নারাযণীযং দশক 42 - শকটাসুরবধম্

কদাপি জন্মর্ক্ষদিনে তব প্রভো নিমন্ত্রিতজ্ঞাতিবধূমহীসুরা ।
মহানসস্ত্বাং সবিধে নিধায সা মহানসাদৌ ববৃতে ব্রজেশ্বরী ॥1॥

ততো ভবত্ত্রাণনিযুক্তবালকপ্রভীতিসঙ্ক্রন্দনসঙ্কুলারবৈঃ ।
বিমিশ্রমশ্রাবি ভবত্সমীপতঃ পরিস্ফুটদ্দারুচটচ্চটারবঃ ॥2॥

ততস্তদাকর্ণনসম্ভ্রমশ্রমপ্রকম্পিবক্ষোজভরা ব্রজাঙ্গনাঃ ।
ভবন্তমন্তর্দদৃশুস্সমন্ততো বিনিষ্পতদ্দারুণদারুমধ্যগম্ ॥3॥

শিশোরহো কিং কিমভূদিতি দ্রুতং প্রধাব্য নন্দঃ পশুপাশ্চ ভূসুরাঃ ।
ভবন্তমালোক্য যশোদযা ধৃতং সমাশ্বসন্নশ্রুজলার্দ্রলোচনাঃ ॥4॥

কস্কো নু কৌতস্কুত এষ বিস্মযো বিশঙ্কটং যচ্ছকটং বিপাটিতম্ ।
ন কারণং কিঞ্চিদিহেতি তে স্থিতাঃ স্বনাসিকাদত্তকরাস্ত্বদীক্ষকাঃ ॥5॥

কুমারকস্যাস্য পযোধরার্থিনঃ প্ররোদনে লোলপদাম্বুজাহতম্ ।
মযা মযা দৃষ্টমনো বিপর্যগাদিতীশ তে পালকবালকা জগুঃ ॥6॥

ভিযা তদা কিঞ্চিদজানতামিদং কুমারকাণামতিদুর্ঘটং বচঃ ।
ভবত্প্রভাবাবিদুরৈরিতীরিতং মনাগিবাশঙ্ক্যত দৃষ্টপূতনৈঃ ॥7॥

প্রবালতাম্রং কিমিদং পদং ক্ষতং সরোজরম্যৌ নু করৌ বিরোজিতৌ।
ইতি প্রসর্পত্করুণাতরঙ্গিতাস্ত্বদঙ্গমাপস্পৃশুরঙ্গনাজনাঃ ॥8॥

অযে সুতং দেহি জগত্পতেঃ কৃপাতরঙ্গপাতাত্পরিপাতমদ্য মে ।
ইতি স্ম সঙ্গৃহ্য পিতা ত্বদঙ্গকং মুহুর্মুহুঃ শ্লিষ্যতি জাতকণ্টকঃ ॥9॥

অনোনিলীনঃ কিল হন্তুমাগতঃ সুরারিরেবং ভবতা বিহিংসিতঃ ।
রজোঽপি নো দৃষ্টমমুষ্য তত্কথং স শুদ্ধসত্ত্বে ত্বযি লীনবান্ ধ্রুবম্ ॥10॥

প্রপূজিতৈস্তত্র ততো দ্বিজাতিভির্বিশেষতো লম্ভিতমঙ্গলাশিষঃ ।
ব্রজং নিজৈর্বাল্যরসৈর্বিমোহযন্ মরুত্পুরাধীশ রুজাং জহীহি মে ॥11॥