శ్రీ శ్రీనివాస గద్యమ్

శ్రీమదఖిలమహీమణ్డలమణ్డనధరణీధర మణ్డలాఖణ్డలస్య,

వానిఖిలసురాసురవన్దిత వరాహక్షేత్ర విభూషణస్య,

శేషాచల గరుడాచల సింహాచల వృషభాచల నారాయణాచలాఞ్జనాచలాది శిఖరిమాలాకులస్య,

నాథముఖ బోధనిధివీథిగుణసాభరణ సత్త్వనిధి తత్త్వనిధి భక్తిగుణపూర్ణ శ్రీశైలపూర్ణ

గుణవశంవద పరమపురుషకృపాపూర విభ్రమదతుఙ్గశృఙ్గ గలద్గగనగఙ్గాసమాలిఙ్గితస్య,

సీమాతిగ గుణ రామానుజముని నామాఙ్కిత బహు భూమాశ్రయ సురధామాలయ వనరామాయత వనసీమాపరివృత విశఙ్కటతట

నిరన్తర విజృమ్భిత భక్తిరస నిర్ఘరానన్తార్యాహార్య ప్రస్రవణధారాపూర విభ్రమద సలిలభరభరిత మహాతటాక మణ్డితస్య,

కలికర్దమ మలమర్దన కలితోద్యమ విలసద్యమ నియమాదిమ మునిగణనిషేవ్యమాణ

ప్రత్యక్షీభవన్నిజసలిల సమజ్జన నమజ్జన నిఖిలపాపనాశనా పాపనాశన తీర్థాధ్యాసితస్య,

మురారిసేవక జరాదిపీడిత నిరార్తిజీవన నిరాశ భూసుర వరాతిసున్దర సురాఙ్గనారతి కరాఙ్గసౌష్ఠవ

కుమారతాకృతి కుమారతారక సమాపనోదయ దనూనపాతక మహాపదామయ విహాపనోదిత సకలభువన విదిత కుమారధారాభిధాన తీర్థాధిష్ఠితస్య,

ధరణితల గతసకల హతకలిల శుభసలిల గతబహుల వివిధమల హతిచతుర

రుచిరతర విలోకనమాత్ర విదలిత వివిధ మహాపాతక స్వామిపుష్కరిణీ సమేతస్య,

బహుసఙ్కట నరకావట పతదుత్కట కలికఙ్కట కలుషోద్భట జనపాతక వినిపాతక

రుచినాటక కరహాటక కలశాహృత కమలారత శుభమఞ్జన జలసజ్జన

భరభరిత నిజదురిత హతినిరత జనసతత నిరస్తనిరర్గల పేపీయమాన సలిల సమ్భృత విశఙ్కట కటాహతీర్థ విభూషితస్య,

ఏవమాదిమ భూరిమఞ్జిమ సర్వపాతక గర్వహాపక సిన్ధుడమ్బర హారిశమ్బర వివిధవిపుల పుణ్యతీర్థనివహ నివాసస్య,

