ಶ್ರೀ ದುರ್ಗಾ ಅಥರ್ವಶೀರ್ಷಮ್

ಓಂ ಸರ್ವೇ ವೈ ದೇವಾ ದೇವೀಮುಪತಸ್ಥುಃ ಕಾಸಿ ತ್ವ-ಮ್ಮಹಾದೇವೀತಿ ॥ 1 ॥

ಸಾ-ಽಬ್ರವೀದಹ-ಮ್ಬ್ರಹ್ಮಸ್ವರೂಪಿಣೀ ।
ಮತ್ತಃ ಪ್ರಕೃತಿಪುರುಷಾತ್ಮಕ-ಞ್ಜಗತ್ ।
ಶೂನ್ಯ-ಞ್ಚಾಶೂನ್ಯ-ಞ್ಚ ॥ 2 ॥

ಅಹಮಾನನ್ದಾನಾನನ್ದೌ ।
ಅಹಂ-ವಿಁಜ್ಞಾನಾವಿಜ್ಞಾನೇ ।
ಅಹ-ಮ್ಬ್ರಹ್ಮಾಬ್ರಹ್ಮಣಿ ವೇದಿತವ್ಯೇ ।
ಅಹ-ಮ್ಪಞ್ಚಭೂತಾನ್ಯಪಞ್ಚಭೂತಾನಿ ।
ಅಹಮಖಿಲ-ಞ್ಜಗತ್ ॥ 3 ॥

ವೇದೋ-ಽಹಮವೇದೋ-ಽಹಮ್ ।
ವಿದ್ಯಾ-ಽಹಮವಿದ್ಯಾ-ಽಹಮ್ ।
ಅಜಾ-ಽಹಮನಜಾ-ಽಹಮ್ ।
ಅಧಶ್ಚೋರ್ಧ್ವ-ಞ್ಚ ತಿರ್ಯಕ್ಚಾಹಮ್ ॥ 4 ॥

ಅಹಂ ರುದ್ರೇಭಿರ್ವಸುಭಿಶ್ಚರಾಮಿ ।
ಅಹಮಾದಿತ್ಯೈರುತ ವಿಶ್ವದೇವೈಃ ।
ಅಹ-ಮ್ಮಿತ್ರಾವರುಣಾವುಭೌ ಬಿಭರ್ಮಿ ।
ಅಹಮಿನ್ದ್ರಾಗ್ನೀ ಅಹಮಶ್ವಿನಾವುಭೌ ॥ 5 ॥

ಅಹಂ ಸೋಮ-ನ್ತ್ವಷ್ಟಾರ-ಮ್ಪೂಷಣ-ಮ್ಭಗ-ನ್ದಧಾಮಿ ।
ಅಹಂ-ವಿಁಷ್ಣುಮುರುಕ್ರಮ-ಮ್ಬ್ರಹ್ಮಾಣಮುತ ಪ್ರಜಾಪತಿ-ನ್ದಧಾಮಿ ॥ 6 ॥

ಅ॒ಹ-ನ್ದ॑ಧಾಮಿ॒ ದ್ರವಿ॑ಣಂ ಹ॒ವಿಷ್ಮ॑ತೇ ಸುಪ್ರಾ॒ವ್ಯೇ॒3 ಯಜ॑ಮಾನಾಯ ಸುನ್ವ॒ತೇ ।
ಅ॒ಹಂ ರಾಷ್ಟ್ರೀ॑ ಸ॒ಙ್ಗಮ॑ನೀ॒ ವಸೂ॑ನಾ-ಞ್ಚಿಕಿ॒ತುಷೀ॑ ಪ್ರಥ॒ಮಾ ಯ॒ಜ್ಞಿಯಾ॑ನಾಮ್ ।
ಅ॒ಹಂ ಸು॑ವೇ ಪಿ॒ತರ॑ಮಸ್ಯ ಮೂ॒ರ್ಧನ್ಮಮ॒ ಯೋನಿ॑ರ॒ಪ್ಸ್ವನ್ತ-ಸ್ಸ॑ಮು॒ದ್ರೇ ।
ಯ ಏವಂ-ವೇಁದ । ಸ ದೇವೀಂ ಸಮ್ಪದಮಾಪ್ನೋತಿ ॥ 7 ॥

