ନାରାଯଣୀଯଂ ଦଶକ 64 - ଗୋଵିନ୍ଦପଟ୍ଟାଭିଷେକମ୍

ଆଲୋକ୍ଯ ଶୈଲୋଦ୍ଧରଣାଦିରୂପଂ ପ୍ରଭାଵମୁଚ୍ଚୈସ୍ତଵ ଗୋପଲୋକାଃ ।
ଵିଶ୍ଵେଶ୍ଵରଂ ତ୍ଵାମଭିମତ୍ଯ ଵିଶ୍ଵେ ନନ୍ଦଂ ଭଵଜ୍ଜାତକମନ୍ଵପୃଚ୍ଛନ୍ ॥1॥

ଗର୍ଗୋଦିତୋ ନିର୍ଗଦିତୋ ନିଜାଯ ଵର୍ଗାଯ ତାତେନ ତଵ ପ୍ରଭାଵଃ ।
ପୂର୍ଵାଧିକସ୍ତ୍ଵଯ୍ଯନୁରାଗ ଏଷାମୈଧିଷ୍ଟ ତାଵତ୍ ବହୁମାନଭାରଃ ॥2॥

ତତୋଽଵମାନୋଦିତତତ୍ତ୍ଵବୋଧଃ ସୁରାଧିରାଜଃ ସହ ଦିଵ୍ଯଗଵ୍ଯା।
ଉପେତ୍ଯ ତୁଷ୍ଟାଵ ସ ନଷ୍ଟଗର୍ଵଃ ସ୍ପୃଷ୍ଟ୍ଵା ପଦାବ୍ଜଂ ମଣିମୌଲିନା ତେ ॥3॥

ସ୍ନେହସ୍ନୁତୈସ୍ତ୍ଵାଂ ସୁରଭିଃ ପଯୋଭିର୍ଗୋଵିନ୍ଦନାମାଙ୍କିତମଭ୍ଯଷିଞ୍ଚତ୍ ।
ଐରାଵତୋପାହୃତଦିଵ୍ଯଗଙ୍ଗାପାଥୋଭିରିନ୍ଦ୍ରୋଽପି ଚ ଜାତହର୍ଷଃ ॥4॥

ଜଗତ୍ତ୍ରଯେଶେ ତ୍ଵଯି ଗୋକୁଲେଶେ ତଥାଽଭିଷିକ୍ତେ ସତି ଗୋପଵାଟଃ ।
ନାକେଽପି ଵୈକୁଣ୍ଠପଦେଽପ୍ଯଲଭ୍ଯାଂ ଶ୍ରିଯଂ ପ୍ରପେଦେ ଭଵତଃ ପ୍ରଭାଵାତ୍ ॥5॥

କଦାଚିଦନ୍ତର୍ଯମୁନଂ ପ୍ରଭାତେ ସ୍ନାଯନ୍ ପିତା ଵାରୁଣପୂରୁଷେଣ ।
ନୀତସ୍ତମାନେତୁମଗାଃ ପୁରୀଂ ତ୍ଵଂ ତାଂ ଵାରୁଣୀଂ କାରଣମର୍ତ୍ଯରୂପଃ ॥6॥

ସସମ୍ଭ୍ରମଂ ତେନ ଜଲାଧିପେନ ପ୍ରପୂଜିତସ୍ତ୍ଵଂ ପ୍ରତିଗୃହ୍ଯ ତାତମ୍ ।
ଉପାଗତସ୍ତତ୍କ୍ଷଣମାତ୍ମଗେହଂ ପିତାଽଵଦତ୍ତଚ୍ଚରିତଂ ନିଜେଭ୍ଯଃ ॥7॥

ହରିଂ ଵିନିଶ୍ଚିତ୍ଯ ଭଵନ୍ତମେତାନ୍ ଭଵତ୍ପଦାଲୋକନବଦ୍ଧତୃଷ୍ଣାନ୍ ॥
ନିରୀକ୍ଷ୍ଯ ଵିଷ୍ଣୋ ପରମଂ ପଦଂ ତଦ୍ଦୁରାପମନ୍ଯୈସ୍ତ୍ଵମଦୀଦୃଶସ୍ତାନ୍ ॥8॥

ସ୍ଫୁରତ୍ପରାନନ୍ଦରସପ୍ରଵାହପ୍ରପୂର୍ଣକୈଵଲ୍ଯମହାପଯୋଧୌ ।
ଚିରଂ ନିମଗ୍ନାଃ ଖଲୁ ଗୋପସଙ୍ଘାସ୍ତ୍ଵଯୈଵ ଭୂମନ୍ ପୁନରୁଦ୍ଧୃତାସ୍ତେ ॥9॥

କରବଦରଵଦେଵଂ ଦେଵ କୁତ୍ରାଵତାରେ
ନିଜପଦମନଵାପ୍ଯଂ ଦର୍ଶିତଂ ଭକ୍ତିଭାଜାମ୍ ।
ତଦିହ ପଶୁପରୂପୀ ତ୍ଵଂ ହି ସାକ୍ଷାତ୍ ପରାତ୍ମା
ପଵନପୁରନିଵାସିନ୍ ପାହି ମାମାମଯେଭ୍ଯଃ ॥10॥