ଶ୍ରୀ ବଟୁକ ଭୈରଵ କଵଚଂ

ଦେଵେଶି ଦେହରକ୍ଷାର୍ଥଂ କାରଣଂ କଥ୍ଯତାଂ ଧ୍ରୁଵମ୍ ।
ମ୍ରିଯନ୍ତେ ସାଧକା ଯେନ ଵିନା ଶ୍ମଶାନଭୂମିଷୁ ॥
ରଣେଷୁ ଚାତିଘୋରେଷୁ ମହାଵାଯୁଜଲେଷୁ ଚ ।
ଶୃଙ୍ଗିମକରଵଜ୍ରେଷୁ ଜ୍ଵରାଦିଵ୍ଯାଧିଵହ୍ନିଷୁ ॥
ଶ୍ରୀଦେଵ୍ଯୁଵାଚ।
କଥଯାମି ଶୃଣୁ ପ୍ରାଜ୍ଞ ବଟୋସ୍ତୁ କଵଚଂ ଶୁଭମ୍ ।
ଗୋପନୀଯଂ ପ୍ରଯତ୍ନେନ ମାତୃଜାରୋପମଂ ଯଥା ॥
ତସ୍ଯ ଧ୍ଯାନଂ ତ୍ରିଧା ପ୍ରୋକ୍ତଂ ସାତ୍ତ୍ଵିକାଦିପ୍ରଭେଦତଃ ।
ସାତ୍ତ୍ଵିକଂ ରାଜସଂ ଚୈଵ ତାମସଂ ଦେଵ ତତ୍ ଶୃଣୁ ॥
ଧ୍ଯାନମ୍ –
ଵନ୍ଦେ ବାଲଂ ସ୍ଫଟିକସଦୃଶଂ କୁଣ୍ଡଲୋଦ୍ଭାସିଵକ୍ତ୍ରଂ
ଦିଵ୍ଯାକଲ୍ପୈର୍ନଵମଣିମଯୈଃ କିଙ୍କିଣୀନୂପୁରାଦ୍ଯୈଃ ।
ଦୀପ୍ତାକାରଂ ଵିଶଦଵଦନଂ ସୁପ୍ରସନ୍ନଂ ତ୍ରିନେତ୍ରଂ
ହସ୍ତାବ୍ଜାଭ୍ଯାଂ ବଟୁକମନିଶଂ ଶୂଲଖଡ୍ଗୌଦଧାନମ୍ ॥ 1 ॥

ଉଦ୍ଯଦ୍ଭାସ୍କରସନ୍ନିଭଂ ତ୍ରିନଯନଂ ରକ୍ତାଙ୍ଗରାଗସ୍ରଜଂ
ସ୍ମେରାସ୍ଯଂ ଵରଦଂ କପାଲମଭଯଂ ଶୂଲଂ ଦଧାନଂ କରୈଃ ।
ନୀଲଗ୍ରୀଵମୁଦାରଭୂଷଣଶତଂ ଶୀତାଂଶୁଚୂଡୋଜ୍ଜ୍ଵଲଂ
ବନ୍ଧୂକାରୁଣଵାସସଂ ଭଯହରଂ ଦେଵଂ ସଦା ଭାଵଯେ ॥ 2 ॥

ଧ୍ଯାଯେନ୍ନୀଲାଦ୍ରିକାନ୍ତଂ ଶଶିଶକଲଧରଂ ମୁଣ୍ଡମାଲଂ ମହେଶଂ
ଦିଗ୍ଵସ୍ତ୍ରଂ ପିଙ୍ଗକେଶଂ ଡମରୁମଥ ସୃଣିଂ ଖଡ୍ଗଶୂଲାଭଯାନି ।
ନାଗଂ ଘଣ୍ଟାଂ କପାଲଂ କରସରସିରୁହୈର୍ଵିଭ୍ରତଂ ଭୀମଦଂଷ୍ଟ୍ରଂ
ସର୍ପାକଲ୍ପଂ ତ୍ରିନେତ୍ରଂ ମଣିମଯଵିଲସତ୍କିଙ୍କିଣୀ ନୂପୁରାଢ୍ଯମ୍ ॥ 3 ॥
ଅସ୍ଯ ଵଟୁକଭୈରଵକଵଚସ୍ଯ ମହାକାଲ ଋଷିରନୁଷ୍ଟୁପ୍ଛନ୍ଦଃ ଶ୍ରୀଵଟୁକଭୈରଵୋ ଦେଵତା ବଂ ବୀଜଂ ହ୍ରୀଂ ଶକ୍ତିରାପଦୁଦ୍ଧାରଣାଯେତି କୀଲକଂ ମମ ସର୍ଵାଭୀଷ୍ଟସିଦ୍ଧ୍ଯର୍ଥେ ଵିନିଯୋଗଃ ।
