ଶ୍ରୀ ଦକ୍ଷିଣାମୂର୍ତି କଵଚଂ (ରୁଦ୍ରଯାମଲ)

ନମସ୍ତେଽସ୍ତୁ ତ୍ରଯୀନାଥ ପରମାନନ୍ଦକାରକ ।
କଵଚଂ ଦକ୍ଷିଣାମୂର୍ତେଃ କୃପଯା ଵଦ ମେ ପ୍ରଭୋ ॥ 1 ॥

ଵକ୍ଷ୍ଯେଽହଂ ଦେଵଦେଵେଶି ଦକ୍ଷିଣାମୂର୍ତିରଵ୍ଯଯମ୍ ।
କଵଚଂ ସର୍ଵପାପଘ୍ନଂ ଵେଦାନ୍ତଜ୍ଞାନଗୋଚରମ୍ ॥ 2 ॥

ଅଣିମାଦି ମହାସିଦ୍ଧିଵିଧାନଚତୁରଂ ଶୁଭମ୍ ।
ଵେଦଶାସ୍ତ୍ରପୁରାଣାନି କଵିତା ତର୍କ ଏଵ ଚ ॥ 3 ॥

ବହୁଧା ଦେଵି ଜାଯନ୍ତେ କଵଚସ୍ଯ ପ୍ରଭାଵତଃ ।
ଋଷିର୍ବ୍ରହ୍ମା ସମୁଦ୍ଦିଷ୍ଟଶ୍ଛନ୍ଦୋଽନୁଷ୍ଟୁବୁଦାହୃତମ୍ ॥ 4 ॥

ଦେଵତା ଦକ୍ଷିଣାମୂର୍ତିଃ ପରମାତ୍ମା ସଦାଶିଵଃ ।
ବୀଜଂ ଵେଦାଦିକଂ ଚୈଵ ସ୍ଵାହା ଶକ୍ତିରୁଦାହୃତା ।
ସର୍ଵଜ୍ଞତ୍ଵେଽପି ଦେଵେଶି ଵିନିଯୋଗଂ ପ୍ରଚକ୍ଷତେ ॥ 5 ॥
ଧ୍ଯାନମ୍
ଅଦ୍ଵନ୍ଦ୍ଵନେତ୍ରମମଲେନ୍ଦୁକଲାଵତଂସଂ
ହଂସାଵଲମ୍ବିତ ସମାନ ଜଟାକଲାପମ୍ ।
ଆନୀଲକଣ୍ଠମୁପକଣ୍ଠମୁନିପ୍ରଵୀରାନ୍
ଅଧ୍ଯାପଯନ୍ତମଵଲୋକଯ ଲୋକନାଥମ୍ ॥
କଵଚମ୍
ଓମ୍ । ଶିରୋ ମେ ଦକ୍ଷିଣାମୂର୍ତିରଵ୍ଯାତ୍ ଫାଲଂ ମହେଶ୍ଵରଃ ।
ଦୃଶୌ ପାତୁ ମହାଦେଵଃ ଶ୍ରଵଣେ ଚନ୍ଦ୍ରଶେଖରଃ ॥ 1 ॥
କପୋଲୌ ପାତୁ ମେ ରୁଦ୍ରୋ ନାସାଂ ପାତୁ ଜଗଦ୍ଗୁରୁଃ ।
ମୁଖଂ ଗୌରୀପତିଃ ପାତୁ ରସନାଂ ଵେଦରୂପଧୃତ୍ ॥ 2 ॥
ଦଶନାଂ ତ୍ରିପୁରଧ୍ଵଂସୀ ଚୋଷ୍ଠଂ ପନ୍ନଗଭୂଷଣଃ ।
ଅଧରଂ ପାତୁ ଵିଶ୍ଵାତ୍ମା ହନୂ ପାତୁ ଜଗନ୍ମଯଃ ॥ 3 ॥
ଚୁବୁକଂ ଦେଵଦେଵସ୍ତୁ ପାତୁ କଣ୍ଠଂ ଜଟାଧରଃ ।
ସ୍କନ୍ଧୌ ମେ ପାତୁ ଶୁଦ୍ଧାତ୍ମା କରୌ ପାତୁ ଯମାନ୍ତକଃ ॥ 4 ॥
କୁଚାଗ୍ରଂ କରମଧ୍ଯଂ ଚ ନଖରାନ୍ ଶଙ୍କରଃ ସ୍ଵଯମ୍ ।
ହୃନ୍ମେ ପଶୁପତିଃ ପାତୁ ପାର୍ଶ୍ଵେ ପରମପୂରୁଷଃ ॥ 5 ॥
ମଧ୍ଯମଂ ପାତୁ ଶର୍ଵୋ ମେ ନାଭିଂ ନାରାଯଣପ୍ରିଯଃ ।
କଟିଂ ପାତୁ ଜଗଦ୍ଭର୍ତା ସକ୍ଥିନୀ ଚ ମୃଡଃ ସ୍ଵଯମ୍ ॥ 6 ॥
କୃତ୍ତିଵାସାଃ ସ୍ଵଯଂ ଗୁହ୍ଯାମୂରୂ ପାତୁ ପିନାକଧୃତ୍ ।
ଜାନୁନୀ ତ୍ର୍ଯମ୍ବକଃ ପାତୁ ଜଙ୍ଘେ ପାତୁ ସଦାଶିଵଃ ॥ 7 ॥
ସ୍ମରାରିଃ ପାତୁ ମେ ପାଦୌ ପାତୁ ସର୍ଵାଙ୍ଗମୀଶ୍ଵରଃ ।
ଇତୀଦଂ କଵଚଂ ଦେଵି ପରମାନନ୍ଦଦାଯକମ୍ ॥ 8 ॥
ଜ୍ଞାନଵାଗର୍ଥଦଂ ଵୀର୍ଯମଣିମାଦିଵିଭୂତିଦମ୍ ।
ଆଯୁରାରୋଗ୍ଯମୈଶ୍ଵର୍ଯମପମୃତ୍ଯୁଭଯାପହମ୍ ॥ 9 ॥
ପ୍ରାତଃ କାଲେ ଶୁଚିର୍ଭୂତ୍ଵା ତ୍ରିଵାରଂ ସର୍ଵଦା ଜପେତ୍ ।
ନିତ୍ଯଂ ପୂଜାସମାଯୁକ୍ତଃ ସଂଵତ୍ସରମତନ୍ଦ୍ରିତଃ ॥ 10 ॥
ଜପେତ୍ ତ୍ରିସନ୍ଧ୍ଯଂ ଯୋ ଵିଦ୍ଵାନ୍ ଵେଦଶାସ୍ତ୍ରାର୍ଥପାରଗଃ ।
ଗଦ୍ଯପଦ୍ଯୈସ୍ତଥା ଚାପି ନାଟକାଃ ସ୍ଵଯମେଵ ହି ।
ନିର୍ଗଚ୍ଛନ୍ତି ମୁଖାମ୍ଭୋଜାତ୍ସତ୍ଯମେତନ୍ନ ସଂଶଯଃ ॥ 11 ॥