శ్రీమతో వేఙ్కటాచలస్య శిఖరశేఖరమహాకల్పశాఖీ,

ఖర్వీభవదతి గర్వీకృత గురుమేర్వీశగిరి ముఖోర్వీధర కులదర్వీకర దయితోర్వీధర శిఖరోర్వీ

సతత సదూర్వీకృతి చరణఘన గర్వచర్వణనిపుణ తనుకిరణమసృణిత గిరిశిఖర శేఖరతరునికర తిమిరః,

వాణీపతిశర్వాణీ దయితేన్ద్రాణిశ్వర ముఖ నాణీయోరసవేణీ

నిభశుభవాణీ నుతమహిమాణీ య స్తన కోణీ భవదఖిల భువనభవనోదరః,

వైమానికగురు భూమాధిక గుణ రామానుజ కృతధామాకర కరధామారి దరలలామాచ్ఛకనక

దామాయిత నిజరామాలయ నవకిసలయమయ తోరణమాలాయిత వనమాలాధరః,

కాలామ్బుద మాలానిభ నీలాలక జాలావృత బాలాబ్జ సలీలామల ఫాలాఙ్కసమూలామృత

ధారాద్వయావధీరణ ధీరలలితతర విశదతర ఘన ఘనసార మయోర్ధ్వపుణ్డ్ర రేఖాద్వయరుచిరః,

సువికస్వర దలభాస్వర కమలోదర గతమేదుర నవకేసర తతిభాసుర

పరిపిఞ్జర కనకామ్బర కలితాదర లలితోదర తదాలమ్బ జమ్భరిపు మణిస్తమ్భ

గమ్భీరిమదమ్భస్తమ్భ సముజ్జృమ్భమాణ పీవరోరుయుగల తదాలమ్బ పృథుల

కదలీ ముకుల మదహరణజఙ్ఘాల జఙ్ఘాయుగలః,

నవ్యదల భవ్యమల పీతమల శోణిమలసన్మృదుల సత్కిసలయాశ్రుజలకారి బల శోణతల

పదకమల నిజాశ్రయ బలబన్దీకృత శరదిన్దుమణ్డలీ

విభ్రమదాదభ్ర శుభ్ర పునర్భవాధిష్ఠితాఙ్గులీగాఢ నిపీడిత పద్మావనః,

జానుతలావధి లమ్బ విడమ్బిత వారణ శుణ్డాదణ్డ విజృమ్భిత నీలమణిమయ కల్పకశాఖా

విభ్రమదాయి మృణాలలతాయిత సముజ్జ్వలతర కనకవలయ వేల్లితైకతర బాహుదణ్డయుగలః,

యుగపదుదిత కోటి ఖరకర హిమకర మణ్డల జాజ్వల్యమాన సుదర్శన పాఞ్చజన్య

సముత్తుఙ్గిత శృఙ్గాపర బాహుయుగలః,

అభినవశాణ సముత్తేజిత మహామహా నీలఖణ్డ మదఖణ్డన నిపుణ

నవీన పరితప్త కార్తస్వర కవచిత మహనీయ పృథుల సాలగ్రామ పరమ్పరా గుమ్భిత

నాభిమణ్డల పర్యన్త లమ్బమాన ప్రాలమ్బదీప్తి సమాలమ్బిత విశాల వక్షఃస్థలః,

గఙ్గాఝర తుఙ్గాకృతి భఙ్గావలి భఙ్గావహ సౌధావలి బాధావహ ధారా

నిభ హారావలి దూరాహత గేహాన్తర మోహావహ మహిమ మసృణిత మహాతిమిరః,

పిఙ్గాకృతి భృఙ్గార నిభాఙ్గార దలాఙ్గామల నిష్కాసిత దుష్కార్యఘ

నిష్కావలి దీపప్రభ నీపచ్ఛవి తాపప్రద కనకమాలికా పిశఙ్గిత సర్వాఙ్గః,

నవదలిత దలవలిత మృదులలిత కమలతతి మదవిహతి చతురతర

పృథులతర సరసతర కనకసరమయ రుచిరకణ్ఠికా కమనీయకణ్ఠః,

వాతాశనాధిపతి శయన కమన పరిచరణ రతిసమేతాఖిల ఫణధర

తతి మతికరవర కనకమయ నాగాభరణ పరివీతాఖిలాఙ్గా వగమిత శయన భూతాహిరాజ జాతాతిశయః,

రవికోటీ పరిపాటీ ధరకోటీ రవరాటీ కితవీటీ రసధాటీ

ధరమణిగణకిరణ విసరణ సతతవిధుత తిమిరమోహ గార్భగేహః,

అపరిమిత వివిధభువన భరితాఖణ్డ బ్రహ్మాణ్డమణ్డల పిచణ్డిలః,

ఆర్యధుర్యానన్తార్య పవిత్ర ఖనిత్రపాత పాత్రీకృత

నిజచుబుక గతవ్రణకిణ విభూషణ వహనసూచిత శ్రితజన వత్సలతాతిశయః,

మడ్డుడిణ్డిమ ఢమరు జర్ఘర కాహలీ పటహావలీ మృదుమద్దలాది మృదఙ్గ దున్దుభి

ఢక్కికాముఖ హృద్య వాద్యక మధురమఙ్గల నాదమేదుర

నాటారభి భూపాల బిలహరి మాయామాలవ గౌల అసావేరీ సావేరీ శుద్ధసావేరీ దేవగాన్ధారీ

ధన్యాసీ బేగడ హిన్దుస్తానీ కాపీ తోడి నాటకురుఞ్జీ శ్రీరాగ

సహన అఠాణ సారఙ్గీ దర్బారు పన్తువరాలీ వరాలీ కల్యాణీ భూరికల్యాణీ యమునాకల్యాణీ

