નારાયણીયં દશક 54 - કાલિયસ્ય કાલિન્દીપ્રાપ્તિઃ તથા વિષબાધા

ત્વત્સેવોત્કસ્સૌભરિર્નામ પૂર્વં
કાલિન્દ્યન્તર્દ્વાદશાબ્દં તપસ્યન્ ।
મીનવ્રાતે સ્નેહવાન્ ભોગલોલે
તાર્ક્ષ્યં સાક્ષાદૈક્ષતાગ્રે કદાચિત્ ॥1॥

ત્વદ્વાહં તં સક્ષુધં તૃક્ષસૂનું
મીનં કઞ્ચિજ્જક્ષતં લક્ષયન્ સઃ ।
તપ્તશ્ચિત્તે શપ્તવાનત્ર ચેત્ત્વં
જન્તૂન્ ભોક્તા જીવિતં ચાપિ મોક્તા ॥2॥

તસ્મિન્ કાલે કાલિયઃ ક્ષ્વેલદર્પાત્
સર્પારાતેઃ કલ્પિતં ભાગમશ્નન્ ।
તેન ક્રોધાત્ત્વત્પદામ્ભોજભાજા
પક્ષક્ષિપ્તસ્તદ્દુરાપં પયોઽગાત્ ॥3॥

ઘોરે તસ્મિન્ સૂરજાનીરવાસે
તીરે વૃક્ષા વિક્ષતાઃ ક્ષ્વેલવેગાત્ ।
પક્ષિવ્રાતાઃ પેતુરભ્રે પતન્તઃ
કારુણ્યાર્દ્રં ત્વન્મનસ્તેન જાતમ્ ॥4॥

કાલે તસ્મિન્નેકદા સીરપાણિં
મુક્ત્વા યાતે યામુનં કાનનાન્તમ્ ।
ત્વય્યુદ્દામગ્રીષ્મભીષ્મોષ્મતપ્તા
ગોગોપાલા વ્યાપિબન્ ક્ષ્વેલતોયમ્ ॥5॥

નશ્યજ્જીવાન્ વિચ્યુતાન્ ક્ષ્માતલે તાન્
વિશ્વાન્ પશ્યન્નચ્યુત ત્વં દયાર્દ્રઃ ।
પ્રાપ્યોપાન્તં જીવયામાસિથ દ્રાક્
પીયૂષામ્ભોવર્ષિભિઃ શ્રીકટક્ષૈઃ ॥6॥

કિં કિં જાતો હર્ષવર્ષાતિરેકઃ
સર્વાઙ્ગેષ્વિત્યુત્થિતા ગોપસઙ્ઘાઃ ।
દૃષ્ટ્વાઽગ્રે ત્વાં ત્વત્કૃતં તદ્વિદન્ત-
સ્ત્વામાલિઙ્ગન્ દૃષ્ટનાનાપ્રભાવાઃ ॥7॥

ગાવશ્ચૈવં લબ્ધજીવાઃ ક્ષણેન
સ્ફીતાનન્દાસ્ત્વાં ચ દૃષ્ટ્વા પુરસ્તાત્ ।
દ્રાગાવવ્રુઃ સર્વતો હર્ષબાષ્પં
વ્યામુઞ્ચન્ત્યો મન્દમુદ્યન્નિનાદાઃ ॥8॥

રોમાઞ્ચોઽયં સર્વતો નઃ શરીરે
ભૂયસ્યન્તઃ કાચિદાનન્દમૂર્છા ।
આશ્ચર્યોઽયં ક્ષ્વેલવેગો મુકુન્દે-
ત્યુક્તો ગોપૈર્નન્દિતો વન્દિતોઽભૂઃ ॥9॥

એવં ભક્તાન્ મુક્તજીવાનપિ ત્વં
મુગ્ધાપાઙ્ગૈરસ્તરોગાંસ્તનોષિ ।
તાદૃગ્ભૂતસ્ફીતકારુણ્યભૂમા
રોગાત્ પાયા વાયુગેહાધિવાસ ॥10॥