അമൃത സഞ്ജീവനി ധന്വന്തരീ സ്തോത്രമ്

അഥാപരമഹം വക്ഷ്യേഽമൃതസഞ്ജീവനം സ്തവമ് ।
യസ്യാനുഷ്ഠാനമാത്രേണ മൃത്യുര്ദൂരാത്പലായതേ ॥ 1 ॥

അസാധ്യാഃ കഷ്ടസാധ്യാശ്ച മഹാരോഗാ ഭയങ്കരാഃ ।
ശീഘ്രം നശ്യന്തി പഠനാദസ്യായുശ്ച പ്രവര്ധതേ ॥ 2 ॥

ശാകിനീഡാകിനീദോഷാഃ കുദൃഷ്ടിഗ്രഹശത്രുജാഃ ।
പ്രേതവേതാലയക്ഷോത്ഥാ ബാധാ നശ്യന്തി ചാഖിലാഃ ॥ 3 ॥

ദുരിതാനി സമസ്താനി നാനാജന്മോദ്ഭവാനി ച ।
സംസര്ഗജവികാരാണി വിലീയന്തേഽസ്യ പാഠതഃ ॥ 4 ॥

സര്വോപദ്രവനാശായ സര്വബാധാപ്രശാന്തയേ ।
ആയുഃ പ്രവൃദ്ധയേ ചൈതത് സ്തോത്രം പരമമദ്ഭുതമ് ॥ 5 ॥

ബാലഗ്രഹാഭിഭൂതാനാം ബാലാനാം സുഖദായകമ് ।
സര്വാരിഷ്ടഹരം ചൈതദ്ബലപുഷ്ടികരം പരമ് ॥ 6 ॥

ബാലാനാം ജീവനായൈതത് സ്തോത്രം ദിവ്യം സുധോപമമ് ।
മൃതവത്സത്വഹരണം ചിരഞ്ജീവിത്വകാരകമ് ॥ 7 ॥

മഹാരോഗാഭിഭൂതാനാം ഭയവ്യാകുലിതാത്മനാമ് ।
സര്വാധിവ്യാധിഹരണം ഭയഘ്നമമൃതോപമമ് ॥ 8 ॥

അല്പമൃത്യുശ്ചാപമൃത്യുഃ പാഠാദസ്യഃ പ്രണശ്യതി ।
ജലാഽഗ്നിവിഷശസ്ത്രാരി ന ഹി ശൃങ്ഗി ഭയം തഥാ ॥ 9 ॥

ഗര്ഭരക്ഷാകരം സ്ത്രീണാം ബാലാനാം ജീവനപ്രദമ് ।
മഹാരോഗഹരം നൄണാമല്പമൃത്യുഹരം പരമ് ॥ 10 ॥

ബാലാ വൃദ്ധാശ്ച തരുണാ നരാ നാര്യശ്ച ദുഃഖിതാഃ ।
ഭവന്തി സുഖിനഃ പാഠാദസ്യ ലോകേ ചിരായുഷഃ ॥ 11 ॥

അസ്മാത്പരതരം നാസ്തി ജീവനോപായ ഐഹികഃ ।
തസ്മാത് സര്വപ്രയത്നേന പാഠമസ്യ സമാചരേത് ॥ 12 ॥

അയുതാവൃത്തികം വാഥ സഹസ്രാവൃത്തികം തഥാ ।
തദര്ധം വാ തദര്ധം വാ പഠേദേതച്ച ഭക്തിതഃ ॥ 13 ॥

കലശേ വിഷ്ണുമാരാധ്യ ദീപം പ്രജ്വാല്യ യത്നതഃ ।
സായം പ്രാതശ്ച വിധിവത് സ്തോത്രമേതത് പഠേത് സുധീഃ ॥ 14 ॥