ತೇ ದೇವಾ ಅಬ್ರುವನ್ –
ನಮೋ ದೇವ್ಯೈ ಮಹಾದೇವ್ಯೈ ಶಿವಾಯೈ ಸತತ-ನ್ನಮಃ ।
ನಮಃ ಪ್ರಕೃತ್ಯೈ ಭದ್ರಾಯೈ ನಿಯತಾಃ ಪ್ರಣತಾ-ಸ್ಸ್ಮ ತಾಮ್ ॥ 8 ॥

ತಾಮ॒ಗ್ನಿವ॑ರ್ಣಾ॒-ನ್ತಪ॑ಸಾ ಜ್ವಲ॒ನ್ತೀಂ-ವೈಁ॑ರೋಚ॒ನೀ-ಙ್ಕ॑ರ್ಮಫ॒ಲೇಷು॒ ಜುಷ್ಟಾ᳚ಮ್ ।
ದು॒ರ್ಗಾ-ನ್ದೇ॒ವೀಂ ಶರ॑ಣ-ಮ್ಪ್ರಪ॑ದ್ಯಾಮಹೇ-ಽಸುರಾನ್ನಾಶಯಿತ್ರ್ಯೈ ತೇ ನಮಃ ॥ 9 ॥

(ಋ.ವೇ.8.100.11)
ದೇ॒ವೀಂ-ವಾಁಚ॑ಮಜನಯನ್ತ ದೇ॒ವಾಸ್ತಾಂ-ವಿಁ॒ಶ್ವರೂ॑ಪಾಃ ಪ॒ಶವೋ॑ ವದನ್ತಿ ।
ಸಾ ನೋ॑ ಮ॒ನ್ದ್ರೇಷ॒ಮೂರ್ಜ॒-ನ್ದುಹಾ॑ನಾ ಧೇ॒ನುರ್ವಾಗ॒ಸ್ಮಾನುಪ॒ ಸುಷ್ಟು॒ತೈತು॑ ॥ 10 ॥

ಕಾಲರಾತ್ರೀ-ಮ್ಬ್ರಹ್ಮಸ್ತುತಾಂ-ವೈಁಷ್ಣವೀಂ ಸ್ಕನ್ದಮಾತರಮ್ ।
ಸರಸ್ವತೀಮದಿತಿ-ನ್ದಕ್ಷದುಹಿತರ-ನ್ನಮಾಮಃ ಪಾವನಾಂ ಶಿವಾಮ್ ॥ 11 ॥

ಮಹಾಲಕ್ಷ್ಮ್ಯೈ ಚ ವಿದ್ಮಹೇ ಸರ್ವಶಕ್ತ್ಯೈ ಚ ಧೀಮಹಿ ।
ತನ್ನೋ ದೇವೀ ಪ್ರಚೋದಯಾತ್ ॥ 12 ॥

ಅದಿತಿರ್​ಹ್ಯಜನಿಷ್ಟ ದಕ್ಷ ಯಾ ದುಹಿತಾ ತವ ।
ತಾ-ನ್ದೇವಾ ಅನ್ವಜಾಯನ್ತ ಭದ್ರಾ ಅಮೃತಬನ್ಧವಃ ॥ 13 ॥

