ୍ରତଂ ନ ଯୋଗୋ ନ ଚ ଵିଷ୍ଣୁଚର୍ଚା ।
ନ ପିତୃଗୋଵିପ୍ରଵରାମରାର୍ଚା
ସ୍ଵଲ୍ପାଯୁଷସ୍ତତ୍ର ଜନା ଭଵନ୍ତି ॥ 24 ॥
ଅଥ ମନ୍ତ୍ରମ୍
କ୍ଲୀଂ ଶ୍ରୀଂ କ୍ଲୀଂ ଶ୍ରୀଂ ନମୋ ଭଗଵତେ ଜନାର୍ଦନାଯ ସକଲ ଦୁରିତାନି ନାଶଯ ନାଶଯ ।
କ୍ଷ୍ରୌଂ ଆରୋଗ୍ଯଂ କୁରୁ କୁରୁ । ହ୍ରୀଂ ଦୀର୍ଘମାଯୁର୍ଦେହି ଦେହି ସ୍ଵାହା ॥
ଫଲଶ୍ରୁତିଃ
ଅସ୍ଯ ଧାରଣତୋ ଜାପାଦଲ୍ପମୃତ୍ଯୁଃ ପ୍ରଶାମ୍ଯତି ।
ଗର୍ଭରକ୍ଷାକରଂ ସ୍ତ୍ରୀଣାଂ ବାଲାନାଂ ଜୀଵନଂ ପରମ୍ ॥ 1 ॥
ଶତଂ ପଞ୍ଚାଶତଂ ଶକ୍ତ୍ଯାଽଥଵା ପଞ୍ଚାଧିଵିଂଶତିମ୍ ।
ପୁସ୍ତକାନାଂ ଦ୍ଵିଜେଭ୍ଯସ୍ତୁ ଦଦ୍ଯାଦ୍ଦୀର୍ଘାଯୁଷାପ୍ତଯେ ॥ 2 ॥
ଭୂର୍ଜପତ୍ରେ ଵିଲିଖ୍ଯେଦଂ କଣ୍ଠେ ଵା ବାହୁମୂଲକେ ।
ସନ୍ଧାରଯେଦ୍ଗର୍ଭରକ୍ଷା ବାଲରକ୍ଷା ଚ ଜାଯତେ ॥ 3 ॥
ସର୍ଵେ ରୋଗା ଵିନଶ୍ଯନ୍ତି ସର୍ଵା ବାଧାଃ ପ୍ରଶାମ୍ଯତି ।
କୁଦୃଷ୍ଟିଜଂ ଭଯଂ ନଶ୍ଯେତ୍ ତଥା ପ୍ରେତାଦିଜଂ ଭଯମ୍ ॥ 4 ॥
ମଯା କଥିତମେତତ୍ତେଽମୃତସଞ୍ଜୀଵନଂ ପରମ୍ ।
ଅଲ୍ପମୃତ୍ଯୁହରଂ ସ୍ତୋତ୍ରଂ ମୃତଵତ୍ସତ୍ଵନାଶନମ୍ ॥ 5 ॥