സര്പിഷാ ഹവിഷാ വാഽപി സംയാവേനാഥ ഭക്തിതഃ ।
ദശാംശമാനതോ ഹോമം കുര്യാത് സര്വാര്ഥസിദ്ധയേ ॥ 15 ॥
അഥ സ്തോത്രമ്
നമോ നമോ വിശ്വവിഭാവനായ
നമോ നമോ ലോകസുഖപ്രദായ ।
നമോ നമോ വിശ്വസൃജേശ്വരായ
നമോ നമോ മുക്തിവരപ്രദായ ॥ 1 ॥
നമോ നമസ്തേഽഖിലലോകപായ
നമോ നമസ്തേഽഖിലകാമദായ ।
നമോ നമസ്തേഽഖിലകാരണായ
നമോ നമസ്തേഽഖിലരക്ഷകായ ॥ 2 ॥
നമോ നമസ്തേ സകലാര്തിഹര്ത്രേ
നമോ നമസ്തേ വിരുജഃ പ്രകര്ത്രേ ।
നമോ നമസ്തേഽഖിലവിശ്വധര്ത്രേ
നമോ നമസ്തേഽഖിലലോകഭര്ത്രേ ॥ 3 ॥
സൃഷ്ടം ദേവ ചരാചരം ജഗദിദം ബ്രഹ്മസ്വരൂപേണ തേ
സര്വം തത്പരിപാല്യതേ ജഗദിദം വിഷ്ണുസ്വരൂപേണ തേ ।
വിശ്വം സംഹ്രിതയേ തദേവ നിഖിലം രുദ്രസ്വരൂപേണ തേ
സംസിച്യാമൃതശീകരൈര്ഹര മഹാരിഷ്ടം ചിരം ജീവയ ॥ 4 ॥
യോ ധന്വന്തരിസഞ്ജ്ഞയാ നിഗദിതഃ ക്ഷീരാബ്ധിതോ നിഃസൃതോ
ഹസ്താഭ്യാം ജനജീവനായ കലശം പീയൂഷപൂര്ണം ദധത് ।
ആയുര്വേദമരീരചജ്ജനരുജാം നാശായ സ ത്വം മുദാ
സംസിച്യാമൃതശീകരൈര്ഹര മഹാരിഷ്ടം ചിരം ജീവയ ॥ 5 ॥
സ്ത്രീരൂപം വരഭൂഷണാമ്ബരധരം ത്രൈലോക്യസമ്മോഹനം
കൃത്വാ പായയതി സ്മ യഃ സുരഗണാന് പീയൂഷമത്യുത്തമമ് ।
ചക്രേ ദൈത്യഗണാന് സുധാവിരഹിതാന് സമ്മോഹ്യ സ ത്വം മുദാ
സംസിച്യാമൃതശീകരൈര്ഹര മഹാരിഷ്ടം ചിരം ജീവയ ॥ 6 ॥
ചാക്ഷുഷോദധിസമ്പ്ലാവ ഭൂവേദപ ഝഷാകൃതേ ।
സിഞ്ച സിഞ്ചാമൃതകണൈശ്ചിരം ജീവയ ജീവയ ॥ 7 ॥
പൃഷ്ഠമന്ദരനിര്ഘൂര്ണനിദ്രാക്ഷ കമഠാകൃതേ ।
സിഞ്ച സിഞ്ചാമൃതകണൈശ്ചിരം ജീവയ ജീവയ ॥ 8 ॥
യാഞ്ചാച്ഛലബലിത്രാസമുക്തനിര്ജര വാമന ।
സിഞ്ച സിഞ്ചാമൃതകണൈശ്ചിരം ജീവയ ജീവയ ॥ 9 ॥
ധരോദ്ധാര ഹിരണ്യാക്ഷഘാത ക്രോഡാകൃതേ പ്രഭോ ।
സിഞ്ച സിഞ്ചാമൃതകണൈശ്ചിരം ജീവയ ജീവയ ॥ 10 ॥
ഭക്തത്രാസവിനാശാത്തചണ്ഡത്വ നൃഹരേ വിഭോ ।
സിഞ്ച സിഞ്ചാമൃതകണൈശ്ചിരം ജീവയ ജീവയ ॥ 11 ॥
ക്ഷത്രിയാരണ്യസഞ്ഛേദകുഠാരകരരൈണുക ।
സിഞ്ച സിഞ്ചാമൃതകണൈശ്ചിരം ജീവയ ജീവയ ॥ 12 ॥
രക്ഷോരാജപ്രതാപാബ്ധിശോഷണാശുഗ രാഘവ ।
സിഞ്ച സിഞ്ചാമൃതകണൈശ്ചിരം ജീവയ ജീവയ ॥ 13 ॥
ഭൂഭാരാസുരസന്ദോഹകാലാഗ്നേ രുക്മിണീപതേ ।
സിഞ്ച സിഞ്ചാമൃതകണൈശ്ചിരം ജീവയ ജീവയ ॥ 14 ॥
വേദമാര്ഗരതാനര്ഹവിഭ്രാന്ത്യൈ ബുദ്ധരൂപധൃക് ।
