ନାରାଯଣୀଯଂ ଦଶକ 71 - କେଶୀ ତଥା ଵ୍ଯୋମାସୁରଵଧମ୍

ଯତ୍ନେଷୁ ସର୍ଵେଷ୍ଵପି ନାଵକେଶୀ କେଶୀ ସ ଭୋଜେଶିତୁରିଷ୍ଟବନ୍ଧୁଃ ।
ତ୍ଵାଂ ସିନ୍ଧୁଜାଵାପ୍ଯ ଇତୀଵ ମତ୍ଵା ସମ୍ପ୍ରାପ୍ତଵାନ୍ ସିନ୍ଧୁଜଵାଜିରୂପଃ ॥1॥

ଗନ୍ଧର୍ଵତାମେଷ ଗତୋଽପି ରୂକ୍ଷୈର୍ନାଦୈଃ ସମୁଦ୍ଵେଜିତସର୍ଵଲୋକଃ ।
ଭଵଦ୍ଵିଲୋକାଵଧି ଗୋପଵାଟୀଂ ପ୍ରମର୍ଦ୍ଯ ପାପଃ ପୁନରାପତତ୍ତ୍ଵାମ୍ ॥2॥

ତାର୍କ୍ଷ୍ଯାର୍ପିତାଙ୍ଘ୍ରେସ୍ତଵ ତାର୍କ୍ଷ୍ଯ ଏଷ ଚିକ୍ଷେପ ଵକ୍ଷୋଭୁଵି ନାମ ପାଦମ୍ ।
ଭୃଗୋଃ ପଦାଘାତକଥାଂ ନିଶମ୍ଯ ସ୍ଵେନାପି ଶକ୍ଯଂ ତଦିତୀଵ ମୋହାତ୍ ॥3॥

ପ୍ରଵଞ୍ଚଯନ୍ନସ୍ଯ ଖୁରାଞ୍ଚଲଂ ଦ୍ରାଗମୁଞ୍ଚ ଚିକ୍ଷେପିଥ ଦୂରଦୂରମ୍
ସମ୍ମୂର୍ଚ୍ଛିତୋଽପି ହ୍ଯତିମୂର୍ଚ୍ଛିତେନ କ୍ରୋଧୋଷ୍ମଣା ଖାଦିତୁମାଦ୍ରୁତସ୍ତ୍ଵାମ୍ ॥4॥

ତ୍ଵଂ ଵାହଦଣ୍ଡେ କୃତଧୀଶ୍ଚ ଵାହାଦଣ୍ଡଂ ନ୍ଯଧାସ୍ତସ୍ଯ ମୁଖେ ତଦାନୀମ୍ ।
ତଦ୍ ଵୃଦ୍ଧିରୁଦ୍ଧଶ୍ଵସନୋ ଗତାସୁଃ ସପ୍ତୀଭଵନ୍ନପ୍ଯଯମୈକ୍ଯମାଗାତ୍ ॥5॥

ଆଲମ୍ଭମାତ୍ରେଣ ପଶୋଃ ସୁରାଣାଂ ପ୍ରସାଦକେ ନୂତ୍ନ ଇଵାଶ୍ଵମେଧେ ।
କୃତେ ତ୍ଵଯା ହର୍ଷଵଶାତ୍ ସୁରେନ୍ଦ୍ରାସ୍ତ୍ଵାଂ ତୁଷ୍ଟୁଵୁଃ କେଶଵନାମଧେଯମ୍ ॥6॥

କଂସାଯ ତେ ଶୌରିସୁତତ୍ଵମୁକ୍ତ୍ଵା ତଂ ତଦ୍ଵଧୋତ୍କଂ ପ୍ରତିରୁଧ୍ଯ ଵାଚା।
ପ୍ରାପ୍ତେନ କେଶିକ୍ଷପଣାଵସାନେ ଶ୍ରୀନାରଦେନ ତ୍ଵମଭିଷ୍ଟୁତୋଽଭୂଃ ॥7॥

କଦାପି ଗୋପୈଃ ସହ କାନନାନ୍ତେ ନିଲାଯନକ୍ରୀଡନଲୋଲୁପଂ ତ୍ଵାମ୍ ।
ମଯାତ୍ମଜଃ ପ୍ରାପ ଦୁରନ୍ତମାଯୋ ଵ୍ଯୋମାଭିଧୋ ଵ୍ଯୋମଚରୋପରୋଧୀ ॥8॥

ସ ଚୋରପାଲାଯିତଵଲ୍ଲଵେଷୁ ଚୋରାଯିତୋ ଗୋପଶିଶୂନ୍ ପଶୂଂଶ୍ଚ
ଗୁହାସୁ କୃତ୍ଵା ପିଦଧେ ଶିଲାଭିସ୍ତ୍ଵଯା ଚ ବୁଦ୍ଧ୍ଵା ପରିମର୍ଦିତୋଽଭୂତ୍ ॥9॥

ଏଵଂ ଵିଧୈଶ୍ଚାଦ୍ଭୁତକେଲିଭେଦୈରାନନ୍ଦମୂର୍ଚ୍ଛାମତୁଲାଂ ଵ୍ରଜସ୍ଯ ।
ପଦେ ପଦେ ନୂତନଯନ୍ନସୀମାଂ ପରାତ୍ମରୂପିନ୍ ପଵନେଶ ପାଯାଃ ॥10॥