ಕಾಮೋ ಯೋನಿಃ ಕಮಲಾ ವಜ್ರಪಾಣಿ-
ರ್ಗುಹಾ ಹಸಾ ಮಾತರಿಶ್ವಾಭ್ರಮಿನ್ದ್ರಃ ।
ಪುನರ್ಗುಹಾ ಸಕಲಾ ಮಾಯಯಾ ಚ
ಪುರೂಚ್ಯೈಷಾ ವಿಶ್ವಮಾತಾದಿವಿದ್ಯೋಮ್ ॥ 14 ॥

ಏಷಾ-ಽಽತ್ಮಶಕ್ತಿಃ ।
ಏಷಾ ವಿಶ್ವಮೋಹಿನೀ ।
ಪಾಶಾಙ್ಕುಶಧನುರ್ಬಾಣಧರಾ ।
ಏಷಾ ಶ್ರೀಮಹಾವಿದ್ಯಾ ।
ಯ ಏವಂ-ವೇಁದ ಸ ಶೋಕ-ನ್ತರತಿ ॥ 15 ॥

ನಮಸ್ತೇ ಅಸ್ತು ಭಗವತಿ ಮಾತರಸ್ಮಾನ್ಪಾಹಿ ಸರ್ವತಃ ॥ 16 ॥

ಸೈಷಾಷ್ಟೌ ವಸವಃ ।
ಸೈಷೈಕಾದಶ ರುದ್ರಾಃ ।
ಸೈಷಾ ದ್ವಾದಶಾದಿತ್ಯಾಃ ।
ಸೈಷಾ ವಿಶ್ವೇದೇವಾ-ಸ್ಸೋಮಪಾ ಅಸೋಮಪಾಶ್ಚ ।
ಸೈಷಾ ಯಾತುಧಾನಾ ಅಸುರಾ ರಕ್ಷಾಂಸಿ ಪಿಶಾಚಾ ಯಕ್ಷಾ ಸಿದ್ಧಾಃ ।
ಸೈಷಾ ಸತ್ತ್ವರಜಸ್ತಮಾಂಸಿ ।
ಸೈಷಾ ಬ್ರಹ್ಮವಿಷ್ಣುರುದ್ರರೂಪಿಣೀ ।
ಸೈಷಾ ಪ್ರಜಾಪತೀನ್ದ್ರಮನವಃ ।
ಸೈಷಾ ಗ್ರಹನಕ್ಷತ್ರಜ್ಯೋತೀಂಷಿ । ಕಲಾಕಾಷ್ಠಾದಿಕಾಲರೂಪಿಣೀ ।
ತಾಮಹ-ಮ್ಪ್ರಣೌಮಿ ನಿತ್ಯಮ್ ।
ಪಾಪಾಪಹಾರಿಣೀ-ನ್ದೇವೀ-ಮ್ಭುಕ್ತಿಮುಕ್ತಿಪ್ರದಾಯಿನೀಮ್ ।
ಅನನ್ತಾಂ-ವಿಁಜಯಾಂ ಶುದ್ಧಾಂ ಶರಣ್ಯಾಂ ಶಿವದಾಂ ಶಿವಾಮ್ ॥ 17 ॥

ವಿಯದೀಕಾರಸಂ​ಯುಁಕ್ತಂ-ವೀಁತಿಹೋತ್ರಸಮನ್ವಿತಮ್ ।
ಅರ್ಧೇನ್ದುಲಸಿತ-ನ್ದೇವ್ಯಾ ಬೀಜಂ ಸರ್ವಾರ್ಥಸಾಧಕಮ್ ॥ 18 ॥

ಏವಮೇಕಾಕ್ಷರ-ಮ್ಬ್ರಹ್ಮ ಯತಯ-ಶ್ಶುದ್ಧಚೇತಸಃ ।
ಧ್ಯಾಯನ್ತಿ ಪರಮಾನನ್ದಮಯಾ ಜ್ಞಾನಾಮ್ಬುರಾಶಯಃ ॥ 19 ॥