സിഞ്ച സിഞ്ചാമൃതകണൈശ്ചിരം ജീവയ ജീവയ ॥ 15 ॥
കലിവര്ണാശ്രമാസ്പഷ്ടധര്മര്ധ്യൈ കല്കിരൂപഭാക് ।
സിഞ്ച സിഞ്ചാമൃതകണൈശ്ചിരം ജീവയ ജീവയ ॥ 16 ॥
അസാധ്യാഃ കഷ്ടസാധ്യാ യേ മഹാരോഗാ ഭയങ്കരാഃ ।
ഛിന്ധി താനാശു ചക്രേണ ചിരം ജീവയ ജീവയ ॥ 17 ॥
അല്പമൃത്യും ചാപമൃത്യും മഹോത്പാതാനുപദ്രവാന് ।
ഭിന്ധി ഭിന്ധി ഗദാഘാതൈശ്ചിരം ജീവയ ജീവയ ॥ 18 ॥
അഹം ന ജാനേ കിമപി ത്വദന്യത്
സമാശ്രയേ നാഥ പദാമ്ബുജം തേ ।
കുരുഷ്വ തദ്യന്മനസീപ്സിതം തേ
സുകര്മണാ കേന സമക്ഷമീയാമ് ॥ 19 ॥
ത്വമേവ താതോ ജനനീ ത്വമേവ
ത്വമേവ നാഥശ്ച ത്വമേവ ബന്ധുഃ ।
വിദ്യാധനാഗാരകുലം ത്വമേവ
ത്വമേവ സര്വം മമ ദേവദേവ ॥ 20 ॥
ന മേഽപരാധം പ്രവിലോകയ പ്രഭോ-
-ഽപരാധസിന്ധോശ്ച ദയാനിധിസ്ത്വമ് ।
താതേന ദുഷ്ടോഽപി സുതഃ സുരക്ഷതേ
ദയാലുതാ തേഽവതു സര്വദാഽസ്മാന് ॥ 21 ॥
അഹഹ വിസ്മര നാഥ ന മാം സദാ
കരുണയാ നിജയാ പരിപൂരിതഃ ।
ഭുവി ഭവാന് യദി മേ ന ഹി രക്ഷകഃ
കഥമഹോ മമ ജീവനമത്ര വൈ ॥ 22 ॥
ദഹ ദഹ കൃപയാ ത്വം വ്യാധിജാലം വിശാലം
ഹര ഹര കരവാലം ചാല്പമൃത്യോഃ കരാലമ് ।
നിജജനപരിപാലം ത്വാം ഭജേ ഭാവയാലം
കുരു കുരു ബഹുകാലം ജീവിതം മേ സദാഽലമ് ॥ 23 ॥
ന യത്ര ധര്മാചരണം ന ജാനം
വ്രതം ന യോഗോ ന ച വിഷ്ണുചര്ചാ ।
ന പിതൃഗോവിപ്രവരാമരാര്ചാ
സ്വല്പായുഷസ്തത്ര ജനാ ഭവന്തി ॥ 24 ॥
അഥ മന്ത്രമ്
ക്ലീം ശ്രീം ക്ലീം ശ്രീം നമോ ഭഗവതേ ജനാര്ദനായ സകല ദുരിതാനി നാശയ നാശയ ।
ക്ഷ്രൌം ആരോഗ്യം കുരു കുരു । ഹ്രീം ദീര്ഘമായുര്ദേഹി ദേഹി സ്വാഹാ ॥
ഫലശ്രുതിഃ
അസ്യ ധാരണതോ ജാപാദല്പമൃത്യുഃ പ്രശാമ്യതി ।
ഗര്ഭരക്ഷാകരം സ്ത്രീണാം ബാലാനാം ജീവനം പരമ് ॥ 1 ॥
ശതം പഞ്ചാശതം ശക്ത്യാഽഥവാ പഞ്ചാധിവിംശതിമ് ।
പുസ്തകാനാം ദ്വിജേഭ്യസ്തു ദദ്യാദ്ദീര്ഘായുഷാപ്തയേ ॥ 2 ॥
ഭൂര്ജപത്രേ വിലിഖ്യേദം കണ്ഠേ വാ ബാഹുമൂലകേ ।
സന്ധാരയേദ്ഗര്ഭരക്ഷാ ബാലരക്ഷാ ച ജായതേ ॥ 3 ॥
സര്വേ രോഗാ വിനശ്യന്തി സര്വാ ബാധാഃ പ്രശാമ്യതി ।
കുദൃഷ്ടിജം ഭയം നശ്യേത് തഥാ പ്രേതാദിജം ഭയമ് ॥ 4 ॥
മയാ കഥിതമേതത്തേഽമൃതസഞ്ജീവനം പരമ് ।
അല്പമൃത്യുഹരം സ്തോത്രം മൃതവത്സത്വനാശനമ് ॥ 5 ॥