নারাযণীযং দশক 93 - পঞ্চবিংশতি গুরবঃ

বন্ধুস্নেহং বিজহ্যাং তব হি করুণযা ত্বয্যুপাবেশিতাত্মা
সর্বং ত্যক্ত্বা চরেযং সকলমপি জগদ্বীক্ষ্য মাযাবিলাসম্ ।
নানাত্বাদ্ভ্রান্তিজন্যাত্ সতি খলু গুণদোষাববোধে বিধির্বা
ব্যাসেধো বা কথং তৌ ত্বযি নিহিতমতের্বীতবৈষম্যবুদ্ধেঃ ॥1॥

ক্ষুত্তৃষ্ণালোপমাত্রে সততকৃতধিযো জন্তবঃ সন্ত্যনন্তা-
স্তেভ্যো বিজ্ঞানবত্ত্বাত্ পুরুষ ইহ বরস্তজ্জনির্দুর্লভৈব ।
তত্রাপ্যাত্মাত্মনঃ স্যাত্সুহৃদপি চ রিপুর্যস্ত্বযি ন্যস্তচেতা-
স্তাপোচ্ছিত্তেরুপাযং স্মরতি স হি সুহৃত্ স্বাত্মবৈরী ততোঽন্যঃ ॥2॥

ত্বত্কারুণ্যে প্রবৃত্তে ক ইব নহি গুরুর্লোকবৃত্তেঽপি ভূমন্
সর্বাক্রান্তাপি ভূমির্নহি চলতি ততস্সত্ক্ষমাং শিক্ষযেযম্ ।
গৃহ্ণীযামীশ তত্তদ্বিষযপরিচযেঽপ্যপ্রসক্তিং সমীরাত্
ব্যাপ্তত্বঞ্চাত্মনো মে গগনগুরুবশাদ্ভাতু নির্লেপতা চ ॥3

স্বচ্ছঃ স্যাং পাবনোঽহং মধুর উদকবদ্বহ্নিবন্মা স্ম গৃহ্ণাং
সর্বান্নীনোঽপি দোষং তরুষু তমিব মাং সর্বভূতেষ্ববেযাম্ ।
পুষ্টির্নষ্টিঃ কলানাং শশিন ইব তনোর্নাত্মনোঽস্তীতি বিদ্যাং
তোযাদিব্যস্তমার্তাণ্ডবদপি চ তনুষ্বেকতাং ত্বত্প্রসাদাত্ ॥4॥

স্নেহাদ্ব্যাধাত্তপুত্রপ্রণযমৃতকপোতাযিতো মা স্ম ভূবং
প্রাপ্তং প্রাশ্নন্ সহেয ক্ষুধমপি শযুবত্ সিন্ধুবত্স্যামগাধঃ ।
মা পপ্তং যোষিদাদৌ শিখিনি শলভবত্ ভৃঙ্গবত্সারভাগী
ভূযাসং কিন্তু তদ্বদ্ধনচযনবশান্মাহমীশ প্রণেশম্ ॥5॥

মা বদ্ধ্যাসং তরুণ্যা গজ ইব বশযা নার্জযেযং ধনৌঘং
হর্তান্যস্তং হি মাধ্বীহর ইব মৃগবন্মা মুহং গ্রাম্যগীতৈঃ ।
নাত্যাসজ্জেয ভোজ্যে ঝষ ইব বলিশে পিঙ্গলাবন্নিরাশঃ
সুপ্যাং ভর্তব্যযোগাত্ কুরর ইব বিভো সামিষোঽন্যৈর্ন হন্যৈ ॥6॥

বর্তেয ত্যক্তমানঃ সুখমতিশিশুবন্নিস্সহাযশ্চরেযং
কন্যাযা একশেষো বলয ইব বিভো বর্জিতান্যোন্যঘোষঃ ।
ত্বচ্চিত্তো নাববুধ্যৈ পরমিষুকৃদিব ক্ষ্মাভৃদাযানঘোষং
গেহেষ্বন্যপ্রণীতেষ্বহিরিব নিবসান্যুন্দুরোর্মন্দিরেষু ॥7॥

ত্বয্যেব ত্বত্কৃতং ত্বং ক্ষপযসি জগদিত্যূর্ণনাভাত্ প্রতীযাং
ত্বচ্চিন্তা ত্বত্স্বরূপং কুরুত ইতি দৃঢং শিক্ষযে পেশকারাত্ ।
বিড্ভস্মাত্মা চ দেহো ভবতি গুরুবরো যো বিবেকং বিরক্তিং
ধত্তে সঞ্চিন্ত্যমানো মম তু বহুরুজাপীডিতোঽযং বিশেষাত্ ॥8॥

হী হী মে দেহমোহং ত্যজ পবনপুরাধীশ যত্প্রেমহেতো-
র্গেহে বিত্তে কলত্রাদিষু চ বিবশিতাস্ত্বত্পদং বিস্মরন্তি ।
সোঽযং বহ্নেশ্শুনো বা পরমিহ পরতঃ সাম্প্রতঞ্চাক্ষিকর্ণ-
ত্বগ্জিহ্বাদ্যা বিকর্ষন্ত্যবশমত ইতঃ কোঽপি ন ত্বত্পদাব্জে ॥9॥

দুর্বারো দেহমোহো যদি পুনরধুনা তর্হি নিশ্শেষরোগান্
হৃত্বা ভক্তিং দ্রঢিষ্ঠাং কুরু তব পদপঙ্কেরুহে পঙ্কজাক্ষ ।
নূনং নানাভবান্তে সমধিগতমমুং মুক্তিদং বিপ্রদেহং
ক্ষুদ্রে হা হন্ত মা মা ক্ষিপ বিষযরসে পাহি মাং মারুতেশ ॥10॥