ವಾಙ್ಮಾಯಾ ಬ್ರಹ್ಮಸೂಸ್ತಸ್ಮಾ-ಥ್ಷಷ್ಠಂ-ವಁಕ್ತ್ರಸಮನ್ವಿತಮ್ ।
ಸೂರ್ಯೋ-ಽವಾಮಶ್ರೋತ್ರಬಿನ್ದುಸಂ​ಯುಁಕ್ತಷ್ಟಾತ್ತೃತೀಯಕಃ ।
ನಾರಾಯಣೇನ ಸಮ್ಮಿಶ್ರೋ ವಾಯುಶ್ಚಾಧರಯುಕ್ತತಃ ।
ವಿಚ್ಚೇ ನವಾರ್ಣಕೋ-ಽರ್ಣ-ಸ್ಸ್ಯಾನ್ಮಹದಾನನ್ದದಾಯಕಃ ॥ 20 ॥

ಹೃತ್ಪುಣ್ಡರೀಕಮಧ್ಯಸ್ಥಾ-ಮ್ಪ್ರಾತಸ್ಸೂರ್ಯಸಮಪ್ರಭಾಮ್ ।
ಪಾಶಾಙ್ಕುಶಧರಾಂ ಸೌಮ್ಯಾಂ-ವಁರದಾಭಯಹಸ್ತಕಾಮ್ ।
ತ್ರಿನೇತ್ರಾಂ ರಕ್ತವಸನಾ-ಮ್ಭಕ್ತಕಾಮದುಘಾ-ಮ್ಭಜೇ ॥ 21 ॥

ನಮಾಮಿ ತ್ವಾ-ಮ್ಮಹಾದೇವೀ-ಮ್ಮಹಾಭಯವಿನಾಶಿನೀಮ್ ।
ಮಹಾದುರ್ಗಪ್ರಶಮನೀ-ಮ್ಮಹಾಕಾರುಣ್ಯರೂಪಿಣೀಮ್ ॥ 22 ॥

ಯಸ್ಯಾ-ಸ್ಸ್ವರೂಪ-ಮ್ಬ್ರಹ್ಮಾದಯೋ ನ ಜಾನನ್ತಿ ತಸ್ಮಾದುಚ್ಯತೇ ಅಜ್ಞೇಯಾ ।
ಯಸ್ಯಾ ಅನ್ತೋ ನ ಲಭ್ಯತೇ ತಸ್ಮಾದುಚ್ಯತೇ ಅನನ್ತಾ ।
ಯಸ್ಯಾ ಲಕ್ಷ್ಯ-ನ್ನೋಪಲಕ್ಷ್ಯತೇ ತಸ್ಮಾದುಚ್ಯತೇ ಅಲಕ್ಷ್ಯಾ ।
ಯಸ್ಯಾ ಜನನ-ನ್ನೋಪಲಭ್ಯತೇ ತಸ್ಮಾದುಚ್ಯತೇ ಅಜಾ ।
ಏಕೈವ ಸರ್ವತ್ರ ವರ್ತತೇ ತಸ್ಮಾದುಚ್ಯತೇ ಏಕಾ ।
ಏಕೈವ ವಿಶ್ವರೂಪಿಣೀ ತಸ್ಮಾದುಚ್ಯತೇ ನೈಕಾ ।
ಅತ ಏವೋಚ್ಯತೇ ಅಜ್ಞೇಯಾನನ್ತಾಲಕ್ಷ್ಯಾಜೈಕಾ ನೈಕೇತಿ ॥ 23 ॥

ಮನ್ತ್ರಾಣಾ-ಮ್ಮಾತೃಕಾ ದೇವೀ ಶಬ್ದಾನಾ-ಞ್ಜ್ಞಾನರೂಪಿಣೀ ।
ಜ್ಞಾನಾನಾ-ಞ್ಚಿನ್ಮಯಾತೀತಾ ಶೂನ್ಯಾನಾಂ ಶೂನ್ಯಸಾಕ್ಷಿಣೀ ।
ಯಸ್ಯಾಃ ಪರತರ-ನ್ನಾಸ್ತಿ ಸೈಷಾ ದುರ್ಗಾ ಪ್ರಕೀರ್ತಿತಾ ॥ 24 ॥

