નારાયણીયં દશક 50 - વત્સાસુર-બકાસુરયોઃ વધમ્

તરલમધુકૃત્ વૃન્દે વૃન્દાવનેઽથ મનોહરે
પશુપશિશુભિઃ સાકં વત્સાનુપાલનલોલુપઃ ।
હલધરસખો દેવ શ્રીમન્ વિચેરિથ ધારયન્
ગવલમુરલીવેત્રં નેત્રાભિરામતનુદ્યુતિઃ ॥1॥

વિહિતજગતીરક્ષં લક્ષ્મીકરામ્બુજલાલિતં
દદતિ ચરણદ્વન્દ્વં વૃન્દાવને ત્વયિ પાવને ।
કિમિવ ન બભૌ સમ્પત્સમ્પૂરિતં તરુવલ્લરી-
સલિલધરણીગોત્રક્ષેત્રાદિકં કમલાપતે ॥2॥

વિલસદુલપે કાન્તારાન્તે સમીરણશીતલે
વિપુલયમુનાતીરે ગોવર્ધનાચલમૂર્ધસુ ।
લલિતમુરલીનાદઃ સઞ્ચારયન્ ખલુ વાત્સકં
ક્વચન દિવસે દૈત્યં વત્સાકૃતિં ત્વમુદૈક્ષથાઃ ॥3॥

રભસવિલસત્પુચ્છં વિચ્છાયતોઽસ્ય વિલોકયન્
કિમપિ વલિતસ્કન્ધં રન્ધ્રપ્રતીક્ષમુદીક્ષિતમ્ ।
તમથ ચરણે બિભ્રદ્વિભ્રામયન્ મુહુરુચ્ચકૈઃ
કુહચન મહાવૃક્ષે ચિક્ષેપિથ ક્ષતજીવિતમ્ ॥4॥

નિપતતિ મહાદૈત્યે જાત્યા દુરાત્મનિ તત્ક્ષણં
નિપતનજવક્ષુણ્ણક્ષોણીરુહક્ષતકાનને ।
દિવિ પરિમિલત્ વૃન્દા વૃન્દારકાઃ કુસુમોત્કરૈઃ
શિરસિ ભવતો હર્ષાદ્વર્ષન્તિ નામ તદા હરે ॥5॥

સુરભિલતમા મૂર્ધન્યૂર્ધ્વં કુતઃ કુસુમાવલી
નિપતતિ તવેત્યુક્તો બાલૈઃ સહેલમુદૈરયઃ ।
ઝટિતિ દનુજક્ષેપેણોર્ધ્વં ગતસ્તરુમણ્ડલાત્
કુસુમનિકરઃ સોઽયં નૂનં સમેતિ શનૈરિતિ ॥6॥

ક્વચન દિવસે ભૂયો ભૂયસ્તરે પરુષાતપે
તપનતનયાપાથઃ પાતું ગતા ભવદાદયઃ ।
ચલિતગરુતં પ્રેક્ષામાસુર્બકં ખલુ વિસ્મૃતં
ક્ષિતિધરગરુચ્છેદે કૈલાસશૈલમિવાપરમ્ ॥7॥

પિબતિ સલિલં ગોપવ્રાતે ભવન્તમભિદ્રુતઃ
સ કિલ નિગિલન્નગ્નિપ્રખ્યં પુનર્દ્રુતમુદ્વમન્ ।
દલયિતુમગાત્ત્રોટ્યાઃ કોટ્યા તદાઽઽશુ ભવાન્ વિભો
ખલજનભિદાચુઞ્ચુશ્ચઞ્ચૂ પ્રગૃહ્ય દદાર તમ્ ॥8॥

સપદિ સહજાં સન્દ્રષ્ટું વા મૃતાં ખલુ પૂતના-
મનુજમઘમપ્યગ્રે ગત્વા પ્રતીક્ષિતુમેવ વા ।
શમનનિલયં યાતે તસ્મિન્ બકે સુમનોગણે
કિરતિ સુમનોવૃન્દં વૃન્દાવનાત્ ગૃહમૈયથાઃ ॥9॥

લલિતમુરલીનાદં દૂરાન્નિશમ્ય વધૂજનૈ-
સ્ત્વરિતમુપગમ્યારાદારૂઢમોદમુદીક્ષિતઃ ।
જનિતજનનીનન્દાનન્દઃ સમીરણમન્દિર-
પ્રથિતવસતે શૌરે દૂરીકુરુષ્વ મમામયાન્ ॥10॥