શ્રી વેઙ્કટેશ્વર શરણાગતિ ગદ્યમ્

યો નિત્યમચ્યુતપદામ્બુજયુગ્મરુક્મ
વ્યામોહતસ્તદિતરાણિ તૃણાય મેને ।
અસ્મદ્ગુરોર્ભગવતોઽસ્ય દયૈકસિન્ધોઃ
રામાનુજસ્ય ચરણૌ શરણં પ્રપદ્યે ॥
વન્દે વેદાન્તકર્પૂરચામીકર કરણ્ડકમ્ ।
રામાનુજાર્યમાર્યાણાં ચૂડામણિમહર્નિશમ્ ॥
ઓમ્ ॥ ભગવન્નારાયણાભિમતાનુરૂપ સ્વરૂપરૂપ ગુણવિભવૈશ્વર્ય શીલાદ્યનવધિકાતિશય અસઙ્ખ્યેય કલ્યાણગુણગણાં પદ્મવનાલયાં ભગવતીં શ્રિયં દેવીં નિત્યાનપાયિનીં નિરવદ્યાં દેવદેવદિવ્યમહિષીં અખિલજગન્માતરં અસ્મન્માતરં અશરણ્યશરણ્યાં અનન્યશરણઃ શરણમહં પ્રપદ્યે ॥
પારમાર્થિક ભગવચ્ચરણારવિન્દ યુગલૈકાન્તિકાત્યન્તિક પરભક્તિ પરજ્ઞાન પરમભક્તિકૃત પરિપૂર્ણાનવરત નિત્યવિશદતમાનન્ય પ્રયોજનાનવધિકાતિશય પ્રિય ભગવદનુભવજનિતાનવધિકાતિશય પ્રીતિકારિતાશેષાવસ્થોચિત અશેષશેષતૈકરતિરૂપ નિત્યકૈઙ્કર્યપ્રાપ્ત્યપેક્ષયા પારમાર્થિકી ભગવચ્ચરણારવિન્દ શરણાગતિઃ યથાવસ્થિતા અવિરતાઽસ્તુ મે ॥
અસ્તુ તે । તયૈવ સર્વં સમ્પત્સ્યતે ॥
અખિલહેયપ્રત્યનીક કલ્યાણૈકતાન, સ્વેતર સમસ્તવસ્તુવિલક્ષણાનન્ત જ્ઞાનાનન્દૈકસ્વરૂપ, સ્વાભિમતાનુરૂપૈકરૂપાચિન્ત્ય દિવ્યાદ્ભુત નિત્યનિરવદ્ય નિરતિશયૌજ્જ્વલ્ય સૌન્દર્ય સૌગન્ધ્ય સૌકુમાર્ય લાવણ્ય યૌવનાદ્યનન્તગુણનિધિ દિવ્યરૂપ, સ્વાભાવિકાનવધિકાતિશય જ્ઞાન બલૈશ્વર્ય વીર્ય શક્તિ તેજસ્સૌશીલ્ય વાત્સલ્ય માર્દવાર્જવ સૌહાર્દ સામ્ય કારુણ્ય માધુર્ય ગામ્ભીર્યૌદાર્ય ચાતુર્ય સ્થૈર્ય ધૈર્ય શૌર્ય પરાક્રમ સત્યકામ સત્યસઙ્કલ્પ કૃતિત્વ કૃતજ્ઞતાદ્યસઙ્ખ્યેય કલ્યાણગુણગણૌઘ મહાર્ણવ,
સ્વોચિત વિવિધ વિચિત્રાનન્તાશ્ચર્ય નિત્ય નિરવદ્ય નિરતિશય સુગન્ધ નિરતિશય સુખસ્પર્શ નિરતિશયૌજ્જ્વલ્ય કિરીટ મકુટ ચૂડાવતંસ મકરકુણ્ડલ ગ્રૈવેયક હાર કેયૂર કટક શ્રીવત્સ કૌસ્તુભ મુક્તાદામોદરબન્ધન પીતામ્બર કાઞ્ચીગુણ નૂપુરાદ્યપરિમિત દિવ્યભૂષણ, સ્વાનુરૂપાચિન્ત્યશક્તિ શઙ્ખચક્રગદાઽસિ શાર્ઙ્ગાદ્યસઙ્ખ્યેય
નિત્યનિરવદ્ય નિરતિશય કલ્યાણદિવ્યાયુધ,
સ્વાભિમત નિત્યનિરવદ્યાનુરૂપ સ્વરૂપરૂપગુણ વિભવૈશ્વર્ય શીલાદ્યનવધિકાતિશયાસઙ્ખ્યેય કલ્યાણગુણગણશ્રીવલ્લભ, એવમ્ભૂત ભૂમિનીલાનાયક, સ્વચ્છન્દાનુવર્તિ સ્વરૂપસ્થિતિ પ્રવૃત્તિભેદાશેષ શેષતૈકરતિરૂપ
નિત્યનિરવદ્યનિરતિશય જ્ઞાન ક્રિયૈશ્વર્યાદ્યનન્ત કલ્યાણગુણગણ શેષ શેષાશન
ગરુડપ્રમુખ નાનાવિધાનન્ત પરિજન પરિચારિકા પરિચરિત ચરણયુગલ, પરમયોગિ વાઙ્મનસાઽપરિચ્છેદ્ય સ્વરૂપ સ્વભાવ સ્વાભિમત વિવિધવિચિત્રાનન્તભોગ્ય ભોગોપકરણ ભોગસ્થાન સમૃદ્ધાનન્તાશ્ચર્યાનન્ત મહાવિભવાનન્ત પરિમાણ નિત્ય નિરવદ્ય નિરતિશય શ્રીવૈકુણ્ઠનાથ, સ્વસઙ્કલ્પાનુવિધાયિ સ્વરૂપસ્થિતિ પ્રવૃત્તિ સ્વશેષતૈકસ્વભાવ પ્રકૃતિ પુરુષ કાલાત્મક વિવિધ વિચિત્રાનન્ત ભોગ્ય ભોક્તૃવર્ગ ભોગોપકરણ ભોગસ્થાનરૂપ
નિખિલજગદુદય વિભવ લયલીલ, સત્યકામ, સત્યસઙ્કલ્પ, પરબ્રહ્મભૂત, પુરુષોત્તમ,મહાવિભૂતે,
શ્રીમન્ નારાયણ, વૈકુણ્ઠનાથ, અપાર કારુણ્ય સૌશીલ્ય વાત્સલ્યૌદાર્યૈશ્વર્ય સૌન્દર્ય મહોદધે, અનાલોચિતવિશેષાશેષલોક શરણ્ય, પ્રણતાર્તિહર, આશ્રિત વાત્સલ્યૈકજલધે, અનવરતવિદિત નિખિલભૂતજાતયાથાત્મ્ય, અશેષચરાચરભૂત નિખિલનિયમન નિરત, અશેષચિદચિદ્વસ્તુ શેષિભૂત, નિખિલજગદાધાર, અખિલજગત્સ્વામિન્, અસ્મત્સ્વામિન્, સત્યકામ,
સત્યસઙ્કલ્પ, સકલેતરવિલક્ષણ, અર્થિકલ્પક, આપત્સખ, શ્રીમન્, નારાયણ, અશરણ્યશરણ્ય, અનન્યશરણસ્ત્વત્પાદારવિન્દ યુગલં શરણમહં પ્રપદ્યે ॥
અત્ર દ્વયમ્ ।
પિતરં માતરં દારાન્ પુત્રાન્ બન્ધૂન્ સખીન્ ગુરૂન્ ।
રત્નાનિ ધનધાન્યાનિ ક્ષેત્રાણિ ચ ગૃહાણિ ચ ॥ 1