హుశేనీ జఞ్ఝోఠీ కౌమారీ కన్నడ ఖరహరప్రియా

కలహంస నాదనామక్రియా ముఖారీ తోడీ పున్నాగవరాలీ కామ్భోజీ భైరవీ

యదుకులకామ్భోజీ ఆనన్దభైరవీ శఙ్కరాభరణ మోహన రేగుప్తీ సౌరాష్ట్రీ నీలామ్బరీ గుణక్రియా

మేఘగర్జనీ హంసధ్వని శోకవరాలీ మధ్యమావతీ జేఞ్జురుటీ సురటీ ద్విజావన్తీ మలయామ్బరీ

కాపీపరశు ధనాసిరీ దేశికతోడీ ఆహిరీ వసన్తగౌలీ సన్తు కేదారగౌల

కనకాఙ్గీ రత్నాఙ్గీ గానమూర్తీ వనస్పతీ వాచస్పతీ దానవతీ మానరూపీ సేనాపతీ

హనుమత్తోడీ ధేనుకా నాటకప్రియా కోకిలప్రియా రూపవతీ గాయకప్రియా

వకులాభరణ చక్రవాక సూర్యకాన్త హాటకామ్బరీ

ఝఙ్కారధ్వనీ నటభైరవీ కీరవాణీ హరికామ్భోదీ ధీరశఙ్కరాభరణ నాగానన్దినీ యాగప్రియాది

విసృమర సరస గానరుచిర సన్తత సన్తన్యమాన నిత్యోత్సవ పక్షోత్సవ మాసోత్సవ

సంవత్సరోత్సవాది వివిధోత్సవ కృతానన్దః శ్రీమదానన్దనిలయ విమానవాసః,

సతత పద్మాలయా పదపద్మరేణు సఞ్చితవక్షస్తల పటవాసః,

శ్రీశ్రీనివాసః సుప్రసన్నో విజయతాం.

శ్రీ​అలర్మేల్మఙ్గా నాయికాసమేతః శ్రీశ్రీనివాస స్వామీ సుప్రీతః సుప్రసన్నో వరదో భూత్వా, పవన పాటలీ పాలాశ బిల్వ పున్నాగ చూత కదలీ చన్దన చమ్పక మఞ్జుల మన్దార హిఞ్జులాది తిలక మాతులుఙ్గ నారికేల క్రౌఞ్చాశోక మాధూకామలక హిన్దుక నాగకేతక పూర్ణకున్ద పూర్ణగన్ధ రస కన్ద వన వఞ్జుల ఖర్జూర సాల కోవిదార హిన్తాల పనస వికట వైకసవరుణ తరుఘమరణ విచులఙ్కాశ్వత్థ యక్ష వసుధ వర్మాధ మన్త్రిణీ తిన్త్రిణీ బోధ న్యగ్రోధ ఘటవటల జమ్బూమతల్లీ వీరతచుల్లీ వసతి వాసతీ జీవనీ పోషణీ ప్రముఖ నిఖిల సన్దోహ తమాల మాలా మహిత విరాజమాన చషక మయూర హంస భారద్వాజ కోకిల చక్రవాక కపోత గరుడ నారాయణ నానావిధ పక్షిజాతి సమూహ బ్రహ్మ క్షత్రియ వైశ్య శూద్ర నానాజాత్యుద్భవ దేవతా నిర్మాణ మాణిక్య వజ్ర వైఢూర్య గోమేధిక పుష్యరాగ పద్మరాగేన్ద్ర నీల ప్రవాలమౌక్తిక స్ఫటిక హేమ రత్నఖచిత ధగద్ధగాయమాన రథ గజ తురగ పదాతి సేనా సమూహ భేరీ మద్దల మురవక ఝల్లరీ శఙ్ఖ కాహల నృత్యగీత తాలవాద్య కుమ్భవాద్య పఞ్చముఖవాద్య అహమీమార్గన్నటీవాద్య కిటికున్తలవాద్య సురటీచౌణ్డోవాద్య తిమిలకవితాలవాద్య తక్కరాగ్రవాద్య ఘణ్టాతాడన బ్రహ్మతాల సమతాల కొట్టరీతాల ఢక్కరీతాల ఎక్కాల ధారావాద్య పటహకాంస్యవాద్య భరతనాట్యాలఙ్కార కిన్నెర కిమ్పురుష రుద్రవీణా ముఖవీణా వాయువీణా తుమ్బురువీణా గాన్ధర్వవీణా నారదవీణా స్వరమణ్డల రావణహస్తవీణాస్తక్రియాలఙ్క్రియాలఙ్కృతానేకవిధవాద్య వాపీకూపతటాకాది గఙ్గాయమునా రేవావరుణా

శోణనదీశోభనదీ సువర్ణముఖీ వేగవతీ వేత్రవతీ క్షీరనదీ బాహునదీ గరుడనదీ కావేరీ తామ్రపర్ణీ ప్రముఖాః మహాపుణ్యనద్యః సజలతీర్థైః సహోభయకూలఙ్గత సదాప్రవాహ ఋగ్యజుస్సామాథర్వణ వేదశాస్త్రేతిహాస పురాణ సకలవిద్యాఘోష భానుకోటిప్రకాశ చన్ద్రకోటి సమాన నిత్యకల్యాణ పరమ్పరోత్తరోత్తరాభివృద్ధిర్భూయాదితి భవన్తో మహాన్తోzనుగృహ్ణన్తు, బ్రహ్మణ్యో రాజా ధార్మికోzస్తు, దేశోయం నిరుపద్రవోzస్తు, సర్వే సాధుజనాస్సుఖినో విలసన్తు, సమస్తసన్మఙ్గలాని సన్తు, ఉత్తరోత్తరాభివృద్ధిరస్తు, సకలకల్యాణ సమృద్ధిరస్తు ॥
హరిః ఓమ్ ॥