ନାରାଯଣୀଯଂ ଦଶକ 73 - ଶ୍ରୀକୃଷ୍ଣସ୍ଯ ମଥୁରାଯାତ୍ରା

ନିଶମଯ୍ଯ ତଵାଥ ଯାନଵାର୍ତାଂ ଭୃଶମାର୍ତାଃ ପଶୁପାଲବାଲିକାସ୍ତାଃ ।
କିମିଦଂ କିମିଦଂ କଥଂ ନ୍ଵିତୀମାଃ ସମଵେତାଃ ପରିଦେଵିତାନ୍ଯକୁର୍ଵନ୍ ॥1॥

କରୁଣାନିଧିରେଷ ନନ୍ଦସୂନୁଃ କଥମସ୍ମାନ୍ ଵିସୃଜେଦନନ୍ଯନାଥାଃ ।
ବତ ନଃ କିମୁ ଦୈଵମେଵମାସୀଦିତି ତାସ୍ତ୍ଵଦ୍ଗତମାନସା ଵିଲେପୁଃ ॥2॥

ଚରମପ୍ରହରେ ପ୍ରତିଷ୍ଠମାନଃ ସହ ପିତ୍ରା ନିଜମିତ୍ରମଣ୍ଡଲୈଶ୍ଚ ।
ପରିତାପଭରଂ ନିତମ୍ବିନୀନାଂ ଶମଯିଷ୍ଯନ୍ ଵ୍ଯମୁଚଃ ସଖାଯମେକମ୍ ॥3॥

ଅଚିରାଦୁପଯାମି ସନ୍ନିଧିଂ ଵୋ ଭଵିତା ସାଧୁ ମଯୈଵ ସଙ୍ଗମଶ୍ରୀଃ ।
ଅମୃତାମ୍ବୁନିଧୌ ନିମଜ୍ଜଯିଷ୍ଯେ ଦ୍ରୁତମିତ୍ଯାଶ୍ଵସିତା ଵଧୂରକାର୍ଷୀଃ ॥4॥

ସଵିଷାଦଭରଂ ସଯାଚ୍ଞମୁଚ୍ଚୈଃ ଅତିଦୂରଂ ଵନିତାଭିରୀକ୍ଷ୍ଯମାଣଃ ।
ମୃଦୁ ତଦ୍ଦିଶି ପାତଯନ୍ନପାଙ୍ଗାନ୍ ସବଲୋଽକ୍ରୂରରଥେନ ନିର୍ଗତୋଽଭୂଃ ॥5॥

ଅନସା ବହୁଲେନ ଵଲ୍ଲଵାନାଂ ମନସା ଚାନୁଗତୋଽଥ ଵଲ୍ଲଭାନାମ୍ ।
ଵନମାର୍ତମୃଗଂ ଵିଷଣ୍ଣଵୃକ୍ଷଂ ସମତୀତୋ ଯମୁନାତଟୀମଯାସୀଃ ॥6॥

ନିଯମାଯ ନିମଜ୍ଯ ଵାରିଣି ତ୍ଵାମଭିଵୀକ୍ଷ୍ଯାଥ ରଥେଽପି ଗାନ୍ଦିନେଯଃ ।
ଵିଵଶୋଽଜନି କିଂ ନ୍ଵିଦଂ ଵିଭୋସ୍ତେ ନନୁ ଚିତ୍ରଂ ତ୍ଵଵଲୋକନଂ ସମନ୍ତାତ୍ ॥7॥

ପୁନରେଷ ନିମଜ୍ଯ ପୁଣ୍ଯଶାଲୀ ପୁରୁଷଂ ତ୍ଵାଂ ପରମଂ ଭୁଜଙ୍ଗଭୋଗେ ।
ଅରିକମ୍ବୁଗଦାମ୍ବୁଜୈଃ ସ୍ଫୁରନ୍ତଂ ସୁରସିଦ୍ଧୌଘପରୀତମାଲୁଲୋକେ ॥8॥

ସ ତଦା ପରମାତ୍ମସୌଖ୍ଯସିନ୍ଧୌ ଵିନିମଗ୍ନଃ ପ୍ରଣୁଵନ୍ ପ୍ରକାରଭେଦୈଃ ।
ଅଵିଲୋକ୍ଯ ପୁନଶ୍ଚ ହର୍ଷସିନ୍ଧୋରନୁଵୃତ୍ତ୍ଯା ପୁଲକାଵୃତୋ ଯଯୌ ତ୍ଵାମ୍ ॥9॥

କିମୁ ଶୀତଲିମା ମହାନ୍ ଜଲେ ଯତ୍ ପୁଲକୋଽସାଵିତି ଚୋଦିତେନ ତେନ ।
ଅତିହର୍ଷନିରୁତ୍ତରେଣ ସାର୍ଧଂ ରଥଵାସୀ ପଵନେଶ ପାହି ମାଂ ତ୍ଵମ୍ ॥10॥