ନାରାଯଣୀଯଂ ଦଶକ 4 - ଯୋଗାଭ୍ଯାସଃ ତଥା ଯୋଗସିଦ୍ଧିଃ

କଲ୍ଯତାଂ ମମ କୁରୁଷ୍ଵ ତାଵତୀଂ କଲ୍ଯତେ ଭଵଦୁପାସନଂ ଯଯା ।
ସ୍ପଷ୍ଟମଷ୍ଟଵିଧଯୋଗଚର୍ଯଯା ପୁଷ୍ଟଯାଶୁ ତଵ ତୁଷ୍ଟିମାପ୍ନୁଯାମ୍ ॥1॥

ବ୍ରହ୍ମଚର୍ଯଦୃଢତାଦିଭିର୍ଯମୈରାପ୍ଲଵାଦିନିଯମୈଶ୍ଚ ପାଵିତାଃ ।
କୁର୍ମହେ ଦୃଢମମୀ ସୁଖାସନଂ ପଙ୍କଜାଦ୍ଯମପି ଵା ଭଵତ୍ପରାଃ ॥2॥

ତାରମନ୍ତରନୁଚିନ୍ତ୍ଯ ସନ୍ତତଂ ପ୍ରାଣଵାଯୁମଭିଯମ୍ଯ ନିର୍ମଲାଃ ।
ଇନ୍ଦ୍ରିଯାଣି ଵିଷଯାଦଥାପହୃତ୍ଯାସ୍ମହେ ଭଵଦୁପାସନୋନ୍ମୁଖାଃ ॥3॥

ଅସ୍ଫୁଟେ ଵପୁଷି ତେ ପ୍ରଯତ୍ନତୋ ଧାରଯେମ ଧିଷଣାଂ ମୁହୁର୍ମୁହୁଃ ।
ତେନ ଭକ୍ତିରସମନ୍ତରାର୍ଦ୍ରତାମୁଦ୍ଵହେମ ଭଵଦଙ୍ଘ୍ରିଚିନ୍ତକା ॥4॥

ଵିସ୍ଫୁଟାଵଯଵଭେଦସୁନ୍ଦରଂ ତ୍ଵଦ୍ଵପୁଃ ସୁଚିରଶୀଲନାଵଶାତ୍ ।
ଅଶ୍ରମଂ ମନସି ଚିନ୍ତଯାମହେ ଧ୍ଯାନଯୋଗନିରତାସ୍ତ୍ଵଦାଶ୍ରଯାଃ ॥5॥

ଧ୍ଯାଯତାଂ ସକଲମୂର୍ତିମୀଦୃଶୀମୁନ୍ମିଷନ୍ମଧୁରତାହୃତାତ୍ମନାମ୍ ।
ସାନ୍ଦ୍ରମୋଦରସରୂପମାନ୍ତରଂ ବ୍ରହ୍ମ ରୂପମଯି ତେଽଵଭାସତେ ॥6॥

ତତ୍ସମାସ୍ଵଦନରୂପିଣୀଂ ସ୍ଥିତିଂ ତ୍ଵତ୍ସମାଧିମଯି ଵିଶ୍ଵନାଯକ ।
ଆଶ୍ରିତାଃ ପୁନରତଃ ପରିଚ୍ଯୁତାଵାରଭେମହି ଚ ଧାରଣାଦିକମ୍ ॥7॥

ଇତ୍ଥମଭ୍ଯସନନିର୍ଭରୋଲ୍ଲସତ୍ତ୍ଵତ୍ପରାତ୍ମସୁଖକଲ୍ପିତୋତ୍ସଵାଃ ।
ମୁକ୍ତଭକ୍ତକୁଲମୌଲିତାଂ ଗତାଃ ସଞ୍ଚରେମ ଶୁକନାରଦାଦିଵତ୍ ॥8॥

ତ୍ଵତ୍ସମାଧିଵିଜଯେ ତୁ ଯଃ ପୁନର୍ମଙ୍କ୍ଷୁ ମୋକ୍ଷରସିକଃ କ୍ରମେଣ ଵା ।
ଯୋଗଵଶ୍ଯମନିଲଂ ଷଡାଶ୍ରଯୈରୁନ୍ନଯତ୍ଯଜ ସୁଷୁମ୍ନଯା ଶନୈଃ ॥9॥

ଲିଙ୍ଗଦେହମପି ସନ୍ତ୍ଯଜନ୍ନଥୋ ଲୀଯତେ ତ୍ଵଯି ପରେ ନିରାଗ୍ରହଃ ।
ଊର୍ଧ୍ଵଲୋକକୁତୁକୀ ତୁ ମୂର୍ଧତଃ ସାର୍ଧମେଵ କରଣୈର୍ନିରୀଯତେ ॥10॥

ଅଗ୍ନିଵାସରଵଲର୍କ୍ଷପକ୍ଷଗୈରୁତ୍ତରାଯଣଜୁଷା ଚ ଦୈଵତୈଃ ।
ପ୍ରାପିତୋ ରଵିପଦଂ ଭଵତ୍ପରୋ ମୋଦଵାନ୍ ଧ୍ରୁଵପଦାନ୍ତମୀଯତେ ॥11॥

ଆସ୍ଥିତୋଽଥ ମହରାଲଯେ ଯଦା ଶେଷଵକ୍ତ୍ରଦହନୋଷ୍ମଣାର୍ଦ୍ଯତେ ।
ଈଯତେ ଭଵଦୁପାଶ୍ରଯସ୍ତଦା ଵେଧସଃ ପଦମତଃ ପୁରୈଵ ଵା ॥12॥

ତତ୍ର ଵା ତଵ ପଦେଽଥଵା ଵସନ୍ ପ୍ରାକୃତପ୍ରଲଯ ଏତି ମୁକ୍ତତାମ୍ ।
ସ୍ଵେଚ୍ଛଯା ଖଲୁ ପୁରା ଵିମୁଚ୍ଯତେ ସଂଵିଭିଦ୍ଯ ଜଗଦଣ୍ଡମୋଜସା ॥13॥

ତସ୍ଯ ଚ କ୍ଷିତିପଯୋମହୋଽନିଲଦ୍ଯୋମହତ୍ପ୍ରକୃତିସପ୍ତକାଵୃତୀଃ ।
ତତ୍ତଦାତ୍ମକତଯା ଵିଶନ୍ ସୁଖୀ ଯାତି ତେ ପଦମନାଵୃତଂ ଵିଭୋ ॥14॥

ଅର୍ଚିରାଦିଗତିମୀଦୃଶୀଂ ଵ୍ରଜନ୍ ଵିଚ୍ଯୁତିଂ ନ ଭଜତେ ଜଗତ୍ପତେ ।
ସଚ୍ଚିଦାତ୍ମକ ଭଵତ୍ ଗୁଣୋଦଯାନୁଚ୍ଚରନ୍ତମନିଲେଶ ପାହି ମାମ୍ ॥15॥