ନାରାଯଣୀଯଂ ଦଶକ 45 - ଶ୍ରୀକୃଷ୍ଣସ୍ଯ ବାଲଲୀଲାଃ

ଅଯି ସବଲ ମୁରାରେ ପାଣିଜାନୁପ୍ରଚାରୈଃ
କିମପି ଭଵନଭାଗାନ୍ ଭୂଷଯନ୍ତୌ ଭଵନ୍ତୌ ।
ଚଲିତଚରଣକଞ୍ଜୌ ମଞ୍ଜୁମଞ୍ଜୀରଶିଞ୍ଜା-
ଶ୍ରଵଣକୁତୁକଭାଜୌ ଚେରତୁଶ୍ଚାରୁଵେଗାତ୍ ॥1॥

ମୃଦୁ ମୃଦୁ ଵିହସନ୍ତାଵୁନ୍ମିଷଦ୍ଦନ୍ତଵନ୍ତୌ
ଵଦନପତିତକେଶୌ ଦୃଶ୍ଯପାଦାବ୍ଜଦେଶୌ ।
ଭୁଜଗଲିତକରାନ୍ତଵ୍ଯାଲଗତ୍କଙ୍କଣାଙ୍କୌ
ମତିମହରତମୁଚ୍ଚୈଃ ପଶ୍ଯତାଂ ଵିଶ୍ଵନୃଣାମ୍ ॥2॥

ଅନୁସରତି ଜନୌଘେ କୌତୁକଵ୍ଯାକୁଲାକ୍ଷେ
କିମପି କୃତନିନାଦଂ ଵ୍ଯାହସନ୍ତୌ ଦ୍ରଵନ୍ତୌ ।
ଵଲିତଵଦନପଦ୍ମଂ ପୃଷ୍ଠତୋ ଦତ୍ତଦୃଷ୍ଟୀ
କିମିଵ ନ ଵିଦଧାଥେ କୌତୁକଂ ଵାସୁଦେଵ ॥3॥

ଦ୍ରୁତଗତିଷୁ ପତନ୍ତାଵୁତ୍ଥିତୌ ଲିପ୍ତପଙ୍କୌ
ଦିଵି ମୁନିଭିରପଙ୍କୈଃ ସସ୍ମିତଂ ଵନ୍ଦ୍ଯମାନୌ ।
ଦ୍ରୁତମଥ ଜନନୀଭ୍ଯାଂ ସାନୁକମ୍ପଂ ଗୃହୀତୌ
ମୁହୁରପି ପରିରବ୍ଧୌ ଦ୍ରାଗ୍ଯୁଵାଂ ଚୁମ୍ବିତୌ ଚ ॥4॥

ସ୍ନୁତକୁଚଭରମଙ୍କେ ଧାରଯନ୍ତୀ ଭଵନ୍ତଂ
ତରଲମତି ଯଶୋଦା ସ୍ତନ୍ଯଦା ଧନ୍ଯଧନ୍ଯା ।
କପଟପଶୁପ ମଧ୍ଯେ ମୁଗ୍ଧହାସାଙ୍କୁରଂ ତେ
ଦଶନମୁକୁଲହୃଦ୍ଯଂ ଵୀକ୍ଷ୍ଯ ଵକ୍ତ୍ରଂ ଜହର୍ଷ ॥5॥

ତଦନୁଚରଣଚାରୀ ଦାରକୈସ୍ସାକମାରା-
ନ୍ନିଲଯତତିଷୁ ଖେଲନ୍ ବାଲଚାପଲ୍ଯଶାଲୀ ।
ଭଵନଶୁକଵିଡାଲାନ୍ ଵତ୍ସକାଂଶ୍ଚାନୁଧାଵନ୍
କଥମପି କୃତହାସୈର୍ଗୋପକୈର୍ଵାରିତୋଽଭୂଃ ॥6॥

ହଲଧରସହିତସ୍ତ୍ଵଂ ଯତ୍ର ଯତ୍ରୋପଯାତୋ
ଵିଵଶପତିତନେତ୍ରାସ୍ତତ୍ର ତତ୍ରୈଵ ଗୋପ୍ଯଃ ।
ଵିଗଲିତଗୃହକୃତ୍ଯା ଵିସ୍ମୃତାପତ୍ଯଭୃତ୍ଯା
ମୁରହର ମୁହୁରତ୍ଯନ୍ତାକୁଲା ନିତ୍ଯମାସନ୍ ॥7॥

ପ୍ରତିନଵନଵନୀତଂ ଗୋପିକାଦତ୍ତମିଚ୍ଛନ୍
କଲପଦମୁପଗାଯନ୍ କୋମଲଂ କ୍ଵାପି ନୃତ୍ଯନ୍ ।
ସଦଯଯୁଵତିଲୋକୈରର୍ପିତଂ ସର୍ପିରଶ୍ନନ୍
କ୍ଵଚନ ନଵଵିପକ୍ଵଂ ଦୁଗ୍ଧମପ୍ଯାପିବସ୍ତ୍ଵମ୍ ॥8॥

ମମ ଖଲୁ ବଲିଗେହେ ଯାଚନଂ ଜାତମାସ୍ତା-
ମିହ ପୁନରବଲାନାମଗ୍ରତୋ ନୈଵ କୁର୍ଵେ ।
ଇତି ଵିହିତମତିଃ କିଂ ଦେଵ ସନ୍ତ୍ଯଜ୍ଯ ଯାଚ୍ଞାଂ
ଦଧିଘୃତମହରସ୍ତ୍ଵଂ ଚାରୁଣା ଚୋରଣେନ ॥9॥

ତଵ ଦଧିଘୃତମୋଷେ ଘୋଷଯୋଷାଜନାନା-
ମଭଜତ ହୃଦି ରୋଷୋ ନାଵକାଶଂ ନ ଶୋକଃ ।
ହୃଦଯମପି ମୁଷିତ୍ଵା ହର୍ଷସିନ୍ଧୌ ନ୍ଯଧାସ୍ତ୍ଵଂ
ସ ମମ ଶମଯ ରୋଗାନ୍ ଵାତଗେହାଧିନାଥ ॥10॥

ଶାଖାଗ୍ରେ ଵିଧୁଂ ଵିଲୋକ୍ଯ ଫଲମିତ୍ଯ୍ମ୍ବାଂ ଚ ତାତଂ ମୁହୁଃ
ସମ୍ପ୍ରାର୍ଥ୍ଯାଥ ତଦା ତଦୀଯଵଚସା ପ୍ରୋତ୍କ୍ଷିପ୍ତବାହୌ ତ୍ଵଯି।
ଚିତ୍ରଂ ଦେଵ ଶଶୀ ସ ତେ କର୍ମଗାତ୍ କିଂ ବ୍ରୂମହେ ସମ୍ପତଃ
ଜ୍ଯୋତିର୍ମଣ୍ଡଲପୂରିତାଖିଲଵପୁଃ ପ୍ରାଗା ଵିରାଡ୍ରୂପତାମ୍ ॥ 11॥

କିଂ କିଂ ବତେଦମିତି ସମ୍ଭ୍ରମ ଭାଜମେନଂ
ବ୍ରହ୍ମାର୍ଣଵେ କ୍ଷଣମମୁଂ ପରିମଜ୍ଜ୍ଯ ତାତମ୍ ।
ମାଯାଂ ପୁନସ୍ତନଯ-ମୋହମଯୀଂ ଵିତନ୍ଵନ୍
ଆନନ୍ଦଚିନ୍ମଯ ଜଗନ୍ମଯ ପାହି ରୋଗାତ୍ ॥12॥