କଵଚମ୍ –
ଓଁ ଶିରୋ ମେ ଭୈରଵଃ ପାତୁ ଲଲାଟଂ ଭୀଷଣସ୍ତଥା ।
ନେତ୍ରେ ଚ ଭୂତହନନଃ ସାରମେଯାନୁଗୋ ଭ୍ରୁଵୌ ॥ 1
ଭୂତନାଥଶ୍ଚ ମେ କର୍ଣୌ କପୋଲୌ ପ୍ରେତଵାହନଃ ।
ନାସାପୁଟୌ ତଥୋଷ୍ଠୌ ଚ ଭସ୍ମାଙ୍ଗଃ ସର୍ଵଭୂଷଣଃ ॥ 2
ଭୀଷଣାସ୍ଯୋ ମମାସ୍ଯଂ ଚ ଶକ୍ତିହସ୍ତୋ ଗଲଂ ମମ ।
ସ୍କନ୍ଧୌ ଦୈତ୍ଯରିପୁଃ ପାତୁ ବାହୂ ଅତୁଲଵିକ୍ରମଃ ॥ 3
ପାଣୀ କପାଲୀ ମେ ପାତୁ ମୁଣ୍ଡମାଲାଧରୋ ହୃଦମ୍ ।
ଵକ୍ଷଃସ୍ଥଲଂ ତଥା ଶାନ୍ତଃ କାମଚାରୀ ସ୍ତନଂ ମମ ॥ 4
ଉଦରଂ ଚ ସ ମେ ତୁଷ୍ଟଃ କ୍ଷେତ୍ରେଶଃ ପାର୍ଶ୍ଵତସ୍ତଥା ।
କ୍ଷେତ୍ରପାଲଃ ପୃଷ୍ଠଦେଶଂ କ୍ଷେତ୍ରାଖ୍ଯୋ ନାଭିତସ୍ତଥା ॥ 5
କଟିଂ ପାପୌଘନାଶଶ୍ଚ ବଟୁକୋ ଲିଙ୍ଗଦେଶକମ୍ ।
ଗୁଦଂ ରକ୍ଷାକରଃ ପାତୁ ଊରୂ ରକ୍ଷାକରଃ ସଦା ॥ 6
ଜାନୂ ଚ ଘୁର୍ଘୁରାରାଵୋ ଜଙ୍ଘେ ରକ୍ଷତୁ ରକ୍ତପଃ ।
ଗୁଲ୍ଫୌ ଚ ପାଦୁକାସିଦ୍ଧଃ ପାଦପୃଷ୍ଠଂ ସୁରେଶ୍ଵରଃ ॥ 7
ଆପାଦମସ୍ତକଂ ଚୈଵ ଆପଦୁଦ୍ଧାରଣସ୍ତଥା ।
ସହସ୍ରାରେ ମହାପଦ୍ମେ କର୍ପୂରଧଵଲୋ ଗୁରୁଃ ॥ 8
ପାତୁ ମାଂ ଵଟୁକୋ ଦେଵୋ ଭୈରଵଃ ସର୍ଵକର୍ମସୁ ।
ପୂର୍ଵ ସ୍ଯାମସିତାଙ୍ଗୋ ମେ ଦିଶି ରକ୍ଷତୁ ସର୍ଵଦା ॥ 9
ଆଗ୍ନେଯ୍ଯାଂ ଚ ରୁରୁଃ ପାତୁ ଦକ୍ଷିଣେ ଚଣ୍ଡଭୈରଵଃ ।
ନୈରୃତ୍ଯାଂ କ୍ରୋଧନଃ ପାତୁ ମାମୁନ୍ମତ୍ତସ୍ତୁ ପଶ୍ଚିମେ ॥ 10
ଵାଯଵ୍ଯାଂ ମେ କପାଲୀ ଚ ନିତ୍ଯଂ ପାଯାତ୍ ସୁରେଶ୍ଵରଃ ।
ଭୀଷଣୋ ଭୈରଵଃ ପାତୂତ୍ତରସ୍ଯାଂ ଦିଶି ସର୍ଵଦା ॥ 11
ସଂହାରଭୈରଵଃ ପାତୁ ଦିଶ୍ଯୈଶାନ୍ଯାଂ ମହେଶ୍ଵରଃ ।
ଊର୍ଧ୍ଵେ ପାତୁ ଵିଧାତା ଵୈ ପାତାଲେ ନନ୍ଦିକୋ ଵିଭୁଃ ॥ 12
