ନାରାଯଣୀଯଂ ଦଶକ 56 - କାଲିଯଗର୍ଵଶମନଂ ତଥା ଭଗଵଦନୁଗ୍ରହମ୍

ରୁଚିରକମ୍ପିତକୁଣ୍ଡଲମଣ୍ଡଲଃ ସୁଚିରମୀଶ ନନର୍ତିଥ ପନ୍ନଗେ ।
ଅମରତାଡିତଦୁନ୍ଦୁଭିସୁନ୍ଦରଂ ଵିଯତି ଗାଯତି ଦୈଵତଯୌଵତେ ॥1॥

ନମତି ଯଦ୍ଯଦମୁଷ୍ଯ ଶିରୋ ହରେ ପରିଵିହାଯ ତଦୁନ୍ନତମୁନ୍ନତମ୍ ।
ପରିମଥନ୍ ପଦପଙ୍କରୁହା ଚିରଂ ଵ୍ଯହରଥାଃ କରତାଲମନୋହରମ୍ ॥2॥

ତ୍ଵଦଵଭଗ୍ନଵିଭୁଗ୍ନଫଣାଗଣେ ଗଲିତଶୋଣିତଶୋଣିତପାଥସି ।
ଫଣିପତାଵଵସୀଦତି ସନ୍ନତାସ୍ତଦବଲାସ୍ତଵ ମାଧଵ ପାଦଯୋଃ ॥3॥

ଅଯି ପୁରୈଵ ଚିରାଯ ପରିଶ୍ରୁତତ୍ଵଦନୁଭାଵଵିଲୀନହୃଦୋ ହି ତାଃ ।
ମୁନିଭିରପ୍ଯନଵାପ୍ଯପଥୈଃ ସ୍ତଵୈର୍ନୁନୁଵୁରୀଶ ଭଵନ୍ତମଯନ୍ତ୍ରିତମ୍ ॥4॥

ଫଣିଵଧୂଗଣଭକ୍ତିଵିଲୋକନପ୍ରଵିକସତ୍କରୁଣାକୁଲଚେତସା ।
ଫଣିପତିର୍ଭଵତାଽଚ୍ଯୁତ ଜୀଵିତସ୍ତ୍ଵଯି ସମର୍ପିତମୂର୍ତିରଵାନମତ୍ ॥5॥

ରମଣକଂ ଵ୍ରଜ ଵାରିଧିମଧ୍ଯଗଂ ଫଣିରିପୁର୍ନ କରୋତି ଵିରୋଧିତାମ୍ ।
ଇତି ଭଵଦ୍ଵଚନାନ୍ଯତିମାନଯନ୍ ଫଣିପତିର୍ନିରଗାଦୁରଗୈଃ ସମମ୍ ॥6॥

ଫଣିଵଧୂଜନଦତ୍ତମଣିଵ୍ରଜଜ୍ଵଲିତହାରଦୁକୂଲଵିଭୂଷିତଃ ।
ତଟଗତୈଃ ପ୍ରମଦାଶ୍ରୁଵିମିଶ୍ରିତୈଃ ସମଗଥାଃ ସ୍ଵଜନୈର୍ଦିଵସାଵଧୌ ॥7॥

ନିଶି ପୁନସ୍ତମସା ଵ୍ରଜମନ୍ଦିରଂ ଵ୍ରଜିତୁମକ୍ଷମ ଏଵ ଜନୋତ୍କରେ ।
ସ୍ଵପତି ତତ୍ର ଭଵଚ୍ଚରଣାଶ୍ରଯେ ଦଵକୃଶାନୁରରୁନ୍ଧ ସମନ୍ତତଃ ॥8॥

ପ୍ରବୁଧିତାନଥ ପାଲଯ ପାଲଯେତ୍ଯୁଦଯଦାର୍ତରଵାନ୍ ପଶୁପାଲକାନ୍ ।
ଅଵିତୁମାଶୁ ପପାଥ ମହାନଲଂ କିମିହ ଚିତ୍ରମଯଂ ଖଲୁ ତେ ମୁଖମ୍ ॥9॥

ଶିଖିନି ଵର୍ଣତ ଏଵ ହି ପୀତତା ପରିଲସତ୍ଯଧୁନା କ୍ରିଯଯାଽପ୍ଯସୌ ।
ଇତି ନୁତଃ ପଶୁପୈର୍ମୁଦିତୈର୍ଵିଭୋ ହର ହରେ ଦୁରିତୈଃସହ ମେ ଗଦାନ୍ ॥10॥