ନାରାଯଣୀଯଂ ଦଶକ 38 - ଶ୍ରୀକୃଷ୍ଣାଵତାରମ୍

ଆନନ୍ଦରୂପ ଭଗଵନ୍ନଯି ତେଽଵତାରେ
ପ୍ରାପ୍ତେ ପ୍ରଦୀପ୍ତଭଵଦଙ୍ଗନିରୀଯମାଣୈଃ ।
କାନ୍ତିଵ୍ରଜୈରିଵ ଘନାଘନମଣ୍ଡଲୈର୍ଦ୍ଯା-
ମାଵୃଣ୍ଵତୀ ଵିରୁରୁଚେ କିଲ ଵର୍ଷଵେଲା ॥1॥

ଆଶାସୁ ଶୀତଲତରାସୁ ପଯୋଦତୋଯୈ-
ରାଶାସିତାପ୍ତିଵିଵଶେଷୁ ଚ ସଜ୍ଜନେଷୁ ।
ନୈଶାକରୋଦଯଵିଧୌ ନିଶି ମଧ୍ଯମାଯାଂ
କ୍ଲେଶାପହସ୍ତ୍ରିଜଗତାଂ ତ୍ଵମିହାଵିରାସୀଃ ॥2॥

ବାଲ୍ଯସ୍ପୃଶାଽପି ଵପୁଷା ଦଧୁଷା ଵିଭୂତୀ-
ରୁଦ୍ଯତ୍କିରୀଟକଟକାଙ୍ଗଦହାରଭାସା ।
ଶଙ୍ଖାରିଵାରିଜଗଦାପରିଭାସିତେନ
ମେଘାସିତେନ ପରିଲେସିଥ ସୂତିଗେହେ ॥3॥

ଵକ୍ଷଃସ୍ଥଲୀସୁଖନିଲୀନଵିଲାସିଲକ୍ଷ୍ମୀ-
ମନ୍ଦାକ୍ଷଲକ୍ଷିତକଟାକ୍ଷଵିମୋକ୍ଷଭେଦୈଃ ।
ତନ୍ମନ୍ଦିରସ୍ଯ ଖଲକଂସକୃତାମଲକ୍ଷ୍ମୀ-
ମୁନ୍ମାର୍ଜଯନ୍ନିଵ ଵିରେଜିଥ ଵାସୁଦେଵ ॥4॥

ଶୌରିସ୍ତୁ ଧୀରମୁନିମଣ୍ଡଲଚେତସୋଽପି
ଦୂରସ୍ଥିତଂ ଵପୁରୁଦୀକ୍ଷ୍ଯ ନିଜେକ୍ଷଣାଭ୍ଯାମ୍ ॥
ଆନନ୍ଦଵାଷ୍ପପୁଲକୋଦ୍ଗମଗଦ୍ଗଦାର୍ଦ୍ର-
ସ୍ତୁଷ୍ଟାଵ ଦୃଷ୍ଟିମକରନ୍ଦରସଂ ଭଵନ୍ତମ୍ ॥5॥

ଦେଵ ପ୍ରସୀଦ ପରପୂରୁଷ ତାପଵଲ୍ଲୀ-
ନିର୍ଲୂନଦାତ୍ରସମନେତ୍ରକଲାଵିଲାସିନ୍ ।
ଖେଦାନପାକୁରୁ କୃପାଗୁରୁଭିଃ କଟାକ୍ଷୈ-
ରିତ୍ଯାଦି ତେନ ମୁଦିତେନ ଚିରଂ ନୁତୋଽଭୂଃ ॥6॥

ମାତ୍ରା ଚ ନେତ୍ରସଲିଲାସ୍ତୃତଗାତ୍ରଵଲ୍ଯା
ସ୍ତୋତ୍ରୈରଭିଷ୍ଟୁତଗୁଣଃ କରୁଣାଲଯସ୍ତ୍ଵମ୍ ।
ପ୍ରାଚୀନଜନ୍ମଯୁଗଲଂ ପ୍ରତିବୋଧ୍ଯ ତାଭ୍ଯାଂ
ମାତୁର୍ଗିରା ଦଧିଥ ମାନୁଷବାଲଵେଷମ୍ ॥7॥

ତ୍ଵତ୍ପ୍ରେରିତସ୍ତଦନୁ ନନ୍ଦତନୂଜଯା ତେ
ଵ୍ଯତ୍ଯାସମାରଚଯିତୁଂ ସ ହି ଶୂରସୂନୁଃ ।
ତ୍ଵାଂ ହସ୍ତଯୋରଧୃତ ଚିତ୍ତଵିଧାର୍ଯମାର୍ଯୈ-
ରମ୍ଭୋରୁହସ୍ଥକଲହଂସକିଶୋରରମ୍ଯମ୍ ॥8॥

ଜାତା ତଦା ପଶୁପସଦ୍ମନି ଯୋଗନିଦ୍ରା ।
ନିଦ୍ରାଵିମୁଦ୍ରିତମଥାକୃତ ପୌରଲୋକମ୍ ।
ତ୍ଵତ୍ପ୍ରେରଣାତ୍ କିମିଵ ଚିତ୍ରମଚେତନୈର୍ଯଦ୍-
ଦ୍ଵାରୈଃ ସ୍ଵଯଂ ଵ୍ଯଘଟି ସଙ୍ଘଟିତୈଃ ସୁଗାଢମ୍ ॥9॥

ଶେଷେଣ ଭୂରିଫଣଵାରିତଵାରିଣାଽଥ
ସ୍ଵୈରଂ ପ୍ରଦର୍ଶିତପଥୋ ମଣିଦୀପିତେନ ।
ତ୍ଵାଂ ଧାରଯନ୍ ସ ଖଲୁ ଧନ୍ଯତମଃ ପ୍ରତସ୍ଥେ
ସୋଽଯଂ ତ୍ଵମୀଶ ମମ ନାଶଯ ରୋଗଵେଗାନ୍ ॥10॥