ସଦ୍ଯୋଜାତସ୍ତୁ ମାଂ ପାଯାତ୍ ସର୍ଵତୋ ଦେଵସେଵିତଃ ।
ଵାମଦେଵୋଽଵତୁ ପ୍ରୀତୋ ରଣେ ଘୋରେ ତଥାଵତୁ ॥ 13
ଜଲେ ତତ୍ପୁରୁଷଃ ପାତୁ ସ୍ଥଲେ ପାତୁ ଗୁରୁଃ ସଦା ।
ଡାକିନୀପୁତ୍ରକଃ ପାତୁ ଦାରାଂସ୍ତୁ ଲାକିନୀସୁତଃ ॥ 14
ପାତୁ ସାକଲକୋ ଭ୍ରାତୄନ୍ ଶ୍ରିଯଂ ମେ ସତତଂ ଗିରଃ ।
ଲାକିନୀପୁତ୍ରକଃ ପାତୁ ପଶୂନଶ୍ଵାନଜାଂସ୍ତଥା ॥ 15
ମହାକାଲୋଽଵତୁ ଚ୍ଛତ୍ରଂ ସୈନ୍ଯଂ ଵୈ କାଲଭୈରଵଃ ।
ରାଜ୍ଯଂ ରାଜ୍ଯଶ୍ରିଯଂ ପାଯାତ୍ ଭୈରଵୋ ଭୀତିହାରକଃ ॥ 16
ରକ୍ଷାହୀନନ୍ତୁ ଯତ୍ ସ୍ଥାନଂ ଵର୍ଜିତଂ କଵଚେନ ଚ ।
ତତ୍ ସର୍ଵଂ ରକ୍ଷ ମେ ଦେଵ ତ୍ଵଂ ଯତଃ ସର୍ଵରକ୍ଷକଃ ॥ 17
ଏତତ୍ କଵଚମୀଶାନ ତଵ ସ୍ନେହାତ୍ ପ୍ରକାଶିତମ୍ ।
ନାଖ୍ଯେଯଂ ନରଲୋକେଷୁ ସାରଭୂତଂ ଚ ସୁଶ୍ରିଯମ୍ ॥ 18
ଯସ୍ମୈ କସ୍ମୈ ନ ଦାତଵ୍ଯଂ କଵଚେଶଂ ସୁଦୁର୍ଲଭମ୍ ।
ନ ଦେଯଂ ପରଶିଷ୍ଯେଭ୍ଯଃ କୃପଣେଭ୍ଯଶ୍ଚ ଶଙ୍କର ॥ 19
ଯୋ ଦଦାତି ନିଷିଦ୍ଧେଭ୍ଯଃ ସ ଵୈ ଭ୍ରଷ୍ଟୋ ଭଵେଦ୍ଧ୍ରୁଵମ୍ ।
ଅନେନ କଵଚେଶେନ ରକ୍ଷାଂ କୃତ୍ଵା ଦ୍ଵିଜୋତ୍ତମଃ ॥ 20
ଵିଚରନ୍ ଯତ୍ର କୁତ୍ରାପି ଵିଘ୍ନୌଘୈଃ ପ୍ରାପ୍ଯତେ ନ ସଃ ।
ମନ୍ତ୍ରେଣ ମ୍ରିଯତେ ଯୋଗୀ କଵଚଂ ଯନ୍ନ ରକ୍ଷିତଃ ॥ 21
ତସ୍ମାତ୍ ସର୍ଵପ୍ରଯତ୍ନେନ ଦୁର୍ଲଭଂ ପାପଚେତସାମ୍ ।
ଭୂର୍ଜେ ରମ୍ଭାତ୍ଵଚେ ଵାପି ଲିଖିତ୍ଵା ଵିଧିଵତ୍ ପ୍ରଭୋ ॥ 22
ଧାରଯେତ୍ ପାଠଯେଦ୍ଵାପି ସମ୍ପଠେଦ୍ଵାପି ନିତ୍ଯଶଃ ।
ସମ୍ପ୍ରାପ୍ନୋତି ପ୍ରଭାଵଂ ଵୈ କଵଚସ୍ଯାସ୍ଯ ଵର୍ଣିତମ୍ ॥ 23
ନମୋ ଭୈରଵଦେଵାଯ ସାରଭୂତାଯ ଵୈ ନମଃ ।
ନମସ୍ତ୍ରୈଲୋକ୍ଯନାଥାଯ ନାଥନାଥାଯ ଵୈ ନମଃ ॥ 24