శ్రీ మాతఙ్గీ అష్టోత్తర శత నామా స్తోత్రం

భగవన్ శ్రోతుమిచ్ఛామి మాతఙ్గ్యాః శతనామకమ్ ।
యద్గుహ్యం సర్వతన్త్రేషు కేనాపి న ప్రకాశితమ్ ॥ 1 ॥

శృణు దేవి ప్రవక్ష్యామి రహస్యాతిరహస్యకమ్ ।
నాఖ్యేయం యత్ర కుత్రాపి పఠనీయం పరాత్పరమ్ ॥ 2 ॥

యస్యైకవారపఠనాత్సర్వే విఘ్నా ఉపద్రవాః ।
నశ్యన్తి తత్క్షణాద్దేవి వహ్నినా తూలరాశివత్ ॥ 3 ॥

ప్రసన్నా జాయతే దేవీ మాతఙ్గీ చాస్య పాఠతః ।
సహస్రనామపఠనే యత్ఫలం పరికీర్తితమ్ ।
తత్కోటిగుణితం దేవీనామాష్టశతకం శుభమ్ ॥ 4 ॥
అస్య శ్రీమాతఙ్గ్యష్టోత్తరశతనామస్తోత్రస్య భగవాన్మతఙ్గ ఋషిః అనుష్టుప్ఛన్దః శ్రీమాతఙ్గీ దేవతా శ్రీమాతఙ్గీ ప్రీతయే జపే వినియోగః ।
మహామత్తమాతఙ్గినీ సిద్ధిరూపా
తథా యోగినీ భద్రకాలీ రమా చ ।
భవానీ భవప్రీతిదా భూతియుక్తా
భవారాధితా భూతిసమ్పత్కరీ చ ॥ 1 ॥
ధనాధీశమాతా ధనాగారదృష్టి-
-ర్ధనేశార్చితా ధీరవాపీ వరాఙ్గీ ।
ప్రకృష్టా ప్రభారూపిణీ కామరూపా
ప్రహృష్టా మహాకీర్తిదా కర్ణనాలీ ॥ 2 ॥
కరాలీ భగా ఘోరరూపా భగాఙ్గీ
భగాహ్వా భగప్రీతిదా భీమరూపా ।
భవానీ మహాకౌశికీ కోశపూర్ణా
కిశోరీ కిశోరప్రియా నన్దీహా ॥ 3 ॥
మహాకారణాఽకారణా కర్మశీలా
కపాలీ ప్రసిద్ధా మహాసిద్ధఖణ్డా ।
మకారప్రియా మానరూపా మహేశీ
మలోల్లాసినీ లాస్యలీలాలయాఙ్గీ ॥ 4 ॥
క్షమా క్షేమశీలా క్షపాకారిణీ చా-
-ఽక్షయప్రీతిదా భూతియుక్తా భవానీ ।
భవారాధితా భూతిసత్యాత్మికా చ
ప్రభోద్భాసితా భానుభాస్వత్కరా చ ॥ 5 ॥
ధరాధీశమాతా ధరాగారదృష్టి-
-ర్ధరేశార్చితా ధీవరా ధీవరాఙ్గీ ।
ప్రకృష్టా ప్రభారూపిణీ ప్రాణరూపా
ప్రకృష్టస్వరూపా స్వరూపప్రియా చ ॥ 6 ॥
చలత్కుణ్డలా కామినీ కాన్తయుక్తా
కపాలాఽచలా కాలకోద్ధారిణీ చ ।
కదమ్బప్రియా కోటరీ కోటదేహా
క్రమా కీర్తిదా కర్ణరూపా చ కాక్ష్మీః ॥ 7 ॥
క్షమాఙ్గీ క్షయప్రేమరూపా క్షయా చ
క్షయాక్షా క్షయాహ్వా క్షయప్రాన్తరా చ ।
క్షవత్కామినీ క్షారిణీ క్షీరపూర్ణా
శివాఙ్గీ చ శాకమ్భరీ శాకదేహా ॥ 8 ॥
మహాశాకయజ్ఞా ఫలప్రాశకా చ
శకాహ్వాఽశకాహ్వా శకాఖ్యా శకా చ ।
శకాక్షాన్తరోషా సురోషా సురేఖా
మహాశేషయజ్ఞోపవీతప్రియా చ ॥ 9 ॥
జయన్తీ జయా జాగ్రతీ యోగ్యరూపా
జయాఙ్గా జపధ్యానసన్తుష్టసఞ్జ్ఞా ।
జయప్రాణరూపా జయస్వర్ణదేహా
జయజ్వాలినీ యామినీ యామ్యరూపా ॥ 10 ॥
జగన్మాతృరూపా జగద్రక్షణా చ
స్వధావౌషడన్తా విలమ్బాఽవిలమ్బా ।
షడఙ్గా మహాలమ్బరూపాసిహస్తా-
పదాహారిణీహారిణీ హారిణీ చ ॥ 11 ॥
మహామఙ్గలా మఙ్గలప్రేమకీర్తి-
-ర్నిశుమ్భచ్ఛిదా శుమ్భదర్పాపహా చ ।
తథాఽఽనన్దబీజాదిముక్తిస్వరూపా
తథా చణ్డముణ్డాపదా ముఖ్యచణ్డా ॥ 12 ॥
ప్రచణ్డాఽప్రచణ్డా మహాచణ్డవేగా
చలచ్చామరా చామరా చన్ద్రకీర్తిః ।
సుచామీకరా చిత్రభూషోజ్జ్వలాఙ్గీ
సుసఙ్గీతగీతా చ పాయాదపాయాత్ ॥ 13 ॥