নারাযণীযং দশক 83 - পৌণ্ড্রকবধং - দ্নিনিদবধম্

রামেঽথ গোকুলগতে প্রমদাপ্রসক্তে
হূতানুপেতযমুনাদমনে মদান্ধে ।
স্বৈরং সমারমতি সেবকবাদমূঢো
দূতং ন্যযুঙ্ক্ত তব পৌণ্ড্রকবাসুদেবঃ ॥1॥

নারাযণোঽহমবতীর্ণ ইহাস্মি ভূমৌ
ধত্সে কিল ত্বমপি মামকলক্ষণানি ।
উত্সৃজ্য তানি শরণং ব্রজ মামিতি ত্বাং
দূতো জগাদ সকলৈর্হসিতঃ সভাযাম্ ॥2॥

দূতেঽথ যাতবতি যাদবসৈনিকৈস্ত্বং
যাতো দদর্শিথ বপুঃ কিল পৌণ্ড্রকীযম্ ।
তাপেন বক্ষসি কৃতাঙ্কমনল্পমূল্য-
শ্রীকৌস্তুভং মকরকুণ্ডলপীতচেলম্ ॥3॥

কালাযসং নিজসুদর্শনমস্যতোঽস্য
কালানলোত্করকিরেণ সুদর্শনেন ।
শীর্ষং চকর্তিথ মমর্দিথ চাস্য সেনাং
তন্মিত্রকাশিপশিরোঽপি চকর্থ কাশ্যাম্ ॥4॥

জাল্যেন বালকগিরাঽপি কিলাহমেব
শ্রীবাসুদেব ইতি রূঢমতিশ্চিরং সঃ ।
সাযুজ্যমেব ভবদৈক্যধিযা গতোঽভূত্
কো নাম কস্য সুকৃতং কথমিত্যবেযাত্ ॥5॥

কাশীশ্বরস্য তনযোঽথ সুদক্ষিণাখ্যঃ
শর্বং প্রপূজ্য ভবতে বিহিতাভিচারঃ ।
কৃত্যানলং কমপি বাণ্ররণাতিভীতৈ-
র্ভূতৈঃ কথঞ্চন বৃতৈঃ সমমভ্যমুঞ্চত্ ॥6॥

তালপ্রমাণচরণামখিলং দহন্তীং
কৃত্যাং বিলোক্য চকিতৈঃ কথিতোঽপি পৌরৈঃ ।
দ্যূতোত্সবে কিমপি নো চলিতো বিভো ত্বং
পার্শ্বস্থমাশু বিসসর্জিথ কালচক্রম্ ॥7॥

অভ্যাপতত্যমিতধাম্নি ভবন্মহাস্ত্রে
হা হেতি বিদ্রুতবতী খলু ঘোরকৃত্যা।
রোষাত্ সুদক্ষিণমদক্ষিণচেষ্টিতং তং
পুপ্লোষ চক্রমপি কাশিপুরীমধাক্ষীত্ ॥8॥

স খলু বিবিদো রক্ষোঘাতে কৃতোপকৃতিঃ পুরা
তব তু কলযা মৃত্যুং প্রাপ্তুং তদা খলতাং গতঃ ।
নরকসচিবো দেশক্লেশং সৃজন্ নগরান্তিকে
ঝটিতি হলিনা যুধ্যন্নদ্ধা পপাত তলাহতঃ ॥9॥

সাম্বং কৌরব্যপুত্রীহরণনিযমিতং সান্ত্বনার্থী কুরূণাং
যাতস্তদ্বাক্যরোষোদ্ধৃতকরিনগরো মোচযামাস রামঃ ।
তে ঘাত্যাঃ পাণ্ডবেযৈরিতি যদুপৃতনাং নামুচস্ত্বং তদানীং
তং ত্বাং দুর্বোধলীলং পবনপুরপতে তাপশান্ত্যৈ নিষেবে ॥10॥