ತಾ-ನ್ದುರ್ಗಾ-ನ್ದುರ್ಗಮಾ-ನ್ದೇವೀ-ನ್ದುರಾಚಾರವಿಘಾತಿನೀಮ್ ।
ನಮಾಮಿ ಭವಭೀತೋ-ಽಹಂ ಸಂಸಾರಾರ್ಣವತಾರಿಣೀಮ್ ॥ 25 ॥

ಇದಮಥರ್ವಶೀರ್​ಷಂ-ಯೋಁ-ಽಧೀತೇ ಸ ಪಞ್ಚಾಥರ್ವಶೀರ್​ಷಜಪಫಲಮಾಪ್ನೋತಿ ।
ಇದಮಥರ್ವಶೀರ್​ಷಮಜ್ಞಾತ್ವಾ ಯೋ-ಽರ್ಚಾಂ ಸ್ಥಾಪಯತಿ ।
ಶತಲಕ್ಷ-ಮ್ಪ್ರಜಪ್ತ್ವಾ-ಽಪಿ ಸೋ-ಽರ್ಚಾಸಿದ್ಧಿ-ನ್ನ ವಿನ್ದತಿ ।
ಶತಮಷ್ಟೋತ್ತರ-ಞ್ಚಾಸ್ಯ ಪುರಶ್ಚರ್ಯಾವಿಧಿ-ಸ್ಸ್ಮೃತಃ ।
ದಶವಾರ-ಮ್ಪಠೇದ್ಯಸ್ತು ಸದ್ಯಃ ಪಾಪೈಃ ಪ್ರಮುಚ್ಯತೇ ।
ಮಹಾದುರ್ಗಾಣಿ ತರತಿ ಮಹಾದೇವ್ಯಾಃ ಪ್ರಸಾದತಃ । 26 ॥
ಸಾಯಮಧೀಯಾನೋ ದಿವಸಕೃತ-ಮ್ಪಾಪ-ನ್ನಾಶಯತಿ ।
ಪ್ರಾತರಧೀಯಾನೋ ರಾತ್ರಿಕೃತ-ಮ್ಪಾಪ-ನ್ನಾಶಯತಿ ।
ಸಾಯ-ಮ್ಪ್ರಾತಃ ಪ್ರಯುಞ್ಜಾನೋ ಅಪಾಪೋ ಭವತಿ ।
ನಿಶೀಥೇ ತುರೀಯಸನ್ಧ್ಯಾಯಾ-ಞ್ಜಪ್ತ್ವಾ ವಾಕ್ಸಿದ್ಧಿರ್ಭವತಿ ।
ನೂತನಾಯಾ-ಮ್ಪ್ರತಿಮಾಯಾ-ಞ್ಜಪ್ತ್ವಾ ದೇವತಾಸಾನ್ನಿಧ್ಯ-ಮ್ಭವತಿ ।
ಪ್ರಾಣಪ್ರತಿಷ್ಠಾಯಾ-ಞ್ಜಪ್ತ್ವಾ ಪ್ರಾಣಾನಾ-ಮ್ಪ್ರತಿಷ್ಠಾ ಭವತಿ ।
ಭೌಮಾಶ್ವಿನ್ಯಾ-ಮ್ಮಹಾದೇವೀಸನ್ನಿಧೌ ಜಪ್ತ್ವಾ ಮಹಾಮೃತ್ಯು-ನ್ತರತಿ ।
ಸ ಮಹಾಮೃತ್ಯು-ನ್ತರತಿ ।
ಯ ಏವಂ-ವೇಁದ ।
ಇತ್ಯುಪನಿಷತ್ ॥ 27 ॥