સર્વધર્માંશ્ચ સન્ત્યજ્ય સર્વકામાંશ્ચ સાક્ષરાન્ ।
લોકવિક્રાન્તચરણૌ શરણં તેઽવ્રજં વિભો ॥ 2

ત્વમેવ માતા ચ પિતા ત્વમેવ
ત્વમેવ બન્ધુશ્ચ ગુરુસ્ત્વમેવ ।
ત્વમેવ વિદ્યા દ્રવિણં ત્વમેવ
ત્વમેવ સર્વં મમ દેવદેવ ॥ 3

પિતાઽસિ લોકસ્ય ચરાચરસ્ય
ત્વમસ્ય પૂજ્યશ્ચ ગુરુર્ગરીયાન્ ।
ન ત્વત્સમોઽસ્ત્યભ્યધિકઃ કુતોઽન્યો
લોકત્રયેઽપ્યપ્રતિમપ્રભાવ ॥ 4
તસ્માત્પ્રણમ્ય પ્રણિધાય કાયં
પ્રસાદયે ત્વામહમીશમીડ્યમ્ ।
પિતેવ પુત્રસ્ય સખેવ સખ્યુઃ
પ્રિયઃ પ્રિયાયાર્હસિ દેવ સોઢુમ્ ॥
મનોવાક્કાયૈરનાદિકાલ પ્રવૃત્તાનન્તાકૃત્યકરણ કૃત્યાકરણ ભગવદપચાર ભાગવતાપચારાસહ્યાપચારરૂપ નાનાવિધાનન્તાપચારાન્ આરબ્ધકાર્યાન્ અનારબ્ધકાર્યાન્ કૃતાન્ ક્રિયમાણાન્ કરિષ્યમાણાંશ્ચ સર્વાનશેષતઃ ક્ષમસ્વ ।
અનાદિકાલપ્રવૃત્તવિપરીત જ્ઞાનમાત્મવિષયં કૃત્સ્ન જગદ્વિષયં ચ વિપરીતવૃત્તં ચાશેષવિષયમદ્યાપિ વર્તમાનં વર્તિષ્યમાણં ચ સર્વં ક્ષમસ્વ ।
મદીયાનાદિકર્મ પ્રવાહપ્રવૃત્તાં ભગવત્સ્વરૂપ તિરોધાનકરીં વિપરીતજ્ઞાનજનનીં સ્વવિષયાયાશ્ચ ભોગ્યબુદ્ધેર્જનનીં દેહેન્દ્રિયત્વેન ભોગ્યત્વેન સૂક્ષ્મરૂપેણ ચાવસ્થિતાં દૈવીં ગુણમયીં માયાં દાસભૂતં શરણાગતોઽસ્મિ તવાસ્મિ દાસઃ